Display Style:
Column Style
विनियोजन विधेयक २०७६ यात कयाः सहलह न्ह्यात
लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः
प्रतिनिधि सभाय् विनियोजन विधेयक २०७६ अन्तर्गत थीथी मन्त्रालयया नितिं फ्याःगु शीर्षकयात कयाः सहलह शुरु जूगु दु ।
विनियोजन विधेयकया मन्त्रालयगत सहलहया न्हापांगु दिं थौं मंगलवाः युवा तथा खेलकूद शहरी विकास व अर्थ मन्त्रालयया नितिं विनियोजन याःगु धेबायात कयाः सहलह जूगु खः ।
उगु मन्त्रालयया नितिं विनियोजन याःगु बजेटयात कयाः थःथःगु धापू तयेगु झ्वलय् सांसदतसें कासाख्यःयात उपेक्षा याःगु द्वपं ब्यूगु दु । शीर्ष नेताया निर्वाचन क्षेत्रयात अप्वः बजेट फ्याःगु नं उमिसं द्वपं ब्यूगु दु ।
अथे हे बजेटयात व्यवस्थित यानाः विकास यायेगु स्वयां नं लाथेपाथे खर्च यायेकथ विनियोजन याःगु सांसदपिनिगु द्वपं खः ।
कन्हय् वन तथा वातावरण, महिला, बालबालिका तथा ज्येष्ठ नागरिक व कृषि तथा पशुपन्छी मन्त्रालयया नितिं विनियोजन याःगु शीर्षकयात कयाः सहलह जुइ ।
विनियोजन विधेयकलिसें आश्रित राष्ट्र ऋण म्हयेगु विधेयक व ऋण तथा जमानत नीस्वक्वःगु संशोधन विधेयक नं सरकारं वंगु विहिवाः हे मुँज्याय् टेबल यायेधुंकूगु दु ।
म्हिगः सोमवाःनिसें असार २ गतेतक विनियोजन विधेयकयात कयाः सहलह याकेगु व ३ निसें ६ गतेतक सम्बन्धित मन्त्रीं लिसः बीगु ज्याझ्वः संघीय संसद सचिवालयं क्वःछिनातःसां नं नेपाली कांग्रेसया संसदय् पंगः थनेवं म्हिगः सोमवाःया मुँज्या स्थगित जूगु खः ।
प्रतिनिधिसभाया मेगु मुँज्या कन्हय् बुधवाः सुथसिया ११ताः ईया नितिं सःतातःगु दु ।
विकासया आयोजनाय् अनुगमन
लहनान्युज | बछलाथ्व अष्टमी ११३९ ९जुन १० २०१९०
प्रदेश नं ३ या संसदीय समितिं प्रदेश मातहत सञ्चालन जुया च्वंगु विकासया आयोजनाया प्रगति विवरण संकलन यायेगु लागि टोली खटे याःगु दु । प्रदेशसभाया अर्थ नाप विकास समिति अन्तर्गतया योजना अनुगमन उपसमितिया टोलीं अनुगमन याः वःगु दु ।
उगु उपसमितिया संयोजक नारायण सिलवालया नेतृत्वय् धादिङ जिल्लाय् निर्माणाधीन प्यंगु योजना अनुगमन याःगु दु ।
अथेहे उगु टोलीं धादिङबेसीइ २ करोड ५७ लाख तकाया लागतय् निर्माणाधीन धोपलखोला ताः, २८ करोड लागतया धादिङबेसी–सङ्कोस–पिप्लिङ सतक, व ६० लाखया लागतय् दयेका च्वंगु निलकण्डा–१३ या सतक योजनायन अनुगमन याःवःगु खः। अनुगमनका झ्वलय् संसदीय टोलीं छु हे बाहानाय् निर्माण ज्या ढिला मयायेत निर्देशन न बिगु खः ।
उगु अनुगमन टोलीइ प्रदेश सांसदपिं डा। अजयक्रान्ति शाक्य, बिजुला बर्मा, शोभा शाक्य, आशामाया तामाङ व प्रदेशपाखे खटे जुपिं कर्मचारीपि न उगु ज्याय् वःगु खः ।
धादिङपाखे जिल्ला समन्वय समितिया उपप्रमुख बिन्दा बलामु, पूर्वाधार विकास कार्यालयया ईन्जिनियरपिं विजय बज्रचार्य, दीपकराज भट्ट व राजेन्द्र भण्डारीपिन्स अनुगमन याःगु खः न ।
मन्त्रीया गाडी खुसिइ दुन
लहनान्युज | ने.सं. ११३९ तछलाथ्व नवमि (११ जुन, २०१९)
भौतिक पूर्वाधार तथा यातायात मन्त्री रघुवीर महासेठ च्वनावंगु गाडी खुसिइ दुंगु दु ।
स्याङ्गजा जिल्लाया अर्जुन चौपारी ३, घट्टेय् च्वंगु दरौ खुसिइ मन्त्रीया झण्डावाल गाडि दुंगु खः । सहरे खुसिया ताँया शिलान्यास यानाः लिहां वयेगु झ्वलय् मन्त्री च्वनावःगु बा २ झ ४०२९ ल्यांया गाडी खुसिइ बच्छि दुंगु खः । मन्त्रीयात धाःसा सुरक्षाकःमितसें उद्दार याःगु खः ।
खुसिइ गाडी दुंगुलिं गाडीया इन्जिन हे बन्द जूगु दुसा क्रेनया ग्वाहालिइ गाडी पितहयेगु ज्या जूगु खः । मन्त्री धाःसा मेगु गाडीइ लिहांवःगु प्रमुख जिल्ला अधिकारी कोशहरी निरौलां जानकारी बियादीगु दु ।
