Display Style:
Column Style
सामुदायिक स्कूल प्रतिस्पर्र्धी दयेकेत मेयर शाक्यया इनाप
नृपेन्द्रलाल श्रेष्ठ | तछलागा पञ्चमी ११४०,जेठ २८ बुधवाः
येँ महानगरपालिकां रेडियो शिक्षा ज्याझ्वः न्ह्याकूगु दु । बन्दाबन्दीया इलय् बैकल्पिक माध्ययमं ब्बकेगु लागि सामुदायिक स्कूलयात प्रतिस्पर्धी दयेकेत येँ महानगरपालिकां मेट्रो एफ एमपाखे थौंनिसे आधारभूत झीगुतगि तक रेडियो शिक्षा सुरु याःगु खः ।
येँ महानगरपालिकाया प्रमुख नाप शिक्षा समितिया अध्यक्ष बिद्यासुन्दर शाक्यं थौं राष्ट्रियसभा गृहय् च्वंगु मेट्रो एफ एम ९४ बिन्दु ६ मेगाहर्जमार्फत रेडियो शिक्षा ज्याझ्वः न्ह्याकूगु दु । ‘देशय् जारी जुया च्वंगु लकडाउनया कारण नियमित ब्बकेगु सम्भव मजूगुलि छेँय् च्वना मस्तयेत बैकल्पिक शिक्षा प्रदान यायेगुु उदेश्यं येँँ महानगरपालिकां आधारभूत निसे १०गू तक रेडियो शिक्षा सुरु यानागु धका,’ मेयर शाक्यं धयादिगु दु, ‘थुकि सामान्य जीवनप्रति उत्साहित यायेत व शैक्षिक गतिबिधियात निरन्तरता बिइत ग्वाहालि जुूइगु अपेक्षा याःगु दु । वयकलं रेडियो शिक्षाया सुझाव आधारय् मेगु प्रभावकारी दयेकेगु जानकारी बियादिगु खः ।
मेयर शाक्यं रेडियो ज्याझ्वःया शुभारम्भ लिपा शिक्षा बिभागया अधिकारी व प्रधानाध्यापकपि नाप खँ ल्हाना गुणस्तरीय शिक्षाय् जोड बिइत इनाप यानादिगु दु । ‘ पूर्वाधार उपलब्धताया दृष्टिं महानगर दुने संस्थागत व सामुदायिक स्कूलया दथुइ अन्तर मयायेत वयकलं धयादिगु खः, ‘कोभिड–१९ या संक्रमण व रोकथाम नियन्त्रणया लागि जारी लकडाउनया कारण स्कूलय् शैक्षिक ज्याझ्वः आः बन्द जुया च्वंगु खः । थुगु इलय् पूर्वाधार सुधारया ज्याय् निरन्तरता बिइत इनाप यानादिगु दु ।’
येँ महानगरं येया दक्को सामूदायिक स्कूलय् छगू हे प्रकारया रंग तयेगु ज्यायात न निरन्तरता बियादिगु दु । येँ महानगरं सामुदायिक स्कूलया दुने धू मुक्त दयेकेगु, फलफुल पिउगु, लैङ्गिक तथा अपाङ्गमैत्री चःबि निर्माण यायेगु, शुद्ध लः त्वनेगु व्यवस्था यायेगु, खुला थासय् लः पुनर्भरण (रिचार्ज) ज्याझ्वः, फोहोर तयेगु थलःया ब्यवस्था, दक्को स्कूलय् बालमैत्री चित्र व महावाणी च्वयेगु व छगू हे रंग तयेगु ज्याझ्वः सञ्चालन यायेगु नीति कायेगु ज्या जूगु मेयर शाक्यं धयादिगु दु ।
येँ महानगरपालिकाया प्रवक्ता ईश्वरमान डंगोल, शिक्षा विभागया शाखा अधिकृत मोती प्रसाद भट्टराई, सूचना प्रबिधि बिभागया निमित्त प्रमुख युवराज खनालपि उपस्थिति दुगु खः ।
येँ महानगरपालिका न्ह्याका वयाच्वंगु मेट्रो एफ एम ९४ बिन्दु ६ मेगाहर्जय् न्हि न्हि आधारभूत निसे १० तक कक्षा सञ्चालन जुइ धका धाःगु दु । रेडियो शिक्षाया लागि कक्षा १ निसे ३ तक २५ मिनेट व कक्षा ४ निसे १० तक ३० मिनेटया ई उपलब्ध याःगु दु।
येँय् बँ पसः चिइकेगु अभियान न्ह्यात
शोभा श्रेष्ठ | तछलागा पञ्चमी ११४०,जेठ २८ बुधवाः
थौं कन्ह्य कोरोना भाइरस कोभिड १९ संक्रमण जुइगुपाखें बचे जुइत व थुकिया रोकथाम यायेगु लागि येँया दुनेया सहरय् च्वंगु बँ पसः –फुटफाथ) चिइकेगु अभियानयात थौं बुधवाः नं निरन्तरता ब्यूगु दु ।
येँ महानगरपालिका २४ वडाया वडा दुजः विनोद तुलाधरं बिःगु जानकारी कथं सतकय् फुटपाथय् तयातःगु बँ पसःपाखें नं कोरोना संक्रमणया आपालं ग्याःचिकु दूगुलि बँ पसः चिइकेगु अभियान न्ह्याकेमाःगु खँय् बः बियादुग खः ।
