Display Style:
Column Style
सः छगु फरक अभिव्यक्तिया गुंगुब्व
लहनान्युज | गुंलागा षष्ठी ११३९ (अगष्ट २१ २०१९)
सुधीर ख्ववि व सुनिल बज्राचार्य थेंज्यापिं साहित्यकारपिं जाना निस्वंगु सः छगु फरक अभिव्यक्तिया थगुने निसें निरंतर न्ह्याना च्वंगु दुसाः थुगु साहित्यिक श्रृंखलाया न्हूगु ब्वः कथं आः वइगु
शनिवाः गुक्वःगु ब्वय् स्वम्ह चिं बाखंमि पिन्सं बाखं न्यंकीगु ज्याझ्वः तयातःगु दु ।
गुंलागा अष्टमि (भदौ ७) कुन्हु यलया इखालखु तलाछेंया दबु नसाः छेँय् जुइगु थुगुसिया सः छगु फरक अभिव्यक्ति ज्याझ्वलय् चिबाखंमि विजयरत्न असंबरे, न्हुछेंभक्त कवां व मानणिक उराय नं थः थःगु चिबाखं ब्वना न्यंकिगु ज्याझ्वः जुइ ।
थुगुसि चिबाखं ब्वनिपिं मध्ये विजयरत्न असंबरे या नकतिनि हे जक“श्री३ “ नायागु चिबाखं मुना पिदंगु खःसा लाबला न्ह्यःतिनि न्हूछेभक्त कवांया“ क्वाः नाःखँ मिंनःगु छेँ “ पिदंगु खः।अथेहेतुं मानिक उरायया“ दोहलपा “ बाखं मुना पिदने धुंकुगु दु ।
थुकथं न्ह्याना च्वंगु साहित्यिक ज्याझ्वः नेपालभाषा या साहित्य ख्यलय् धाथें हे फरक सवाः जुइत ताःलागु दु धका साहित्यह्यःमि तसें धायेगु याना हःगु दु ।
येँया स्वयेगु लागि बिदेशी पाँहापि वइगु
नृपेन्द्रलाल श्रेष्ठ | गुंलागा षष्ठी ११३९ (अगष्ट २१ २०१९)
आः वइगु येँया (इन्द्रजात्रा) विशेष जुइ धका येँ महानगरपालिका धाःगु दु ।
महानगरं अन्तरर्राष्ट्रिय सम्बन्ध सचिवालयया कथं येँया स्वयेगु लागि महानगरं भगिनी सम्बन्ध जुगु खुगु देय् या १३ गु अन्तरर्राष्ट्रिय नगरपाखे ५ म्ह मेयर नाप ४८ म्ह पाहुना वइगु जुगु दु ।
महानगरया ब्बनाय् वइपि पाँहापि चीनया ल्हासाया मेयर गुहेओ गुहेओ, बङ्गालादेश ढाका साउथ सिटी कर्पोरेसनया मेयर मोहम्मद सहिद खोकन, भुटानया थिम्पु नगरया मेयर किन्ले दोर्जे, भारत इष्ट दिल्ली म्युनिसिपल कर्पोरेसनया मेयर अञ्जु कमलकान्त व नर्थ दिल्ली म्युनिसिपलपाखे मेयर सरदार अभतार सिंहया नेतृत्वय् जात्रा स्वयेगु लागि येँय् वइगु पौं थ्यगु दु ।
अथेहे, चीनपाखे सियान, छेन्दु, सेञ्जेन, नान्जिन व लाञ्चाउ नगर, जापानया मात्सुमोतो नगर, संयुक्त राज्य अमेरिकाया फेडेरिकबर्ग व बोल्डर नगरपाखे उच्च अधिकारीया नेतृत्वय् जात्रा स्वयेगु लागि वये त्यःगु खः । येँया स्वयेगु लागि वइपि पाँहापि ४८ म्ह थ्यंगु दु ।
