Display Style:
Column Style
धर्मोदय सभाया हिरक जयन्ती हन
लहनान्युज | थिंलाथ्व पंचमी ११४० (दिसेम्वर ३० २०१९)
बौद्ध धर्मया ख्यलय् छगू तःजिगु व महत्वपूर्ण संस्था कथं स्थापित जुया न्ह्याना वयाच्वंगु धार्मिक संस्था धर्मोदय सभाया ७५ दँ हिरक जयन्ती स्वयम्भूया आनन्दकुटी विहारय् छगु ज्याझ्वः दथुइ हःगु दु ।
मूपाहाँ संस्कृति मन्त्री योगश भट्टराईपाखें बोधि मत च्याकाः उलेज्या याना न्ह्याःगु थुगु ज्याझ्वलय् अखिल नेपाल भिक्षु महासंघया नायः भिक्षु मैत्री महास्थवीरजुं पंचशील प्रदान याना बिज्यागु खः ।
थुकथं हे ज्याझ्वलय् मैत्री सुत्र पाठ टेन्डर लामाजुं याना विज्यागु खःसा स्वन्ति वाचन राजु बज्राचार्य, दशरत्न बज्राचार्य व सजन बज्राचार्यजुपिंपाखें याना बिज्यागु खः ।
धर्मोदय सभाया नायः यज्ञमानपति बज्राचार्यया सभाधक्ष्यताय् न्ह्याःगु उगु हना ज्याझ्वलय् धर्मोदय सभाया न्वकु सुचित्र मान शाक्यजुं धर्मोदय सभाया संक्षिप्त म्हसीका बियादीगु खः ।
ज्याझ्वलय् विशेष पाहाँ कथं येँ महानगरपालिकाया मेयर विद्यासुन्दर शाक्य झायादिगु खः ।
उगु ज्याझ्वलय् पीएचडी यानादीपिं बौद्ध विद्धानपिं डा. गौतमवीर बज्राचार्य, डा. इन्द्रसिद्धि बज्राचार्य, डा. सुरेन्द्रमान बज्राचार्य, डा. त्रिरत्न मानन्धरपिन्त दोसल्लां न्यय्का हनापौ देछाया हनेज्या नं यानादीगु खः ।
धर्मोदय सभाया मूछ्याञ्जे सागरमान बज्राचार्यजुं न्ह्याका बिज्यागु थुगु ज्याझ्वलय् सभाया वरिष्ठ न्वकु लक्ष्मीदास मानन्धरजुं सुभाय् न्वचु बियादीगु खः ।
किपा व बुखँ सुगतरत्न सिन्दुराकार
प्राचीन टिष्टुङ बज्रबाराही १२ वर्षे देवीगण नाच
नृपेन्द्रलाल श्रेष्ठ | थिंलाथ्व चतुर्थी ११४० (नोभेम्वर ३० २०१९)
प्राचीन टिष्टुङ बज्रबाराही १२ वर्षे देवीगण नाच थौंं येँया हनुमानध्वाकाय् जुगु दु । फोटो फिचर
पं. निष्ठानन्दया बुदिं हन
नृपेन्द्रलाल श्रेष्ठ | थिंलाथ्व चतुर्थी ११४० (नोभेम्वर ३० २०१९)
गद्यगुरु पं. निष्ठानन्द बज्राचार्यया १६३ क्वःगु बुदिं थौं येँया ओम बहालय् छगु ज्याझ्वः यासे हःगु दु ।
निष्ठानन्द स्मृति गुथिया ग्वसालय् जुगु उगु ज्याझ्वलय् मूवक्ता कथं शरद कसाः न पं. निष्ठानन्द बज्राचार्यं नेपालय् न्हापां प्रेश दुत हया थःम्ह हे कम्पोजयाना ललित बिस्तर पिकानादिगु खँ
न्ह्यनानादिगु खः ।
मूवक्ता कसाः न थुगु सफू सच्छि दँ न्ह्यः च्वगु खःसा उतिहे सरल भाषा दुगु धका छकुचा ब्बना न न्यकादिगु खः ।
गुथिया नायः प्रा. सुवर्ण शाक्यया सभाध्यताय् जुगु उगुु ज्याझ्वः पबित्र बज्राचार्यं न्ह्याकादिगु खः ।
सांसद् श्रेष्ठपाखें पत्रकार दबूयात भिन्तुना
शोभा श्रेष्ठ | थिंलाथ्व तृतीया ११४०
समाजवादी पार्टी नेपालया ज्वः नायः लिसें सांसद् राजेन्द्र श्रेष्ठं नेवाः पत्रकार राष्ट्रिय दबूया न्हूगु निर्वाचित ज्यासना पुचःयात भिन्तुना देछानादीगु दु ।
पत्रकार दबूया न्हूगु ज्यासना पुचःयात थौं थःगु हे छेँय् नापलानाः सांसद श्रेष्ठं भिन्तुना देछानादीगु खः ।
