Display Style:
Column Style
येँमनपा व पत्रकार दबू दथुइ अन्तरक्रिया
लहनान्युज | कछलागा द्धादशी ११३९ (दिसेम्वर ४ २०१८)
येँ महानगरपालिकाया मेयर विद्यासुन्दर शाक्य नाप नेवाः पत्रकार राष्ट्रिय दबू पाखें छगु अन्तरक्रिया ज्याझ्वः जुगु दु ।
उगु अन्तरक्रिया ज्याझुवलय् मेयर शाक्यं येँ महानगरपालिकाय् थः निर्वाचित जुइ धुकाः ज्या यानागु गतिबिधिया जानकारी बियादीगु खः ।
वय्कलं येँ महानगरपालिकाय् सम्पदा, संस्कृति, भाषाया उत्थान यायेगु ज्याय् थः न्ह्याबलेय् न्ह्यचिलेत तयार दु धकाः न धयादील । नाप भुखाचं स्यंगु देगः महानगरपालिका देयकेगु जुइ धका जानकरी न बियादील ।
महानगरपालिकां मरु सतः दयेकेगु ज्या जुयाच्वंगु दु धयादीसे याकन हे माजु देगः न निर्माण जुइगु क्रमय् दुगु जानकारी न बियादील ।
उगु ज्याझ्वलय् नेवाः पत्रकार राष्ट्रिय दबूया नायः श्रीकृष्ण महर्जनं, न्वकु नृपेन्द्रलाल श्रेष्ठ व सुरजवीर बज्राचार्य, महासचिव सुनिल महर्जन, दांभरी सुुरेन्द्रभक्त श्रेष्ठ मूदुजःपि पेरणा शाक्य, नजरराम महर्जन, नातिकाजी महर्जन व जितेन्द्र श्रेष्ठपिन्स ब्बति काःगु खः ।
अथेहे सल्लाहकारपिं सुरेशकिरण मानन्धर, नरेशवीर शाक्य, पुष्कर माथेमा सुजिव बज्राचार्य राजु शाक्य लगायत नेपालभाषाया माध्यमं पत्रकारिता यानाच्वंपिं थीथी पत्रिका, टेलिभिजन, अनलाइनया सम्पादकपिन्सं ब्वति काःगु खः ।
नेरेसो स्वय्म्भूया १५क्वःदँ मुँज्या क्वचाल
पुर्णिमा शाक्य | कछलागा द्धादशी ११३९ (दिसेम्वर ४ २०१८)
नेपाल रेडक्रस सोसाइटी, स्वयम्भू उपशाखाया १५क्वःगु दँमुँज्यावंगु सञ्चरवाः येँया कुलां भुलुया श्री भक्तविद्याश्रम ब्वनेकुथी जुल । येँ जिल्ला सभापति मथुराराम श्रेष्ठ मूपाहां कथं झायादीगु
उगु ज्याझ्वलय् नेपाल रेडक्रस सोसाइटीया पुलांम्ह केन्द्रीय उपाध्यक्ष विश्वकेशर मास्के व येँ महानगरपालिका–१८या वडानायः न्हुछेकाजी महर्जनपिं पाहां कथं झायादीगु खः ।
ज्याझ्वलय् छ्याञ्जे मञ्जु पाण्डें उप शाखाया प्रतिवेदन व दांभरि महेश्वर महर्जनं आर्थिक प्रतिवेदन न्ह्यब्वयादीगु खः ।
उपशाखाया सभापति राजेन्द्र श्रेष्ठया सभाध्यक्षताय् जूगु उगु ज्याझ्वलय्
उपस्थित जुयादीपिन्त शाखाया उपसभापति वीरेन्द्र बज्राचार्य लसकुस यानादीगु खः । ज्याझ्वः पदमकुमार श्रेष्ठं न्ह्याकादीगु खः ।
हेमराज सिरपाः इन्द्र मालीयात
लहनान्युज | कछलागा दशमी ११३८ (दिसेम्वर २ २०१८)
लोक साहित्य परिषद् यलया ग्वसालय् लिपि विशेषज्ञ व संस्कृतिविद् पं हेमराज शाक्यया लुमन्तिइ नीस्वना तःगु समालोचक नाप नेपालभाषाया तःखँग्वः धुकूया कोशकार इन्द्र मालीयात हेमराज सिरपाः लःल्हागु दु ।
