Display Style:
Column Style
रामशेखरया ग्वाहालिया नितिं नेवाः पत्रकारत न्ह्यचिल
लहनान्यूज | सिल्लाथ्व चतुर्दशी ११३७ (फेब्रुअरी १० २०१७)
नेपालभाषा लिसें खस नेपाली भाय तकंया ख्यालः विधाया प्रतिभाशाली कलाकार अले वरिष्ठ साहित्यकार रामशेखर नकःमियात वासः यायेत राज्यपाखें सुविधा बीकेगु ज्याय् नेवाः पत्रकार राष्ट्रिय दबुलिं पलाः न्ह्याकीगु जूगु दु ।
थ्व हे झ्वलय् कलाक्षेत्रय् थःगु जीवन अर्पण याःम्ह राष्ट्रियस्तरया व्यक्तित्व कलाकार नकःमिया वासः यायेत राज्यस्तरं हे ग्वाहालि उपलब्ध याकेत नेवाः पत्रकार राष्ट्रिय दबुलिं जिप्रका ख्वपयात इनाप यासें पौ लःल्हाःगु दु । दबुलिं कलाकार नकःमिया आर्थिक अवस्थायात थुइकाः वयकःयात तत्काल हे राज्यया सुविधा अन्तर्गत जिल्ला जनस्वास्थ्य ज्याकू ख्वपपाखें ग्वाहालि उपलब्ध याकेत इनाप याःगु खः ।
ख्वप जिल्लाया प्रमुख जिल्ला अधिकारी द्रोण पोखरेलयात थौं वयकःया हे ज्याकुथिइ नापलानाः पत्रकार दबूपाखें ब्यूगु इनाप पौ लःल्हानाकासें थःगु अध्यक्षताय् दुगु जिल्लास्तरीय समितिं तत्कालया लागिं १ लख तका उपलब्ध याकेत उजं बियादिल । प्रमुख जिल्ला अधिकारी पोखरेलं फोन मार्फत ख्वप जिल्ला जनस्वास्थ्य ज्याकूया प्रमुख केशव पण्डितयात वइगु आईतबाः च्वनीगु मुँज्यां स्वास्थ्य उपचार सुविधा उपलब्ध याकेगु क्वःछीत कलाकार नकःमिया नां धलखय् तयेत इनाप यानादीगु खः ।
पत्रकार दबुलिं प्रजिअयात लःल्हाःगु पतिइ नकःमिया वासः यायेत आवश्यक च्यूताः, पहलकदमी क्यनेत लिसें अस्पताललिसे समन्वय यानाबीत धयातःगु दु । उगु पतिइ वयकःया वासः यायेगु ज्याय् गुगु नं कथं म्ह्वति जुइके मबीत इनाप यानातःगु दुगु दबूया मू छ्यान्जे सुनिल महर्जनं लहनान्यूजयात कनादिल ।
भक्तपुर क्यान्सर अस्पतालया मेडिकल डाइरेक्टर डा। प्रकाशया कथं वयकःया उसाँय् पायछि खनेदुसा वइगु ८ गते रेडियोथेरापी न्ह्याकेगु धयादिल । ‘दबुलिं इनाप याःकथं मेपिं ईच्छुक व्यक्ति संघसंस्थापिन्सं नं वयकःया वयकःयात ग्वाहालि यायेत अस्पतालय् तप्यंक मुनीगु कथं विशेष खाता चायेकेफइगु व्यवस्था यायेफइ, थ्व बाहेक वयकःया वासः यायेत गुगु नं कथं म्ह्वति जुइके बी मखु ।’ डा। प्रकाशं धयादिल ।
दबुलिं मंगलबारया दुने थुगु खाताया बारे जानकारी मुंकाः सार्वजनिक अपिल योगु तयारी याःगु सीदुगु दु ।
थ्वयां न्ह्यः बिहीबाः पत्रकार दबूया केन्द्रीय नायः श्रीकृष्ण महर्जनलिसें दबूया टोली भक्तपुर क्यान्सर अस्पताल वनाः नकःमि उसाँय् अवस्था उपचारबारे परिवार चिकित्सकपिंलिसे सहलह याःगु खः ।
सम्पदा पुनर्निमाणय् ठेक्का प्रथा विरुद्ध खबरदारी
लहनान्यूज | सिल्लाथ्व चतुर्दशि ११३७ (फेब्रुअरी १० २०१७)
ऐतिहासिक सम्पदा पुनर्निर्माण ठेक्का प्रथां याये दइमखु धकाः खबरदारी यासें स्थानीयवासी व संघसंस्थाया येँया बसन्तपुलिइ तःधंगु सभा याःगु दु ।
येँया हनुमानध्वाखा लागाय् वंगु बैसाख १२या भुखाचं क्षतिग्रस्त ऐतिहासिक सम्पदाया पुनर्निर्माण ठेक्का प्रथां यायेत्यंगु सन्दर्भय् येँय् जूगु सभाय् पुनर्निर्माणया विश्वसनीयताया खँय् न्ह्यसः तःगु खः । सभाय् ठेक्का प्रथां जुइगु पुनर्निर्माणय् आर्थिक चलखेल आपाः जुयाः सम्पदाया बल्लाःगु पुनर्निर्माण धाःसा जुइ मफइगु खँ स्थानीयवासी लिसें विज्ञपिन्सं तकं तःगु खः ।
