थौ बुधवाः सेयर बजार ९.०९ ल्याखं थहावंना नेप्से परिसूचक २७०११ ल्याः थ्यःगु दु। बजाः थहावसा कारोबार रकम धाःसा म्हो जूगु दु।

म्हिगः १० अर्ब ४६ करोडया कारोबार जूगुलि थौ ७ अर्ब ९ करोड जक जुगु दु। थौ १४३ गु कम्पनीया भाः थहावःगु दु सा ८९ गु कम्पनीया भाः कुहावःगु दु। अथेहे ११ गु कम्पनीया भाः स्थिर जूगु दु। विकास बैंक समूह दकलय् अप्पो ३.३८ प्रतिशत थहावंगु दु।

अथेहे फाइनान्स १.६६, होटल लिसे पर्यटन ०.४५, हाइड्रोपावर १.२८, लगानी ०.२०, माइक्रोफाइनान्स ०.०७ व व्यापार ०.२७ प्रतिशत थहावंगु दु।

बैंकिङ सेक्टर ०.२६ प्रतिशतं कुहावःगु दु सा जीवन बीमा ०.१८, निर्जीवन बीमा ०.२१ व मेमेगु ०.०७ प्रतिशत घटे जूगु दु। उत्पादन समूह स्थिर जूगु दु। च्यागु कम्पनीया भाः १० प्रतिशतं थहावःगु दु।

कर्पोरेट विकास बैंक, सिन्धु विकास बैंक, नेपाल हाइड्रो डेभलपर्स, सप्तकोशी विकास बैंक, महिला लघुवित्त वित्तीय संस्था, कर्णाली विकास बैंक, जानाकी फाइनान्स व सपोर्ट माइक्रोफाइनान्सया भाः १० प्रतिशत थहवंगु दु।

गुराँस लघुवित्तया भाः १० प्रतिशत, युनिक नेपाल लघुवित्तया ७.०६ प्रतिशत कुहावःगु दु। कारोबार रकमया आधारय् ङादी ग्रुप पावर, जानाकी फाइनान्स, नेपाल फाइनान्स, हिमालय ऊर्जा विकास कम्पनी व बेस्ट फाइनान्स कम्पनी न्ह्यने लागु दु।

नेपाल राष्ट्र बैंकं थौं पिकाःगु थुगु आर्थिक दँया न्हापांगु स्वलाया प्रतिवेदन कथं गैरखाद्य वस्तुया तुलनाय् खाद्य वस्तुया मूल्यवृद्धि जूगु दु।

मूकथं तरकारी व गेडागुडीया मू थहाँवःगु खनेदूगु खः।“२०८१ असोजय् वार्षिक विन्दुगत उपभोक्ता मुद्रास्फीति प्यंगू दशमलव ८२ प्रतिशत दु। वंगु दँय् व हे लाय् मुद्रास्फीति न्हय्गू दशमलव ५० प्रतिशत जूगु खः”, प्रतिवेदनय् धयातःगु दु, “समीक्षा जुइगु लाय् खाद्यनापं पेयपदार्थ पुचःया मुद्रास्फीति न्हय्गू दशमलव १८ प्रतिशत व गैर–खाद्य नापं सेवा पुचःया मुद्रास्फीति स्वंगू दशमलव ४९ प्रतिशत दूगु खः।”

खाद्य नापं पेयपदार्थ पुचः दुने तरकारी उप–समूहया वार्षिक विन्दुगत उपभोक्ता मू सूचकाङ्क २५ दशमलव १५ प्रतिशतं थहांवःगु दु। गुगु दकसिबे अप्वःगु मूल्यवृद्धि खः । अथे हे, केँ व गेडागुडी १० प्रतिशत, खाद्य तथा खाद्यजन्य पदार्थ नौ दशमलव ५७ प्रतिशत व घ्यः नापं चिकं चार दशमलव ९८ प्रतिशतं थहाँवंगु खः।

थुगु ई दुने छुं छुं वस्तुया मू धाःसा कुहाँवःगु दु। न्या व ला उप–समूहया वार्षिक विन्दुगत उपभोक्ता मू सूचकाङ्क छगू दशमलव १८ प्रतिशत, मरमसला शून्य दशमलव ७९ प्रतिशत व चिनी नापं चिनीजन्य पदार्थ शून्य दशमलव ७८ प्रतिशतं कुहांवःगु खः। गैर–खाद्य नापं सेवा पुचः दुने थीथी वस्तु नापं सेवा उप–समूहया वार्षिक विन्दुगत उपभोक्ता मू सूचकाङ्क १० दशमलव ४९, अय्लालिसें त्वनेगु पदार्थया ६ दशमलव ३२, कापः व लकां छ दशमलव १२ प्रतिशत व घरायसी उपकरण प्यंगू दशमलव ८८ प्रतिशतं थहांवंगु दु। वं

गु असोजय् गां लागाय् वार्षिक विन्दुगत उपभोक्ता मू सूचकाङ्क न्यागू प्रतिशतं थहांवःगु दु धाःसा सहरी लागाय् वार्षिक विन्दुगत उपभोक्ता मू सूचकाङ्क प्यंगू दशमलव ७६ प्रतिशतं थहांवंगु दु। प्रदेशया कथं कोशी प्रदेशया वार्षिक विन्दुगत उपभोक्ता मुद्रास्फीति खुगू दशमलव २६, मधेश प्रदेशया न्यागू दशमलव ८, बागमती प्रदेशया प्यंगू दशमलव २४ व गण्डकी प्रदेशया स्वंगू दशमलव ९८ प्रतिशत दु।

