Display Style:
Column Style
प्रेस चौतारीया नीदँ बुदिं हन
लहनान्युज | सिल्लागा चौथि ११३८ (फ्रेअवरी ४ २०१८)
प्रेस चौतारीया नीदँ दुगु लसताय् थौं छगु बिषेश ज्याझ्वः दथुइ मूपाँहा नेकपा एमालेया न्वकु बामदेव गौतम त्वाः देवाय् मत च्याका ज्याझ्वःया उलेज्या यानादीगु दु ।
उगु ज्याझ्वलय् बांलापि पत्रकार पिन्त मूपाँहा नेकपा एमालेया न्वकु बामदेव गौतमं सिरपा न लःल्हानादीगु खः ।
उगु ज्याझ्वलय् नेकपा माओवादीया प्रवक्ता पम्फा भुषाल, योगेश भट्टरइ नाप नेपाल पत्रकार महासंघया नायः गोबिन्द आचार्यया न उपस्थिति दुगु खः
पत्रकार दबू चितवन कचापाखें स्वंगू संस्थायात हन
लहनान्युज | सिल्लागा चौथि ११३८ (फ्रेअवरी ४ २०१८)
नेवाः पत्रकारतयेगु राष्ट्रिय संगठन नेवाः पत्रकार राष्ट्रिय दबूया चितवन कचां शनिवाः चितवनया भरतपुरय् छगू ज्याझ्वःया दथुइ स्वंगू संस्थाया न्हू निर्वाचित जुयादीपिं पदाधिकारी नापं दुजःपिन्त मंकाः कथं हंगु दु ।
उद्योग वाणिज्य संघ चितवन, चितवन उद्योग संघ व नारायणी कला मन्दिरया न्हू निर्वाचित जुयादीपिन्त नेवाः परम्परा कथं खेँ सगं बियाः नापं हना पौ लःल्हाना हनेज्या याःगु खः ।
नेवाः पत्रकार राष्ट्रिय दबूया केन्द्रीय नायः श्रीकृष्ण महर्जन मूपाहां जुयादीगु उगु ज्याझ्वलय विशेष पाहां प्रदेश नम्बर ३ या नितिं चितवनपाखें सांसद जुयादीम्ह मिलनवावु श्रेष्ठ जुयादीगु खःसा
ज्याझ्वः नेवाः पत्रकार राष्ट्रिय दबू चितवन कचाया कार्यबहाक नायः कमलमान श्रेष्ठया नासःसुइ जूगु खः ।
उद्योग वाणिज्य संघ चितवनया सभाहलय् जूगु उगु ज्याझ्वलय् भिंतुना न्वचू बिइगु ज्याझ्वलय् थी थी ब्यक्तित्वपिन्सं नेवाः पत्रकार राष्ट्रिय दबू चितवन कचापाखें न्हापांखुसि सार्वजनिक समारोह याना महत्वपूर्ण ज्या याःगु चर्चा यानादिसें थुगु ज्याझ्वलं राजनीतिक नेतृत्व, व्यवसायीक संस्था, कलाकारनिसें समुदाययात स्वाकेगु ज्या जूगु दु धकाः धयादिल ।
नेवाः पत्रकार राष्ट्रिय दबूपाखें नेवाः संस्कृति, नेपालभाषा संरक्षण सम्वद्र्धन यायेगु नाप नापं पत्रकारिता ख्यःयात विकास याना यंकेगु ज्याय् बः बिइमाः धकाः सम्मानित संस्थाया प्रतिनिधिपिन्सं न्वंवासें उकिया नितिं थःपिं नं नापं जाना वनेत तयार दु धकाः धयादीगु खः ।