येँ महानगरपालिकाया मेयर बिद्यासुन्दर शाक्यं जिमिसं भगिनी सम्बन्ध स्थापना यानागु नगरनाप जिमिगु नागरिक नाप सम्बन्ध बलाकेगु, थःम्ह थः सांस्कृतिक पक्षया आदान प्रदान यायेगु व नेपाल भ्रमण बर्ष २०२० यात प्रवर्धन यायेगु महत्वपूर्ण अवसर न जुइगु धका बिश्वास कयादिगु दु ।
अन्तरर्राष्ट्रिय सम्बन्ध सचिवालयया प्रमुख महेश काफ्ले कथं जात्रा स्वयेगु लागि वइपि पाँहापि येँयाया मूर्त अमूर्त पक्षया अवलोकन नाप न बिइगु जुइ धका धयादिगु खः ।
अथेहे येँया थीथी थाय् स्वयम्भू व बौद्ध, यल व ख्वपया दरबार स्क्वायर नाप चन्द्रागिरी थासय् चाहिकिगु ब्यवस्था याउगु दु ।
पाँहापि भाद्र २६ गते (सेप्टेम्बर १२) येँ थ्यकं वइगु जुगु दु ।
यलय् ऐतिहासिक नृसिंह जात्रा जुल
लहनान्युज | गुंलागा षष्ठी ११३९ (अगष्ट २१ २०१९)
यल मल्ल राजा सिद्धिनरसिहंया पालानिसे न्ह्याना वयाच्वंगु ऐतिहासिक नृसिंह जात्रा मंगलवाःक्वचाःगु दु ।
यलय् स्वनिम्ह त्वालय् हनुमान ननीइ नृसिंहयात विशेष तान्त्रिक पुजा याना न्ह्यागु थुगु जात्रा यलया थीथी थासय् चाःहिला हाकन स्वनिम्ह थ्यंका क्वचाःगु खः ।
यलया खुगु कुलया राजोपाध्याय समुदायया थकालिम्हेसिया पालं पाया आधारय् दक्को व्यवस्थापनया जिम्मा कया नृसिहं जात्रा न्ह्याइगु खः । थुगु पालय् स्वनिम्हया हेरम्वराज राजोपाध्यायया परिवारं थुगु जात्रा न्ह्याकेगु जिम्माय् वःगु खः ।
नृसिहं जात्रा यायेगु झ्वलय् बाजा थाना, प्रत्यक्ष भजन नाप नृसिहं सहित लक्ष्मी, सरस्वती ,भक्त प्रल्हाद यलया गाःबहाः, पिम्बहाः, बंगलामुखी, कोबहाः, मंगलबजाः, सुन्धारा, इकुबहाः, महाबौद्ध, टंगल, तिच्छु गल्ली, हौगल, इखालखु, पूर्णचण्डी थासय् नं चाःहिउगु खः ।
कार्तिक प्याँखनय् पिहा वइगु नृसिहं द्यः उग्र रुप काइ । भदौय् पिहा वइगु थुगु नृसिहंयात शान्त स्वभावया रुपं कया तःगु दु । नेपाल सम्बत ७५१ अर्थात विक्रम सम्वत १६८८ निसे थुुगु जात्रा निरन्तर न्ह्याना वया च्वंगु लिखित दस्ताबेज दु ।
डुबानया समस्या ज्यंकेत भारत सरकारलिसे सहकार्य यायेमाःगु
लहना न्यूज | ने.सं. ११३९ गुंलागा पञ्चमि (२० अगष्ट, २०१९), मंगलवाः
नेपाल कम्युनिष्ट पार्टी (नेकपा)का नायः पुष्पकमल दाहालं नेपालय् जुइगु डुबानया समस्या ज्यंकेगु नितिं भारत सरकारलिसे सहकार्य यानाः न्ह्याः वनेमाःगु धयादीगु दु ।
जिल्ला विपद् व्यवस्थान समितिया मुँज्याय् थौं मंगलवाः न्ववानादिसें नायः दाहालं उगु खँ धयादीगु खः । वय्कलं नेपालय् दँय्दसं वर्षाया इलय् वइगु खुसिवाःपाखें तःधंगु जनधनया खति जुइगु नं धयादिल ।
