Display Style:
Column Style
ललितपुर सुन—चाँदी ब्यवसायी संघया न्याक्वःगु साधारणया
नृपेन्द्रलाल श्रेष्ठ | गुंलागा पंचमी ११३७ (अगष्ट १२ २०१७)
ललितपुर सुन—चाँदी ब्यवसायी संघया न्याक्वःगु साधारणया उलेज्या छगु ज्याझ्वः दथुइ मूपाहाँ नेपाल सुन चाँदी ब्यवसायी महासंघया नायः मोहनबहादुर सुनारं त्वाः देवाय् मतः च्याका उलेज्या यानादीगु दु ।
उगु ज्याझ्वलय् नेपाल सुन चाँदी ब्यवसायीया न्हुपि पदाधिकारी नाप यल महानगरपालिकाया मेयर उप मेयर पिन्तं नं ख्यः सगं बिया हने ज्या यागु खः ।
ललितपुर सुन—चाँदी ब्यवसायी संघया नायः किरणभाइ शाक्यया सभाध्यक्षय् जुगु उगु ज्याझ्वलय् महासंघया नायः मोहनबहादुर सुनार, ललितपुर प्रमुख जिल्ला अधिकारी राजकुमार श्रेष्ठ व यल उपमहानगर पालिकाया उपमेयर गीता सत्यालं थःथःगु नुगः खँ तयादीगु खः ।
यलय् उपाकलं सायाः झःझः धाल
लहनान्यूज | गुंलागा पंचमि ११३७ (अगष्ट १२ २०१७)
तसकं हे वा वःसां नं वाया हे दथुइ यलय् नरसिंह जात्रा उपाकलं सायाः झःझः धायेक न्यायेकूगु दु ।
यलया द्यःब्रम्हू अर्थात राजोपाध्यायपिनिगु उपाकर्म गुथि अन्तर्गत दँय्दसं भाद्र कृष्ण पंचमिया दिनय् न्यायेका वयाच्वंगु नरसिंह जात्राय् थुगुसी तसकं वःगु वाया दथुइ नं त्वाःत्वाःपतिं द्यः दर्शन यायेगु लिसें पुज्यायेत त्वाःत्वाःपतिं सर्वसाधारणत म्वःम्वः हे मुंगु खः । लिसें वां दायक हे भक्तजनपिन्सं नरसिंहलिसें यल देय् नं चाःहूगु खः ।
यल उपाकर्म गुथि अन्तर्गत षटकुलया राजोपाध्यायपिनि दथुइ ज्येष्ठताया लिधंसाय् पाः न्ह्याकीगु थुगु जात्रायात थुगुसी तुइलाक्व मंगःया घनश्याम शर्मा राजोपाध्यायया छेँय् नं न्ह्याकूगु खः । जात्राया पाः लाःम्हेसिया जिलाजं अथवा भिनामचा अथवा पुरोहितयात नरसिंह दयेकेगु परम्परा कथं थुगुसी पाःलाःम्ह शर्माया जिलाजं अन्जन राज राजोपाध्याययात नरसिंह दयेकाः यल देय् चाःहुइकूगु खः ।
नरसिंहलिसें लक्ष्मी, सरस्वती व प्रल्हादयात यलया सायाः रुटय् चाःहुकूगु खः । पाः लाःम्हेसिया छेँय् नं हे जात्रा पिकायेगु व क्वचायेकेगु परम्परा कथं पाः लाःम्ह शर्माया छेँ तुइलाक्वं जात्रा न्ह्याःगु खःसा तुइलाक्वं सौगः, नुगः ओकुबहाल, थाइना, चक्रबही, हौगः, तिच्छुँगल्ली, वला, पुन्चली, गाःबहाः, पिम्बहाः, बालिफः, क्वालखु जुयाः मंगलं तुइलाक्वय् हे थ्यंकाः जात्रा क्वचाःगु खः ।
द्यःगणपिं लिसें खुज्वः अप्सरापिं, भजन पुचःत, धिमेय् पुचःत व थीथी झाँकिलिसें पिकाःगु जात्रा तसकं झःझः धाःगु खः ।
थुगु जात्रा सुथां लाःसा दैवीप्रकोप, ल्वय् आदिं मुक्ति चूलाइगु, जात्राया झ्वलय् नरसिंहया ल्यूने घानातइपिं कापःया कतांमरि भागियाकूसा मस्तय् अरिं मचाइगु जनविश्वास दया वयाच्वंगु दु ।
यलय् कात्ति प्याखनय् किपाइम्ह नरसिंहयात उग्र रुपया नरसिंह कथं काइसा उपाकलं सायाःया नरसिंहयात शान्त रुप कथं काइ ।
