Display Style:
Column Style
प्रम ओली स्वास्थ्य परीक्षण झ्वलय् अस्पताल भर्ना
लहनान्युज | सिल्लागा औंशी ११३९ (मार्च ६ २०१९)
प्रधानमन्त्री केपी शर्मा ओली नियमित स्वास्थ्य परीक्षण यायेगु झ्वलय् थौं त्रिवि शिक्षण अस्पताल वःगु इलय् अस्पतालय् भर्ना जुयादीगु दु ।
मुटु परीक्षणया लागि थौं बुधवाः सुथय् १० ताः इलय् महाराजगञ्जया मनमोहन कार्डियोथोरासिक भास्कुलर तथा ट्रान्सप्लान्ट सेन्टरय् वःगु इलय् प्रधानमन्त्री ओली भर्ना जुगु वयकःया सचिवालय पाखे धाःगु खः ।
सेन्टरया कार्यकारी निर्देशक प्रा. डा. उत्तमकृष्ण श्रेष्ठं प्रधानमन्त्रीयात अब्जरभेसनय् तया थप परीक्षण यायेगु उपयुक्त खःगुलिं अब्जरभेसन तइगु न्हिनय् १ः१५ ताः इलय् विज्ञप्ति पाखे जानकारी बिगु खः ।
प्रधानमन्त्रीया स्वास्थ्य परीक्षण प्रा. डा. अरुण सायमीया संयोजकत्वय् जुया च्वंगु दु । प्रधानमन्त्रीया स्वास्थ्य अवस्था सामान्य दुगु न अस्पताल जानकारी बिगु दु ।
यल महानगरया लुखाय् लः त्वनिगु एटीएम
लहनान्युज | सिल्लागा चर्तुदशी ११३९ (मार्च ५ २०१९)
यल महानगरपालिकाया लुखाय् ‘वाटर एटीएम’ सञ्चालन जुगु दु । नेपालय् हे न्हापागु पटक ‘वाटर एटीएम’ जुगुुु खः । थौं मंगलवाः खानेपानी मन्त्री बिना मगरं छगु ज्याझ्वः दथुइ उलेज्या यानादीगु खः । उगु ‘वाटर एटीएम’ छगु गिलास लः नितका ध्यवा त्वनेगु ब्यवस्था याना तःगु खः ।
काठमाण्डौ उपत्यका खानेपानी व्यवस्थापन वोर्डया लागनीं ‘वाटर एटीएम’ पानी पंधेरो सञ्चालन जुगु खः । थ्व ‘वाटर एटीएम’ पानी पंधेरोयात सञ्चालन यायेगु लागि सुपिङ इन्टरनेशनल नेपालं स्वला तक समन्वय याःगु खः ।
थुगु ब्यवस्थापन यायेत काठमाण्डौ उपत्यका खानेपानी व्यवस्थापन वोर्ड व ललितपुर महानगरपािलका याःगु खः ।
‘वाटर एटीएम’या उलेज्या लिपा मन्त्री मगर व महानगरपालिकाया उपमेयर गीता सत्यालं सःता लःत्वकुगु खः ।
थुगु ‘वाटर एटीएम’ यात काठमाण्डौ उपत्यका खानेपानी व्यवस्थापन वोर्डं काठमाण्डौ उपत्यकाय् १९ गु थासय् सञ्चालनय् हयेगु तयारी याना च्वंगु दु ।
संघीय समाजवादी नेवाः संघय् सत्यनारायण
लहनान्युज | सिल्लागा चर्तुदशी ११३९ (मार्च ५ २०१९)
संघिय समाजवादीया सह अधक्ष्य नाप प्रतिनिधिया सांसद राजेन्द्र श्रेष्ठं विकासया नामय् सम्पदा स्यका अतिक्रमणयात विकास मखु विनाश जक जुगु धकाः धयादीसे ‘छाँयादेवी कम्प्लेस, सप्तपाताल, मसान अतिक्रमण, खोकना–बुङमति क्षेत्रय्् समस्या लगायतया विविध समस्याय् थःगु न बिरोध दुगु खँ तयादील ।
उगु ज्याझ्वलय् पवित्र बज्राचार्य, डा. पुष्पराज राजकर्णिकार, न्हुच्छेलाल महर्जन, मनरत्न शाक्य, सिद्धिबहादुर जोशी, प्रेरणा शाक्य, नवीन श्रेष्ठपाखें भिंतुना प्वंकादीगु खः ।
उगु न्हुधाः जुगु समितिइ पुलांम्ह हे नायः सत्यनारायण डंगोलयात हे नायः जुगु दु सा नाप ४१ म्हसित सर्वसहमतिइ ल्यःगु दु ।