बसः पसा चिइकेगु लागि जागरुक युवा समूह नीस्वनाः छु दिं न्ह्यःनिसें येँया दुनेयाश सहरय् अब्यवस्थित रुपं सतकय् तयातःगु बँ पसः चिइकेगु अभियान न्ह्याकूगु जानकारी २४ वडाया दुजःलिसें समूहया सल्लाहाकार तुलाधरं लहनान्युजयात बियादीगु खः ।
थौं बुधवाः पसः चिइकेगु अभियानया निरन्तरता कथं सुथय् ६ ताइलय् असं त्वालय् मुनाः बँ पसः चिइकेगु अभियानय् वडाया जनप्रतिनिधिपिं, स्थानीय संघसंस्था, खलः पुचः, येँ महानगरपालिकाया नगर प्रहरी, जनपद प्रहरी, स्थानीय बासिन्दापिनिगु उपस्थिति दूगु खः ।
यलया लुँवह ब्यवसायीं यात काेराेना बिमा
लहनान्युज | तछलागा पञ्चमी ११४०,जेठ २८ बुधवाः |
ललितपुर सुनचाँदी व्यवसायी संघं थः दुजःपिं दुजःया छेँजः व संघया कर्मचारीपिनिगु कोरोना बिमा याःगु दु । मंगलवाः एभरेष्ट ईन्सुरेन्स कम्पनीनाप ४ कोति ४९ लखया कोरोना भाइरस बिमा सम्झौता जूगु संघका अध्यक्ष रमेश बहादुर शाक्यं कनादीगु दु ।
कोरोना भाइरसया जोखिम दुगु थुगु इलय् विमितं कोरोना परिक्षण (पिसिआर) पोजेटिभ जुइवं एभरेष्ट ईन्सुरेन्स कम्पनीपाखें १ लख विमा वापतया धेबा कयादीफइ ।
कोरोना संक्रमित प्यद्धः थ्यन
लहनान्युज | तछलागा चतुर्थी ११४०,जेठ २७ मंगलवाः
नेपालय् थौं तक प्यद्धः स्वयां अप्व मनूतय्त कोरोना भाइरसया संक्रमण खने दये धुकुगु दु ।
थौं स्वास्थ्य तथा जनसंख्या मन्त्रालयं नेपालय् संक्रमित पिनिगु ल्याः ४०८५म्ह थ्यंगु दु धका जानकारी बिःगु दु ।
अथेहे वंगु नीप्यघौया दुन थप ३२३म्हेसित थप संक्रमित जूगु धका धाःगु दु । मन्त्रालयया प्रवक्ता डा. जागेश्वर गौतमया कथं न्हूपिं संक्रमित जूपि मध्ये २९२म्ह मिजंपि व ३१म्ह मिसापि धका
धाःगु दु । नेपालय् थौं इलाम जिल्लाय् थप जूगु दु । थ्व नापं आ ७२गू जिल्लाय् कोरोनाया संक्रमण खने दये धुकुगु दु ।
येँया राष्ट्रिय जनस्वास्थ्य प्रयोगशालाय् याःगु परीक्षणय् धनुषाया २४म्ह, कपिलवस्तुया ७म्ह, महोत्तरीया ३म्ह, नवलपरासी पश्चिमया २२म्ह, नुवाकोटया २म्ह, रौतहटया २१, सर्लाहीया १६म्ह व सिरहाया १२म्ह यानाः १ सय २५म्हेसित संक्रमण खनेदुगु दु । देय्या थीथी थासय् याःगु परीक्षणय् थप १ सय ९८म्हेसित संक्रमणया पुष्टि जूगु खः ।
अथेहे ९६म्ह मनूत कोरोनामुक्त जुया अस्पतालं डिस्चार्ज जूगु दु ।
आः तक अस्पतालं डिस्चार्ज जूपिं ५८४म्ह थ्यंगु दु ।
गण्डकी प्रदेशका थप २४ म्हेसित कोरोना
लहनान्युज | तछलागा चतुर्थी ११४०,जेठ २७ मंगलवाः
गण्डकी प्रदेशय् थप २४ म्हेसित कोरोना भाइरस संक्रमण पुष्टि जूगु दु ।
नवलपरासी ९बर्दघाट सुस्ता पूर्वय् १२म्ह, बाग्लुङय् म्ह ११ व म्याग्दी जिल्लाय् छम्हेसित कोरोना संक्रमण पुष्टि जूगु दु ।
गण्डकी प्रदेश कोरोना नियन्त्रण तथा रोकथाम कार्यक्रमया प्रवक्ता डा. विनोद विन्दु शर्माया कथं थ्व नाप गण्डकी प्रदेशय् कोरोना संक्रमितपि १४४म्ह थ्यःगु दु ।
स्वास्थ्य निर्देशनालय रामघाट पोखराया कथं पूर्वी नवलपरासी बौदीकाली गाउँपालिकाय् १२म्ह संक्रमित जूगु दु ।
अथेहे, बाग्लुङ बरेङ गाउँपालिकाय् च्याम्ह व निसीखोला गाउँपालिकाय् प्यम्ह मिजंपिन्त कोरोना पुष्टि जूगु दु ।
म्यादीया बेनी नगरपालिकाया ४६ दँ दुम्हेसित कोरोना खने दुगु धका स्वास्थ्य निर्देशनालय पोखरां धाःगु दु ।
