Display Style:
Column Style
“पहिचान” विषयस व्यापक सहलह
नृपेन्द्रलाल श्रेष्ठ | दिल्लागा अष्टमी ११३८ ( अगष्ट ४ २०१८ )
‘पहिचान’ धइगु तसकं मज्जिमगाःगु व महत्वपूर्ण खँ खः । पहिचानं हे लिपातकं गौरवताया म्हसीका बीगु नितिं ग्वाहालि याइ ।
थ्व खँ वर्तमान इलय् वयाः अझ मज्जिमगाःगु व महत्वया विषय जूगु दु ।
नेवाः पत्रकार राष्ट्रिय दबूया ग्वसालय् जूगु अन्तरक्रिया ज्याझ्वलय् ब्वति कयादीपिं पत्रकारपिन्सं ‘पहिचान’या विषययात कयाः सहलह याःगु खः ।
थीथी दलया खोल न्ययाः नेपालय् राजनीति यानाच्वंगु दलया नेता तय्सं पहिचानया विषयस नेपाःमिपिन्त ललिपप क्यनाः ल्वाप्पा नकाच्वंगु गुलिखे घटनानापं यथार्थ सकसिगु न्ह्यःने दुगु उमिसं दावी याःगु दु ।
ज्याझ्वलय् ‘पहिचान’या विषयस एमफिल यानाच्वनादीम्ह उपेश महर्जनं विश्वय् हे पहिचानया आन्दोलनयात कयाः न्ह्यब्वय्गु ज्या जूगु खः । महर्जनं अमेरिकाथें जाःगु विश्वया हे तसकं वैभवशाली देशय् तकं अनया न्यय्गू राज्य मध्ये नीन्हय्गू राज्य पहिचानया नितिं संघर्ष यानाच्वंगु अजू चायापूगु यर्थाथता न्ह्यब्वयादीगु खः ।
नेवाः पत्रकार राष्ट्रिय दबूया नायः श्रीकृष्ण महर्जन, सुरजवीर बज्राार्य, सुनील महर्जन, नृपेन्द्रलाल श्रेष्ठ, सुरेन्द्रभक्त श्रेष्ठ, राजेश बज्राचार्यपिन्सं पहिचानया विषयस ३ नं प्रदेशया जनतायात अलमल याय्गु ज्या केन्द्र व राज्य सरकारपाखें जुयाच्वंगु नापं झंगः ल्हानाः प्रदेशया नामाकरण ‘पहिचान’ मदइकथं तय्गु कुतः यानाच्वंगुलिं खबरदारी याय्माःगु सुझाव बियादीगु दु ।
पत्रकार तालिम न्ह्यात
नृपेन्द्रलाल श्रेष्ठ | चौलागा दुतिया ११३८ (अप्रिल २ २०१८)
नेवाः पत्रकार राष्ट्रिय दबू ग्वसालय् गोल्डेन डायमण्ड एण्ड ज्वलेरीया ग्वाहालिं थौं छगु पत्रकार तालिम जुगु दु ।
निन्हु यकं जुइगु उगु तालिमय् वरिष्ठ पत्रकार धर्मेन्द्र झा पाखें समाचार, संकलन व लेखन अथेहे पत्रकार सुरजबीर बज्राचार्यपाखें रेडियो निंति च्वयेगु व ब्बनेगु, वरिष्ठ पत्रकार गर्जूधन राई पाखें टेलिभिजनया लागि च्वयेगु व ब्बनेगु तरिकाया बारे तालिम बियादीगु खः ।
यलया ताम्रकार समाजया भवनय् जुगु उगु तालिमय् ३० म्ह मल्याक मनू तयेस ब्बति काःगु दु ।
कन्हेय अनलाइन पत्रिकाया बिषयलय् युवराज गौतम, केपी दुंगाना व वरिष्ठ पत्रकार धर्मेन्द्र झा पाखे तालिम बियादी ।
क्षयरोग निवारण संस्थाया स्थापना हन
बाबुकाजी श्रेष्ठ | दिल्लागा चौथी ११३८ ( अगष्ट १ २०१८ )
