Display Style:
Column Style
येँ महानरया मेयर बिद्यासुन्दर शाक्यं वडा न १० निरीक्षण
सुरेन्द्रभक्त श्रेष्ठ | पोहेलाथ्व चतुर्दशी ११४० –जनवरी ९ २०२०)
येँँ महानगरपालिकाया मेयर विद्यासुन्दर शाक्यं महानगर दुने जुयाच्वंगु विकास निर्माण व सेवा प्रवाहया स्थलगत अनुगमनयात निरन्तरता बियाच्वंगु दुु ।
थथेहे मेयर शाक्यं वडा नम्बर ७, ९, १६ व २६ या स्थलगत अनुगमन याये धुकुगु दुसा वडा नम्बर १० वना थीथी थासय् स्थलगत अनुगमन न याउगु दु ।
मेयर शाक्यं थः निर्वाचित जुइ धुका नीदँया दुने वडा वडाय् गुकथं विकास निर्माण व ज्या जुयाच्वंगु प्रत्यक्ष जानकारी कायेगु लागि अनुगमन याना वयाच्वंगु खः ।
येँ महानगरया मेयर शाक्यं वडा १० या वडाध्यक्ष रामकुमार केसी, वडा सदस्यपिं सतिस तण्डुकार, सुनिता भित्रकोटी, रोहिनी श्रेष्ठ नाप बुद्धनगर, नयाँ बानेश्वर, गंगादेवी मन्दिर, सहभागिता मार्ग, पुजा–प्रतिष्ठान मार्ग, युएन पार्कय् निरिक्षण यानादिगु खः ।
मेयर शाक्यं ‘येँ महानगर दुने जुयाच्वंगु ज्याया अवलोकन नाप बाँकी दुगु ज्याया कार्ययोजना दयेका योजनाबद्ध रुपं न्ह्यने वनेत थःम्ह प्रत्येक वडाय् निरिक्षण यानागु खः धका धयादिगु खः’ बुद्धनगरया स्थानीय मतदाता नापलाना मेयर शाक्यं ‘एकीकृत विकाश यायेगु लागि जनताया चाहना कथं थःपिं लगे न्ह्यावनाच्वनागु दु धका धयादिसे गन गन मेलम्ची लः हयेगु लागि सडक विभागं गाः म्हुयाच्वगुया कारणं समस्या जुयाच्वंगु धका न धयादिगु खः ।’
मेयर शाक्यं ‘वडा नम्बर–१० या लागि थुगु आर्थिक दँ दुने जक तीन करोडया वजेत विनियोजन यानागु दु धका धयादिसे, ‘हाकन थप एक करोड ५० लाखया ब्यवस्या यानागु दु धयादिगु खः । अथेहे मेयर शाक्यले सिद्धेश्वर महादेव द्यया न्ह्यने निखा छेँय् सतक मिचे याना दयेकुगयात तत्काल हटे यायेत वडा सदस्ययात निर्देशन बियादिगु खः ।
वडा सदस्य सतिस तण्डुकारं नगर प्रहरी लगे याना तत्काल हटे यायेगु प्रतिवद्धता व्यक्त यानादिगुु खःसा वडा सदस्य तण्डुकारं वडा–१० या दुने करीब १ सय ३२ रोपनी सार्वजनिक जग्गा दुगु आः १२–१५ रोपनी जक पत्ता लगे जुगु दु धयादिसे दक्को सार्वजनिक जग्गा मालेगु ज्या जुयाच्वंगु न कनादिगु खः ।
परियत्ति शिक्षायात मनपाया ग्वाहालि
लहनान्युज | पोहेलाथ्व एकादशी ११४० (जनवरी ६ २०२०)