अथे हे, लुम्बिनी प्रदेशया प्यंगू दशमलव ४२, कर्णालीया स्वंगू दशमलव २५ प्रतिशत व सुदूरपश्चिम प्रदेशया खुगू दशमलव ५६ प्रतिशत दु। स्वनिगःया वार्षिक विन्दुगत उपभोक्ता मुद्रास्फीति प्यंगू दशमलव ५०, तराईया न्यागू दशमलव २३, गुँइ प्यंगू दशमलव ३२ प्रतिशत व च्वापुगुँइ न्यागू दशमलव ०८ प्रतिशत दु।(रासस)

ऊर्जा, जलस्रोत नापं सिँचाइमन्त्री दीपक खड्का व विश्व खाद्य सङ्गठन (एफएओ)या प्रतिनिधि केन शिमिजु नाप लानाः सहलह ब्याकादिल।

ऊर्जा मन्त्रालयय् थौँ नाप लानाः जलवायु ह्यूपाःलिसें अप्वःयावंगु खाद्य व जल सङ्कटया थीथी विषयय् सहलह जूगु खः। ऊर्जामन्त्री खड्कां सन् १९७७ निसें एफएओं नेपाःया दिगो कृषि विकास, खाद्य सुरक्षा वृद्धि व ग्रामीण समुदायया जीविकोपार्जनय् याःगु ग्वहालियात च्वछानादिल।

वय्कलं नवप्रवर्तन, चीधंगु उत्पादनकर्ताया पहुँच व प्राविधिक कृषि प्रवर्द्धन याइगु एफएओया दृष्टिकोण नेपाःया दिगो विकास प्राथमिकतालिसे ज्वःलाः धयादिल। शिमिजुं जलवायु ह्यूपाःया हुनिं खाद्य सङ्कट अप्वःयाः वनाच्वंगुलिं उगु सङ्कट म्ह्वः यायेत एफएओं उत्थानशील संरचना दयेकाः खाद्यय् आत्मनिर्भर जुयाः न्ह्याःवनेगु मनतूंगु दु धकाः धयादिल।

वय्कःया कथं कृषि उत्पादन नापं जीविकोपार्जनया निंतिं दिगो सिँचाइ सुविधा उपलब्ध याकेगु बारे एफएओं ज्या यानावयाच्वंगु दु। मन्त्रालयया ऊर्जाविज्ञ प्रवल अधिकारी, सहसचिव जीवछ मण्डललिसेंयापिंसं उगु ज्याझ्वलय् ब्वति कयादीगु खः। (रासस)

राष्ट्रिय मानव अधिकार आयोगं विश्वसनीय आयोग निस्वनाः शान्ति प्रक्रियायात याकनं क्वचाय्केत सरकारयात इनाप याःगु दु।

नापं आयोगं पीडिततय् सन्तुष्टिइ ध्यान केन्द्रित यायेत इनाप यासें न्हापाया सिफारिस छ्लाय् हयेत व अन्तरराष्ट्रिय अभ्यास नापं मान्यता बमोजिम शान्ति प्रक्रिया क्वचाय्केत इनाप याःगु खः।

सरकार व तत्कालीन नेपाल कम्युनिष्ट पार्टी (माओवादी)नाप विस्तृत शान्ति सम्झौता जुयालिं न्ह्याःगु शान्ति प्रक्रिया १८ दँ क्यंगु सन्दर्भय् आयोगया प्रवक्ता डा टीकाराम पोखरेलं थौँ पिथंगु प्रेस विज्ञप्तिइ पीडिततय्त न्याय यायेगु राष्ट्रिय नापं अन्तरराष्ट्रिय प्रतिबद्धता पूवंकेत सरकारयात ध्यानाकर्षण यानातःगु दु।

बेपत्ता यानातपिं मनुतय् छानविन व सत्य निरुपण नापं मेलमिलाप आयोग ऐन, २०७१ नकतिनि संसद्ं संशोधन जुया प्वंनाच्वंगु आयोगतय् गठन प्रक्रिया न्ह्याकीगु खँयात आयोगं सकारात्मक रुपं कयागु धाःगु दु। सरकार व माओवादी दथुइ २०६३ मङ्सिर ५ गते विस्तृत शान्ति सम्झौता जुगु खः। (रासस)

प्रधानमन्त्री केपी शर्मा ओलीलिसे नेपाःया निंतिं अष्ट्रेलियाया राजदूत लिन जोन्स्टनं वय्कःया ज्याकुथिइ थौँ न्हिनय् नापलान दिगु दु।

उगु झ्वलय् वय्कःपिनि दथुइ नेपाल–अष्ट्रेलिया सम्बन्धया नापं निगू देय्या हित व च्यूताःया मंकाः विषयय् सहलह जूगु प्रधानमन्त्री नापं मन्त्रिपरिषदया ज्याकुथिं धाःगु दु।

नेपाः व अष्ट्रेलिया दथुइ ६४ दँ न्ह्यः कूटनीतिक सम्बन्ध स्वाःगु खः। (रासस)