नेपाल क्षयरोग निवारण संस्था ख्वपया ३९ क्वःगु स्थापना दिवसया लसताय् छगु ज्याझ्वः जुगु दु ।
उगु ज्याझ्वलय् मूपाँहा ३ नं. प्रदेशया सांसद् प्रतिमा श्रेष्ठं (उर्मिला) त्वाःदेवाय् मत च्याका उलेज्या यानादीगु खः ।
मूपाँहा श्रेष्ठं नेपाः संघीय गणतन्त्रात्मक राज्य प्रणालीया राज्य व्यवस्था वने धकुगु सा स्थानीय सरकारं जनस्वास्थ्य समस्याया रुपय् क्षयरोगयात नियन्त्रण यायेत माःगु ज्याझ्वः हये माःगु बिचाः तयादीगु खः ।
संस्थाया सभापति राम सिख्वःया सभाधक्ष्यत्वय् जुगु उगु ज्याझ्वलय् संस्थाया सल्लाहकार कृष्णलाल गोजा श्रेष्ठ, जिल्ला समन्वय समिति सामाजिक शाखा अधिकृत बल्देव घोरसाइने, पूर्व सभासद् सत्यलाल मुल, ज्याझ्वःया संयोजक लक्ष्मण सुजखु, निवर्तमान सभापति बाबुकाजी श्रेष्ठ व सचिव राजेश्वरी शिल्पकारपिन्स थःथःगु नुगः खँ तयादीगु खः ।
सर्लाहीइ नेपालभाषा रेडियाे ज्याझ्वः विषय छलफल
लहनान्युज | दिल्लागा द्वितिया ११३८ ( जुलाई ३० २०१८ ) |
सर्लाहीया शान्ति व सद्भावया सः ब्वयाः न्ह्यानाच्वंगु सामुदायिक रेडियाे एकता ९२.४ मेगाहर्जपाखें प्रशारण जुयाच्वंगु नेवाः ज्याझ्वः लाेकंह्वाःगु म्येयात कयाः सहलह ज्याझ्वः जुल । लालबन्दी नेवा: समूह व रेडियाे एकता लालबन्दीया मंकाः ग्वसालय् उगु ज्याझ्वः जूगु खः ।
यलया रमा बज्राचार्यं न्ह्याकादीगु थुगु ज्याझ्वःया प्रचार अप्वयेकेगु, ज्याझ्वः न्ह्याइगु र्इ शुक्रवाः न्हिनसिया १२ः१५ बजे ज्याझ्वः न्यनेतः सकसिनं र्इ बीगु, व बीत सर्लाहीया नेवाःतयत इनाप यायेगु नं सहलह जूगु खः ।
भाय् मसःगु हुनिं ज्याझ्वलय् भाय् स्यनेकथंया ब्व तनेगु नितिं इनाप नं जूगु थुगु सहलहय् भाय् स्यनेगु मती नं ब्वति कयादीपिन्सं प्वंकादीगु खः । नेवाः न्यनामि क्लब स्वनेगु विषय नं सहलह ब्याःगु थुगु ज्याझ्वलय् ज्याझ्वः निरन्तर जुइगु नितिं अार्थिक तिबः गुकथं बीगु धइगु विषयय् नं सहलह जूगु खः । नेपालभाषाया रेडियाे ज्याझ्वः न्ह्याकेगु व सहलहया पहलया नितिं स्टेशन म्यानेजर प्रकाश मैनालीयात सकसिनं सुभाय् नं देछाःगु खः ।