येँ महानगरपालिकां बौद्ध परियत्ति शिक्षा प्रवद्र्धनया लागिं आर्थिक ग्वाहालि लःल्हाःगु दु । आइतवाः येँया विश्वशान्ति विहारय् जूगु जूगु छगू ज्याझ्वःया दथुइ येँ महानगरपालिकाया मेयर भाजु विद्यासुन्दरं परियत्ति शिक्षा सञ्चालन याना वयाच्वंगु निकाय अखिल नेपाल भिक्षु महासंघया नायः भिक्षु मैत्री महास्थविरयात २३ लाख ६५ हजार तकाया चेक लःल्हानादिल ।
ज्याझ्वलय् न्ववासें मेयर शाक्यं भगवान बुद्धया आधारभूत परियत्ति शिक्षायात येँ महानगरपालिका अन्तर्गत लाःगु स्कूलय् नं नैतिक शिक्षाया रुपय् समावेश याना यंकेमाःगु खँय् बः बियादिल । परियत्ति शिक्षायात बियागु थ्व ग्वाहालि शुरुवात जक खः धासें वय्कलं लिपा थुकियात बढे यानाः यंके फइगु खँ नं कनादिल ।
अखिल नेपाल भिक्षु महासंघया नायः भिक्षु मैत्री महास्थविरया सभापतित्वय् जूगु उगु ज्याझ्वलय् अनगारिका ञाणवति गुरुमांनं परियत्ति शिक्षाया महत्व बारे कनाबिज्याःगु खःसा परियत्ति शिक्षाया परीक्षा नियन्त्रक भिक्षु वोधिज्ञान महास्थविरं मनपाया थ्व ग्वाहालिपाखें परियत्ति शिक्षाया विस्तारय् तःधंगु ग्वाहालि जुइगु खँ कनादिल ।
थौंकन्हय् नेपाःन्यंकं २२ गू जिल्लाय् ११४ गू परियत्ति शिक्षा केन्द्र सञ्चालन जुयाच्वंगु दुसा दँय् न्याद्वः परिक्षार्थीपिंसं थुकिया परीक्षा बीगु यानाच्वंगु दु । कपिलवस्तु जिल्लाया देवदह नगरपालिकां थौंकन्ह थःगु नगर अन्तर्गत लाःगु फुक्क हे स्कूलय् ६, ७ व ८ तगिमय् नैतिक शिक्षाया रुपय् परियत्ति शिक्षा ब्वंकेगु यानाच्वंगु दु ।
मेलम्चीइ मिखाया शल्यक्रिया ज्याझ्वः
बाबुकाजी श्रेष्ठ | पोहेलाथ्व एकादशी ११४० (जनवरी ६ २०२०ं
सिन्धुपाल्चोकया मेलम्ची नगरपालिका, तिलगंगा सामुदायिक आँखा केन्द्रया परिसरय् बृहत स्वास्थ्य शिविर जुल ।
वंगु पौष ४ गतेनिसें स्वास्थ्य चौकी दुवाचौर, एकीकृत स्वास्थ्य सेवा केन्द्र पिपले, ईन्द्रावती जनसेवा समिति टिपेणी, हेलम्बू गाउँपालिका किउल, चिलाउनेघारी स्वास्थ्य केन्द्र हेलम्बू, स्वास्थ्य चौकी तीनधरे बाडे गाउँ, स्वास्थ्य चौकी सिपाघाट यानाः च्यागू थासय् मिखाया परीक्षण शिविर न्ह्याकूगु खः ।
थ्व हे झ्वलय् शल्यक्रिया याय्माःमिपिं मोतियाविन्दु ल्वगिपिं ११५म्हेसिगु तिलगंगा आँखा प्रतिष्ठानया वरिष्ठ मिखा ल्वय्या विशेषज्ञ डा. सृजना अधिकारींया नेतृत्वय् सफल शल्यक्रिया जूगु खः ।
ज्याझ्वलय् बृहत स्वास्थ्य शिविर यासें मस्तय्गु ल्वय्, जनरल, छातीलिसें गंल्वय्, हाडजोर्नी व खै परीक्षण यानाः वासः नं सितिकं इनेगु ज्या जूगु खः । थ्व हे झ्वलय् शारीरिककथं अशक्त जूपिं ५गू थान ह्विलचियर नं लःल्हाय्गु ज्या जूगु खः ।