ज्याझ्वलय् त्रैलोक्य मोहन नारायण देगःया मू पुजारी दिपकप्रसाद श्रेष्ठ, पुरातत्व विभागया पुलांम्ह निर्देशक डा. साफल्य अमात्य, इतिहासविद् प्रा. सुदर्शन राज तिवारी, काष्ठमण्डप पुनर्निर्माण अभियानया कजि बीरेन्द्रभक्त श्रेष्ठ, स्थानीय अभियन्ता गणपतिलाल श्रेष्ठ, पुरातत्व विभागया निर्देशक भेषनारायण दाहाल व न्ह्यलुवा पवित्र बज्राचार्यं थःथःगु नुगःखँ तयादीगु खः ।
ज्याझ्वलय् नवाःपिन्सं सम्पदाया पुनर्निर्माण ठेक्का प्रथां याके बी मज्यूगु धासें स्थानीयया सहभागीता व सक्रियताय् हे सम्पदा पुनर्निर्माण यायेमाःगु खँय् वक्तापिन्सं बः ब्यूगु खः । ठेक्का प्रथाया पुनर्निर्माणय् ज्या याइपिनि आर्थिक लाभय् आपाः ध्यान वनीगु जूगुलिं बल्लाःगु सम्पदा निर्माण जुइमफइगु वक्तापिनिगु धापू खः ।
ज्याझ्वलय् सरकारी निकायपाखें पुरातत्व विभागया निर्देशक दाहालया जक ब्वति दुगु खः । येँ महानगरपालिकाया प्रमूख रुद्रसिं तामाङयात ब्वनागु खःसां वयकः ज्याझ्वलय् मथ्यंगु ग्वसाः खलकं जानकारी ब्यूगु दु ।
ज्याझ्वलय् ब्वति मदुगु खःसां पुनर्निर्माण प्राधीकरणया प्रमूख कार्यकारी अधिकृत गोविन्द पोखरेल धाःसा सम्पदाया पुनर्निर्माण ठेक्का प्रथां जुइमज्यूगु खँय् सकारात्मक हे दुगु ग्वसाः खलकं न्ह्यथंगु दु । वयकःलिसे खँल्हाबल्हा जूबलय् थम्हं सम्पदाया पुनर्निर्माण ठेक्का प्रथां जुइकेमबीत पहल यायेगु धयादीगु ग्वसाः खलकं जानकारी ब्यूगु दु ।
‘शंखरापुरवासीपिनिगु भावना सम्बोधन जुइ’ - पाण्डे
लहनान्यूज | सिल्लाथ्व चतुर्दशि ११३७ (फेब्रुअरी १० २०१७)
ऐतिहासिक पहिचानयुक्त शंखरापुरयात मेगु नगरपालिकाय् समायोजन याये मज्यू धइगु माग यासें शंखरापुर नागरिक समाजया पाखें सङ्घीय मामिला तथा स्थानीय विकासमन्त्री हितराज पाण्डेयात थौं ज्ञापनपौ लःल्हागु दु ।
समाजया संयोजक रुपेशलाल श्रेष्ठं लःल्हानादीगु ज्ञापन पौ लःल्हाना कासें मन्त्री पाण्डें स्थानीय तह पुनर्संरचना यायेगु ज्या तसकं थाकूगु धासें शङ्खरापुरवासीयात छुं नं विरोधया ज्याझ्वः मयायेत इनाप यानादीगु खः । उगु झ्वलय् मन्त्री पाण्डें असन्तुष्टि खँ अध्ययन यानाः सुझावलिसें मन्त्रिपरिषदय् पेश यायेगु प्रतिवद्धता प्वंकादीगु खः ।
ज्ञापनपतिइ करिब ३द्वः दँ न्ह्यः राजा शङ्खदेवं मां बज्रयोगिनीया उजनय् न्हयगू गां कःघानाः द्वःछि खा छेँ अले उकियात माःगु क्यब, चकंगु ख्यः, चुक, ननि, देगः, तुं, हिति, पूखू, दयेकाः शंख आकारया देय् निर्माण यानातःगु ऐतिहासिक व पौराणिक शंखरापुर क्षेत्रयात बिस्कं हे स्थानीय तह दयेकेत माग यानातःगु दु ।
शङ्खरापुरयात सर्वदलीय संयन्त्रपाखें बिस्कं हे स्थानीय तह अथवा नगरपालिका कथं सर्वसम्मतिं पास यानाः जिल्ला प्राविधिक समितिइ सिफारिस याःसां स्थानीय तह पुनर्संरचना आयोगं कागेश्वरी मनहरा नगरपालिकाय् समाजोजन याःगु धासें शङ्खरापुरवासीपिन्सं विरोध याना वयाच्वंगु खः ।
विधागत पत्रकारिता विकासय् जोड
लहनान्यूज | सिल्लाथ्व चतुर्दशि ११३७ (फेब्रुअरी ११ २०१७)
