Display Style:
Column Style
मोटरसाइकलय् निम्ह च्वना चले याये मदइगु
लहनान्युज | तछलागा षष्ठी ११४०,जेठ २९ बिहिवाः
सरकारं लकडाउनयात कमयाना मोटरसाइकल चले याकेगु बिइगु जूगु दु ।
तर मोटरसाइकलय् छम्ह जक च्वना चले याकेगु जूइ धका सरकारया प्रवक्ता तथा सञ्चार व अर्थमन्त्री डा. युवराज खतिवडां जानकारी बिःगु दु ।
थौं बिहीवाः च्वंगु मन्त्रिपरिषद् बैठकं मोटरसाइकलय् छम्ह जक च्वना चले याये फइ धका निर्णय याःगु खः ।
अथेहे, दक्को प्रकारया पैदल आवागमन, साइकल व मोटरसाइकल चले याकेगु निर्णय मन्त्रिपरिषद् या बैठकं याःगु खः ।
दक्को प्रकारया ढुवानी न खुल्ला याःगु दु ।
थुगु व्यवस्था थौं बिहीवाः निसे लागु याये त्यःगु खः ।
सरकारी व निजी ज्याकू निगू सिफ्टय् चायेकेगु निर्णय
लहनान्युज | तछलागा षष्ठी ११४०,जेठ २९ बिहिवाः
सरकारं आः सरकारी, निजी, बैंक व वित्ति य संस्थयाना ज्याकू निगू सिफ्टय् चायेकेगु निर्णय याःगु दु ।
म्हिगः बुधवाः च्वंगु मन्त्रिपरिषदया मुँज्यां याःगु निर्णय सार्वजनिक यासें सरकारया प्रवक्ता नापं अर्थमन्त्री डा. युवराज खतिवडां ज्याकूत निगू सिफ्टय् याना याये केगु धका धयादिगु दु ।
ज्याकू चायेकेत कर्मचारी तयेगु दथुइ अनिवार्य रुपं दूरी कायम यायेमाःगु खँ नं मन्त्री खतिवडां धयादिगु खः ।
सरकारया निर्णय कथं ज्याक सुथसिया ८ बजे निसें १ बजे तक व १ बजे निसें ६ बजे तक संचालन यायेगु धका धाःगु खः ।
सरकारं याःगु थुगु निर्णयपाखें आर्थिक दँया लिप्पांगु इलय् जुइगु ज्याया व्यवस्थापन यायेत ग्वाहालि जुइगु मन्त्री खतिवडां धयादिल ।
थुगु निर्णय असार १ गते निसें लागू जुइ धका न धाःगु दु ।
थौं थप २५०म्हेसित कोरोनाया संक्रमण
लहनान्युज | तछलागा षष्ठी ११४०,जेठ २९ बिहिवाः
नेपालय् थौं थप २५०म्हेसित कोरोनाया संक्रमण खने दुगु दु ।
थौं स्वास्थ्य तथा जनसंख्या मन्त्रालय बिःगु जानकारी कथं वंगु २४ घण्टाया दुने २३०म्ह मिजं व २०म्ह मिसापिन्त कोरोनाया संक्रमण जूगु दु ।
थ्व नापं आः नेपालय् कोरोना संक्रमण जूपिं ४६१४म्हेसित संक्रमण जूगु दु ।
प्रादेशिक विवरण कथं प्रदेश १य् ३०७म्ह, प्रदेश २ लय् १६६१म्ह, बागमति प्रदेशय् १४७म्ह व गण्डकी प्रदेशय् १४७म्हेसित संत्रमण जुइधुंकूगु दु ।
अथेहे प्रदेश ५य् १३९९म्ह, कर्णाली प्रदेशय्
७५९म्ह व सूदुरपश्चिम प्रदेशय् १९२म्हेसित संक्रमण जुगु दु ।
अथेहे तु १८७म्ह मनू अस्पतालं डिस्चार्ज जुइ धुकुगु दु ।
न्हूगु नक्साया समर्थनय् स्थानीय ल्याय्म्हतय् प्रदर्शन
राजेश बज्राचार्य | तछलागा पञ्चमी ११४०
नेपालया तंगु भूभाग लिम्पियाधुरालिसेंया नेपालया न्हूगु नक्सा संशोधित संविधानय् चूलाःगु लसताय् यलया स्थानीय ल्याय्म्हतय्सं यल लायकुलिइ मत च्याकूगु दु ।
