Display Style:
Column Style
भारतय् निर्यात याइगु कृषि वस्तुखय् ५ प्रतिशत नगद अनुदान
लहनान्युज | दिल्लागा सप्तमी ११३९ (जुलाई २४ २०१९)
सरकारं निर्यात अनुदान सम्बन्धि कार्यविधि संशोधन याना भारतंय् निर्यात याइगु कृषि वस्तुखय् याना ५ प्रतिशत नगद अनुदान बिइगु व्यवस्था याःगु दु । थ्वः स्वया न्ह्यः तेस्रो देशं निर्यात जूइगु कृषिजन्य उत्पादनय् जक निर्यात बिइगु व्यवस्था दुगु खः ।
न्हुगु व्यवस्था लिपा नेपालपाखें भारतय् प्रशोधित हलू, तरकारी, प्रशोधित चिया व कफी, स्वां, प्रशोधित मह, प्रशोधित अलैंची नाप प्रशोधित पालुवा लगायतया वस्तु निर्यातय् न्यागु प्रतिशत नगद दइगु याःगु खः । राजपत्रय् सूचं प्रकाशित याना उद्योग, बाणिज्य तथा आपूर्ति मन्त्रालयं भारतपाखे कृषि वस्तु निर्यातय् तक नगद अनुदान बिइगु व्यवस्था याःगु खः ।
थुगु संशोधनं निर्यातय् नगद अनुदान दइगु निर्यात मूलक वस्तुखय् सूचियात थप विस्तार याना ५० प्रतिशत मूल्य अभिवृद्धि यायेगु २७ गु वस्तुखय् ५ प्रतिशत नगद अनुदान दइगु व्यवस्था याःगु दु । थ्व स्वया न्ह्यः १५ गु वस्तुखय् निर्यातय् ५ प्रतिशत नगद अनुदान व १२ गु वस्तुखय् निर्यातय् ३ प्रतिशत नगद अनुदान बिइगु व्यवस्था दु ।
कार्यविधि कथं प्रशोधित चिया, प्रशोधित कफी, हस्तकला व काष्ठकला, प्रशोधित छ्यगु व छ्यगुजन्य वस्तु, प्रशोधित जडीबुटी व सारयुक्त चिकं, मिनिरल वाटर, प्रशोधित पत्थर व पत्थर जडित तिसा, प्रशोधित हलू, तरकारी, स्वां, प्रशोधित मह, प्रशोधित अलैँची व प्रशोधित पालू निर्यातय् ५ प्रतिशत नगद अनुदान उपलब्ध जुइगु खः।
त्यस्तै, स्वदेशमा उत्पादित कपडा, तयारी पोसाक, गलैँचा र ऊनीका पोसाक, च्यांग्रा, पस्मिना तथा त्यसका उत्पादन, सुन(चाँदीका गरगहना, प्रशोधित जुट तथा त्यसका उत्पादन, अर्द्धप्रशोधित छाला, औषधि, फेल्ट, पोलिस्टार(कटन(फाइबर यार्न र तामाका सामानको निर्यातमा ३ प्रतिशत नगद अनुदान दिइने छ ।
सफू ब्बज्या जुइगु
लहनान्युज | दिल्लागा सप्तमी ११३९ (जुलाई २४ २०१९)
नेपालभाषा एकेदेमिया ग्वसालय् दँय् दँसं थें थुगुसी नं तःजिक सफू ब्वज्या जुइगु खँ सफू ब्वज्याया कजि बिजयरत्न असंबरे लहनान्युजयात जानकारी ब्यूगु दु । थुग ज्याझ्वः वःगु प्यदँ न्ह्यःनिसें न्ह्याकावया च्वंगु खः ।
