Display Style:
Column Style
हीरा ब्यापारी समीर महर्जनयात सम्मान
लहनान्युज | कछलाथ्व द्धादशी ११४० (नोभेम्वर ९ २०१९)
अमेरिकाया व्यवसाय याइपिनि दथुइ उत्कृष्ट १० म्ह दुने लायत ताःलानादिम्ह न्यूयोर्कया हीरा ब्यापारी समीर महर्जनयात हलिं नेवाः दबू नेपाः देय् मू कवलं थौं छगू ज्याझ्वः दथुइं हनेज्या याउगु दु ।
नेपाः देय् मू कवःया नायः शाक्य सुरेनं स्वांमा क्वखायेकाः महासचिव रश्मिला प्रजापति, सचिव महर्जन रत्नं, दांभरी सुरेन्द्रभक्त श्रेष्ठ पिन्स खादां न्ययेका नाप नेवाः परम्परा खें सगं यिबा भिंतुना देछायेगु ज्या जुगु खः।
हलिं नेवाः दबू अमेरिका कवःया न्वकू समीर महर्जनं थपिन्त टप टेन दुने लाकेगुलिइ ज्याय् नेवाः तयेगु ख ल्हाः दुगु खँ कनादिसे ब्याबसायिक सफलताया ल्याखं जक मखु समाजया नितिं याउगु योगदानयात कदरय् थः लुमकुगुलि लसता प्वकादिल ।
अमेरिकाया बिजिनेस म्यागेजिन ईन्क डटकम (Inc.com) पाखें वंगु अक्टोबर २९ य अमेरिकाया झिम्ह चिधंगु व्यापार यानाच्वपिं मध्ये सफल ब्यापारी व ब्यवसायीतय् लिष्टय् महर्जनयात “The Peak Performer” या उपमा बिसें ब्यापारया सफलता बारे च्वःगु ख ।
न्यूयोर्कया क्विन्स डाईमण्ड ज्वेलरी पसः मार्फत हिरा लुँ वहःया ब्यापार याना च्वनादीम्ह महर्जन यलय् च्वनादिम्ह खः
भारतं पिथंगु नक्सा स्वीकार्य मजूगु : नेकपा नायः दाहाल
लहना न्यूज | ने.सं. ११४० कछलाथ्व दसमि (२१ नोभेम्बर, २०१९), बसुवाः
सत्तारुढ नेपाल कम्युनिस्ट पार्टी (नेकपा)या नायः पुष्पकमल दाहालं भारतं पिथंगु नक्सा स्वीकार्य मजूगु धयादीगु दु ।
थौं बसुवाः पोखराय् सञ्चारकःमितलिसे खँल्हानादिसें नेकपाया नायः दाहालं धयादिल, ‘गुगुकथंया नक्सा सार्वजनिक याःगु दु, व नेपाःयात मान्य मजू ।’
लिपुलेकयात कयाः भारत व चीन दथुइ सहमति जुल धकाः वःगु इलय् थःम्हेस्यां भारतीय प्रधानमन्त्री नरेन्द्र मोदीलिसे ‘थ्व गलत जूगु दु, थुकियात कयाः पुनःविचाः याय्माः’ धयागु लुमंकादिसें वय्कलं धयादिल, ‘आः नं कालापानीलिसेंया फुक्क नक्सा दुने लाकेधुंकाः थ्व नेपाःयात सह्य जुइ फइमखु, मान्य जुइ फइमखु ।’
भारतया नक्साय् नेपाःया गम्भीर आपत्ति दुगु धयादिसें दाहालं थुकियात कयाः सरकारं नं न्ववायेधुंकूगु धयादिल । नेपाःया भौगोलिक अखण्डतायात कयाः फुक्क देय् छगू थासय् दनेगु धयादिसें ‘राष्ट्रिय अखण्डता, सार्वभौमसत्ताय् छुं गनं नं सम्झौता यायेगु, क्वमिलु जुइगु धइगु सवाल हे जुइमखु ।’ धयादिल ।
सरकारं नं भारतीय नक्सा स्वीकार्य जुइमखु धायेधुंकूगुलिं आः निगू देय् दथुइ सम्बाद जुइगु नं नायः दाहालं धयादिल ।
कालापानी व लिपुलेक नेपाःया अविभाज्य भूमि : नेपाली कांग्रेस
लहना न्यूज | ने.सं. ११४० कछलाथ्व दसमि (२१ नोभेम्बर, २०१९), बसुवाः
नेपाली कांग्रेसं नेपाःया भूमिइ जुइगु अतिक्रमण अस्वीकार्य जूगु धाःगु दु । कालापानी व लिपुलेक नेपाःया अविभाज्य भूमि जूगु धासें कांग्रेसं भारतं पिथंगु नक्सायात कयाः आपत्ति प्वंकूगु दु ।
