Display Style:
Column Style
शाक्य महाविहारं गुथि विधेयकयात कया च्यूता
लहनान्युज | गुंलागा दशमी ११३९ (अगष्ट २५ २०१९)
येँ देय्या शाक्यत च्वनिगु महाविहारया संगठन शाक्य महाविहार संघया न्याक्वःगु बुदिं छगु ज्याझ्वः याना हंगु दु ।
थुकथं बुदिं हनेगु झ्वलय् महासंघं सरकारं पितहःगु गुथि विधेयक आःयात लित काःगु जूसां खारेज मयानिगु खँयात कया च्यूता प्वकुंगु दु । महासंघया बुदिंया ज्याझ्वलय् महासंघया नायः शुभकाजी शाक्यं थ्व खँ न्ह्यथनादीगु खः ।
महासंघया नायः शाक्यया सभाध्यक्षताय् न्ह्याःगु ज्याझ्वलय् प्रदेश नं ३ या सांसद राजेश शाक्य मूपाहाँ कथं झायादीगु खःसा वयकलं नेपालमण्डलया तःजिगु संस्कृति धइगु हे बौद्ध संस्कृति व बौद्ध परम्परा खः धका धयादिलसा थज्यागु ज्वमदुगु परम्परायात बौद्ध महाविहार संध जाना ल्यंका तःगु खः धका नं न्ह्यःथनादिल ।
शाक्य महाविहार संघया बुन्हिया ज्याझ्वलय् पुलांम्ह मन्त्री एवं बौद्ध विद्वान डा. केशव मान शाक्यं बुद्धवंशयात कया दुवाला दिल । नघः बहाःया रत्नमान शाक्यया उपस्थितिइ जूगु उगु ज्याझ्वलय् महासंघया न्वकु अमिरमान शाक्यं लसकुस यानादीगु खःसा ज्याझ्वः महासंघया छ्याञ्जे संघरत्न शाक्यं न्ह्याकादीगु खः ।
रञ्जना लिपि प्रवद्र्धन अभियान क्वचाल
लहनान्युज | गुंलागा दशमी ११३९ (अगष्ट २५ २०१९)
नेपाल लिपि गुथिया स्वलाया रञ्जना लिपि प्रवद्र्धन अभियानय् ग्वाहालि यानादीपिन्त येँ छगू तःजिगु ज्याझ्वः यासें हनेज्या जुगु दु ।
गुथिया संरक्षक एवं जनकवि दुर्गालाल श्रेष्ठ मूपाहाँ कथं झायादीगु उगु ज्याझ्वलय् संस्थाया नायः निरञ्जन ताम्राकारया सभाध्यक्षताय् जुगु खःसा पवित्र कसाः नन्ह्याकादीगु खः ।
ज्याझ्वलय् रञ्जना लिपि प्रवद्र्धन अभियानय् ग्वाहालि याना दिइम्ह प्रदेश ३ या सभासद माननीय राजेश शाक्ययात मूपाहाँ श्रेष्ठं हनापदिगु खः । अथेहे नेपाल लिपि व रञ्जना लिपिया प्राविधिक व डिजिटल ज्याझ्वः व एप दयेकेत ग्वाहालि यानादीपिं व रञ्जना लिपि क्यालिजात्रा अभियानय् ग्वाहालि यानादीपिन्त नं सुभाय् देछासे हनाबना याःगु खः ।
प्रदेश ३ सांसद माननीय राजेश शाक्य, रञ्जना लिपि प्रवद्र्धन अभियानया निंतिं विशेष आर्थिक ग्वाहालि यानादीगु खःसा आनन्द कुमार महर्जनं नेपाल लिपि ट्यूटोरियल भिडियो, नेपाल लिपि व रञ्जना लिपि एप, रञ्जना लिपि क्यालिजात्रा, पवन राजा महर्जनं –नेपाल लिपि व रञ्जना लिपि एप, अश्लेषा महर्जनं –नेपाल लिपि ट्यूटोरियल भिडियो, सुयोग्य रत्न ताम्राकारं –नेपाल लिपि व रञ्जना लिपि एप नापं रञ्जना लिपि क्यालिजात्रा, मच्छिन्द्र क्लबं रञ्जना लिपि क्यालिजात्रा अभियानया निंतिं आर्थिक ग्वाहालि, समिर कर्माचार्यं –रञ्जना लिपि युनिकोड फोण्ट दयेकाः, सुनिता डंगोलं –संयोजक, रञ्जना लिपि क्यालिजात्रा ग्वाहालि यानादीगु खः ।