थुगु ज्याझ्वलय् रेडियाे एकताया स्टेशन म्यानेजर मैनालीनाप पूर्व पशुपंछी विकास मन्त्री शम्भुलाल श्रेष्ठ, नेवाः देय् दबूया शंकर श्रेष्ठ, नेपाली काँग्रेस सर्लाही जिल्ला काेषाध्यक्ष बाबुकाजी श्रेष्ठ, वडा ८ या अध्यक्ष राजन श्रेष्ठ, सूर्य बहादुर श्रेष्ठ, बालकृष्ण श्रेष्ठ, अशीम ज्वेल्स श्रेष्ठ झापा, नवीन श्रेष्ठ, भुवन श्रेष्ठ, बाबु काजी श्रेष्ठ, भिमेस्वर गुथी नायः लीला कुमार श्रेष्ठ, क्षत्रबहादुर श्रेष्ठ, संजीव कुमार श्रेष्ठ, सुदर्शन श्रेष्ठ, कल्याणकुमार जोशी, बिष्णु कुमार श्रेष्ठपिन्सं ब्वति कयादीगु खःसा लाेकंह्वाःम्ह म्येच्वमि समाजसेवी अानन्द बज्राचार्यं नं उगु ज्याझ्वलय् पाहाँकथं ब्वति कयादीगु खः ।
थःम्हं सर्लाही व जःखःया नेवाःतयगु नितिं दयेकाःगु ज्याझ्वः अझ बांलाकेगु नितिं थुगु सहलह हःपा जूगु धयादिसें ज्याझ्वः न्ह्याकामि बज्राचार्यं ज्याझ्वलय् सहलहया मनसुवाःकथं हिलावनेगु व तनावनेगु खँ कनादीगु दु । ज्याझ्वलय् नेपालभाषाया अतिकं लाेकंह्वाःगु पुलांगु न्हूगु म्ये थ्वयाच्वंगु दुसा नेपालभाषा, इतिहास, तजिलजि, थायबाय, नेवाः अान्दाेलनया सः दुथ्याकावयागु न्ह्यथनादिल । च्यूता कयादीपिं, ज्याझ्वः न्यनादीपिं सकलसित ज्याझ्वः न्ह्याकामि रमा बज्राचार्यं सुभाय् नं देछानादीगु दु ।
रेडियाे एकतापाखें थ्वइगु ज्याझ्वः अनलाइनपाखे http://www.radioekata.com.np व थीथी एपपाखें नं न्यनादीफइसा ज्याझ्वः न्ह्याकामि बज्राचार्यं सकसिया नितिं धकाः थःगु पफेसबुक पेज व युट्युबपाखें नं थुगु ज्याझ्वः सार्वजनिक यायेगु यानादीगु दु ।
प्रशारण जूगु ज्याझ्वः न्यनेत थुगु लिंक क्लिक यानादिसँ ।
आदिवासी जनजाति राष्ट्रिय पत्रकारिता प्यम्हसिगु नां सार्वजनिक
नृपेन्द्रलाल श्रेष्ठ | दिल्लागा तृतिया ११३८ ( जुलाई ३१ २०१८ )
नेपाल आदिवासी जनजाति पत्रकार महासंघं (फोनिज) ‘आदिवासी जनजाति राष्ट्रिय पत्रकारिता पुरस्कार–२०७५’ पाखें पुरस्कृत जुुइत ताःलापिं प्यम्ह पत्रकार तयेगु नां सार्वजनिक याःगु दु ।
पुरस्कार छनौट समितिं याःगु सिफारिसया आधारय् अनुमोदन यासें थौं च्वंगु सचिवालय मुँज्यां पुरस्कृत जुपि पत्रकार तयेगु नां सार्वजनिक याःगु खः।
फोनिजं दँय् दँसं बिया वयाच्वंगु ‘आदिवासी जनजाति राष्ट्रिय पत्रकारिता पुरस्कार पाखें थुगु दँय् प्यम्ह पत्रकारपिं उजिर मगर (अनलाईन), भैरव आङला (टेलिभिजन), छेटु शेर्पा (छापा) व विमला चौधरी (रेडियो) विधाय् पुरस्कृत जुगु फोनिजया संगठन सचिव मिलन लिम्बू लहनान्युजयात जानकारी बियादिगु खः ।
उगु सिरपाः नगद ४० द्धः तका याःगु खः । उगु सिरपा फोनिजया स्थापना दिवसया लसताय् थ्व हे वइगु श्रावण २७ गते छगु ज्याझ्वः याना लःल्हाइगु धका सचिव लिम्बू धयादीगु दु ।