थुगु सफू ब्वज्या थ्वः हे वइगु गुँलाथ्व नवमिनिसें एकादसि (श्रावण २४ निसें २६ गते) तक स्वन्हुयंकं जुइगु उगु सफू ब्बज्या यलया ज्यावलाख्यःया तमकःद्यः (उग्रचण्डी) परिसरय् जुइगु त्यःगु खः ।
थुगुसी सफू ब्वज्याया नापनापं नेपालभाषा संकिपा ख्यःयात कयाः नं छगू विचार गोष्ठी जुइगु खँ नं ग्वसाः खलः नेपालभाषा एकेदेमिं जानकारी ब्यूगु दु । नेपालभाषा संकिपा ख्यःयात कया जुइत्यंगु थ्व विचाः गोष्ठी ब्वति कायेत नं सकल संकिपामिपिन्त ग्वसाः खलकं इनाप याःगु दु ।
यलया तमकः द्यःया थाय् जुइगु सफू ब्वज्याय् स्टल तयेगु मनदुपिन्सं थ्वहे वइगु दिल्लागा आमाइ (श्रावण १७) तकया दुने स्वापु तया थःगु थाय् कयादीत नं ग्वसाः खलकं इनाप याःगु दुसाः थुगुसी स्टलया निंतिं छुं नं कथं शुल्कः मकाइगु धका ग्वसाः खलक धाःगु दु ।
थुगुसीया सफू ब्वज्या ताःलाकेगु नितिं गठन याःगु सफू ब्वज्या व नेवाः संकिपा विचार गोष्ठि उप समितिया कजि कथं एकेदेमिया प्राज्ञ दुजः विजयरत्न असंबरे व छ्यान्जे शान्तराज शाक्ययातं ल्यःगु दुसा दुजलय् पवित्र कसाः, राजीव राजोपाध्याय, सुरजवीर बज्राचार्य, नृपेन्द्रलाल श्रेष्ठ, राजु राजदेव बज्राचार्य व मीना बज्राचार्य दुजः कथं ल्यःगु धका एकेडेमीया सदस्य सचिव मल्ल के. सुन्दरं लहनान्युजयात जानकारी बियादीगु दु ।
सफू ब्वज्याया न्हापांगु दिं शुक्रवाः एकेदेमिया नियमित प्रकाशन ‘नेवाः प्रज्ञा’या स्वंगूगु ल्याःया पितब्वज्या, निन्हु कुन्हु लिपि गुथिया ग्वसालय् लिपि ब्वज्या, स्वन्हुया दिं खुन्हु नेपालभाषा संकिपायात कयाः छगू विचार गोष्ठी जुइगु नाप नेपालभाषाया साहित्ययात कया नं छगु अन्तरक्रिया नं जुइगु खँ ग्वसाः उप कमिटिया कजि असंबरें कनादीगु दु ।
थौं कन्ह्यः वाः वइगु
लहनान्युज | दिल्लागा सप्तमी ११३९ ( जुलाई २४ २०१९ )
मौसम पूर्वानुमान महाशाखा थौं बुधवाः व कन्ह्यः बिहीवाः देय् न्यंक बदली जुया अप्वो थासय् वाः वइगु सम्भावना दु धका धाःगु दु ।
मनसुनी न्यूनचापीय रेखा नेपाःया दक्षिण पाखे दुगुलि व बङ्गालया खाडीपाखे दुहा वयाच्वंगु जलवाष्पयुक्त फय् व स्थानीय वायूया प्रभावया कारण पूर्व व मध्यय् अधिकांश थासय् नाप पश्चिमया छु थासय् वाः वइगु सम्भावना दु धकाः मौसमविदं जानकारी बिउगु दु ।
महाशाखां बिउगु जानकारी कथं थौं बुधवाः देय् न्यकं समान्य निसे पूर्ण बदली जुया अधिकांश थासय् वाः वइगुु व छु थासय् तसकं वाः वाइगु धका महाशाखा पित बिउगु बुलेटिनय् उल्लेख यानादिगु खः ।
