Display Style:
Column Style
प्रदेश २ लय् थप ३४म्ह कोरोना संक्रमण पुष्टि
लहनान्युज | तछलागा नवमी ११४०,जेठ ३२ आइतवाः
वीरगञ्जया नारायणी अस्पतालय् पीसीआर ल्याब् याःगु परीक्षणय् प्रदेश २ लय् थप ३४म्ह कोरोना भाइरस संक्रमण पुष्टि जूगु दु । पर्साय् १७म्ह, बाराय् ९म्ह, रौतहटय् ७म्ह व सर्लाहीइ
छम्हेसित कारोना संक्रमण पुष्टि जूगु दु ।
शनिवाः जक नारायणी अस्पतालया ल्याब् न्यासःम्हेसिगु थ्रोट स्वाबया नमुना परीक्षण याःगु खः ।
पर्सा, बारा, रौतहट व सर्लाहीया थ्रोट स्वाबया नमुना परीक्षणय् ३४म्हेसित कोरोना भाइरस संक्रमण पुष्टि जूगु धका नारायणी अस्पतालं धाःगु दु
सरकारं असार १ गतेनिसे रेडियो व टिभीपाखे ब्बकेइगु
लहनान्युज | तछलागा नवमी ११४०,जेठ ३२ आइतवाः
लकडाउनया स्कूलय् वने मखंपि ब्बमिपिनिगु लागि सरकारं असार १ गतेनिसे रेडियो व टिभीपाखे ब्बकेगु सुरु याये त्यःगु दु । एफएम, टिभी व इन्टरनेट सेवा प्रदायक कम्पनी मार्फत् सरकारं ब्बकेगु याये त्यःगु खः ।
असार १ गते निसे असार ३१ गते तक विषयगत ब्बकेगु लागि नेपाल टेलिभिजनया एनटिभी प्लसं याये त्यःगु दु । अथहे कक्षा ९ व १०या विषयगत ब्बकेगु लागि डिस होम, नेट टिभी, म्याक्स टिभीइ स्कुल एजुकेसन च्यानलपाखे प्रसारण याये त्यःगु खः ।
स्कूल याकन मचाइगु अवस्थाय् वैकल्पिक विधिपाखे ब्बकेत तयारी याये त्यःगु खः ।
‘कक्षा ६ निसे ८ तक टार्गेट याना कान्तिपुर एफएमय् कन्ह्यनिसे वाःया न्यान्हु विषयगत ब्बकेगु सुरु यायेत्यःगु दु । रेडियो नेपालपाखे न कन्ह्यनिसे कक्षा ९ व १० या सामग्री प्रसारण याये त्यःगु दु । अथेहे, मेमेगु लोकल एफएमपाखे न प्रसारण यायेगु तयारी यायेत स्थानीय तह न याना च्वंगु दु ।
लकडाउनया इलय् इन्टरनेट प्रविधि छ्यला अनलाइन क्लास पाखे ब्बका वया च्वंगु दु ।
सांसद श्रेष्ठपाखे निर्माण ज्याया निरिक्षण
लहनान्युज | तछलागा नवमी ११४०,जेठ ३२ आइतवाः
प्रतिनिधि सभा सदस्य माननीय सांसद जीवन राम श्रेष्ठं येँया क्षेत्र न. ८ स्थानीय पूर्वाधार विकास साझेदारी कार्यक्रम अन्र्तगत कामपा वडा नं. १५ य् थी थी निर्माण ज्याझ्वः न्ह्याकादिगु दु ।
स्थानीय पूर्वाधार विकास साझेदारी कार्यक्रम कथं जगतसुन्दर ब्बनेकुथि न्ह्यनो ताँ, मुख्य सतकय् आकाशे ताँ, चःमती पार्क नाप परम्परागत शैलीया जेष्ठ दिवा बिश्राम भबन, श्रीकृष्ण कुन्जय् तल्ला थपे यायेगु ज्या न्ह्याके त्यःगु खः ।
अथेहे, सांसद श्रेष्ठं कामपा वडा १९य् इन्द्र सभा सामुदायिक भवन निर्माण ज्याया न निरिक्षण यानादिगु दु ।
सांसद श्रेष्ठं स्थानीय जनताया सक्रियताय् जुया च्वंगु ज्याया प्रशंसा यानादिसे गुणस्तरय् ज्या जुइगुलि बिश्वास प्वकादिगु दु ।
एमसीसी छलफल यायेत नेकपा सचिवालय बैठक
लहनान्युज | तछलागा नवमी ११४०,जेठ ३२ आइतवाः
एमसीसी परियोजनाबारे छलफल यायेगु लागि नेकपा सचिवालयया बैठक थौं च्वने त्यःगु दु । बैठक थौं ४ बजे प्रधानमन्त्री निवास बालुवाटारय् च्वने त्यःगु खः ।
उगु बैठकय् एमसीसी कार्यदलया दुजःपि भिम रावल व प्रदीप ज्ञवालीया नाप अर्थमन्त्री डा. युवराज खतिवडायात न आमन्त्रित सदस्य कथं ब्बना तःगु दु ।
थ्व स्वया न्ह्यःया बैठकय् न रावल, ज्ञवाली व खतिवडायात सःता एमसीसीबारे नेकपां छलफल याये धुकुगु खः ।
थौंया छलफलं सम्भवतः एमसीसीबारे टुंगो लगे यायेगु नेकपां तयारी यानाच्वंगु दु ।
थुगु संसदया अधिवेशनं एमसीसी पारित यायेगु व मयागु धका नेकपायात दबाव दु ।
पार्टी दुने एमसीसी पारित याये मज्यु धका दवाव दु ।
पार्टीं गठन याःगु कार्यदलं एमसीसी गथे खः अथे पारित मयायेत सुझाव बिःगु खः ।
गुल्मीइ कोरोना संक्रमितम्ह सीत
लहनान्युज | तछलागा नवमी ११४०,जेठ ३२ आइतवाः
गुल्मीइ कोरोना संक्रमित बिरामी सीगु दु ।
रेसुङ्गा नगरपालिका वडा नम्बर–९ य् उपल्लो तम्घास आइसोलेसनय् उपचार याना च्वम्ह धुर्कोट गाउँपालिका वडा नम्बर ४ जैसिथोक च्वम्ह ३६ दँयाम्ह मिजंम्ह सीगु धका डा. कविराज भुसालं धाःगु दु ।
सीइम्हेसिगु शवयात चान्ह्य हे नेपाली सेनां व्यवस्थापन याःगु खः ।
सीम्ह मनू भारतं वया धुर्कोटया क्वारेन्टिनय् च्वःगु खःसा वयात वःगु जेठ १२ गते कोरोना संक्रमण पुष्टि जूगु खः । संक्रमण पुष्टि जूगु लिपा वयात जेठ १३ गते निसे तम्घासया आसोलेसनय् च्वना वासः याका वयाच्वंगु खः ।
उम्ह मनू वःगु निदँनिसे आन्द्राय् क्यान्सर जूया च्वम्ह खः । वयात स्वकः तक स्वाब परीक्षणय् रिपोर्ट पोजिटिभ वःगु खः ।
