Display Style:
Column Style
‘अकुपाई तिंख्यः राजनीतिक फाइदा कायेत जुयाच्वंगु’ – मेयर शाक्य
नृपेन्द्रलाल श्रेष्ठ | थिंलागा पारु ११४० (दिसेम्वर १३ २०१९)
येँ महानगरपालिकाया मेयर विद्यासुन्दर शाक्यं तिंख्यःया नामय् राजनीति यायेमज्यूगु धयादीगु दु ।
छु दिं न्ह्यःनिसे अकुपाई तिंख्यः अभियन्तातयसं येँ महानगरपालिकाया मेयर शाक्य व उपमेयर हरीप्रभा खड्गी श्रेष्ठ दथुइ स्वापू स्यन्का ल्वापु याकेत स्वःगु द्वपं नं बियादीगु दुसा मेयर शाक्यं थथे ल्वापु याकाः सुयात न फाइदा जुइ फइमखुगू धयादिल ।
राजनीतिक लवः नयेत हे गुलिसिनं मेयरं तिंख्यः मियाः नल धयाजूगु धासें मेयर शाक्यं तिंख्यः सरकारी जग्गा खःगुलिं सुनां नं न्यायेमिइ याये मफइगु स्पष्ट यानादिल ।
अकुपाई तिंख्यःया न्हापांगु दिं येँ मनपाया निम्ह वडाध्यक्षलिसें उपमेयरं ब्बति कयाः महानगरया नियम हाचां गाःगु द्वपं ब्युसे शाक्यं महानगरं बोर्डं याइगु निर्णय दक्वसिनं पालना यायेमाःगु खँय् न बः बियादिल ।
मेयर शाक्यं अकुपाई तिंख्यःया नामं पुलाम्ह रक्षामन्त्री लिसें सांसद भीमसेनदास प्रधानं राजनीति यायेगु स्वयाच्वंगु द्वपं नं बियादिल ।
सांसद प्रधानलिसें अभियन्तापिन्सं रानीपुखूनिसें दशरथ रंगशालातक्क खुला क्षेत्र याये माःगु माग यासे अकुपाई टुडिख्यः अभियान न्ह्याका वयाच्वंगु खः ।
येँ महानगरपालिकाया मेयर बिद्यासुन्दर शाक्यं अभियन्तापिन्सं उपमेयर खड्गी व पुर्वमन्त्री प्रधानयात न्ह्यःने तयाः आन्दोलन यानाच्वंगु द्वपं नं बियादिल । वयकलं सैनिक मुख्यालय चिइकेगु वा मचिइकेगु धइगु विषयया निर्णय यायेगु अधिकार सरकारयात जक दुगुलिं थुकिया जिम्मा महानगरपालिकां काये फइमखुगु प्रष्ट यानादिल ।
पुर्वमन्त्री प्रधानं थः मन्त्री जुया च्वंगु इलय सेनाया मुख्यालय चिइकेगु लागिं छुं कुतः मयाःगु व आः थः सत्ताय् मदुगु इलय् हालाः छुं अर्थ मदुगु नं धयादिल ।
सांसद प्रधानया पालय् हे नेपाली सेनां कामपा ज्याकू न्ह्यःने नक्सा पास हे मयाःसे सैनिक पुस्तकालय दयेकुूगु नं लुमंकादिल ।
अथेहे वयकलं खुला मञ्चया बसपार्क अस्थायी जक खःगु धासें तिंख्यलय् दुगु सरकारया हे इनापय् वीर अस्पताल व धरहरायागु सामाग्री मुंके बियागु धयादिल । । उगु थाय् आः याकनं हे खाली जुइगु नं वयकलं जानकारी बियादिल ।
मेयर शाक्यं अकुपाई तिंख्यः अभियान न्ह्याकाच्वंपिन्सं बसन्तपुरय् पर्यटक लिसें लँजुवाःत जुइ हे मछिंक मुंकातःगु सामग्री चिइकेबीत नं हाथ्या बियादिल ।
येँ नगरपालिकाया न्हापाम्ह मेयर जनकमान श्रेष्ठ मन्त
नृपेन्द्रलाल श्रेष्ठ | थिंलागा पारु ११४० (दिसेम्वर १३ २०१९)
येँ नगरपालिकाया न्हापाम्ह निर्वाचित मेयर जनकमान श्रेष्ठ थौं सुथय् मन्त । स्येँय् क्यान्सर ल्वचं कया च्वम्ह श्रेष्ठ ९२ दँय् मदुगु खः ।