अथेहे, बिहीवाः देय्न्यकं सामान्य बदली जुइगु धका न धाःगु दु ।
छानबिन सम्बन्धय् नीस्वंगु समितिया कार्यशैलीयात कयाः प्रधानमन्त्री असन्तुष्ट
लहना न्यूज | ने.सं. ११३९ दिल्लागा षष्ठि (२३ जुलाइ, २०१९), मंगलवाः
प्रधानमन्त्री केपी शर्मा ओलीं राप्ती स्वास्थ्य विज्ञान प्रतिष्ठानय् जूगु अनियमितताया छानबिन सम्बन्धय् नीस्वंगु समितिया कार्यशैलीयात कयाः असन्तुष्टि प्वंकादीगु दु ।
येँय् थौं प्रतिष्ठान स्वक्वःगु मुँज्यायात सम्बोधन यानादिसें प्रधानमन्त्री ओली उकथं असन्तुष्टि प्वंकादीगु खः । वय्कलं प्रतिवेदनया विश्वसनियतायात कयाः हे न्ह्यसः छुनादिल ।
प्रतिष्ठानया कुलपति तकं जुयादीम्ह प्रधानमन्त्री ओलीं धयादिल, “समितिं प्रतिवेदन दकलय् न्हापां कुलपतियात लःल्हायेमाःगु खः, तर, सामाजिक सञ्जाल व सञ्चार माध्यमय् न्हापां वल । थ्व प्रतिवेदन खः कि राजनीति खः ? समितिइ दुपिं सदस्यपिं छानविन यायेत कि राजनीति यायेत वनादीगु खः ? जिम्मेवारी काःपिन्सं थःगु कर्तव्य व दायित्वयात ख्याल यायेम्वाः ला ?”
समितिं कुलपतियात लःल्हायेमाःगु प्रतिवेदन थीथी सञ्चार माध्यमय् वःगु पाय्छि मजूगु धयादिसें प्रधानमन्त्री ओलीं दबाब ब्वलंकेत कूलपतियात लःल्हाये न्ह्यः सार्वजनिक याःगु नं दावी यानादिल ।
प्रतिष्ठानय् जूगु अनियमितता छानवीन यायेत धाःसें वंगु जेष्ठ ३० गते सरकारं समिति नीस्वंगु खः । समितिया हवाला ब्यूसें प्रतिष्ठानया उपकूलपति प्रा. डा. संगीता भण्डारीयात कारवाही यायेत सिफारिस यानातःगु प्रतिवेदन उपकूलपतियात लःल्हाये न्ह्यः हे थीथी सञ्चार माध्यमय् प्रकाशन व प्रसारण जूगु खः ।
पुखूया विवाद वार्तापाखें ज्यंकेत महानगरपालिकायात दबाब
लहनान्युज | दिल्लागा षष्ठी ११३९ (जुलाई २३ २०१९ )
आन्दोलनय् ज्यापू समाजलिसें ४०गू त्वाःया नायःपिनिगु ऐक्यबद्धता
प्रहरी बल छ्यलाः आन्दोलन क्वत्यलेगु प्रमुखया योजना पूमवन
पलेस्वां पुखूया विवाद वार्तापाखें ज्यंकेत यल महानगरपालिकायात निरन्तर दबाब लानाच्वंगु दु । पलेस्वां पुखूयात पार्किङ याय्गु थाय्कथं मखुसे पुखू हे कायम याय्माःगु माग तयाः स्थानीयवासीपिं साउन १ गतेनिसें निरन्तरकथं संघर्ष न्ह्याका वयाच्वंगु दु । स्थानीयबासीया संघर्षयात कयाः थीथी जातीय समाज, संघसंस्था व ज्यापु समाजलिसें पीगू त्वाःया नायःपिन्सं नं ऐक्यबद्धता क्यंगु दु ।
