Display Style:
Column Style
पुखूया विवाद वार्तापाखें ज्यंकेत महानगरपालिकायात दबाब
लहनान्युज | दिल्लागा षष्ठी ११३९ (जुलाई २३ २०१९ )
आन्दोलनय् ज्यापू समाजलिसें ४०गू त्वाःया नायःपिनिगु ऐक्यबद्धता
प्रहरी बल छ्यलाः आन्दोलन क्वत्यलेगु प्रमुखया योजना पूमवन
पलेस्वां पुखूया विवाद वार्तापाखें ज्यंकेत यल महानगरपालिकायात निरन्तर दबाब लानाच्वंगु दु । पलेस्वां पुखूयात पार्किङ याय्गु थाय्कथं मखुसे पुखू हे कायम याय्माःगु माग तयाः स्थानीयवासीपिं साउन १ गतेनिसें निरन्तरकथं संघर्ष न्ह्याका वयाच्वंगु दु । स्थानीयबासीया संघर्षयात कयाः थीथी जातीय समाज, संघसंस्था व ज्यापु समाजलिसें पीगू त्वाःया नायःपिन्सं नं ऐक्यबद्धता क्यंगु दु ।
थुगु ऐक्यवद्धतापाखें न्ह्याथे यानाः नं पार्किङ याय्गु थाय् दय्केगु ठेक्का कार्यान्वयन यानांतुं त्वःतेगु अडानय् दुम्ह महानगरपालिकाया प्रमुख चिरीबाबु महर्जनयात बार्तापाखें हे समस्या ज्यंकेत तसकं दबाब लाःगु सीदुगु दु । ठेक्काय् बीगु निर्णय कार्यान्वयन याय् मफय्वं समस्या ज्यंकेत प्रमुख महर्जनया नितिं वार्ता वाहेक मेगु विकल्प नं ल्यंमदुगु धाःगु दु ।
प्रहरी प्रशासनपाखें स्थानीयवासीया आन्दोलन क्वत्यलेगु प्रमुख महर्जनया न्हापांगु योजना प्रहरी प्रशासनया हुनिं कार्यान्वयन जुइमफुत । प्रहरीं स्थानीयवासीया आन्दोलनयात वार्तापाखें हे ज्यंकेमाःगु छ्याता प्रमुख महर्जनयात ब्यूगु खः ।
स्थानीयवासीया आन्दोलनया हुनिं नःत्वालय् च्वंगु पलेस्वां पुखू दुगु थाय् पार्किङया नितिं ठेक्काय् बीगु यल महानगरपालिकाया क्वःछिना कार्यान्वयन जुइमफुत । महानगरपालिकां उगु थाय् साउन १ गतेनिसें पार्किङया नितिं ठेक्काय् बीगु क्वःछ्यूगु खः । महानगरपालिकां ठेक्काया नितिं वंगु जेठ १० गते बोलपत्र आह्वानय याःगु खः । ठेक्काय् बीगु तयारी न्ह्याकेवं स्थानीयवासीं उकिया विरोध याना वयाच्वंगु खः ।
नःत्वाः पलेस्वां पुखू संरक्षण समिति, नःत्वाः मंकाः खलः व नःत्वाः मिसा पुचःया न्ह्यलुवाय् स्थानीयवासी आन्दोलनय् कुहां वःगु खः । विरोध प्रदर्शनया झ्वलय् स्थानीयवासी थःपिन्सं हे पुखू दय्केत गाः म्हुल । थ्व स्वयां न्ह्यः धार्मिक विधिपूर्वक बज्राचार्य गुरुजुपिन्सं पूजापाठ यानाः पुखूया शिलान्यास याःगु खः ।
‘इतिहासंनिसें पुखू दुगु थुगु थाय्यात पुखू हे दय्केमाः । महानगरपालिकां ‘जबरजस्ती’ पार्किङया नितिं ठेक्का ब्यूगु खः । पार्किङ याय्गु थाय् दय्केगु क्वःछिनायात कयाः जिमिगु असहमति दु ।’ संरक्षण समितिया नायः बाबुराजा महर्जनं धयादिल ।
