Display Style:
Column Style
राजोपाध्याय समाजया ई लाइब्ररी न्ह्यात
लहनान्यूज | सिल्लाथ्व पारु ११३७ (जनवरी २८ २०१६)
राजोपाध्याय समाजं राजोपाध्याय सम्बन्धि ऐतिहासिक, सांस्कृतिक लिसेंया सकतां हलंज्वलंया डिजिटल अभिलेखीकरण यायेत धकाः ई लाइब्ररी न्ह्याकूगु दु ।
थौं यलय् ग्वसाः ग्वःगु समाजया स्वक्वःगु साधारण सभा अले हना ज्याझ्वलय् उद्योगमन्त्री नविन्द्रराज जोशीं समाजया ई लाइब्ररी http://rajopadhyayasociety.org.np/elibrary या उलेज्या यानादिल । ज्याझ्वलय् मू पाहां उद्योगमन्त्री जोशीं नेवाः समुदायया गुरु पुरोहितया रुपं सांस्कृतिक भूमिकाय् सक्रिय राजोपाध्यायं विकसित प्रविधियात नं नालाकासें डिजिटल लाइब्ररी न्ह्याकूगु च्वछायेबहःगु धयादिल ।
उगु हे ज्याझ्वलय् राजोपाध्याय समाजपाखें न्हापांम्ह मिसा डाक्टर डा. मनिषा शर्मा राजोपाध्याययात हंगु खः । नापं अमेरीकाय् च्वनाः अनया नेवाः समुदायया गुरु पुरोहितया रुपं सक्रिय जुयाः ल्याय्म्ह संस्कृतिविद्या रुपं तकं म्हस्यूम्ह बासबचन्द्र राजोपाध्याययात नं हंगु खः । सम्मानित व्यक्तित्वपिन्त उद्योगमन्त्री जोशीं खादां न्ययेकाः हनापौ लःल्हानादिल । ज्याझ्वलय् २०७२ सालया एस.एल.सी परीक्षाय् ताःलाःपिं राजोपाध्याय विद्यार्थीपिन्त नं हंगु खः ।
थुगु हे ज्याझ्वलय् समाजया निगूगु स्मारिका लुमन्ति ११३७ या नं विमोचन याःगु खः । ज्याझ्वःया सकल पाहांपिं ताम्रकार समाजया नायः रविन्द्रराज ताम्रकार, ज्यापु समाजया नायः प्रेम महर्जन, स्यस्यः समाजया नायः डा.केदारलाल श्रेष्ठ, जोशी समाजया नायः जयन्तीलाल जोशी, वैदिक प्रतिष्ठानया नायः गोविन्द भक्तानन्द राजोपाध्यायं मंकाः रुपं स्मारिकाया विमोचन यानादीगु खः ।
ज्याझ्वलय् ताम्रकार समाजया नायः रविन्द्रराज ताम्रकार, ज्यापु समाजया नायः प्रेम महर्जनं समाजया विकासया लागिं दक्वं संगठित जुयाः थीथी जातीय संगठनतय्सं थवंथवय् सहकार्य यासें न्ह्याःवनेमाःगुलिइ बः बियादिल ।
ज्याझ्वलय् समाजया मू छ्यान्जे संजय शर्मा राजोपाध्यायं संगठनया वार्षिक प्रगती प्रतिवेदन न्ह्यब्वयादीगु खःसा दांभरिं जयन्ती शर्मा राजोपाध्यायं आर्थिक प्रतिवेदन न्ह्यब्वयादीगु खः । ज्याझ्वः समाजया नायः बदन ज्वालानन्द राजोपाध्यायया सभाध्यक्षताय् जूगु खः ।
प्रेमध्वज संगीत प्रतिष्ठान स्थापना जुइगु
लहनान्यूज | पोहेंलागा आमै ११३७ (जनवरी २७ २०१७)
संस्कृति, पर्यटन तथा नागरीक उड्डयन मन्त्री जीवनबहादुर शाहिं गोल्डन भ्वाइस अफ नेपाल प्रेमध्वज प्रधानया नामं प्रेमध्वज संगीत प्रतिष्ठान गठन यायेत पहल यायेगु धयादीगु दु ।
