Display Style:
Column Style
भिंतुना कालबिल ज्याझ्वः
नृपेन्द्रलाल श्रेष्ठ | कौलागा त्रयादशी ११३९ (अक्टुवर २६ २०१९)
उपत्यका सडक बिस्तार पिडित सर्घष समितिं थौं स्वन्ति नाप नेपाल संवत ११४० या लसताय् भिंतना कालबिल ज्याझ्वः याउगु दु ।
कालिमाटि एफ टेनय् जुगु उगु ज्याझ्वलय् सर्घष समिति अध्यक्ष सुमन साय्मि, सर्घष समितिया सल्लाहकार अधिवक्ता शंकर लिम्वु, प्रा.डा. कृष्ण भट्टचनपिन्स न्हुगु दँ ११४०, स्वन्ति नाप छठ पर्वया लसताय् भिंतुना देछाना दिगु खः ।
नारायण परिवार क्लवपाखे भिंतुना ज्याझ्वः
नृपेन्द्रलाल श्रेष्ठ | कौलागा त्रयादशी ११३९ (अक्टुवर २६ २०१९)
येँया १२ वडाय् च्वंगु नारायण परिवार क्लवपाखे न्हुदँया लसताय् भिंतुना कालबिल ज्याझ्वः जुगु दु ।
उगु ज्याझ्वलय् मूपाँहा कथं येँ महानरगपालिकाया मेयर व बिशेष पाँहा कथं उप मेयर हरिप्रभा खड्गी श्रेष्ठ झायादिगु खः ।
मूपाँहा मेयर शाक्यं नेपाल संवत ११४०या लसताय् भिंतुना देछानादिसे वयकल थः मेयर मजुगु इलय् न थुगु संवतयात राष्ट्र मान्यता बिइकेगुलि फुगु ग्वाहालि यानागु दु धयादिल ।
वयकल थौंकन्ह्य सम्पदाप्रेमी धका थःगु ज्याय् यक्को अवरोध यानागु खँ कनादिसे महानगरं लानिपूखु दयेकगु इलय् ढलान यानागु इलय् अवरोध यागु खँ कनादिसे आ ढलान याना दयकल
न अन मपःगु धका धयादिगु खः ।
उगु ज्याझ्वलय् पुंलाम्ह स्वास्थ्य मन्त्री तिर्थराम डंगोल, येँ मनपा १२ वडा अध्यक्ष बिकाश डंगोलपिँ न पाँहा कथं झायादिगु खः ।
१७ वडा पाखे भिंतुना कालबिल ज्याझ्वः जुल
नृपेन्द्रलाल श्रेष्ठ | कौलागा त्रयादशी ११३९ (अक्टुवर २६ २०१९)
न्हूदँया लसताय् येँ महानगरपालिका १७ वडा पाखे भिंतुना कालबिल ज्याझ्वः जुगु दु ।
येँ महानगरपालिका १७ वडा अध्यक्ष नबिन मानन्धरं नेपाल संवत धइगु नेपाःया मौलिक संवत खः धयादिसे थुकिया संरक्षण झीसं यायेमा झीसं हे ब्यवहारय् छ्यला बुलाय् हयेमाः धका न धयादिगु खः ।
थुगु ज्याझ्वलय् १७ वडाया नाप थीथी खलः प्ुचः न उगु उगु ज्याझ्वलय् ब्बति काःगु खः ।
न्हूदँ समारोह समिति पाखे नेपाल सरकारयात सुभाय् देछात
लहनान्युज | कौलागा एकादशी ११३९ (अक्टुवर २४ २०१९)
नेपाल सरकारं थ्व हे वइगु कार्तिक १३ गते बिदा ब्यूगुलिं नेपाल संवत न्हूदँ समारोह समिति ११४० या नायः रमेश महर्जनं थौं बिहिवाः छगू प्रेस बक्तब्य पित ब्यूसें सुभाय् देछानादिगु खः ।
उगु बक्तब्यय् दँय् पञ्चांग निर्णायक समितिं शास्त्रीय कथं म्हपुजा व किजापुजा यायेगु न्हिं क्वःछ्यूबले नेवाःतय्गु साँस्कृतिक परम्परा व व्यवहारया हुनिं ने.सं. ११४० कछलाथ्व दुतिया कार्तिक १३ गते किजापुजा यायेमाःगु जूगुलिं व नेवाः समुदायया मागयात थुगु समारोह समितिपाखें नेपाल सरकारयात जानकारी बियागुयात सकारात्मक कथं कासें थुगु न्हि कुन्हु सार्वजनिक बिदा बिइगु नेपाल सरकारया निर्णययात लसकुस यानाच्वना ।
नेपाल सरकारया थुगु निर्णयलय् साँस्कृतिक परम्परा व विधि ब्यवहारया महत्व सकलस्यां नाला कायेमाःगु सन्देश ब्यूगु जुल धका न्ह्यथंनातःगु दु ।