दबूया ज्यासना पुचःलिसे सहलह यायेगु झ्वलय् सांस्द श्रेष्ठं सरकारं गुथिया अधिकार गुथियारयात हे लित बी माःगु धयादिल ।
सरकारं गुथि विधेयक हाकनं हयेत्यंगु खँ वयाच्वंबलय् श्रेष्ठं आः संघीय सरकारं पूवंगु विधेयक महःसे चीहाकलं विधेयक हयाः उकिया व्यवस्थापनया भाला प्रदेश सरकारयात बीमाःगु धयादिल ।
श्रेष्ठं आः सरकारं गुथि संस्थान खारेज यानाः समन्वय समिति जक गठन यायेगु लिसें गुथिया व्यवस्थापनया भाला सम्वन्धित प्रदेश सरकारयात हे बीमाःगु धयादिल ।
उकिया नापं गुथिया मुक्कं अधिकार गुथियारयात हे बीमाःगुलिइ नं श्रेष्ठं बः बियादिल ।
उगु इलय् पत्रकार दबूया न्हूगु ज्यासना पुचलं आः प्रदेश सरकारं स्थानीय मांभासं न्ह्यानाच्वंगु संचारमाध्यमयात प्रदेश सरकारपाखें विशेष सुविधा बीमाःगुलिइ बः ब्यूगु खः ।
नेवाः पत्रकारितायात च्वन्ह्याकेत थम्हं फक्व कुतः यायेगु प्रतिवद्धता श्रेष्ठं प्वंकादीगु खः ।
सम्पदामार्ग दयेकेगु ज्या लच्छिया दुने न्ह्याइगु
लहना न्यूज | ने.सं. ११४० थिंलाथ्व तृतिया (२९ नोभेम्बर २०१९), शुक्रवाः
येँ महानगरपालिकां हनुमानध्वाखानिसें स्वयम्भूतक दयेकेत्यंगु सम्पदा पदमार्गया ज्या लच्छिया दुने शुरु याइगु जूगु दु ।
महानगरपालिकाया प्रवक्ता लिसें वडा ल्याः १५या वडाध्यक्ष ईश्वरमान डंगोलं सम्पदा पदमार्गया गुरुयोजना दयेकेधुंकूगुलिं लच्छिया दुने दयेकेगु ज्या न्ह्याइगु धयादिल । थुगु पदमार्गपाखें निगू सम्पदायात स्वाइगु धयादिसें प्रवक्ता डंगोलं पदमार्ग दुने लाःगु सतः, फल्चा, परम्परागत ढाँचाया छेँ, लँ भिंकेगु ज्या नं न्ह्याइगु धयादिल ।
हनुमानध्वाखानिसें स्वयम्भूतकया २.२ किलोमिटरया लँ महानगरपालिकां हे खर्च यायेत्यंगु खः ।
प्रवक्ता डंगोलं महानगरपालिकाया सम्पदा पदमार्ग दुने लाःगु लँ दकलय् न्हापां भिंकेगु धयादिल । आः मौलिक संस्कृति न्ह्यब्वइगु छेँ गजाःगु जुइमाःगु व पदमार्गय् लाःगु थासय् उकथंया हे छेँ दय्केगु नितिं डिजाइन जुयाच्वंगु नं धयादिल । वय्कलं सम्पदा मार्ग निगू सम्पदायात पैदलमार्गकथं विकास यायेत महानगरपालिकां २गू करोडतका बजेट फ्याःगु नं जानकारी बियादिल । उगु सम्पदामार्ग येँ महानगपालिकाया वडा ल्याः १५, १७ व १८ लाः ।
विश्व सम्पदाया धलखय् दुथ्यानाच्वंगु स्वयम्भूनिसें हनुमानध्वाखातकया पदमार्गय् छगू हे कथंया ल्वहतं सीगु नं धयादिल ।
पदमार्गय् लाःगु थासय् नेवाः परम्परायात विशेष बः बीगु जूगु दु । विशेष यानाः नेवाः परम्परायात पर्यटकलिसे तप्यंक स्वायेगु नितिं ग्वाहालि जूवनीगु महानगरपालिकां न्ह्यथंगु दु ।
येँ महानगरपालिका वडा ल्याः १८या वडाध्यक्ष न्हुछेकाजी महर्जनं हनुमानध्वाखानिसें स्वयम्भूतकया पदमार्गय् छगू हे कथंया ल्वहतं सीगु कारण न्ह्यथनादिसें पर्यटकपिन्त अलमल मजूसे उगु लँपुपाखें निगू सम्पदाय् वनेत अःपुइगु धयादिल ।
पर्यटकपिन्सं सम्पदा अवलोकन यायेगु नितिं न्यासि वनेगु हे ययेकीगु जूगुलिं महानगरं सम्पदा मार्ग दयेकेत्यंगु वडाध्यक्ष महर्जनं धयादिल ।