नेवाः पत्रकार राष्ट्रिय दबू चितवन कचाया छ्याञ्जे सृजना ताम्रकारं न्ह्याकादीगु उगु ज्याझ्वलय् उद्योग वाणिज्य संघ चितवन, चितवन उद्योग संघ व नारायणी कला मन्दिरया प्रतिनिधिपिन्सं नापं नेपाल पत्रकार महासंघ, नेवाः देय् दबू, नेपाल आदिवासी जनजाति पत्रकार महासंघ, चितवनया थीथी खलः पुचः नापं गुथिया प्रतिनिधिपिन्सं भिंतुना न्वचू तयादीगु खःसा ज्याझ्वलय् स्थानीय नेवाः नापं प्रतिष्ठित ब्यक्तित्वपिनिगु उपस्थिति दुगु खः । ज्याझ्वलय् कलाकारपिन्सं सांस्कृतिक ब्वज्या तकं याःगु खः ।
रिता महर्जनया निचाः सिडि बिमोचन
नृपेन्द्रलाल श्रेष्ठ | सिल्लागा चौथी ११३८ (फ्रेअवरी ४ २०१८)
म्येहालामि रिता महर्जनया निचाः मा लुमन्ति निस्वना तःगुसीता मां संगीत किपूया ग्वसालय् रिता महर्जनया निचाः सिडि “Forgotten Melodies” व ” Rita at her Best” बिमोचन मूपाँहा बरिष्ठ गायक गोल्डेन भ्वाइस अफ नेपाल प्रेमध्वज प्रधान यानादिगु दु ।
उगु ज्याझ्वलय् जनकवि दुर्गालाल श्रेष्ठ व बरिष्ठ गायक योगेश बैद्ययात न हनेश ज्यानादीगु खः । मूपाँहा बरिष्ठ गायक गोल्डेन भ्वाइस अफ नेपाल प्रेमध्वज प्रधानं दोसल्ला न्ययेकादीगु खःसा बरिष्ठ सगीतकार नाप नेपाल संगीत तथा नाट्य प्रज्ञा प्रतिष्ठानया उपकुलपति शम्भूजीत बास्कोटां ं हना–पौ लःल्हादीगु खः सा सुवर्ण शाक्यं द्य देछानादी गु खः।।
।
उगु स्रष्टा सम्मानया ज्याझ्वलय्ं नेपाःया ं नां जाःपिं गीतकार ज कवि संगीतकार रत्न शमशेर थापा, , डा. कृष्ण हरि बराल, शक्ति बल्लभ, किरण खरेल, यादव खरेल, काली प्रसाद रिजाल, गणेश रसिक उन्नति बोहरा, चूडामणी देवकोटा पिन्सं थःथःगु नुगः खँ तयादीगु खः ।
उग् ज्याझ्वलय् एल्बमय् दुथ्याःगु छपू म्ये मय्जु रीतां महर्जन छपू म्यें हालादिगु खः ।
शिक्षाविद् सुवर्ण शाक्यंया सभाधक्ष्य जुगु थुगु ज्याझ्वलय मदुम्ह थः जहानया लुमन्तिइ संस्थाया संरक्षक कृष्ण हरि महर्जनजु नंं थःगु नुगः खँ तयादीगु खः ।
मदुम्ह माधव मूलया ‘जि’ दुने–मदुम्ह जि सफू पितब्वज्या
लहनान्युज | सिल्लागा तृतिया ११३८ (फ्रेअवरी ३ २०१८)
नेपालभाषाया बहु प्रतिभाशाली अन्तर्राष्ट्रिय स्तरया कवि माधव मूलया निगूगु कृति ‘जि’ दुने–मदुम्ह जि चिनाखँ मुना सफू नेपालभाषा सफू बहुउद्देश्यीय सहकारी संस्था लि.या ग्वसालय् मूलया जहान मय्जु मन्दरी मूलया नायःसुइ च्वसापासाय् शनिवाः पितब्वज्या जूगु दु ।
उगु कृति मदुम्ह कवि मूलया अतिकं स्याःन्याःम्ह पासा श्रीराम श्रेष्ठ व नविन चित्रकारपिसं मंकाःकथं चिखिफेनादीगु खः ।
ज्याझ्वलय् मदुम्ह मूलया लुुमन्तिइ वयेकःया नामं थीथी ज्याझ्वः याये १ लख व ५० द्वः तका ‘माधव मूल लुमन्ति कोष’ (अक्षय कोष) नीस्वनेगु खँ वयेकःया कान्छीम्ह म्ह्याय् डा. सुजु मूलं घोषणा यानादिल ।