अथे हे बक्तब्यया अन्तय् नेपाल संबतया तिथि टुट जुइगु व दोहरे जुइगु धैगु शास्त्रीय समस्या खः, अथेखःसां तिथि कथं नखः चखः जात्रापर्व हनेगु झ्वलय् व्यवहारिकता व साँस्कृतिक जीवन परम्परायात लिच्वः लाके मबिइगु व सामाजिक साँस्कृतिक एकता क्वातुकेगु सकलसिया कर्तव्य व दायित्व जूवइ । उकिं लिपा लिपा नेपाल सरकारं पञ्चांग निणार्यक समितियात माः कथं सहलह यानाः समस्याया न्ह्यो हे समाधान याः धैभन निर्देशन बिइ धैगु भलसा कासें हाकन छक्वः नेपाल सरकारं ने.सं. ११४० कछलाथ्व दुतिया कार्तिक १३ गते सार्वजनिक बिदा घोषणा याःगुलिं सुभाय् देछानातःगु दु ।
अथे हें नेपाल सरकारं राष्ट्रिय संबत् घोषणा यानातयेधुंकुगु नेपाल संबत् कछलाथ्व पारु न्हूदँ कार्तिक १२ गते थःथःगु त्वाः सहरय् थीथी लसता ज्याझ्वः यानाः हनेत सकलसित इनाप यासें येँय् बसन्तपुलिइ थुगु न्हि खुनु सुथसिया ७ ता इलय् मुनाः न्ह्याइगु साँस्कृतिक ¥याली व अनं लिपा जुइगु भिन्तुना सभाय् ब्वति कयादीत इनाप नं याःगु दु ।
न्हूदँया शुभकामना सभाय् वये’ –प्रम ओली
लहनान्युज | कौलागा दशमी ११३९ (अक्टुवर २३ २०१९)
प्रधानमन्त्री केपी शर्मा ओलीं न्हूदँ ११४० या लसताय् येँया बसन्तपुरय् ग्वसाः ग्वइगु न्हूदँ भिंतुना सभाय् ब्बति कायेगु बचं ब्यूगु दु ।
प्रम ओलीं थौं बुधवाः प्रधानमन्त्री निवास बालुवाटारय् नेपाल संवत न्हूदँ राष्ट्रिय समारोह समिति ११४० या प्रतिनिधि मण्डललिसे नापलायेगु झ्वलय् उगु खँया जानकारी ब्यूगु खः ।
प्रम ओलीं थः नेपाल संवतया ¥याली व सभाय् प्रधामन्त्री मजुयागु इलय् नं उपस्थित जुयागु लुमंकुसें थुगु दँया न्हूदँय् ग्वसाः ग्वइगु सभाय् विशेष रुपं उपस्थित जुयाः येँया जनतायात छुं धायेगु इच्छा दूगु विचाः तकं प्वंकूगु खः ।
लिसें प्रम ओलीं नेवाः समुदायपिन्सं कार्तिक १३ गते किजापूजा याइगु जूगुलिं उगु दिं सार्वजनिक विदा बिइगु जानकारी बिसें नेपाःया संस्कृति, परम्पराय् नेपाल सरकारया सदां ग्वाहालि दइगु विचाः नं प्वंकूगु दु ।
न्हूदँ समारोह समिति ११४० या नायः रमेश महर्जनया नेतृत्वय् वंगु उक्त प्रतिनिधि मण्डलय् नेपाल कम्युनिष्ट पार्टीका सचिवालय सदस्य व पार्टी प्रवक्ता नारायणकाजी श्रेष्ठया न विशेष उपस्थिति दूगु खः ।
समारोह समिति ११४० का नायः महर्जनं प्रधानमन्त्री ओलीयात कार्तिक १२ गते येँया बसन्तपुरय् ग्वसाः ग्वइगु न्हूदँ भिंतुना सभाय् विशेष पाहाँया रुपं उपस्थित जुइत इनाप यासें नेपाल संवत सम्बन्धी यायेमाःगु कार्ययोजनायात कयाः ध्यानाकर्षण पौ लःल्हाःगु खः ।
अथेह प्रम ओलीलिसे नापलाये ज्याय् प्रतिनिधिसभाया सांसद जीवनराम श्रेष्ठ, ३ नम्बर प्रदेशया सांसद बसन्त मानन्धर, पूर्व पर्यटन व संस्कृति राज्यमन्त्री दिलीप महर्जन, न्हूदँ समारोह सल्लाहकार समितिया कजि लक्ष्मीदास मानन्धर, न्हूदँ समारोह समितिया पुलांम्ह नायः डा. चुन्दा बज्राचार्य, सुरेन्द्रवीर मालाकार लिसेलिसें समारोह समितिया दुजःपिनिगु उपस्थिति दूगु खः ।
