Display Style:
Column Style
धोबिघाटय् वाः वया छेँय् नोक्सान
लहनान्युज | दिल्लागा एकादशी ११३८ ( अगष्ट ७ २०१८ )
थौं सुथय् स्वता इलंनिसें वःगु वां यलया धोविघाट हिटी नाप धः जाया लः बाः वना अनया छेँय् नोक्सान जूगु दु ।
अनया स्थानीय मनूतय्त खासयाना रजक समाजपिंसं वसः हिया पायेगु यानाच्वंगु उगु थाय् बं भासय् जुयाः नोक्सान जूगु खः ।
उगु घटनाय छुं नं कथंहया मानवीय घापाः मजूगु खँ अनया स्थानीय मनूतयसं जानकारी बियादीगु दु ।
एचआइभी संक्रमण बिषयलय सहलह
नृपेन्द्रलाल श्रेष्ठ | दिल्लागा दशमी ११३८ ( अगष्ट ६ २०१८ )
वीर अस्पतालया एम.आर.टी. सेन्टरपाखें उगु अस्पतालया स्वास्थ्यकःमिपिं दथुइ छगू सहलह ज्याझ्वः याःगु दु ।
स्टेप नेपाल व स्पर्श नेपालया सहजकर्तापिं पाखें न्ह्याकूगु उगु ज्याझ्वलय् अस्पतालया स्वास्थ्यकःमिपिं ३५ म्हया ल्याखय् उपस्थिति दुगु खः ।
समाजय् न्यनाच्वंगु एचआइभी संक्रमणया वासः नेपालय् सन् २००४ निसें न्ह्याय्धुंकूगु खःसा थुकिं यानाः संक्रमितपिं एड्सया अवस्थातक मथ्यंगु दुसा छम्ह स्वस्थम्ह जुयाः समाजय् म्वाय् फयाच्वंगु दु ।
एचआइभी संक्रमितपिनिगु उपचार सरकारं सितिकं यानाच्वंगु दु । वासः याय्गु झ्वलय् थीथी स्वास्थ्य संस्थापाखें जुइगु हेय्या दृष्टि अले थीथी द्वपं व भेदभाव म्हो याय्गु आज्जु तयाः उगु ज्याझ्वः याःगु खः ।
ज्याझ्वलय् थीथी द्वपं व भेदभावपाखें जुइगु लिच्वःयात कयाः दुग्यंक सलहल जूगु खः ।
कृष्ण भक्त बुदिं हन
लहनान्युज | दिल्लागा अष्टमी ११३८ ( अगष्ट ४ २०१८ )
श्री कालिका शरण मा.बि. जहरसिं पौवा, शंखरापुर वडा नं. ३ या ख्यलय् पुलांम्ह प्रध्यानाध्यापक कृष्णभक्त श्रेष्ठया ६५ क्वःगु बुदिं हंगु दु ।
ज्याझ्वलय् उगु ब्वनेकुथि जःपि, गोर्की श्रेष्ठ, बिद्यालय व्यवस्थापन समितिया नायः मदन बहादुर वाइवा, प्रध्यानाध्यापक प्रमोद प्रधान, समकक्षीपासापिं भाग्योदय मा.बि.या प्रध्यानाध्यापक रुषण बसी, नेवाः सूचना केन्द्रया कजि राजेन्द्र रञ्जित, दान बहादुर श्रेष्ठ, कृष्ण लाल बजगाईं, सूर्य मान धलान, कृष्ण बहादुर श्रेष्ठ लगायतपिसं ब्वतिकयादीगु खः ।
ज्याझ्वः न्ह्याकेगु झ्वलय् स्यनामि राजकुमार केसीं थुगु ब्वनेकुथिइ स्यनामिपिं यक्वहे वयेगु वनेगु क्रमला नियमितरुपं जुयाहे च्वनी तर कृष्ण भक्त श्रेष्ठं ब्वनेकुथियागु नितिं यानावंगु ल्वमंके मफैगु योगदानं ज्ञां कायेमाःगु खँ धयादिल ।
कृष्ण भक्त श्रेष्ठं ब्वनेकुथियात च्वन्ह्याकेत छिनावंगु पलाःयात निरन्तरता बिइगु नितिं नापं कृष्णभक्तया लुमन्तिया छुं नं ज्याझ्वयात थम्हं फक्वचाक्व ग्वाहालि यायेगु नितिं गुबलें नं लिमचिलेगु खँ वडा नं ३ या वडानायः सन्तबहादुर वाइवां धयादिल ।
बुखँ नेवाः सूचना केन्द्र
किपा राजेन्द्र रञ्जित
सिद्धि दास महाजुया बुदिंया लसताय् चिनाखँ ब्वज्या
लहनान्युज | दिल्लागा अष्टमी ११३८ ( अगष्ट ४ २०१८ )
महाकवि सिद्धि दास महाजुया १५० क्वःगु बुदिंया लसताय् प्रतिभा साहित्यिक परिवारया ग्वसालय् चिनाखँ मुँज्या किपुलिइ जूगु दु ।