जनताया धार्मिक साँस्कृतिक आस्थाय् प्रहार याःगु : राजेन्द्र श्रेष्ठ
नृपेन्द्रलाल श्रेष्ठ | बछलाथ्व अष्टमी ११३९ (जुन १० २०१९)
समाजवादी पार्टी, नेपालया सहअध्यक्ष राजेन्द्र प्रसाद श्रेष्ठं गुथि विधेयकया नामं जनताया धार्मिक साँस्कृतिक आस्थाय् प्रहार याना तधःगु गल्ती याःगु धका धयादिगु खः ।
छगु ज्याझ्वलय् सहअध्यक्ष श्रेष्ठं गुठी सम्बन्धी कानुनया एकीकरण व संशोधन याये त्यःगु विधेयकया सन्दर्भय् संघीय समाजवादी नेवाः संघ व नेवाः राष्ट्रिय परिषदया मंकाः ग्वसालय् ‘गुुठी विधेयक व नेवाः सरोकार’ विषयलय् विचार गोष्ठीइ अथे धयादिगु खः ।
उगु ज्याझ्वःया मूपाँहा श्रेष्ठं जेठ २६ गते येँया माइतीघर मण्डलाय् गुथि विधेयकया विरुद्धय् जुगु शान्तिपूर्ण जनप्रदर्शनय् प्रहरी हस्तक्षेप व अन्धाधुन्ध लाट्ठीचार्ज, लःया फोहरां छ्वाकां राज्य आतंक याःगु द्धपः न बियादिगु खः।
सहअध्यक्ष श्रेष्ठं गुठी संस्थान तक खारेज याये माःगु माग जुया च्वंगु इलय् प्राधिकारयुक्त संस्था दयेका संयुक्त राष्ट्रसंघ व आइ.एल.ओ. १६९ या प्रदत्त परम्परागत कानुन छ्यले दइगु आदिवासी पिनिगु अधिकारया विरुद्ध खः धका धयादिगु खः ।
उगु ज्याझ्वलय् पंचलाल महर्जन, केदारभक्त माथेमा, हिसिला यमि व नरेशवीर शाक्य न थःथःगु नुँगः खँ तयादिगु खः ।
लोकसेवा आयोगं पिथंगु लिपांगु विज्ञापन रद्द यायेत निर्देशन
लहनान्युज | ने.सं. ११३९ तछलाथ्व अष्टमि (१० जुन, २०१९), सोमबाः
प्रतिनिधिसभा राज्य व्यवस्था समितिं स्थानीय तहया थीथी पदया नितिं लोकसेवा आयोगं पिथंगु लिपांगु विज्ञापन रद्द यायेत निर्देशन ब्यूगु दु ।
समितिया थौं सोमबाः च्वंगु मुँज्यां उगु विज्ञापन संविधानया मर्म व भावनाकथं खनेमदुगु न्ह्यथसें विज्ञापन तत्काल रद्द यायेत याकेत संघीय मामिला तथा सामान्य प्रशासन मन्त्रालय व लोकसेवा आयोगयात निर्देशन ब्यूगु खः ।
थ्व स्वयां न्ह्यः मुँज्याय् संघीय मामिला तथा सामान्य प्रशासन मन्त्री लालबाबु पण्डितं संविधान व कानून दुने च्वनाः बिधि व प्रकृया पूवंकाः आवश्यकता व औचित्यया लिधंसाय् विज्ञापन यानागु धकाः उकिया प्रतिरक्षा यानादीगु खः ।
समितिं प्रदेश व स्थानीय तहया कार्यक्षेत्र, आवश्यकता, विशिष्टता, अपनत्व व पूर्ण सहभागिताय् प्रदेशनापं स्थानीय तगिंया संगठन व व्यवस्थापनया सर्वेक्षण यानाः वास्तविक दरबन्दी ल्याः यकीन जुइधुंकाः जक समानुपातिक समावेशी सिद्धान्तया लिधंसाय् प्रचलित कानूनकथं प्वनाच्वंगु पद पूर्ति यायेत फुक्क प्रकृया न्ह्याकेत मन्त्रालययात निर्देशन ब्यूगु खः ।
लोकसेवा आयोगं वंगु जेठ १५ गते स्थानीय तहया थीथी ९,१६१गू पदया नितिं विज्ञापन चायेकूगु खः ।
थ्व स्वयां न्ह्यः मुँज्याय् सांसदतसें प्रदेश लोकसेवा आयोगं यायेमाःगु ज्या संघीय लोकसेवापाखें याकेत स्वयेगु नापं संविधानं आत्मसात याःगु समानुपातिक व समावेशी सिद्धान्त अःखः वनाः तःधंगु ल्याखय् स्थानीय तगिमय् कर्मचारी भर्ना यायेगु ज्यां सरकार संघीयता व संविधानया भावना अःखः जक वनेत्यंगु खःला धइगु भान जूगु टिप्पणी याःगु खः ।
सांसद देवेन्द्रराज कँडेल, महेश्वरराज गहतराज, रेखा शर्मा, जनार्दन शर्मा, डिला संग्रौला, पम्फा भुषाल, रामसहायप्रसाद यादव, प्रेम सुवाल, छक्कबहादुर लामापिन्सं लोकसेवा आयोगया लिपांगु विज्ञापन संविधानया मर्म व भावनाकथं मजूगुलिं रद्द यायेगुया विकल्प मदुगु सुझाव बियादीगु खः ।