ज्याझ्वलय् लसकुस न्वचू खगेन्द्र बहादुर जोशीं यानदीगु खःसा सुभाय् न्वकू शेषनारायण महर्जनं तयादीगु खः ।
अथेहे आर्थिक प्रतिवेदन पुलांम्ह दांभरी बेखामान अवाले न्ह्यब्वयादीगु खःसा राजनीतिक प्रतिवेदन नायः सत्यनारायण डंगोलं न्ह्यब्वयादीगु खः ।
उगु ज्याझ्वलय् संघीय समाजवादी फोरम नेपाल केन्द्रीय समितिया सहअध्यक्ष राजेन्द्र श्रेष्ठं नेवाः संघया इञ्चार्ज शाक्य सुरेनपाखें न्हूगु समितियात दुजःपिन्त सपथ ग्रहण न याकादीगु खः ।
एसइइ परीक्षाय् ताःलाःपिं ब्वमिपिन्त हन
लहनान्युज | सिल्लागा त्रयोदशी ११३९ (मार्च ४ २०१९)
नेपालभाषा कयाः एसइइ परीक्षाय् ताःलाःपिन्त थौं छग्ु ज्याझ्वः दथुइ नेपालभाषा स्येनेकने पुचः पाखें हना ज्याझ्वः जुगु दु ।
मदुम्ह संरक्षक कुलवीर सिंह तुलाधरया जहान मूपाहाँ रत्नदेवी तुलाधर एसइइ परीक्षाय् ताःलाःपिन्त हनाादीगु खः ।
संस्थाया नायः उज्ज्वल तारा तुलाधरया सभाधक्ष्यताय् जुगु उगुु ज्याझ्वलय् छ्याञ्जे महेश्वर मानन्धरं न्ह्याकादीगु खःसा पुलांम्ह नायः रमिता बज्राचार्यं लसकुस न्वचू तयादीगु खः ।
उगु ज्याझ्वलय् सल्लाहकार दिपक तुलाधर, राजेन्द्र रञ्जित, सुनिता मानन्धरपिं पाहाँ कथं झायादीगु खः । श्रीकृष्ण मानन्ध व सुनिता मानन्धरं थःथःगु नुगःखँ तयादीगु खः ।
बुखँ–नेवाः सुचना केन्द्र किपा–राजेन्द्र रञ्जित
साहित्यिक चौतारीया न्याक्वःगु दँमुज्या क्वचाल
लहनान्युज | सिल्लागा द्धादशी ११३९ (मार्च ३ २०१९)
साहित्यिक चौतारी नेपालया न्याक्वःगु दँ मुज्या क्वचाःगु दु । साहित्यया विकास व विस्तार यायेगु मू उद्देश्य ज्वना २०७१ सालय् पलिस्था जूगु थुगु संस्थापाखें शनिवाः येँ छगु ज्याझ्वः यासे स्वम्ह कविपिन्त सम्मान न याःगु खः ।
नेपाली साहित्यया विकास व विस्तारया लागि अनवरत क्रियाशील साहित्यिक चौतारी नेपालं नेपाली भाषा व साहित्यया श्रीवृद्धिइ ब्यूगु योगदानया मूल्याङ्कन यासें नेपालभाषाया व नेपाली साहित्य नं लोकंह्वाम्ह शालिनकवि सुधीर ख्वबि, ग्रेस एफएमया आरजे व युवाकवि रामगोपाल आशुतोष व प्रखरकवि दीप्स शाहयात सम्मान याःगु खः ।
मूपाँहा व वरिष्ठ साहित्यकार प्रदीप नेपालं संस्थापाखें पिदंगु चौतारी नांया मुक्तक विशेषाङ्क व प्रवासय् च्वना साहित्य सेवा यानाच्वंपि नीनिम्ह मिसा मुक्तक च्वमिसापिनिगु मुक्तक मुनाया विमोचन यानादीगु खः ।
उगु ज्याझ्वलय् थःगु नुँगः खँ तयादीसे मूपाहाँ नेपालं कला, साहित्य व सङ्गीतया ख्यलय् प्रवासया उल्लेखनीय ग्वाहाली यानाच्वंगु खँ कनादिल ।
संस्थाया नेपालया न्हय्गु प्रदेशया प्रतिनिधितयेसं थःथःगु मुक्तक न्ह्यब्वःगु खःसा, विमोचित सफूयात डा भागवत आचार्यं समीक्षा यानादिगु खः । संस्थाया सल्लाहकार सावित्रा लुइँटेल घिमिरेया सभाधक्ष्यताय् जूगु उगु ज्याझ्वलय् संस्थाया महासचिव गीता भण्डारी न्ह्याकादीगु खः ।