थुगु ऐक्यवद्धतापाखें न्ह्याथे यानाः नं पार्किङ याय्गु थाय् दय्केगु ठेक्का कार्यान्वयन यानांतुं त्वःतेगु अडानय् दुम्ह महानगरपालिकाया प्रमुख चिरीबाबु महर्जनयात बार्तापाखें हे समस्या ज्यंकेत तसकं दबाब लाःगु सीदुगु दु । ठेक्काय् बीगु निर्णय कार्यान्वयन याय् मफय्वं समस्या ज्यंकेत प्रमुख महर्जनया नितिं वार्ता वाहेक मेगु विकल्प नं ल्यंमदुगु धाःगु दु ।
प्रहरी प्रशासनपाखें स्थानीयवासीया आन्दोलन क्वत्यलेगु प्रमुख महर्जनया न्हापांगु योजना प्रहरी प्रशासनया हुनिं कार्यान्वयन जुइमफुत । प्रहरीं स्थानीयवासीया आन्दोलनयात वार्तापाखें हे ज्यंकेमाःगु छ्याता प्रमुख महर्जनयात ब्यूगु खः ।
स्थानीयवासीया आन्दोलनया हुनिं नःत्वालय् च्वंगु पलेस्वां पुखू दुगु थाय् पार्किङया नितिं ठेक्काय् बीगु यल महानगरपालिकाया क्वःछिना कार्यान्वयन जुइमफुत । महानगरपालिकां उगु थाय् साउन १ गतेनिसें पार्किङया नितिं ठेक्काय् बीगु क्वःछ्यूगु खः । महानगरपालिकां ठेक्काया नितिं वंगु जेठ १० गते बोलपत्र आह्वानय याःगु खः । ठेक्काय् बीगु तयारी न्ह्याकेवं स्थानीयवासीं उकिया विरोध याना वयाच्वंगु खः ।
नःत्वाः पलेस्वां पुखू संरक्षण समिति, नःत्वाः मंकाः खलः व नःत्वाः मिसा पुचःया न्ह्यलुवाय् स्थानीयवासी आन्दोलनय् कुहां वःगु खः । विरोध प्रदर्शनया झ्वलय् स्थानीयवासी थःपिन्सं हे पुखू दय्केत गाः म्हुल । थ्व स्वयां न्ह्यः धार्मिक विधिपूर्वक बज्राचार्य गुरुजुपिन्सं पूजापाठ यानाः पुखूया शिलान्यास याःगु खः ।
‘इतिहासंनिसें पुखू दुगु थुगु थाय्यात पुखू हे दय्केमाः । महानगरपालिकां ‘जबरजस्ती’ पार्किङया नितिं ठेक्का ब्यूगु खः । पार्किङ याय्गु थाय् दय्केगु क्वःछिनायात कयाः जिमिगु असहमति दु ।’ संरक्षण समितिया नायः बाबुराजा महर्जनं धयादिल ।
‘परापूर्वकालनिसें हे यल महानगरपालिकाया वडा ल्याः २०य् निगू व वडा ल्याः ३य् निगू पुखू दुगु खः । उगु पुखू मध्ये वडा ल्याः २०य् दुगु छगू पुखू न्हंकाः त्रिपद्म माध्यामिक विद्यालय दय्कल । वडा ल्याः ३य् दुगु छगू पुखू न्हंकाः थौंकन्हय्या महानगरपालिकाया भवन दय्कल । महानगरपालिका भवन लिक्कसं छगू पुखू लः रिचार्ज मजुइकथं ‘कृतिम पुखू’ दय्कल । ल्यंदनीगु थ्व हे छगू थाय् दनी । थुकियात पुखू हे कायम याना तय्माः । ठेक्केदारयात छु नं हालतय् पार्किङ याय्गु थाय् दय्के बीमखु ।’ नायः महर्जन धयादिल ।