पूर्व प्रधानमन्त्री तक जुयादीम्ह नेकपाया नायः दाहालं लःया समस्या नेपाःया जक मजूसें भारतया तकं जूगुलिं निगुलिं देसया सरकारं समन्वय यानाः न्ह्याःवनेमाःगु धयादिल । थुकिया नितिं नेपाल सरकारं पहल नं याःगु नायः दाहालया धापू दु ।
भारतपाखेया सीमाय् दयेकीगु तटबन्धलिसें बाँधया हुनिं दकलय् अप्वः समस्या प्रदेश २स जुइगु जूगुलिं सरकार थुगु समस्या ज्यंकेगु नितिं गम्भीर दुगु नं धयादिल ।
थुगुसी वःगु खुसिवाःपाखें जुइफइगु तःधंगु जनधनया खति पनेत सम्बन्धित निकायपाखें इलय् हे तदारुकता क्यंगुलिं नायः दाहालं लसता तकं प्वंकादिल ।
उगु मुँज्याय् ब्वति कयादीम्ह पूर्व प्रधानमन्त्री नापं नेकपाया वरिष्ठ नेता माधवकुमार नेपालं विपदयात कयाः राजनीति मयायेत फुक्क पक्षयात इनाप यानादिल । वय्कलं विपद् व्यवस्थापनया नितिं सरकार नेपाल सरकार गम्भीर जूगु खँ धयादिसें थःपिन्सं तकं थुकिया नितिं सरकारयात दबाब बिया वयाच्वनागु जानकारी याकादिल ।
सर्वदलीय मुँज्या बालुवाटारय् न्ह्यानाच्वन
लहना न्यूज | ने.सं. ११३९ गुंलागा पञ्चमि (२० अगष्ट, २०१९), मंगलवाः
प्रधानमन्त्री केपी शर्मा ओलीं सताःदीगु सर्वदलीइ मुँज्या बालुवाटारय् न्ह्यानाच्वंगु दु ।
संसदय् विचाराधीन अवस्थाय् दयाच्वंगु विधेयक क्वःछीत प्रधानमन्त्री केपी शर्मा ओलीया उपस्थितिइ मुँज्या न्ह्याःगु खः ।
मुँज्याय् नेपाल कम्यूनिष्ट पार्टी (नेकपा)पाखें पुलांम्ह प्रधानमन्त्रीलिसें नायः पुष्पकमल दाहाल, झलनाथ खनाल, नारायणकाजी श्रेष्ठ, वामदेव गौतम, बिष्णु पौडेल, ईश्वर पोख्रेल, सुवास नेम्वाङ, रामबहादुर थापा ब्वति कयाच्वनादीगु दु ।
अथे हे, प्रमुख प्रतिपक्षी नेपाली कांग्रेसपाखें पुलांम्ह प्रधानमन्त्रीलिसें सभापति शेरबहादुर देउवा, विजय गच्छदार, पूर्ण बहादुर खड्का, मिनेन्द्र रिजालं ब्वति कयाच्वनादीगु दु ।
समाजवादी पार्टी नेपालपाखें नायःपिं डा. बाबुराम भट्टराई व उपेन्द्र यादव सहभागी जुयादीगु दुसा राष्ट्रिय जनता पार्टी (राजपा)पाखें राजकिशोर यादव व महन्थ ठाकुरं ब्वति कयाच्वनादीगु दु ।
थ्व हे दथुइ, प्रधानमन्त्री ओलीं सःतादीगु सर्वदलीय मुँज्याय् सत्तारुढ नेपाल कम्यूनिष्ट पार्टी (नेकपा)या वरिष्ठ नेता माधवकुमार नेपाल धाःसा अनुपस्थित जुयादीगु दु । पार्टी वरियताय् घटुवा यानाः झलनाथ खनालयात न्ह्यःने तयेवं सर्वदलीय मुँज्याय् नेता नेपालया अनुपस्थिति अर्थपूर्ण जूगु नेतातसें धाःगु दु ।