न्हूगु नक्सा जारी याःगु सरकारया पलाःया समर्थन यासें स्थानीय ल्याय्म्हतय्सं पाल्चां हे नेपालया न्हूगु नक्सा दयेकाः ब्वज्या याःगु खः ।
सरकारया पायछि पलाःयात लसकुस यायेत पासापिं दथुइ सहलह जुयाकथं स्वस्फुर्त रूपं तत्कालिक योजना ताःलाःगु स्थानीय पृथबिन्दु महर्जनं धयादिल ।
क्वत्यलातःगु भूमि दुथ्याकाः नक्सा जारी यायेगु सरकारया ऐतिहासिक पलाखय् थःपिनिगु समर्थन दुगु बिचाः ब्वतिमि ल्यायम्हतयसं प्वंकल ।
ल्यायम्हतय् लसतायात हःपाः बीत नेकपा यल जिल्ला सभापति हरिकृष्ण ब्यन्जनकारलिसें १२ वडाया अध्यक्ष नारायण लाल अवाले, १६ वडा सदस्य सुप्रभा शाक्य लिसेंया जनप्रतिनिधीं नं ज्याझ्वलय् ब्वति काःगु खः ।
पाल्चा च्याकेगु ज्या न्ह्याकुसें नेकपा जिल्ला सभापति ब्यन्जनकारं भारतीय बिस्तारवादं थःगु कब्जाय् तयेत स्वःगु नेपाली भूमियात नेपाली एकतां आधिकारिक नक्सा संसदया सर्वसम्मतिं पारित जूगु धासें उगु भूभागयात गुगु नं हालतय् कयां त्वःतेगु प्रण लिसा कयादिल ।
देय्या न्हूगु नक्सा कथं संविधानया अनूसूची अद्यावधिक यायेत सरकारं न्ह्यब्वःगु संविधान संशोधन विधेयकय् भारतीय बिस्तारवादीं क्वत्यःगु लिम्पियाधुरा, लिपुलेक व कालापानी दुथ्याकाः न्हूगु नक्सा जारी यायेधुंकाः सरकारं संविधानय् दुगु निसान छाप भिंकेत जेठ ९ गते विधेयक दर्ता याःगु खः ।
संशोधन विधेयकयात बिचाः यायेमाल धइगु प्रस्ताव मंगलबाःया प्रतिनिधिसभा बैठकं सर्वसम्मत स्वीकृत याःगु खः ।
विधेयकय् सैद्धान्तिक सहलहस ८४ सांसदं देयया स्वाधीनता, राष्ट्रियता व भौगोलिक अखण्डताया पक्षय् छधी जुयाः दनेगु धासें समर्थन क्यंगु खः ।
उमिसं भारतलिसे राजनीतिक व कूटनीतिक वार्ताया तयारी यायेत नं ध्यानाकर्षण याकूगु खः ।
ख्वपय् लखं चुइकाः ट्रक चालक वेपत्ता
रामगोपाल तमखु | तछलागा पञ्चमी ११४०
ख्वपय् थौं तसकं वा वयाः चुनदेवीइ लँय् बाः वःगु लखं एलपी ट्रकया चालक छम्ह चुइका यंकाः बेपत्ता जूगु दु ।
ख्वपय् थौं न्हिनय् करिव बाघौ ति तसकं वःगु वां उगु थाय्या लँ दक्वं लखं जायाः खुसिबाः वयेथें बाः वःगु खः ।
अरनिको राजमार्ग अन्तर्गत ६ लेन सडक पाण्डुबजार चोक व सल्लाघारी चोकया दथुइ लाःगु चुनदेवी बस स्टपय् लाःगु धलय् बाःवःगु लखं ना ६ ख १६१६ ल्याःया एलपी ट्रकया चालकयात चुइकूगु खः ।
बेपत्ता ट्रक चालक सिन्धुली रानीचुरीयाम्ह थौंकन्हय् मकवानपुर हेटौँडा लामसुरे च्वनीम्ह ५७दँया नर बहादुर रावत खःगु महानगरीय प्रहरी परिसर ख्वपया सूचना अधिकृत दिपक गिरीं धयादिल ।
बेपत्ता चालकया मालेज्या जुयाच्वंगु नं सूचना अधिकृत गिरीं कनादिल ।
उगु थायया सर्भिस ट्र्याकया लँ दक्वं लखं जाःगु थासय् सल्लाघारीं सुर्यबिनायक पाखे वनाच्वंगु एल पी ट्रकया चालक गाडीं कुतुंवनाः लखय् दुनावंबलय् लखं पाईप दुने चुइकायंकूगु स्थानीय प्रत्यक्षदर्शीं धाःगु दु ।