उगु थासय् पुखू दय्कूसा हिति, मंगलय् लःया स्तर थहां वयाः नःत्वाः, छाय्बहाः जःखःया ल्वहंहितिपाखें लः हाइगु स्थानीयवासीपिनिगु विश्वास दु । अथे हे, वा वःगु लः जमीनं क्वय् बाहाः वने मफयाः महापाः, गाःबहाः जलमग्न जुइगु अवस्था नं म्हो जुइगु स्थानीयबासीपिनिगु आशा दु ।
वि.सं. २०४१ सालय् राजकूलोपाखें लः वय्गु दीवं पुखू बुलुहुँ गना वन । लिपा वनाः उगु थाय् ‘फोहोर वांछ्वय्गु थाय्’ जूवन । जुजुं उगु थासय् फा लहीगु शुरु यात । उगु थाय् तसकं नवल । ताः ईतक फोहोर व दुर्गन्धपाखें दिक्क चाःपिं स्थानीयवासीत हे जानाः सरसफाई अभियान न्ह्याकल । ‘यचुपिचु लिपा उगु थाय्यात थौंतक नं स्थानीयवासीं मदिक्क संरक्षण याना वयाच्वनागु दु ।’ नःत्वाः मिसा पुचःया निवर्तमान नायः सजनी महर्जनं धयादिल, ‘आः वयाः स्थानीयवासीपिनिगु भावना अःखः पार्किङया नितिं ठेक्का बीगु ला ?’
थ्व स्वयां न्ह्यःया प्रमुख बुद्धिराज बज्राचार्यं नं तत्कालीन प्रधानमन्त्री गिरिजाप्रसाद कोइराला मार्फत सभागृह दय्केत शिलान्यास नं याकादीगु खः । तर स्थानीयवासीपिन्सं विरोध यानाः उगु हल दय्के मब्यूगु खः ।
महानगरपालिकाय् जनप्रतिनिधि मदुगु इलय् हे पुखू दय्केत स्थानीयवासीपिन्सं माग याःगु इलय् तत्कालीन कार्यकारी प्रमुखं तत्कालया नितिं पर्यटक वसपार्क दय्केगु धयादीगु खः । लिपा पुखू दय्केगु धाल । स्थानीयवासीपिन्त थुगु खँ बांलाक्क हे लुमनाच्वंगु दु । ‘आः जनप्रतिनिधि वयाः पुखू दय्केगु नितिं पलाः न्ह्याकेगु ला गन ख ःगन, अःखतं स्वदँ न्ह्यः कर्मचारीं धाःगु हे खँयात लिसा काल ।’ मिसा पुचःया निवर्तमान नायः महर्जनं धयादिल ।
स्थानीय सरकार सञ्चालन ऐनकथं सार्वजनिक पुखू संरक्षण याय्गु ज्या स्थानीय तगिंया खः । जनप्रतिनिधिपिं हे थुगु दायित्वपाखें लिचिलेवं स्थानीयवासी आन्दोलित जुइगु स्वभाविक जूगु दुपाः त्वाःया नायः प्रेमकृष्ण महर्जनया धापू दु ।
ठेक्काय् बीगु क्वःछिनायात स्थानीयवासीया असन्तुष्टि दुगु विषयस मंगलाःया नगरसभाय् वडा ल्याः २०या दुजः धनबहादुर महर्जनं ध्यानाकर्षण याकादीगु खः । ‘थुगु विषयस खँ ल्ह्वनाबलय् प्रमुख चिरीबाबु महर्जनं उगु थासय् बोलपत्र आह्वान यानाः निर्णय जुइधुंकूगुलिं आःया नितिं पार्किङ याय्गु थाय् दय्केनु । लिपा विस्तृत आयोजना प्रतिवेदन (डिपिआर) दय्काः पुखू दय्केगु धयादिल ।’ प्रमुख महर्जनया धापूयात न्ह्यथसें वडा दुजः धनबहादुर महर्जनं धयादिल ।
