Display Style:
Column Style
कृषि व बिपद ब्यवस्थापन बिषयलय् छलफल
नृपेन्द्रलाल श्रेष्ठ | दिल्लागा तृतिया ११३८ ( जुलाई ३१ २०१८ )
यल जिल्लाय् स्वास्थ्य, शिक्षा, कृषि व बिपद ब्यवस्थापन बिषयलय् मानव अधिकार संचार प्रतिष्ठान, नेपालं (इहिकन) थौं छगु सहलह ज्याझवः याःगु दु ।
थौं जुगु उगु सहलह ज्याझ्वलय् अधिकारकःमि नन्द ताम्रकार व पत्रकार दिपक बिद्धोहिं उगु बिषयलय् ज्यापौ न्ह्यब्बयादीगु खः ।
राजधानी नाप लाःगु यल जिल्ला तक न स्वास्थ्य व शिक्षाय् याउक स्थानीय मनू तयेगु पहुच मदुगु धकाः अधिकारकःमि ताम्रकार थःगु ज्यापौलय् न्ह्यब्बयादीगु खः । उगु ज्यापौलय् कृषि व बिपद ब्यवस्थापनय् अझ न जनचेतना हये माःगु खँय् न्ह्यथना दीगु दु ।
मानव अधिकार संचार प्रतिष्ठान, नेपालया कार्यकारी निर्देशक कपिल काफ्लें बिज्ञ व सहभागी पिनिगु सल्लाह कथं जनचेतना हयेत मेगु पला छ्यलिगु जुइ धका न धयादीगु खः ।
सतक बिस्तार पीडित तयेगु पत्रकार सम्मेलन
नृपेन्द्रलाल श्रेष्ठ | दिल्लागा तृतिया ११३८ ( जुलाई ३० २०१८ )
काठमाण्डौं उपत्यका सडक बिस्तार पीडित सघर्ष समीतिया ग्वसासलय् थौं छगु पत्रकार सम्मेलनयासें थप सघर्षया ज्याझ्वः घोषणा याःगु दु ।
थौं जुगु पत्रकार सम्मेलनय् सघर्ष समीतिया नायः सुमन साय्मिं १४ गते निसे २८ तक सहरी विकास मन्त्रालय, ३ न. प्रदेश सरकार, उपत्यका विकास प्राधिकरण, येँया १८ गु नगरपालिका,
पुरातत्व विभाग, गुठी सस्थानय् सर्वोच्व अदालत फैसलाया कार्यान्वय यायेत ज्ञापन पौ लःल्हायेगु ज्याझ्वः तःगु दु ।
अथेहे राज्यं धार्मिक, सास्कृतिक, ऐतिहासिक नाप पुरातात्विक जाःगु सम्पदायात न्ह्यःकुगु विषलय् अखिल भिच्छु महासंघ व बिश्व हिन्दु महासंघयात जानकारी बिइगु ।
थ्व हे वइगु २९ गते यलया वटुक भैरव द्यया थाय् पुजा यासें छगु भेला याना जवरजस्ती बुल्डोजर आतक बिरोध यायेगु धकाः थौ पत्रकार सम्मेलन पाखें सघर्ष समीतिया नायः सुमन साय्मि कनादीगु खः ।
धर्मकीर्ति विहारय् प्रम ओली
लहनान्युज | दिल्लागा पारु ११३८ ( जुलाई २८ २०१८ )
धम्मावती गुरुमाया ८५ क्वःगु लसताय् धर्मकीर्ति विहार नघलय् अभिधर्म पाठ जुगु दु ।
अभिधर्म पाठया ज्याझ्वलय् प्रधानमन्त्री केपी शर्मा ओलीं धर्मकीर्ति विहार वया बौद्धविद्धान धम्मावती गुरुमाँयात ८५ क्वःगु बुदिंया लसताय् भिंतुना बिइ वःगु दु
उगु ज्याझ्वलय् प्रधानमन्त्री ओलीं धम्मावती गुरुमाँयात बुद्धया मुर्ति लः ल्हानादीगु खः ।
प्रधानमन्त्री ओलीं बौद्ध परियती शिक्षा १० ताःलापिं गुरुमाँ व उपासक उपासिकापिन्त सम्मान न यानादीगु खः ।
जहाँनिया राणाया कठोर शासनकालय् शिक्षा कायेत बुद्ध धर्म बारय् ज्ञान कायेगु उद्देश्यं विसं २००६ सालय् बर्माया राजधानी रंगुन वम्ह बौद्धविद्धान धम्मावती गुरुमाँ गुरु पुन्हि वलय् ८५ दँ थ्यंगु खः ।
येँ मनपां गुरूपिन्त २५ द्वः भत्ता बीइगु