सक्वय् श्री माधवनारायण मेला न्ह्याइगु
लहनान्युज | पोहेलाथ्व एकादशी ११४० (जनवरी ६ २०२०ं
नेवाःतय्गु ऐतिहासिक वस्ती सक्वय् दँय्दसं थें श्री माधवनारायण स्वस्थानी ब्रतलिसें माघ कुम्भ मेला थ्व हे पौष २५गते निसें न्ह्याइगु जूगु दु ।
श्री माधवनारायण स्वस्थानी ब्रत तथा शालीनदी सुधार समितिं वंगु सञ्चरवाः छगू पत्रकार सम्मेलन यानाः उगु मेलाया व्यवस्थापन पक्ष फुक्कं तयारी जुइधुंकूगु जानकारी ब्यूगु दु ।
समितिया निवर्तमान नायः राजुभाइ मानन्धरं थगुने थ्यंमथ्यं स्वीगू लख भक्तजनपिं दर्शन याःवःगुलिं उकियात ध्यानय् तयाः लँ दय्केगुलिसें ७५गू प्रतिशत लँ पीच जुइधुंकूगुलिं थुगुसी अप्वः भक्तजनपिं वइगु अपेक्षा यानादीगु दु ।
सम्मेलनय् शंखरापुर नगरपालिकाया प्रमुख सुवर्ण श्रेष्ठं मेलाया नितिं शान्ति सुरक्षा, स्वास्थ्य, सार्वजनिक यातायातया व्यवस्थापनया तयारी पूवनेधुंकूगु जानकारी बियादिल । वय्कलं छुं छुं थासय् लँ मछिनाच्वंगुलिं उगु थासय् अल्पकालीनकथं जूसां लँ दय्काः भक्तजनपिन्त अःपुकेगु नितिं तीब्र गतिं ज्या यानाच्वंगु धयादिल ।
तसकं थाकुगुकथं कयातःगु थुगु स्वस्थानी ब्रतय् ब्रत च्वनीपिनिगु नितिं विशेष व्यवस्था यासें पुजाज्वलं, च्वनेगु थाय्, म्वः ल्हुइगु, चःविनिसें भक्तजनपिन्त होटलं यःयःथे धेबा काःगुलिं उकियात
ध्यानय् तयाः होटल, खाजाघरय् अनिवार्यकथं मूल्यसूची तय्माःगु व उकिया अनुगमन याइगु नं समितिं जानकारी ब्यूगु दु ।
थ्व हे झ्वलय् शालीनदी क्षेत्रय् प्यंगु शंखाकारया पुखू व स्तम्भलिसेंया व्यवस्थित पार्क दय्कीगु नं जानकारी ब्यूगु दु ।
वँय् सु ? नाटक सफू पितब्बज्या
नृपेन्द्रलाल श्रेष्ठ | पोहेलाथ्व सप्तमी ११४० –जनवरी २ २०२०)
मेरो साप्ताहिक पत्रिकाया ग्वसालय् पत्रकार रत्नकाजी ‘मन’ या नाटक मुना सफू ‘वँय् सु ?’ येँ महानगरपालिकाया मेयर विद्या सुन्दर शाक्यं छगु ज्याझ्वः दथुइ पितब्वज्या यानादीगु दु ।
च्वमि रत्नकाजी ‘मन’या सभानायःसुइ तेज महर्जनं न्ह्याकादीगु ज्याझ्वलय् विजय सिंह लसकुस न्वचू तयादिलसा नेवाः मिडिया क्लबया नायः सन्त कुमार महर्जनं सफूया समालोचना यानादीगु खः ।
अथेहे उगु ज्याझ्वलय् विशेष पाहाँकथं च्वमिंया मां रत्न देवी महर्जन व अबु भाइकाजी महर्जन, येँ मनपा १८ वडाध्यक्ष न्हुच्छेकाजी महर्जन, १५ वडाध्यक्ष ईश्वरमान डंगोल, नेवाः पत्रकार राष्ट्रिय दबूया केन्द्रीय नायः सुरजवीर बज्राचार्य व येँया नायः अरबिन्द्र मान सि झायादीगु खः ।
