Display Style:
Column Style
‘सरकारी कर्मचारीं राहत काये दइमखु’
नृपेन्द्रलाल श्रेष्ठ | चौलाथ्व एकादशी ११४०
येँँ महानगरपालिकां सङ्घीय सरकारं घोषण याःगु लकडाउन ई ज्वःछि असङ्गठित क्षेत्रया ज्यालादारी मजदूरत व न्हि खानाः नयेमाःपिन्त राहत इनेज्याय् न्हापांगु प्राथमिकताय् तःगु दु ।
येँ महानगरपालिकाया मेयर विद्यासुन्दर शाक्यं सरकारं उपलब्ध याकीगु रातह बालं च्वनीपिन्त जक मखसें छेँ दयाः नं न्हिथं ज्या यानाः नयेमाःपिन्त नं थुगु राहत बीगु धयादीगु खः ।
तर थुग राहत सरकारी सेवाय् ज्या याइपिं डेरावालतयसं धाःसा काये मदइगु मेयर शाक्यं स्पष्ट यानादिल ।
लहनान्यूजलिसे खँ ल्हासें मेयर शाक्यं राहत इनेज्या न्ह्याकेत महानगरपालिकां जनसङ्ख्याया आधारय् च्यागू लख, खुगू लख व प्यंगु लख तकाया दरं वडाय् धेबा निकासा यायेधुनागु जानकारी वयकलं बियादिल ।
राहत इनेबलय् दोहोरे जुइफुगु व त्वःफीफुगु संभावनाबारे लहनाया जिज्ञासाय् वयकलं धयादिल, ‘जिमिसं लक्ष्यित वर्गया प्रारम्भिक विवरण तयार यानागु दु व उकिया हे लिधंसाय् इनेज्या जुयाच्वंगु द । सुयां नं नये मखनीगु स्थिति मवयेमा धइगुलिइ जिपिं सचेत दु ।’
आःयात लकडाउन ई ज्वःछियात क्यालोरी ल्याःखानाः नसाज्वलं इनेज्या जूगु वयकलं धयादिल । वयकःया कथं राहत बीमाःपिनिगु यकिन विवरण थौंकन्हय् दुने हे ३२गुलिं वडां वइ ।
गुगु नं थासय् अत्यावश्यकीय ज्वलंया अभाव खनेदुसा ढुवानीइ सहजीकरण यानाबीगु प्रवन्ध नं महानगरपालिकं ताःलाकागु वयकलं जानकारी बियादिल ।
विपदया इलय् ग्याःचिकुया लकस मदयेकेत नं वयकलं विदेशं वःपिन्त सम्मानजनक व्यवहार यायेत नं इनाप यानादिल ।
‘विदेशं लिहावःपिं मनूतयत अपराधी थें मखु, सम्मानजनक व्यवहार यायेमाःं । इपि थः हे नं एकान्तवासय् अर्थात होम क्वारेन्टाइनय् च्वनाबीमाः । उगु इलय् वयकःपिं परिवारलिसे घुलमिल मयायेत नं जिं इनाप यानाः’ शाक्यं धयादिल ।
थ्व हे झ्वलय् सङ्क्रमणया आशङ्का दुपि मनूतयगु पहिचान व वयागु स्वास्थ्य परीक्षण सहज जुइमा धकाः महानगरपालिकां ‘कोभिड – १९ सर्भिलेन्स सर्भिस’ एप नं सञ्चालनय् हयागु खँ न्ह्यथनादिल ।
आः लकडाउनया इलय् हरेक मनूत छेँय् हे च्वनाः थः नं सुरक्षित जुया थः जःलाखला, समाज, देय् व दक्को मानव जातियात हेसुरक्षित याये धइगु भावना ब्बलनेमा धका शाक्यं कामना यानादिल ।
सर्वसाधारण नागरिकया लागिं राहत वा मेगु गुगु नं विषयस जानकारी वा ग्वाहालि कायेमाःसा महानगरपालिकाया हटलाइन ११८०इ फोन यायेत नं वयकलं इनाप यानादिल ।
न्हापाम्ह स्थानीय याके खने दत कोरोना संक्रमण
लहनान्युज | चौलाथ्व एकादशी ११४०, २२
नेपालय् न्हापां छम्ह स्थानीययाके कोरोना भाइरस (कोभिड–१९) या संक्रमण खनेदुगु दु ।
स्वास्थ्य तथा जनसंख्या मन्त्रालयं थौं शनिवाः स्वम्ह न्हुपि संक्रमित जुगु घोषणा याःगु दु ।
उकि निम्ह भारतपाखे वम्ह व छम्ह स्थानीय मिसा याके खने दुगु खः ।
थ्व स्वया न्ह्यः खनेदुपि दक्को मिजंपिं खः ।
थ्व स्वया न्ह्यः संक्रमण जुपि दक्को विदेश वःपि खः ।
मन्त्रिपरिषद्या बैठक थौं ४ बजे च्वनिगु
लहनान्युज | चौलाथ्व एकादशी ११४०, २२
सरकार. घोषणा याःगु लकडाउन व स्वास्थ्य सामग्री खरिद लगायतया विषयया सहलह यायेगु लागि थौं शनिवाःबार ४ बजे बालुवाटारय् मन्त्रिपरिषद्या बैठक च्वने त्यःगु दु ।
