Display Style:
Column Style
गृहमन्त्रालयया आकस्मिक पत्रकार सम्मेलन
लहनान्युज | सिल्लागा अष्टमी ११३९ (फ्रेअवरी २७ २०१९)
पर्यटनमन्त्री रवीन्द्र अधिकारी नाप ७म्ह ताप्लेजुङय् हेलिकोप्टर दुर्घटना खराब मौसमया कारण जुगु धका प्रारम्भिक अनुसन्धानं क्यंगुु दु ।
सिंहदरबारय् गृहमन्त्रालयया आकस्मिक पत्रकार सम्मेलन यासें गृहप्रवक्ता रामकृष्ण सुवेदीं खराब मौसमं उगु दुर्घटना जुगु धका धाःगु खः ।
गृहप्रवक्ता सुवेदीं ‘स्थानीय प्रशासनं बिगु जानकारी कथं ताप्लेजुङया पाथिभरा मन्दिर दर्शन याये धुका लिहा वयेगु झ्वलय् छगु मिनेत लिपा हे दुर्घटना जुगु खः धका धागु खः’
गृहप्रवक्ता सुवेदी तेह्रथुमया चुहानडाँडाय् जुगु छगु ज्याझ्वलय् ब्बति कया वया मन्त्री अधिकारी नाप पाथिभरा दर्शन याना वगु इलय् थथे दुर्घटना जुगु खः ।
वयकया धापू कथं मन्त्री अधिकारी व वयकया गार्ड सेनाया जमदार अर्जुन घिमिरया शव पहिचान जुगुु मेमेपिनिगु शव पहिचान जुइ मफै च्वंगु दु धका न धयादीगु खः ।
पर्यटनमन्त्री रविन्द्र अधिकारी च्वनावःगु हेलिकोप्टर दुर्घटना
लहनान्युज | सिल्लागा अष्टमी ११३९ (फ्रेअवरी २७ २०१९)
पर्यटनमन्त्री रविन्द्र अधिकारी नाप ७ म्ह च्वनावंगु हेलिकोप्टर थौं ताप्लेजुङया चुहान डाँडा एयरपोर्ट निरीक्षण लिपा पाथिभरा द्यः दर्शन यानाः लिहां वयाच्वंगु इलय् दुर्घटना जूगु दु ।
उगु हेलिकोप्टरय् मन्त्री अधिकारीनाप ७ म्हं सीगु खः । हेलिकोप्टर येँपाखें सुथय् ८ः३० ता इलय् ब्वःगु खः ।
उगु हेलिकोप्टर दुर्घटनाय् लानाः मदुपिनिगु नां धलः थुकथं दु
रविन्द्र अधिकारी – मन्त्री, संस्कृति पर्यटन व नागरिक उड्डयन
आङछिरिङ शेपाः – अध्यक्ष, यति एयरलाइन्स
वीरेन्द्रप्रसाद श्रेष्ठ – उपमहानिर्देशक, नेपाल नागरिक उड्डयन प्राधिकरण
अर्जुनकुमार घिमिरे – मन्त्री अधिकारीया पिएसो
युवराज दाहाल – प्रधानमन्त्री ज्याकुथिया सल्लाहकार
ध्रुवदास भोछिमया – इन्जिनीयर, नेपाल नागरिक उड्डयन प्राधिकरण
क्याप्टेन प्रभाकर केसी – हेलिकोप्टर चालक
जगतसुन्दर ब्बनेकुथिं नीगुदँ बुदिं हन
लहनान्युज | सिल्ला षष्ठी ११३९ (फ्रेअवरी २५ २०१९)
जगतसुन्दर ब्बनेकुथिं नीगुदँ बुदिंया लसताय् ब्बनेकुथि अप्वो ल्याः हःपि सुजित श्रेष्ठ व रमन महर्जनयात बिरचि मोतिमाया सिरपा व न्याद्धः नगद अथेहे शान्ति सिरपा नाप नीद्धः नगद ज्याझ्वःया मूपाहा प्रदेश न.या सासद राजेश शाक्य) लःल्हानादीगुु खः ।
उगु ज्याझवलय् अक्षय कोषया लागि ग्वाहालि यानादीपि गुहेश्वरी मानन्धर व ज्ञानेन्द्र मानन्धरयात नाप ब्बनेकुथिं थी थी इलय् ग्वाहालि यानादीपिन्त न सुभाय् पौ लःल्हायेगु ज्या न जुगु खः ।