रञ्जना लिपि क्यालिजात्रा अभियानय् विक्की बज्राचार्य, जयन्द्र राजभण्डारी, लुमिन ताम्राकार, शशाङ्क श्रेष्ठ, प्रमिला ताम्राकार, बिद्या सागर तुलाधर, लालिमा (लुमु) श्रेष्ठ, बिशाल राजभण्डारी, बिकास मान शाक्य, रजनी श्रेष्ठपिसं ग्वाहालि यानादीगु खः ।
बुखँ व किपाः नेवाः सुचना केन्द्र
अरबिन्द्रमानया नेतृत्वय् पत्रकार दबू् येँ जिल्ला
नृपेन्द्रलाल श्रेष्ठ | गुंलागा दशमी ११३९ (अगष्ट २५ २०१९)
नेवाः पत्रकार राष्ट्रिय दबू् येँ जिल्ला स्वक्वःगु सासा बांय्क्वेट बिशाल बजारय् जुगु दु ।
उगु ज्याझ्वलय् मूपाँहा कथं येँ महानगरपालिकाया प्रमुख मेयर विद्या सुन्दर शाक्य, विशेष पाहाँकथं वरिष्ठ फोटो पत्रकार गोपाल चित्रकार, पाँहा कथ प्रदेश ३ या सांसद राजेश शाक्य, जीवन डंगोल व केन्द्रीय नायः श्रीकृष्ण महर्जन झायादीगु खः ।
उगु ज्याझ्लय् मूपाँहा येँ मनपाया मेयर शाक्यं स्थानीय सरकार व पत्रकार नापा न्ह्यावने माःगु खँय् बः बियादिगु दु । पत्रकार दबूया दच्छि यकं ज्यायायेगु न्यागु लख व अक्षयकोषया लागि न्यागु लख बजेत तयाबियागु दु धयादिगु दु ।
अथेहे ज्याझ्वलय् खँ तयेगु झवलय् प्रदेश न ३ या सांसद राजेश शाक्यं पत्रकार दबूयात ग्वाहालि यायेगु निति थःम्ह प्रदेश सरकार पाखे ग्वाहालि यायेगु बचं न बियादिगु खः ।
दबूया नायः नातिकाजी महर्जनया सभाधक्ष्यताय् जुगु उगु ज्याझ्वलय् छ्याञ्जे प्रजित शाक्यं लसकुस न्वचू याना न्वकु रेखा शाक्यं न्ह्याकादिगु खः ।
उगु मुँज्यां अरबिन्द मान सिंहया अध्यक्षताय् न्हुग ज्यासना पुचः न ल्यःगु खः । उगु ज्यासना पुचलय् न्वकू प्रवीण महर्जन प्रजापति, छ्याञ्जे रत्नकाजी महर्जन, ल्यू छ्याञ्जे शरणहरि डंगोल व बिनिता खड्गी, दांभरिं राजेन्द्र मानन्धर ‘नीलः’ दुजःपिं शैलेश कुमार डंगोल, राजेन्द्र मानन्धर, रेखा शाक्य, रोजिता बुद्धाचार्य, मनोजरत्न शाही, बिजय कुमार सिंह, सहयोग रञ्जित, किचः सिंह ज्यापु व विमला मानन्धरपिन्त निरबिरोध ल्यःगु खः ।
किपुलिइ हना ज्याझ्वः नापं सांस्कृतिक ब्वज्या
नृपेन्द्रलाल श्रेष्ठ | गुंलागा नवमी ११३९ (अगष्ट २४ २०१९)
गोविन्द किपू फाउण्डेशनया न्याक्वःगु न्ह्यब्वया ज्याझ्वलय् जेष्ठ नागरिकनिसें थीथी ख्यःया विशिष्ट न्हय्म्ह ब्यक्तित्वपिन्त हनेज्या याःगु दु ।
शुक्रवाः भदौ ६ गते शुक्रवाः किपूया कुतिसाः त्वालय् फाउण्डेशनं छगू ज्याझ्वःयासें हंगु खः । ख्यालि जुजु मदनकृष्ण श्रेष्ठया मूपाहांसुइ जुयादीगु उगु ज्याझ्वलय् कुतिसाः त्वाःया नीस्वम्ह ज्याथः ज्याथीपिन्त हनेज्या याःगु खः । प्रदेश नं. ३ या सांसद विशेष पाहां जुयादीगु उगु ज्याझ्वलय् थीथी ब्यक्तित्वपिं पाहां जुयादीगु खः । ख्यालि जुजु मदनकृष्ण श्रेष्ठयात दोसाल्लां न्ययेका नापं तपुलिं पुइका हनादीगु उगु ज्याझ्वलय् सम्माननित जुयादीपिं सकलसित खेँसगं बिया नापं हना पौ लःल्हना हंगु खः ।