सरकारं थ्व हे चैत २५ तक याना तःगु लकडाउन घोषणाया अवस्थायात कया थुकियात हाकन निरन्तरता बिइ वा मबिइगु धका मन्त्रिपरिषदय् सहलह यायेत्यःगु खः ।
चागलय् हिंदान ज्याझ्वः जुल
लहनान्युज | चौलाथ्व एकादशी ११४०, २२
कोरोना भाईरस (कोभिड १९) या महामारी कथं हलियक हे आतङ्कित जुयाच्वंगु कारण संक्रमणया महामारीपाखे बच्चे जुइगु लागि नेपाल सरकारं लकडाउनया घोषणा याःगु इलय् हिंया अभाव मजुकेत येँया चागलय् हिंदना ज्याझ्वः जुगु दु ।
राकेश कर्माचार्यया संयोजकत्वय् जुगु उगु ज्याझ्वलय् १५ वडा दुने चागः, लखतिर्थ व धुम्बाख्यलय् च्वपि १३ म्हसिया हिं बिःगु खः । भक्तपुर रेडक्रस सोसाइटी मार्फत हिंया संकलन याःगुः ।
‘लकडाउनया इलय् हिंया अभाव फेशबुकमार्फत जानकारी वःगुलि चागः, लखतिर्थ व धुम्बाख्यया पासापिनिगु ग्वाहालि थुगु हिंदान यानागु खः धका संयोजक कर्माचार्य धयादिगु खः, छेँय् छेँय् वया हिं वया संकलन या वइगु जानकारी वःगुलि भक्तपुर रेडक्रस सोसाइटीया ग्वाहालि थुगु ज्या यानागु खः धका धयादिगु खः ।
‘थज्याःगु इलय् हिंया अभावं सुयागु ज्यान मवने माः धका न थुगु ज्या यानागु खः धका कर्माचार्यं कनादिगु खः । हिंया अभाव जुया वयाच्वंगु कारण रेडक्रसं छेँय् छेँय् वना हिं सकलन यायेगु ज्या याना वयाच्वंगु खः।
उगु ज्याझ्वलय् लक्ष्मण शाही, नविन्द्रमान सिं, अर्जुन महर्जन, मीरा कर्माचार्य, मंगल महर्जन, आदर्श विक्रम शाही, सुशिल रत्न तुलाधर, प्रगुन महर्जन, लोचन थापामगर, युनिक मान डंगोल, आयुष राज बलामी, प्रकाश अमात्य व विनय मुनिकारपिन्स हि बियादिगु खः ।
तोखा नगरपालिकाय् लकडाउनया अवस्था
नृपेन्द्रलाल श्रेष्ठ | चौलाथ्व दशमी ११४०
तोखा नगरपालिकाया उप मेयर ज्ञानमाया डंगोलं तोखा नगरपालिकाय् कोरोना संक्रमण नियन्त्रण व रोकथामया नितिं नगरपालिका सक्रिय दुगु धयादीगु दु ।
आःया नितिं संक्रमण न्यंकेमबीत सकलें पिहां मवःसे छेँय् हे च्वनेगु दक्कले बांलाःगु ज्या जूगुलिं लकडाउनयात पालना याकेगुपाखे विशेष ध्यान बियाच्वनागु उप मेय डंगोलं धयादिल ।
कोरोना भाइरस कोभिड १९ या खँय् सचेतना कार्यक्रम यायेधुनागु खँ तसें डंगोलं क्लोरिन वासः छ्वाकेगु ज्या नं जुयाच्वंगु जानकारी बियादिल ।
विदेशं वःपिनिगु धलः मुंकाः छेँ दुपिन्त होम क्वारेन्टाइनय् च्वनेत धयागु व छकू कोथाय् बालं च्वनाच्वंपिं न्याम्हेसित नगरपालिकापाखें हे क्वारेन्टाइनय् तयातइगु नं वयकलं धयादिल ।
‘विशेष अवस्थायात ध्यानय् तयाः नगरपालिकापाखें हे स्वथाय् क्वारेन्टाइनया व्यवस्था यानागु दु । छथाय् २५ सीट दुसा मेथाय् १० अले मेगु छथाय् ३ सीटया क्वारेन्टाइनया व्यवस्था यानागु दु’ डंगोलया धापू खः ।
लकडाउनया पूर्ण पालना याकेगु नितिं स्वयम्सेवकपिं खटे यानाः व्यवस्थापन यानाच्वनागु धासें छम्ह निम्ह पिहांवयाच्वनीगु बाहेक तोखाय् लकडाउनयात सकसिनं धइथें पालना यानाच्वंगु दुगु डंगोलं धयादिल ।
न्हि खानाः न्हि नयेमाःपिं विपन्न वर्गयापिनिगु तथ्याङ्क मुंकाच्वनागु व उगु तथ्याङ्क तयार जुयाकथं राहत प्याकेज घोषणा यायेगु नं वयकलं जानकारी बियादिल ।
खाद्यान्न लगायतया अत्यावश्यक ज्वलनय् नगरवासीतयत समस्या मजुइमा धकाः सुथय् निघौ व बहनी निघौ पसः चायेकेबीगु व्यवस्थाया लिसें कालो बजारी मजुइमा धइगु ल्याखं प्रत्येक वडापाखें जन प्रतिनिधिपिन्सं अनुगमन यानाच्वंगु दुगु नं वयकःया धापू खः ।