संस्थाया नायः ज्ञान बहादुर महर्जनया मुँज्या नायःसुइ न्ह्याःगु उगु मुँज्याय् मूपाहाँ कथं डा. तुयू बहादुर महर्जन, विशेष पाहाँ कथं सिद्धि दास स्मृति समाजया छ्याञ्जे दिपक तुलाधर, प्रतिभा साहित्यिकया संस्थापक नायः, थौंकन्ह्यया संरक्षक लोककवि राजभाइ जकःमि झायादीगु खः ।
ज्याझ्वलय् शंख नारायण नापित, राम भक्त महर्जन, राजेन्द्र महर्जन, नरेन्द्र मान महर्जन, अर्जुन महर्जन, सुवर्ण महर्जन, दिल कुमारी डंगोल, अर्जुन नेपाःमि, शिव प्रसाद श्रेष्ठ, पि.के. श्रेष्ठ, सालिग्राम महर्जन, विकास महर्जन, नरेश मान महर्जनपिसं थःथःगु चिनाखँ ब्वनाः न्यंकादीगु खः ।
नुगः खँ तयेगु झ्वलय् संस्थाया संरक्षक जकःमिं सिद्धि दासं थःगु जीवनय् अन्तिम इलय् तक्कनं अतिकं दुःखसियाः सिनावंसां थःगु भाषा–जाति, साहित्यया आपालं सफूत च्वयाः नेपालभाषा ख्यःया धुकू जायेका वंगुलिं नेवाःतय्गु नितिं गर्वया विषय जूवंगु खँ कनादिल । अथेहे गुलिखे तनाच्वंपिं, पिल्हूवयेमफया च्वंपिं साहित्यकारत वय्कःपिनिगु कृतित मालाःमालाः पितहयेत प्रतिभा साहित्यिक परिवारं निरन्तर कुतःयानावनेमाःगु खँ कनादिल ।
बुखँ नेवाः सूचना केन्द्र
किपा राजेन्द्र रञ्जित
पत्रकारिता तालिम क्वचाल
नृपेन्द्रलाल श्रेष्ठ | दिल्लागा सप्तमी ११३८ ( अगष्ट ४ २०१८ )
गोल्डेन डायमण्ड ज्वेलरीेया ग्वहालि नेवाःपत्रकार राष्ट्रिय दबूया ग्वसालय् निन्हु यकं शुक्रवाः व शनिवाः पत्रकारिता तालिम जुगु खः । यलया श्री ताम्रकार समाज भवनय् उगु ज्याझ्वः जुगु खः ।
उगु तालिम ज्याझ्वलय् मूपाँँहा यलया महानगरपालिकाया प्रमुख चिरिबाबु महर्जनं ज्याझ्वलय् सहभागी पिन्त दसिपौ लःल्हानादीगु खः ।
थःगु नुगः खँ तयेगु झ्वलय् मूपाँहा मेयर महर्जनं स्थानीय तहयात जवाफदेही पत्रकारिताया दक्षता अभिवृद्धि यायेत स्थानीय तह, निजी क्षेत्र व सञ्चाःकमि नाप सहकार्य याना न्ह्यने वनेमाः धका धयादीगु खः ।
अथेहे ललितपुर उद्योग वाणिज्य संघया अध्यक्ष कृष्णलाल महर्जनं देशय् समावेशी विकास व समृद्धिया लागि पत्रकारिताया भूमिका महत्वपूर्ण जुगु खँय् बःबियादीगु खः ।
उगु ज्याझ्वलय् थःगु नुगः खँ तयादीसे नेपाल सुनचा“दी व्यवसायी महासंघया उपाध्यक्ष नाप गोल्डेन डायमण्ड ज्वेलरीया अध्यक्ष ज्ञानुराज शाक्यं सही व तथ्य परक सूचं प्रवाह याना
समाजयात विकासया लपूलिइ यक माः धयादीसे थुगु ज्याझ्वलं दक्ष पत्रकार उत्पादन याना समावेशी पत्रकारिताय् न ग्वाहालि जुइगु खँ बिश्वास प्वकादील ।
नेवाः पत्रकार राष्ट्रिय दबूया अध्यक्ष श्रीकृष्ण महर्जनया सभाधक्ष्यताय् जुगु ज्याझ्वलय् उपाध्यक्ष सुरजवीर बज्राचार्य, महासचिव सुनील महर्जन पिन्सं नेपाली पत्रकारिताय् समावेशी यायेत समाजया सकसिगु उलि हे महत्व दइ धका थःथःपिनिगु नुगm खँ तयादीगु खः ।
उगु तालिमय् वरिष्ठ पत्रकार धर्मेन्द्र झा, नेपाल टेलिभिजनया गजुरधन राई, इमेज न्यूज एफएमया सुरजवीर बज्राचार्य, पत्रकार केपी ढुंगाना व युवराज गौतमं तालिम बियादीगु खः । तालिमय् ४० म्हसिया ब्बति कयादीगु खः ।