लहना मिडियाया ग्वसालय् येँय् क्वचाःगु ‘यूएफओ भिन्तुना सनिल’ ज्याझ्वलय् म्येहालामि प्रधानयात सम्मान लःल्हासें मन्त्री शाहिं संगीतया माध्यमं मदिक्क नेपाःया सेवा यानाच्वंम्ह प्रधानया नामय् प्रतिष्ठान याये हे माःगु धयादीगु खः । शाहिं नेपालय् रक एन्ड रोल संगीत दुतहयेगु निसें भारतय् हे च्वनाः म्ये हालेगु व्हःताःयात तकं त्वःताः नेपाली संगीत ख्यःयात हे कर्मक्षेत्र दयेकाः थःगु मातृभूमिप्रति म्येहालामि प्रधानं क्यनादीगु मतिनायात च्वछानादिल ।
लहना मिडियां न्हूदँ ने.सं. ११३७ या लसताय् याःगु प्रेमध्वज प्रधानया हना लिसें सांगितिक ज्याझ्वलय् मन्त्री शाहिं प्रधानयात हनापौ लःल्हासें हनादिल । अथे हे जनगायक भृगुराम श्रेष्ठं स्वांमाः कोखायेकादिल सा समाजसेवी लक्ष्मीदास मानन्धरं दोसल्लां न्ययेकादिल ।
नगद सम्मान कथं सम्मानित प्रधानयात यूएफओ क्लोडिङ स्टोरपाखें ५१,१११ तका लःल्हाःगु खः । यूएफओया ब्रान्ड मेनेजर सचिन श्रेष्ठ व हरि न्यौपानें प्रधानयात चेक लःलहानादीगु खः ।
प्रधानयात हनेगु झ्वलय् लहना मिडिया सकल दुजः लिसें सकल कलाकारपिन्सं नं खादां न्ययेकूगु खः । हना स्वयां न्ह्यः वरिष्ठ म्येहालामि प्रेमध्वजलिसें मन्त्री शाहि व ज्याझ्वःया विशिष्ट पाहां व पाहांपिन्त नेवाः परम्परा कथं ख्येँय् सगं ब्यूगु खः ।
सम्मान लःल्हाना कायेधुंकाः म्येहालामि प्रधानं नेवाः ख्यःपाखें थः दक्कले न्हापां सम्मानित जुइखंगु धयादीगु खः । नेवाः ख्यलं थःत थुकथं सम्मान याःबलय् थः तसकं लयताःगु धयादीगु खः ।
सन् १९३८ जुन ६स चौतारा सिन्धुपाल्चोकय् बूम्ह वरिष्ठ म्येहालामि प्रेमध्वज प्रधानंं बालाबालाचिंगु मिखा म्येलिसें नेपालय् रक एन्ड रोल संगीत दुत हयादीगु खः । लिसें भारतया सिने क्षेत्रया प्रतिष्ठित फिल्मफेयर अवार्डया न्हयक्वःगु संस्करणय् भ्वाइस अफ नेपाल उपाधिं सम्बोधित जुयाः म्ये तकं हालादीधुंकूगु दु ।
उगु इलय् प्रधानयात भारतय् हे च्वनाः हिन्दि संकिपाया नितिं म्ये हालेत इनाप यातं तकं वयकः नेपालय् हे च्वनेगु धकाः लिहां झाःगु खः ।
सिजि ब्रुअरी नेपाल प्रा. लि. इभेन्ट पार्टनर जुयाच्वंगु यूएफओ भिन्तुना सनिल ज्याझ्वलय् म्येहालामि ज्योति घिमिरे, भीम तुलाधर, जेम्स प्रधान, जेम्स प्रधान, निशा देसार, सुरजवीर बज्राचार्य, एञ्जिला सिंह, सुलिन्द्र शाक्य, अन्जन श्रेष्ठ, पंकज राजोपाध्याय, भूपेन्द्र बज्राचार्य, निशान्त गौचनं म्ये हालादीगु खःसा आराध्यलक्ष्मी खड्गीं हुलाप्याखं न्ह्यब्वयादीगु खः ।
नांजाःम्ह म्येहालामि पन्नाकाजी मन्त
लहनान्यूज | पोहेंलागा त्रयोदशि ११३७ (जनवरी २५ २०१७)
नांजाःम्ह पुलांम्ह म्येहालामि पन्नाकाजी शाक्य ८५दँया बैंशय् थौं मन्त ।
मदुम्ह शाक्यया थौं हे टेकुदोभानय् अन्त्येष्टि क्वचाःगु दु । वयकःया अन्त्येष्टि न्ह्यः संगीतकार संघ नेपालया कलाकारपिन्सं मदुम्ह शाक्यया हे म्येत हालाः वयकःयात श्रद्धान्जलि देछाःगु खः ।
ताः दत मखनागु थुज्वःगु नेवाः म्येलिसें तिरिरि मुरली बज्यो, किन किन तिम्रो तस्बीर थुज्वःगु लोकंव्हाःगु म्ये शाक्यं हालादीगु दु ।