नेपाली कांग्रेसया सभापति शेरबहादुर देउवां थौं विहिवाः नेपाःस्थित भारतीय राजदूत मञ्जिभ सिंह पुरीयात फोन यानाः नक्सायात कयाः थःपिनिगु पार्टीया ध्यानाकर्षण याकादीगु न्ह्यथंगु दु । देउवां राजदूत पुरीयात कालापानी व लिपुलेक नेपाःया अविभाज्य भूमि जूगु स्मरण तकं याकादीगु कांग्रेसया प्रवक्ता विश्वप्रकाश शर्मां जानकारी बियादीगु दु ।
कांग्रेस थुकियात कयाः मंकाः मत दयेकेत व वकथं हे कूटनीतिक माध्यमपाखें ज्यंकेत सरकारयात इनापं नं याःगु दु ।
२०१८ सालय् लिपुलेकय् जनगणना व राजश्व म्हयेगु ज्या जुइधुंकूगु
लहना न्यूज | ने.सं. ११४० कछलाथ्व दसमि (२१ नोभेम्बर, २०१९), बसुवाः
सरकारं भारतीय न्हूगु नक्साय् नेपाःया भूमि लाःगु विषयस भारतलिसे कुटनीतिक व राजनीतिककथं खँल्हायेगु धाःगु दु ।
मन्त्रिपरिषदया निर्णय सार्वजनिक यायेत ग्वसाः ग्वःगु पत्रकार सम्मेलनय् सरकारया प्रवक्ता सूचना तथा सञ्चारमन्त्री गोकुल बास्कोटां भारतया नक्साय् नेपाःया भूमि लाःगु खँय् समस्या ज्यंकेगु नितिं कुटनीतिक व राजनीतिककथं पहल यायेगु धयादिल । ‘यकःति ढंगं पिथंगु राजनीतिक नक्सायात जिमिसं अस्वीकार यायेगु व कुटनीतिक, राजनीतिक तहपाखें थुकियात ज्यंकेगु ज्या याय् ।’ मन्त्री बास्कोटां धयादिल ।
२०१८ सालय् हे लिपुलेक क्षेत्रय् जनगणना जूगु व राजश्व म्हयेगु नितिं अड्डात दुगु वय्कलं न्ह्यथनादिल । कूटनीतिक व राजनीतिक तगिमं हे थुगु समस्या ज्यनीगु नं बास्कोटां विश्वास प्वंकादिल ।
सरकार गम्भीरतापूर्वक देसया सीमा रक्षा, सार्वभौम स्वाधीनताया रक्षाया नितिं प्रतिबद्ध जूगु नं प्रवक्ता बास्कोटां धयादिल । लिपुलेक व कालापानीइ जक सीमा समस्या मदुगु न्ह्यथनादिसें ऐतिहासिक तथ्यया लिधंसाय् सीमा समस्याया समाधान मालेगु नं मन्त्री बास्कोटां धयादिल ।
‘सीमालिसे सम्बन्धित विषयवस्तु खालि अनया जक मखु, मेमेथाय् च्वंगु सीमालिसे सम्बन्धित विषय ज्यंकेगु ल्यं दनि ।’ मन्त्री बास्कोटां धयादिल ।
शंखधर दिवस हन
नृपेन्द्रलाल श्रेष्ठ | कछलाथ्व दशमी ११४० (नोभेम्वर ७ २०१९)
नेपाल संवत् न्हूदँ राष्ट्रिय समारोह समिति ११४० शंखधर दिवस उपसमितिया ग्वसालय् येँया १५ वडाय् लखतीर्थय् थौं छगु ज्याझ्वः यासे शंखधर दिवस हने ज्या जुगु दु ।
नेपाःया मौलिक संवत नेपाल संवतया प्रवर्ततक शंखधर साख्वाःयात सरकारं कछलाथ्व दशमी कुन्हु राष्ट्रिय विभूति घोषणा याःगु दिंयात लुमका शंखधर दिवस हनाः वयाच्वंगु खः । थौया ज्याझ्वलय् शंखधरया किपातय् स्वांमा देछाना ज्याझ्वः न्ह्याकुगु खः।
थौं जुगु उगु ज्याझ्वलय् मूपाँहा येँ महानगरपालिकाया मेयर विद्यासुन्दर शाक्य झायादीगु खःसा सांसद जीवनराम श्रेष्ठ, १५ वडाया जनप्रतिनिधिपिं नाप नेपालभाषा ख्यःया हनेबहःपि, लखुतीर्थ संरक्षण समितिया नायः सुवर्ण डंगोललिसें १५ वडाया थीथी क्लब, संघसंस्थाया दुजःपिं उपस्थित जूगु खः ।
न्हूदँ समारोह समिति ११४० या नायः रमेश महर्जनया सभाध्यक्षताय् जूगु उगु ज्याझ्वलय् शंखधर दिवस उपसमितिया कजि उदय पसः खलःपाखें लसकुस यानादीगु खः।