आःतक्क ने.सं ८६९ निसेंया प्रमाण लुइधुंकूगु दुसां थुगु जात्राया इतिहास धाःसा यच्चुक सीदये फुगु मदुनि । जात्रालिसे सम्बन्धित उपाकर्म गुथियाके ने.सं. ८६९ निसेंया जात्राया पाः काःपिनिगु धलः दुसां वयां न्ह्यःया प्रमाणत ईया गुगुं कालखण्डय् थीथी घटनाक्रमय् न्हनावंगु वा न्हंकाछ्वःगु जुइफुगु विज्ञतयगु धापू दु ।
ताँ त्वःधुला निम्ह घाइते
नृपेन्द्रलाल श्रेष्ठ | गुंलागा चतुर्थी ११३७ (अगष्ट ११ २०१७)
दल्लु व बिजेश्वरीया दथुइ न्हुगु दयेकुगु ताँ थौ त्वःधुगु दु । दच्छि न्ह्यःतिनि देयेकुगु ताँ स्लाप तयेगु झ्वलय ताँ त्वधुगु खः ।
करिब साढे ५ बजे ति ताँय् स्लाप तयेगु इलय् थुगु घटना जुगु खः । नँयागु ताँय् स्लाप यागु भार फये मफया ताँ त्वधुगु खः ।
ताँ त्वधला निम्ह मनूया छ्य प्वागःगु दु । निम्ह धासाः सामन्य जक घाइते जुगु खः ।
थेच्वय मतया
नृपेन्द्रलाल श्रेष्ठ | गुंलागा दितिया ११३७ (अगष्ट ८ २०१७)
थौं स्वनिगःया थीथी नेवाः वस्ती थासय् थःथःगु पहः कथंया मतया नखः हंगु दु । थ्व हे झ्वलय् नेवाः वस्ती थेच्वय् मतयाः नखः तधंक हंगु दु । थुगुसीया मतया थेच्वय् नीइक्वःगु मतया खः ।
थौं स्वया नीदँ दँनिसें हना वयाच्वंगु थेच्वय् । थुगुसि नं माली गाउँ दाफा खलःया ग्वसालय् उगु कथंया व्वज्या हंगु दु ।
मतयाःया झ्वलय् थीथी कथं सामाजिक व राजनीतिक रुपं ध्याचू नकाः अथे ख्यालः क्यना वया च्ंवःगु खः । अथे हे बाजा गाजा सहित प्याखं ल्हुया वःगु खःसा ब्व छाना लगायत लाखे प्याखं तकं ल्हुया वःगु खः । थेच्वःया थीथी लागाय् चाःहिलेगु ज्या जूगु खः ।
धर्म नापं स्वापू दुगु कथं नापं मेमेगु इलय् क्यनेगु ज्या मजूगु कथंया सन्देश बिइगु कथंया नं ब्वज्या याना वःगु खः । अथे ब्वज्या मध्ये दक्ले बांलाःगु प्रस्तूतियात सिरपाः बिइगु नं याइ ।
किपुलिइ सापारु
नृपेन्द्रलाल श्रेष्ठ | गुंलागा दितिया ११३७ (अगष्ट ८ २०१७)
किपुलिइ सापारुया झ्वलय् धेधेपापा प्याखं क्यंगु दु । थौं जुगु उगु सापारुया दिनय् क्यनीगु थःगुु हे मोलिक रुपं कथंया प्याखंत मध्ये ख्वाःपाः पुया क्यनीगु विस्कं पहःया छगु प्याखं खः ।
तत्कालिन अवस्थाय् पृथ्वीनारायण शाह नं किपुलिइ आक्रमण याःगु इलय् किपूमि तय्त गद्दार याःम्ह धन्चा सिख्वाः व वय्कःया छेँजःपिं थें जुया इमित ध्याचू नका प्याखं ल्हुइकेगु याःगु प्याखं धइगु धेधेपापाः प्याखं खः । थुगु प्याखनय् मूल रुपं ह्याउँख्वाःपाः खःसा अथे हे म्हुकं ख्वाःपाः व न्यात्वाः नापं बापाः च्याः ख्वाःपाः पुया प्याखं ल्हुइगु याइ ।
ख्यालः वइगु कथं क्यना वयाच्वंगु थुगु प्याखं किपूया ऐतिहासिक घटना नाप स्वानाच्वंगु प्याखं खः । धेधेपाःपाः सापारु अर्थात सायाःया छगू बांलाःगु व आकर्षक संस्कृतिया रुपय् विकास जुइ धुंकूगु दु । दँय् दसं त्वाः त्वालं पाःपाः कया वयाच्वंगु उगु प्याखं क्यना हयेगु यात थाचिना हयेगु धकाः धाइ ।
थुगु प्याखं द्धलंद्धःम्ह मनूतय्गु दथुइ धाः बाजाया तालय् हुइगु प्याखं खः।