वयकलं म्ये हालेगुलिसें नेवाः नाटकय् नं म्हितादीगु दु । परमानन्द बज्राचार्यया पूधाः प्याखं यूवराज कुणालय् नं वयकलं म्हितादीगु दुगु खः ।
मदुम्ह शाक्यया प्यम्ह काय् व छम्ह म्ह्याय् दी । नांजाःम्ह म्येहालामि प्रवेशमान शाक्य व पवित्रमान शाक्य नं मदुम्ह पन्नाकाजीया हे काय् खः ।
म्येहालामि निशा देसार सम्मानित
लहनान्यूज | पोहेंलागा अष्टमि ११३७ (जनवरी २० २०१७)
नेवाः लिसें नेपाःया हे संगीत ख्यलय् थौंकन्हय् लोकं व्हानाच्वंम्ह म्येहालामि निशा देसार थुगुसीया नारायण गोपाल यूवा संगीत सिरपालं सम्मानित जूगु दु ।
राष्ट्रिय यूवा सेवा कोषया ग्वसालय् थौं येँय् क्वचाःगु छगू ज्याझ्वःया दथुइ म्येहालामि देसारलिसें संगीतकार सन्तोष श्रेष्ठयात नं थुगु सिरपालं हंगु खः । ज्याझ्वलय् राप्रपाया पार्टि नायः लिसें पूर्व उपप्रधानमन्त्री कमल थापां निम्हं सम्मानित कलाकारपिन्त हनापौ लःल्हानाः हनादिल ।
नायः थापां सम्मानित निम्ह कलाकारयात हनापौ लिसें तका सिरपाः नं लःल्हानादिल । निम्हं सम्मानित कलाकारपिन्त म्हतिं २५द्वः तका लःल्हाःगु खः ।
उगु हे ज्याझ्वलय् मूर्ति लिसें चित्रकार पृथ्वी श्रेष्ठ व ज्योति प्रकाश विश्वकर्मायात नं हंगु खः । वयकःपिन्त नं लुँया तक्मा लिसें म्हतिं २५द्वः तका सिरपाः लःल्हाःगु खः ।
ज्याझ्वलय् सम्मानित जूम्ह म्येहालामि निशा देसारं मदुम्ह स्वरसम्राट नारायण गोपालया म्ये हालाः न्यंकादीगु खः ।
सिरपाःया निर्णायक कथं वरिष्ठ संगीतकार दिपक जंगम व वरिष्ठ मूर्तिकार ठाकुरप्रसाद मैनालीयात तःगु खः ।
ज्याझ्वः कोषया नायः भिमबहादुर अधिकारीया सभाध्यक्षताय् क्वचाःगु खः ।
१५० कुमारीयात पूजा यात
लहनान्यूज | पोहेंलागा अष्टमि ११३७ (जनवरी २० २०१७)
यलया चक्रबहिलिइ नेवाः दुनेया थीथी जातजातिया यानाः करीब सत्याम्ह मिसा मचातयगु वृहत कुमारी पूजा क्वचाःगु दु ।
ताम्रकार समाजया दुजः अष्टलाल ताम्रकारया भाकल अले आर्थिक ग्वाहालिइ चक्रबहि परिसरय् क्वचाःगु पूजाय् कुमारी मचातयत पुज्यायेत द्वलंद्वः भक्तजनत थ्यंगु खः ।
पूजा न्यायेकूम्ह अष्टलाल ताम्रकारं करीव ८दँ न्ह्यः कुमारी पूजाया भाकल यानागुलिइ बल्ल ताःलाःगु धयादिल । थम्हं इच्छा यानागु ज्या क्वचायेकेत व्यवस्थापन अले स्वयम सेवक परिचालनय् ताम्रकार समाज व स्थानीय टोलवासीया ग्वाहालिया नितिं थः तसकं लयताःगु वयकलं धयादिल ।
ताम्रकार समाजया नायः रविन्द्रराज ताम्रकारं नेवाः समुदायस गुगु नं भिंगु ज्या न्ह्याके न्ह्यः कुमारीया पूजा यायेबलय् सिद्धिफल प्राप्त जुइ धइगु मान्यता दया वयाच्वंगु धयादिल । कुमारी पूजा जुया वयाच्वंसां थुकथं तःजिक धाःसा काचाक्क मजूगु वयकलं धयादिल ।
नेवाः समुदायस इहि मयाःनिपिं मिसा मचातयत कुमारी पूजा यायेगु परम्परा दु ।