श्रेष्ठ मदुगुलि येँ महानगरपालिकाया प्रमुख विद्यासुन्दर शाक्यं दुःख प्वकादिगु खः । प्रमुख शाक्य थौं हे पशुपति आर्यघाट वना पार्थिव शरीरय् श्रद्धाञ्जलि प्वकादिगु खः । नेपालय् स्थानीय सरकारया जग स्वनादिम्ह मदुम्ह श्रेष्ठं म्हितादिगु योगदानया स्मरण न यानादिगु दु ।
मेयर शाक्यं मदुम्ह श्रेष्ठया छेँय् जःपिन्त बिचाः हायेका धैर्य धारण यायेत इनाप यानादीगु खः । मदुम्ह श्रेष्ठया कलाः काय् छम्ह व म्ह्याय् छम्ह दु ।
वि.सं. २०१० सालय् जूगु तत्कालीन येँ नगरपालिकाया न्हापांगु निर्वाचनं वयकः नगरपालिकाया सभापति (मेयर) निर्वाचित जुयादीगु खः । न्याय सेवा प्रवेश यानाः येँ जिल्ला अदालतय् न्यायाधीशया रुपय् नं वय्कलं ज्या यानादी धुंकूगु दु ।
येँ महानगरपालिकां वंगु दँ २४ क्वःगु महानगर दिवसया लसताय् वयकःयात महानगर सम्मानं सम्मानित याःगु खः ।
थौं हे पशुपति आर्यघाटय् वय्कःया अन्तिम संस्कार सम्पन्न जुल ।
२५ क्वःगु महानगर दिवस तजिक हनिगु
नृपेन्द्रलाल श्रेष्ठ | थिंलागा पुन्हि ११४० (दिसेम्वर १३ २०१९)
येँ महानगरपालिकां २५ क्वःगु महानगर दिवस थीथी ज्याझ्वः याना तजिक हनिगु दु । महानगरपालिकां कन्ह्य शनिवाः व आइतवाः निन्हु यक हनेत्यःगु खः ।
थौं छगु पत्रकार सम्मेलनया ग्वसाः ग्वया महानगरया प्रमुख नाप महानगर दिवस मुल समारोह समितिया अध्यक्ष बिद्यासुन्दर शाक्यं महानगर दिवस हनेगु ज्याझ्वःया जानकारी बियादिगु खः ।
मेयर शाक्यं येँ च्वःगु परम्परागत बाजं गुरुपिन्त न हनेगु जानकारी बियादिगु खः । उगु ज्याझ्वलय् ज्यापु समुदायया परम्परागत ६३ गुथि, खड्गी समुदायया ६० गुथि, गुँला बाजाया २३ गु बाजा गुरुपिन्त न्यय् द्धः नगद नाप हनापौ लल्हाइगु ज्याझ्वः दु । अथेहे, मखं त्वाःया व किलागः त्वाःया निम्ह जीवित देवी कुमारीयात न झीन्याद्धः भत्ता यिबा हने ज्या याइगु ज्याझ्व दुगुु खँ न्ह्यथनादिगु खः ।
अथेतु, येँया इलय् पिहा वइगु पुलुकिसि, दी प्याखं, लाखे, आकाश भैरव (सवःद्यः) पिनिगु बाजं गुरुपिन्त न न्यय् द्धः नगद बिया हनापौ लल्हाइगु ज्याझ्वः दु ।
महानगरक दिवसया लसताय् जुइगु ज्याझ्वलय् शनिवाः माइतीघर मण्डलानिसे तीनकुने तक साइकल ¥याली, हिन्ह्यः १ बजे रामहिटीइ न्हुगु दमकल भवनया उलेज्या ज्याझ्वः दु शनिवाः व आइतवाः बसन्तपुरय् किपा ब्बज्या, महानगरपाखे तालिम काःपि स्थानीय उद्यमीपिन्स तयार यानातःगु सामाग्रीया न ब्बज्या नाप मौलिक नँसा त्वँसा ब्बज्या याइगु दु । उगु ज्याझ्वलय् येँ महानगरया न्हापाम्ह मेयर पिएल सिहयात न विशेष सम्मानया ज्याझ्वः दु ।
महानगर दिवस व्यवस्थित यायेत वडा १८ या अध्यक्ष नाप सम्पदा तथा पर्यटन समितिया संयोजक न्हुच्छेकाजी महर्जनया संयोजकत्वय् व्यवस्थापन उपसमिति, वडा ३२ या अध्यक्ष नाप सुशासन समितिया संयोजक नवराज पराजुलीया संयोजकत्वय् कर्मचारी, करदाता सम्मान तथा पुरस्कार उपसमिति, वडा १५ या अध्यक्ष नाप प्रवक्ता ईश्वरमान डंगोलया संयोजकत्वय् प्रचारप्रसार उपसमिति, वडा १६ या अध्यक्ष मुकुन्द रिजालया संयोजकत्वय् चिनाखँ, निबन्ध व कासा उपसमिति गठन यानागु दु धका मेयर शाक्यं पत्रकार सम्मेलनपाखे जानकारी बियादिगु खः ।