ब्बनेकुथिया सञ्चालक समितीया नायः समाजसेवी लक्ष्मीदास मानन्धरया सभाधक्ष्यताय् जुगु उगु ज्याझ्वलय् नेवाः देय् दबुया नायः नरेश ताम्रकार व नेपालभाषा केन्द्रिय बिभागया प्रमुख डा.ओमकारेश्व श्रेष्ठपिं पाँहा कथं झायादीगु खः ।
तःमुँज्या तःजिक हनेगु नितिं खलः पुचः नाप सहलह
लहनान्युज | सिल्ला षष्ठी ११३९ (फ्रेअवरी २५ २०१९)
हलिं नेवाः दबू (वल्र्ड नेवाः अर्गनाइजेशन)या स्वक्वःगु तःमुँज्या तःजिक हनेगु नितिं यलय् नेपालभाषाया थीथी ख्यःया प्रतिनिधिपिं लिसे सहलह जुल ।
दबूया नेपाः च्याप्टरया नायः शाक्य सुरेनया सभाध्यक्षताय् जूगु ज्याझ्वलय् वइगु ने.सं. ११३९ चिल्लागा अष्टमिनिसें दशमि तक्क (मार्च २८–३०) स्वन्हु यंक जुइगु तःमुँज्या ताःलाकेगु नितिं नेपालभाषा ख्यःया साहित्यिक, सांस्कृतिक, सांगीतिक, शैक्षिक, बौद्धिक व्यक्तित्वपिनिगु, सञ्चार ख्यःयागु ग्वाहालिं जक ताःलाइगु ग्वसाः खलःया कजि पुष्कर माथेमां कनादिल ।
सहलह ज्याझ्वलय् ब्वति कयादीपिं प्रतिनिधिपिन्सं हलिमय् नेवाः तय्गु एकता ब्वय्गु नितिं थःथःगु खलः पुचः दुने सहलह व्याकाः फूचाःगु ग्वाहालि जुइगु प्रतिबद्धता प्वंकादिल ।
सहलहया क्वछिनायात दबूया मुँज्याय् थ्यंकेगु बचं नं दबूया प्रतिनिधिपिन्सं बियादीगु खः । नापं नेपाःया नेवाः तय्त सरकारं यानाच्वंगु थीथी दमनयात दबाब बी कथंया प्रस्ताब तःमुँज्यां पास याय् माःगु नं न्ह्यथंगु दु ।
गंल्वय् सम्बन्धि सचेतना ज्याझ्वः
लहनान्युज | सिल्ला षष्ठी ११३९ (फ्रेअवरी २५ २०१९)
राष्ट्रिय क्षयरोग केन्द्र, ख्वपया ग्वाहाली नेपाल क्षयरोग निवारण संस्था, ख्वप जिल्ला कचापाखें थीथी समुदायया मिसापिन्त गंल्वय् सम्बन्धि सचेतना ज्याझ्वः याःगु दु ।
संस्थाया निवर्तमान सभापति बाबुकाजी श्रेष्ठं लसकुस यानादीगु उगु ज्याझ्वलय् दुजः रवि श्रेष्ठं ज्याझ्वःया उद्देश्ययात कयाः ध्वा थुइकादीगु खः ।
ज्याझ्वलय् ब्वति कयादीपिन्त थिमि स्वास्थ्य चौकिया इन्चार्ज रञ्जनाकुमारी शाहं छेँजःपिन्त धाय् मफूगु अवस्थाय् मेपिन्त नं गंल्वय् न्यना वने फइगुलिं मिस्तय्त थुकथंया सचेतना ज्याझ्वः यानागु धयादिल । वय्कलं गंल्वय् जुइगु कारण, वासःयाय्गु व मिसापिं सचेत जुइ माःगु कारणयात कयाः प्रशिक्षण बियादीगु खः ।
मध्यपुर थिमिया बालकुमारी स्वास्थ्य समाज, प्रिज्म साकोस, महिला स्वयम् सेविका समितिया दुजःपिं, जनप्रेमी कलेजया मिसा ब्वँमिपिं व कपाली समाजया मिसापिं यानाः नीन्याम्हेस्यां ब्वतिकयादीगु खः ।
नेपाल क्षयरोग निवारण संस्थां थुगुसी जक गं ल्वचं कःपिं म्हसीकाः वासः याय्गु मू तातुनां याःगु थुगु ज्याझ्वः पाखें ख्वपय् गंल्वय्या ल्वगिपिं म्हो जुया वनीगु विश्वास दुगु नं सभापति राम सिख्वः नं जानकारी बियादिल ।