ज्याझ्वलय् थनि स्वीन्यादँ न्ह्यःनिसें गितार बादक जुया देशय् नापं विदेशय् तकं थःगु प्रतिभा न्ह्यब्वया वयादीम्ह सुल्तान अफ स्ट्रीङ येँया अनिला शाही, अथे हे थनि स्वीन्यादँ न्ह्यःनिसें नेवाः बाजाया गुजु जुयादीम्ह यलया हरिलाल श्रेष्ठ, थनि नीन्यादँ न्ह्यःनिसें नेपाःया पत्रकारिता ख्यःपाखें समाजय् हिउपाःया नितिं ज्वःमदुगु योगदान यानादीम्ह किपूया पत्रकार श्रीकृष्ण महर्जन, थनि नीन्यादँ न्ह्यःनिसें कलाकार जुया महत्वपूर्ण भूमिका म्हिता वयादीम्ह येँया पल्पसा डंगोल हंगु खः ।
थनि न्यीन्यादँ न्ह्यःनिसें ख्यालि कलाकार जुया समाजय् हिउपाःया नितिं भूमिका म्हतादीम्ह येँया सुरेन्द्र मानन्धर, थनि स्वीन्यादँ न्ह्यःनिसें म्ये हालादीम्ह गोविन्द उस्तादया शिष्य किपूया राजु महर्जन व थनि नीनिदँ न्ह्यःनिसें बासुरी बादन ख्यलय् तःधंगु भूमिका म्हितादीम्ह येँया विनय महर्जनयात हंगु खः ।
फाउण्डेशनया संरक्षक सुकराम महर्जनया नायःसुइ जूगु उगु ज्याझ्वलय् थीथी कलाकारपिन्त न्ह्याइपुक सांगितिक ज्याझ्वः न्ह्यब्वयादीगु खः ।
सांसदतपाखें चाबही–सक्व सतकखण्डया अवलोकन
लहना न्यूज | ने.सं. ११३९ गुंलागा अष्टमि (२३ अगष्ट, २०१९), शुक्रवाः
चाबही–सक्व सतकखण्डया अवस्था थुइकेत सांसदतसें थौं शुक्रवाः अवलोकन यानादीगु दु ।
प्रतिनिधिसभा, विकास तथा प्रविधि समितिया सभापति, दुजः व सतक आयोजनाया कर्मचारीलिसेया पुचलं चाबही, जोरपाटी जूसें सक्वतक थ्यनीगु सतकया अवलोकन यानादीगु खः ।
समितिया सभापति कल्याणीकुमारी खड्कां सतकया मर्मत नापं थुने ल्यंदनीगु छेँया अवलोकन यानादिसें ज्या याकनं क्वचायेकेत निर्देशन बियादिल । वय्कलं महानगरीय बृत्त बौद्धया भवन न्ह्यःनेया छुं छुं सरचना थुनेत तकं निर्देशन बियादिल ।
वि.सं. २०७२ सालय् निदँ दुने चाबही–सक्व सतकखण्ड विस्ताराय ज्या क्वचायेकेगुकथं सतक दयेकेगु ज्या न्ह्याकूगु खः । सतक दयेकेगु ई क्वचायेधुंकाः नं अझ तकं बच्छि ज्या हे क्वचाःगु मदुनि ।
सरकारं चाबहीनिसें सक्वतक २२गू मिटर ब्याः प्यंगू लेनया सतक दयेकेगु ग्वसाः ग्वःगु खः । काठमाण्डौं उपत्यका सतक विस्तार आयोजनां २०७२ जेठय् सतक दयेकेगु नितिं बोलपत्र आह्वान यानाः उगु हे सालय् असोजय् प्यंगू निर्माण व्यवसायीयात ठेक्क ब्यूगु खः ।
मुक्कं ११.४६ किलोमीटर दुगु उगु सतकखण्डय् प्यंगू कम्पनीं इलय् हे दयेके मफयेवं मेगु छगू कम्पनी यानाः न्यागू ठेकेदार कम्पनीं सतक विस्तार यानाच्वंगु दु ।