नेपाल प्रेस काउन्सिलया ग्वसालय् विधागत पत्रकारीता सम्वद्ध थीथी संघसंस्थाया पदाधिकारी, प्रतिनिधिलिसे ‘काउन्सिललिसे विधागत पत्रकारिता’ विषयक अन्तर्क्रिया ज्याझ्वः जूगु दु ।
ज्याझ्वलय् प्रेस काउन्सिल नेपालया नायः बोर्णवहादुर कार्कीं विधागत क्षेत्रय् ज्या यानाच्वंपि पत्रकारपिनि दथुइ विद्यमान अवस्था, हाथ्या व सम्भावनाया पहिचान यायेत आवश्यक रणनीति मालीगु धयादिल । दक्वं संचार गृहयात व्यवस्थित, जिम्मेवार व जवाफदेही दयेकेत अभिभावक संस्थाया नातां प्रारम्भिक सहलह जूगु नायः कार्कीं स्पष्ट यानादिल ।
उगु हे ज्याझ्वलय् विश्व प्रेस काउन्सिलया न्हापांम्ह न्वकू किशोर श्रेष्ठ, प्रेस काउन्सिल नेपालया दुजः व विधागत पत्रकारिता उपसमितिया कजि चेतनाथ धमला, दुजःपिं इश्वरीप्रसाद ओझा, गोविन्दप्रसाद चौलागाई, दुजः छ्यान्जे बीरवहादुर राईं विधागत पत्रकारिताबारे थःथःगु तसें आवश्यक तालिम, राहतया ज्याझ्वः हयेत पहल यायेमाःगु धयादिल ।
अथे हे नेपाल फोरम अफ साइन्स जर्नालिस्टया नायः छत्र कार्की, लक्ष्मण डंगोल, वैैदेशिक रोजगार कृषि पत्रकार समाजया न्वकू धनबहादुर मगर, नेपाल साहित्यिक पत्रकार संघया न्वकू नवराज पुडासैनी, विकास पत्रकार मञ्चया छ्यान्जे चन्द्रमणि भट्टराई, नेपाल वातावरण पत्रकार समूहया उर्वसी बस्न्यातलिसें नं थःथःगु नुगः खँ तयादीगु खः ।
कलाकार रामशेखर क्यान्सर अस्पताल भर्ना
लहनान्यूज | सिल्लाथ्व त्रयोदशि ११३७ (फेब्रुअरी ९ २०१७)
लोकंव्हाःम्ह कलाकार लिसें निर्देशक रामशेखर नकःमि थौं ख्वपया क्यान्सर अस्पताल भर्ना जुयादीगु दु ।
मोडल अस्पतालं भक्तपुर क्यान्सर अस्पताल रिफर यायेधुंकाः उखे झाःम्ह नकःमियात बेडया समस्या जुयाः अस्पतालं भर्ना मकाःगु खः । थौं बेडया व्यवस्था यानाः भक्तपुर क्यान्सर अस्पतालं भर्ना काःगु खः ।
वंगु आइतवाः वयकःयात सासः सम्बन्धि समस्या जुयाः येँया मोडल अस्पतालय् वासः यायेत हःगु खः । इमर्जेन्सीइ अस्पताल थ्यंम्ह कलाकार नकःमियात लिपा तसकं म्हं मफयेवं आइसीयूलय् तयाः वासः याःगु खः । अन वयकःया न्हासय् ला बढे जुइगु ल्वय् ‘नोजेफारेन्सिजयल कार्सिनोमा’ या अप्रेशन जुगु खः ।
व धुंकाः वयकःया न्हायया लाया बायोप्सि टेष्ट याःबलय् उकिया रिपोर्ट पोजिटिभ वःगु खः । व धुंकाः मोडल अस्पतालं वयकःयात भक्तपुर क्यान्सर अस्पताल रिफर यानाछ्वःगु खः ।
थ्व हे दथुइ, नेवाः पत्रकार राष्ट्रिय दबुलिं कलाकार नकःमिया वासः यायेत ग्वाहालि यायेगु नितिं जिप्रका ख्वपयात इनाप याःवनीगु जूगु दु ।
कन्हय् पत्रकार दबूया छगू पुचः जिप्रका ख्वपय् वनाः ताः इलंनिसें दम, प्रोष्टेड व चिनि ल्वयया वासः याकुयाकुं आर्थिक अभाव जुइधुंकूगु अवस्थाय् क्यान्सरं कःम्ह कलाकार नकःमियात अःपुक वासः यायेत सहजीकरण यानाबीत इनाप याः वनेत्यनागु दबूया छ्यान्जे सुनिल महर्जनं कनादिल ।
छ्यान्जे महर्जनं कन्हय् जिप्रका ख्वपय् वनाः कला, साहित्य व संगीतया माध्यमं देयया नां थकायेत च्वछायेबहःगु योगदान बियादीम्ह कलाकारयात राज्यं वासः यायेगु व्यवस्था यानाबीमाःगु खँ थःपिन्सं तयेत्यनागु लहनान्यूजयात कनादिल ।
