Display Style:
Column Style
छत्रपाटी निःशुल्क चिकित्सालयया दँमुज्या
लहनान्युज | सिल्ला षष्ठी ११३९ (फ्रेअवरी २५ २०१९)
छत्रपाटी निःशुल्क चिकित्साल अस्पतालया दँमुज्या वंगु सञ्चरवाः जुल ।
चिकित्सालयया नायः विजयबहादुर मालीया सभाध्यक्षताय् जूगु उगु मुँज्याय् दांभरि दिनकरमान सिंह प्रधानं आर्थिक वर्ष २०७४÷७४या आर्थिक प्रतिवेदन न्ह्यब्वयादीगु खःसा मूछ्याञ्जे जलकृष्ण श्रेष्ठं वार्षिक प्रगति प्रतिवेदन न्ह्यब्वयादीगु खः । न्ह्यब्वःगु निगुलिं प्रतिवेदन व लेखा परीक्षण प्रतिवेदन सर्वसम्मतं पारित जूगु खः ।
चिकित्सालयस थुगुसी मुक्कं १०१४७६ म्ह ल्वगियात चिकित्सा सेवा बीत ताःलाःगु दु । उकी मध्ये २२२० म्हेसित चिकित्सालयपाखें विशेष छ्यापं व सितिकं वासः व उपचार सुविधा ब्यूगु खः ।
उगु दँमुँज्याय् न्वकू विद्या वनमाली प्रधानं लसकुस यानादीगु खः ।
महानगरंफोहोर ब्यवस्थापन प्रबिधि परीक्षण यात
लहनान्युज | सिल्लाथ्व चतुर्दशी ११३९ (फ्रेअवरी १८ २०१९)
नगरय् उत्पादन जूगु फोहोर व्यवस्थापन प्रबिधियाया उपयोग यासें सम्भावित समस्या ज्यंकेगु कुतलय् येँ महानगरपालिकाया प्रमुख बिद्यासुन्दर शाक्यंइरमा इन्टरनेशनलपाखें प्रस्ताव याःगु “वेस्ट टु वेल्थ” (फोहोरयात मच्याकुसे, कुँ मवय्कूसे खरानी याय्गु) प्रबिधिया बिषयसजानकारी काय्धुंकाः उपयुक्त प्रविधिया परीक्षण याय्गु खँ धयादीगु दु ।
प्रमुख शाक्ययातनापलाय्त जापानया बरिष्ठ आविष्कारक ८२दँया यामाजी मासामुरा व इरमा इन्टरनेशनलया निर्देशक प्रभाकर शाहया पुचः वःगु खः ।
निर्देशक शाहयाकथं “वेष्ट टु वेल्थ” जापानया ३१गू थासय् तयातःगु दु ।
थुगु प्रविधिकथं म्हो क्षमताय् छघौया दुने १गू मेट्रिक टन व अप्वः क्षमता दुगुली ४गू मेट्रिक टन फोहर व्यवस्थापन जुइ ।
प्रविधियात कयाः जानकारी बीगु झ्वलय् महानगरया प्रवक्ता ईश्वरमान डंगोल, वातावरण व्यवस्थापन विभाग, अन्तर्राष्ट्रिय सम्बन्ध सचिवालयया अधिकारीपिनिगु ब्वति दुगु खः ।
कूलपुत्र प्रबज्या व शान्तिदीप प्रज्वलन ज्याझ्वः जुइगु
नृपेन्द्रलाल श्रेष्ठ | सिल्लाथ्व चतुर्दशी ११३९ (फ्रेअवरी १८ २०१९)
शाक्यमुनि बुद्ध जन्म जुया बिज्याःगु लुम्बिनीयात प्रबद्र्धन याय्गु झ्वलय् १११९ नेपाल कुलपुत्र प्रबज्या व शान्तिदीप प्रज्वलन याइगु जूगु दु ।
नेपाल भ्रमण वर्ष २०२०यात कयाः हलिंन्यंक सचेतना जागरण याय्गु तातुनां जुइत्यंगु थुगु ज्याझ्वः याय्गु नितिं अखिल नेपाल भिक्षु महासंघ, नेपाल पर्यटन बोर्ड, धर्मोदय सभा, लुम्बिनी बिकास कोष, युवक बौद्ध मण्डल, श्री शाक्यसिंह विहार, अक्षेश्वर महाविहार, हिरण्यवर्ण महाविहार, धर्मस्थलि अन्तर्राष्ट्रिय ध्यान केन्द्र व दि मिडिल वे मेडिटेशन इन्ष्टिच्यूतया पदाधिकारीपिं दथुइ पर्यटन बोर्डय् समझदारी पतिइ ल्हाःचिं तय्गु ज्या जूगु खः ।