महानगर दिवसया लसताय् आधारभूत तह कक्षा १ निसें ८ तगिमय् तक ब्वनाच्वंपिं ब्वनामिपाखें मेरो काठमाडौं म बनाउँछु विषयस च्वखँ धेंधेंबल्ला कासा, माध्यमिक तह कक्षा ९ व १० तगिंया ब्वनामि दथुइ सांस्कृतिक शहर, काठमाडौं नगर विषय चिनाखँ धेंधें बल्ला कासाया ग्वसाः न दु ।
अथेतु, जनप्रतिनिधि व कर्मचारीया दथुइ खिपः सालेगु कासा व चाःया धम्प तछ्यायेगु धेंधें बल्लाका कासा न दु ।
उगु पत्रकार सम्मेलनय् मेयर शाक्यं सडक मानवमुक्त महाअभियान घोषणा ज्याझ्वः अन्तर्गत लँय् बेसहारा जुयाच्वंपिनिगु उद्धारया नितिं महानगरपालिकां योजना न्ह्याके यकेगु, खँया जानकारी बियादिगु खः ।
येँ महानगरपालिकायात २०५२ मंसीर २९ गते महानगरपालिका घोषणा याउगु खः । उगु दिं यात हे लुमंका हे महानगरदिवस हना वयाच्वंगु खः ।
नारायणगढ मुग्लिन सतक निवाःया लागि न्हिनय् बन्द
लहनान्युज | थिंलाथ्व चर्तुदशी ११४० (दिसेम्वर ११ २०१९)
नारायणगढ मुग्लिन सतक निवाःया लागि बन्द जुइगु दु । चलःया रोकथाम सम्बन्धी ज्या यायेगु लागि जिल्ला सुरक्षा समितिं वइगु शुक्रवाः मंसिर २७ निसे निवाःया लागि न्हिनय् गाडी वन्द यायेगु निर्णय याउगु दु ।
वुधवाः च्वंगु सुरक्षा समितिया बैठकं वइगु २७ गते ११ बजे निसे न्हिनय् ३ बजे तक सतक बन्द यायेगु निर्णय याउगु दु ।
नारायणगढपाखे वइगु बसयात १५ किलो बजारय् रोके याइसा मालवाहक गाडीयात दासढुंगामा रोके याइ ।
येँपाखे वनिगु यात्रुबाहक सवारीयात मुग्लिन बजारय्, पोखरापाखे वइगु गाडीयात बेनीटारय् रोके याइ । अथेतु, पोखरापाखे वइगु मालवाहक सवारीयात आबँुखैरहनी व येँपाखे वनिगु
गाडीयात लेवाटारय् राके याइ ।
सतक विस्तारया ज्या अझ मसिधउगु आ न गन गन अझ न चलःया जोखिम दुगु धका न धाउगु खः ।
प्रधानमन्त्री ओलिं कासामिपिन्त पुरस्कार घोषणा यायेगु तयारी
लहनान्युज | थिंलाथ्व चर्तुदशी ११४० (दिसेम्वर ११ २०१९)
१३ क्वःगु दक्षिण एसियाली खेलकुद (साग) य् पदक त्याकुपि कासामिपि, प्रशिक्षक व पदाधिकारीपिन्त प्रधानमन्त्री केपी शर्मा ओलीं थौं नाप लाइगु ज्याझ्वः दु ।
उगु ज्याझ्वलय् प्रधानमन्त्री ओलीं थौं बुधवाः बालुवाटारय् न्हिनय् २ ताः इलय् सतुगु दु ।
थौं जुइगु उगु ज्याझ्वलय् प्रधानमन्त्रीं कासामिपिन्त सम्बोधन यासे नाप प्रोत्साहन कथं पुरस्कार तक घोषणा यायेगु तयारी दु ।
१३ क्वःगु साग कासाय् नेपालं ५१ स्वर्ण, ६० रजत व ९५ कांस्य पदक त्याका निगु थासय् लागु खः ।
प्रधानमन्त्री ओली म्हमफया सागया उलेज्या व समापन समारोह ज्याझ्वलय् ब्बति काये मखःगु खः ।
समापन समारोह म्हिगः मंगलवाः प्रधानमन्त्री ओलीं भिडियो सन्देश पाखे कासामिपिन्त भिंतुना देछाउगु खः ।