नृपेन्द्रलाल श्रेष्ठ | दिल्लागा पारु ११३८ ( जुलाई २८ २०१८ )
येँ महानगरपालिकां येँया परम्परागत बाजा संरक्षण यायेगु ज्याय् मदिक्क योगदान बिया वयाच्वपिं गुरूपिन्त दँय् २५ द्वः तका गुरू भत्ता बीगु जूगु दु ।
गुरु पुन्हिया लसताय् ज्यापु संस्कृति विकास कोषं ग्वसाः ग्वःगु मंकाः गुरू हनेज्या व झिंन्याक्वःगु राष्ट्रिय ज्यापु दिवस पाः ब्बः लःल्हायेगु ज्याझ्वलय् येँ महानगरपालिकाया मेयर विद्या सुन्दर
शाक्यं थथे घोषणा यानादीगु खः ।
थ थे ज्यापु संस्कृति विकास कोषं दँय्दसं गुरूपुन्हीया दिं कुन्हु येँया परम्परागत ६३ त्वाःया गुरूपिन्त हनेगु ज्या नाप राष्ट्रिय ज्यापु दिवसया पाःब्बः लःल्हायेगु ज्याझ्वः याइगु खः ।
थुगुसि पाःब्व धर्मचक्र तःननि खलः त्वाः गुथियात लःल्हागु ख । पाःब्वकथं खलःयात दसिपौ व छगू लख तकाया चेक लःल्हाःगु खः ।
औपचारिक ज्याझ्वः स्वयां न्ह्यः येँया परम्परागत ६३ त्वाःया गुरूपिन्त नेवाः परम्पराकथं ख्यें सगं बियाः पुजा याःगु खः । नाप येँ मनपाया मेयर विद्या सुन्दर शाक्ययात न हने ज्या याःगु खः ।
ज्याझ्वलय् नुगः खँ तयेगु झ्वलय् ज्यापु महागुथि नेपाः केन्द्रीय तयारी समितिया नायः राजभाइ जकःमिं, संस्थापक संस्था मध्ये छगू नारायण परिवार क्लबया नायः प्रचण्डमान बज्राचार्यं, धर्मचक्र तःननि खलःया नायः तीर्थनारायण महर्जन, १४ क्वःगु राष्ट्रिय ज्यापु दिवस समारोह समितिया सहसंयोजक ज्ञानु काजी डंगोलपिन्स थःथःगु नुगः खँ तयादीगु खः ।
कोषया नायः मंगलकृष्ण सिंहया सभाध्यक्षय् जुगु उगु ज्याझ्वलय् लसकुस कोषया न्वकु सन्तकुमार महर्जन यानादीगु खः सा कोषया दुजः सत्यनारायण डगोल सुुभाय् देछानादीगु खः ।
नेपालभाषाय् ‘ए’ वर्ण सफू पितब्वज्या
लहनान्युज | दिल्लागा पारु ११३८ ( जुलाई २८ २०१८ )
नेपालभाषा केन्द्रीय विभाग लुमन्ति दबूया ग्वसालय् सह प्रा.डा. ओमकारेश्वर श्रेष्ठया नेपालभाषाय् ‘ए’ वर्ण सफू पितब्वज्या जूगु दु ।
लुमन्ति दबूया नायः किरण केन रञ्जितया नायःसुइ न्ह्याःगु उगु मुँज्याय् मूपाहाँ कथं पुलांम्ह विभागीय प्रमुख प्रा.डा. सुन्दरकृष्ण जोशी झायादीगु खः ।
अमृत ताम्राकारं न्ह्याकादीगु उगु ज्याझ्वलय् पाहाँ कथं पुलांम्ह विभागीय प्रमुख सह प्रा. तुलसीलाल सिंह, ईश्वरीमैंया श्रेष्ठ, निर्मला श्रेष्ठ, शरद कसाः लसता सिं, राजित बहादुर श्रेष्ठ, जीवन महर्जन, काशीनाथ तमोट, भरत महर्जन, सुनिता राजभण्डारी, दिपा महर्जनपिन्सं ब्वतिकयादीगु खः ।
न्वचूया झ्वलय् राजनलाल जोशीं गुरुपुन्हि अतिकं महत्वं जाःगु खोज पूर्ण खँग्वः खः । गुरुपिसं अन्धकारयात चिइकाबी माः । अन्धकार चिइकाबी मफुम्ह गुरु, गुरु हे जुइफइमखु धयादिल ।
लुमन्ति दबूया ग्वसालय् गुरुपुन्हिया लसताय् गुरुपिन्त हना ज्याझ्वः तःजिक हंगु खः ।
बुखँ नेवाः सूचना केन्द्र
किपा राजेन्द्र रञ्जित