प्रबज्या ज्याझ्वः वइगु फागुण ११ गते शुरु जुयाः चैत्र ३ गते क्वचाइगु खःसा हरेक मनूतय्गु मनया शान्तिपाखें विश्व शान्ति धइगु कामना यासें शान्ति दीप प्रज्वलन व ध्यान भावना याइगु ज्याझ्वः दु ।
उगु ज्याझ्वलय् उपराष्ट्रपति नन्दबहादुर पुन व पर्यटन संस्कृति नापं नागरिक उड्डयन मन्त्री रविन्द्र अधिकारीलिसें उच्च पदाधिकारीपिनिगु उपस्थिति दइगु नं जानकारी ब्यूगु दु ।
नेपाल मोडेल स्कुलय् विज्ञान व सांस्कृतिक प्रदर्शनी
लहनान्युज | सिल्लाथ्व चतुर्दशी ११३९ (फ्रेअवरी १८ २०१९)
येँया बसुन्धराय् चव.गु नेपाल मोडेल स्कूलय् वंगु माघ २८ व २९ गते न्हय्क्वःगु नेपाल मोडेल शैक्षिक मेला २०७५ (विज्ञान, गणित, चित्रकलानापं सांस्कृतिक प्रदर्शनी २०७४) जुल ।
उगु प्रदर्शनीया उलेज्या नेपाल ललितकला प्रज्ञा प्रतिष्ठानया संस्थापक कुलपति नापं वरिष्ठ कलाकार किरण मानन्धर व त्रिभुवन विश्वविद्यालय् वनस्पति केन्द्रीय विभागया प्रा. डा. सञ्जयकुमार झा नं मंकाःकथं यानादीगु खः ।
उगु प्रदर्शनीइ निगू दर्जन स्वयां अप्वः वैज्ञानिक प्रयोग, गणितीय प्रयोग व स्वंगू दर्जनस्वयां अप्वः चित्रकलालिसें साँस्कृतिक ज्याझ्वः जूगु खः ।
उगु प्रदर्शनीइ प्यद्वःम्ह ब्वँमिपिं, स्वसःम्ह स्यनामि व द्वःछिम्ह अभिभावकपिन्सं अवलोकन याःगु खः ।
सः छगू फरक अभिव्यक्तिस मथुरा साय्मि
लहनान्युज | सिल्लाथ्व एकादशी ११३९ (फ्रेअवरी १६ २०१९)
नेपालभाषा ख्यलय् भाषा साहित्य च्वन्ह्याकेगु तातुनाः सः छगू फरक अभिव्यक्तिया ग्वसालय् थौं शनिवाः स्वक्वःगु साहित्यिक मुँज्या यलय् जूगु दु ।
सुनिल बज्राचार्यं न्ह्याकादीगु उगु ज्याझ्वलय् बरिष्ठ साहित्यकार बाखं च्वमि मथुरा साय्मिया याकः बाखं ब्वनेज्या जूगु दु ।
च्वमि साय्मिं बाध्यात्मक कुसंस्कारयात हाचांगाये मफयाः थःमांयात वासःयाये मफयाः म्वाके मफुगु चीमिपिनिगु नुगलय् हे तिक्क मिनिगु बाखं, विकासया नामय् सरकारं निर्मम पूर्ण ढंगं दमन यानाः डोजर आतंक यानाः नेवाःतय्गु छेँ थुनाब्यूगु बाखं, माया मतिनाया बाखं लगायत मुक्कं न्ह्यपु बाखं इन्क्लाब, गुथि, संस्कार, घाः, ला नःम्ह बुद्ध, प्रेम परीक्षा, भुलं नःगु विष ब्वनाः न्यंकादीगु खः ।
उगु ज्याझ्वलय् ज्ञानी राजा मानन्धरया ‘मतिनाया सवाः’ (चिबाखं मुना) मथुरा साय्मि, नरेश अमात्य, सुधिर ख्वबि स्वम्हसिनं मंकाः कथं चिखिफ्यनादीगु खः ।
ज्याझ्वलय् उपन्यासकार मथुरा साय्मियात मतिनाया चिं सुधिर ख्वबिं लःल्हानादीगु खः ।
बुखँ – नेवाः सूचना केन्द्र किपा – राजेन्द्र रञ्जित