उगु सिरपा लिपि विशेषज्ञ पं हेमराज शाक्यया लुमन्तिइ वयकःयाक छेँजःपिन्सं नीस्वनातःगु भाषा, साहित्य, संस्कृति, लिपि आदि ख्यलय् च्वछायेबहःगु कृति व योगदान बियावयाच्वंपिं व्यक्ति वा संस्थायात सम्मान स्वरुप लोक साहित्य परिषदपाखें थुगुु सिरपाः लःल्हायेगु यानावयाच्वंगु खः ।
छगु ज्याझ्वः दथुइ मूपाँहा शताब्दीपुरुष डा. सत्यमोहन जोशीं हनापौ नाप छगू लख तका ध्यबा समालोचक मालीयात लःल्हानादीगु खः ।
उगु ज्याझ्वलय् मुूपाँहा शताब्दीपुरुष डा.जोशीं नेपालभाषाय् समालोचक मालीं यानादीगु निबन्ध, समालोचक, हाइकु व नेपालभाषाया खँ ग्वः धुकूया योगदान प्रशंसा यानदील ।
परिषदया नायः प्रा. प्रेमशान्ति तुलाधरं सिरपाः त्याकादीम्ह माली छम्ह भाषाविद्, निबन्धकार, समालोचक व कोशकारया रुपय् म्हसिका बियादीगु खःसा ज्याझ्वः राजित श्रेष्ठं न्ह्याकदीगु खः ।
बुखँ नेवाः सुचना केन्द्र किपा राजेन्द्र रंजित
कवियत्री नारायणदेवी श्रेष्ठयात हनेज्या जुल
लहनान्युज | कछलागा नवमी ११३८ (दिसेम्वर १ २०१८)
नेवाः मिसा दबूया निक्वःगु बुदिंया लसताय् निम्ह नेवाः मिसापिंत हनेगु ज्या जुगु दु ।
थुगुसी धरान सुनसरी जिल्लाया न्हापांम्ह नेवाः मिसा समाजसेवी सरला कायष्ठ व मिसा अधिकार व आन्दोलनयात साहित्यया लँपु ज्वनाः दक्कलय् न्हापां वःम्ह कवियत्री नारायणदेवी श्रेष्ठयात हने ज्या जुगुु दु ।
शनिवाः नारायण देवी श्रेष्ठया छेँय् वना मिसा दबू नायः रश्मिला प्रजापतिं हना पौ लःल्हानाः दिगु खःसा मूछ्यान्जे सरिता श्रेष्ठं दोसल्लां न्येयेका हनेज्या याना दीगु खः ।
अथेहे कवियत्री श्रेष्ठया छेँ जःपाखे संस्थायात ग्वाहालि कथं ११,००२ तका ध्यबा न दबुया नायः प्रजापतियात लःल्हानादिगु खः ।
नेवाः मिसा दबूया बुदिंया लसताय् दँय् दँसं थी थी ख्यलय् योगदान यानादीपिं निम्ह नेवाः मिसायात हना वयाच्वंगु दु ।
मदुम्ह प्रा.डा.कमलप्रकाश मल्लयात बिचाः हायेकल
नृपेन्द्रलाल श्रेष्ठ | कछलागा नवमी ११३८ (दिसेम्वर १ २०१८)
छु दिं न्ह्यः मदुम्ह प्रा.डा.कमलप्रकाश मल्लयात थौं शनिवाः सुथय् न्याःगु खलः पुचलं नेपाः ब्याकेटय् बिचाः हायेका ज्याझ्वः यागु दु ।
थौं जुगु उगु मंकाः ज्याझ्वलय् नेवाः देय् दबू, आशा सफू कुथि, च्वसापासा, प्रतिभा साहित्यिक परिवार व नेपालभाषा एकेदेमिया ग्वसालय् बिचाः हायेका ज्याझ्वलय् प्रा.डा. मल्लया किपातय् स्वा देछाःगु खः ।
छगू मिनेट मौन धाराणा यानाः न्ह्यागु उगु ज्याझ्वलय् जनकवि दुर्गालाल श्रेष्ठ व लोककवि राजभाई जकःमि चिनाखँ न्यकादीगु खःसा वाङमय शताब्दी पुरुष डा. सत्यमोहन जोशी, बरिष्ठ पत्रकार कनकमणी दिक्षितपिन्स मदुम्ह प्रा.डा.मल्लया ब्यक्तित्वय् बिषलय् न्ववानादीगु खः ।
ज्याझ्वः शरद कसाः नं न्ह्याकादिगु खः ।