उगु कोषया नितिं भाइबन्धु समूहपाखें ५० द्वः तका व मदुम्ह मूलया जहानपाखें १ गू लख दां नापं मुक्कं १ गू लख व ५० द्वः तका दां नेपालभाषा सफू बहुउद्देश्यीय सहकारी संस्था लि.या दांभरिं अष्टनारायण महर्जनयात लःल्हागु दु ।
ज्याझ्वलय् ई.सं. १९९० व २००० स अन्र्तराष्ट्रिय कविया रुपय् सिरपाः त्याकेत ताःलाःम्ह कवि मदुम्ह मूलया चिनाखँ ‘नकतिनिया कविता’ अंग्रेजीं भाय्हिलादीम्ह शिल्भिया श्रेष्ठ राजोपोध्याय, नेपालभाषाका न्ह्यलुवा मल्ल के. सुन्दर, कविद्वय श्रीराम श्रेष्ठ, नविन चित्रकारपिसं मदुम्ह मूलया मचांनिसें मदये न्ह्यःतक्कया भाषिक, राजनीतिक क्षेत्रय् यानदीगु योगदान व संघर्षमय जीवन बारे कुलादीगु खःसा संस्थाया छयाञ्जे रेवन्त लाल श्रेष्ठ सुभाय् न्वचू तयादीगु खः ।
उगु ज्याझ्वलय् बसन्त महर्जनं लसकुस न्वचू तयादीगु खःसा हरिप्रसाद श्रेष्ठं ज्याझ्वः न्ह्याकादीगु खः ।
किपा राजेन्द्र रञ्जित
बुखँ नेवाः सूचना केन्द्र
बूदिंया भिंतुना म्ये कासाय् ब्बति का पिन्त सुभाय् पौ लःल्हात
नृपेन्द्रलाल श्रेष्ठ | सिल्लागा तृतिया ११३८ (फ्रेअवरी ३ २०१८)
नेपालभाषाया ख्यलय् “बूूदिंया भिंतुना म्ये कासा (Cover Song Competiton) या फेसबुकपाखें म्ये दुथ्याकेगु ई माघ ८ गते क्वचाःगु दु ।थुगु कासाय् अमेरिका, क्यानाडा, नर्वे, मलेशिया लगायत थी थी देसं १२१ म्हसिनं ब्वतिकाःगु खः ।
पेज थ्री बाःछिपौया ग्वसालय् जुगु थुगु कासाय् दकले अप्वः ल्याः हये ताःलाम्ह मय्जु सुमन मानन्धरं २४ इन्चया चेज लिड टिभी छगः सिरपा त्याकादीगु खः ।
थौं हे छगु ज्याझ्वः यासें ब्बति कापि सकसित सुभाय् पौं मूपाँहा जनकवि दुर्गालाल श्रेष्ठं लःल्हानादीगु खः ।
कासाय् न्हाप ला म्हेसित २४ इन्चया चेज लिड टिभी छगः सिरपा नाप न्याम्ह बांलाःपिं (टप ५ म्येहालामि) म्येहालामिपिन्त आर्टोम्यूज रेकर्डिङ स्टुडियोपाखें संगीतकार जुगल डंगोलया संगीत, सुरजवीर बज्राचार्यया च्वसाय् नेपालभाषाया छपु न्हूगु म्ये रेकर्डिङया सिरपा देछायेगु जुगु ज्याझ्वः न दु ।
अथेहे थ्व हे वइगु चैत्र ९ गते पेजथ्री सनिलया नां नं ज्याझ्वः दु ।
थुगु सनिलय् नेपालभाषा लोकंह्वाःपिं कलाकारपिं वरिष्ठ म्येहालामि जुजुकाजी रंजित, निशा देसार, सरीता शाही, सतिष महर्जन, सानुबाबु महर्जन, भुपेन्द्र बज्राचार्य, रीतामहर्जन, सुरज ब्यञ्जनकार, रत्नशोभा महर्जन, दीपा महर्जन, पूर्णकाजी ज्यापु, रोजी श्रेष्ठ, विरज महर्जनपिन्सं म्ये ल्हालादीसा राजन शाही, मिनर्वा शर्मा राजोपाध्याय, आराध्यालक्ष्मी खड्गींपिन्सं हुलाप्याखं न्ह्यब्वयादी ।