‘परापूर्वकालनिसें हे यल महानगरपालिकाया वडा ल्याः २०य् निगू व वडा ल्याः ३य् निगू पुखू दुगु खः । उगु पुखू मध्ये वडा ल्याः २०य् दुगु छगू पुखू न्हंकाः त्रिपद्म माध्यामिक विद्यालय दय्कल । वडा ल्याः ३य् दुगु छगू पुखू न्हंकाः थौंकन्हय्या महानगरपालिकाया भवन दय्कल । महानगरपालिका भवन लिक्कसं छगू पुखू लः रिचार्ज मजुइकथं ‘कृतिम पुखू’ दय्कल । ल्यंदनीगु थ्व हे छगू थाय् दनी । थुकियात पुखू हे कायम याना तय्माः । ठेक्केदारयात छु नं हालतय् पार्किङ याय्गु थाय् दय्के बीमखु ।’ नायः महर्जन धयादिल ।
उगु थासय् पुखू दय्कूसा हिति, मंगलय् लःया स्तर थहां वयाः नःत्वाः, छाय्बहाः जःखःया ल्वहंहितिपाखें लः हाइगु स्थानीयवासीपिनिगु विश्वास दु । अथे हे, वा वःगु लः जमीनं क्वय् बाहाः वने मफयाः महापाः, गाःबहाः जलमग्न जुइगु अवस्था नं म्हो जुइगु स्थानीयबासीपिनिगु आशा दु ।
वि.सं. २०४१ सालय् राजकूलोपाखें लः वय्गु दीवं पुखू बुलुहुँ गना वन । लिपा वनाः उगु थाय् ‘फोहोर वांछ्वय्गु थाय्’ जूवन । जुजुं उगु थासय् फा लहीगु शुरु यात । उगु थाय् तसकं नवल । ताः ईतक फोहोर व दुर्गन्धपाखें दिक्क चाःपिं स्थानीयवासीत हे जानाः सरसफाई अभियान न्ह्याकल । ‘यचुपिचु लिपा उगु थाय्यात थौंतक नं स्थानीयवासीं मदिक्क संरक्षण याना वयाच्वनागु दु ।’ नःत्वाः मिसा पुचःया निवर्तमान नायः सजनी महर्जनं धयादिल, ‘आः वयाः स्थानीयवासीपिनिगु भावना अःखः पार्किङया नितिं ठेक्का बीगु ला ?’
थ्व स्वयां न्ह्यःया प्रमुख बुद्धिराज बज्राचार्यं नं तत्कालीन प्रधानमन्त्री गिरिजाप्रसाद कोइराला मार्फत सभागृह दय्केत शिलान्यास नं याकादीगु खः । तर स्थानीयवासीपिन्सं विरोध यानाः उगु हल दय्के मब्यूगु खः ।
महानगरपालिकाय् जनप्रतिनिधि मदुगु इलय् हे पुखू दय्केत स्थानीयवासीपिन्सं माग याःगु इलय् तत्कालीन कार्यकारी प्रमुखं तत्कालया नितिं पर्यटक वसपार्क दय्केगु धयादीगु खः । लिपा पुखू दय्केगु धाल । स्थानीयवासीपिन्त थुगु खँ बांलाक्क हे लुमनाच्वंगु दु । ‘आः जनप्रतिनिधि वयाः पुखू दय्केगु नितिं पलाः न्ह्याकेगु ला गन ख ःगन, अःखतं स्वदँ न्ह्यः कर्मचारीं धाःगु हे खँयात लिसा काल ।’ मिसा पुचःया निवर्तमान नायः महर्जनं धयादिल ।
स्थानीय सरकार सञ्चालन ऐनकथं सार्वजनिक पुखू संरक्षण याय्गु ज्या स्थानीय तगिंया खः । जनप्रतिनिधिपिं हे थुगु दायित्वपाखें लिचिलेवं स्थानीयवासी आन्दोलित जुइगु स्वभाविक जूगु दुपाः त्वाःया नायः प्रेमकृष्ण महर्जनया धापू दु ।
ठेक्काय् बीगु क्वःछिनायात स्थानीयवासीया असन्तुष्टि दुगु विषयस मंगलाःया नगरसभाय् वडा ल्याः २०या दुजः धनबहादुर महर्जनं ध्यानाकर्षण याकादीगु खः । ‘थुगु विषयस खँ ल्ह्वनाबलय् प्रमुख चिरीबाबु महर्जनं उगु थासय् बोलपत्र आह्वान यानाः निर्णय जुइधुंकूगुलिं आःया नितिं पार्किङ याय्गु थाय् दय्केनु । लिपा विस्तृत आयोजना प्रतिवेदन (डिपिआर) दय्काः पुखू दय्केगु धयादिल ।’ प्रमुख महर्जनया धापूयात न्ह्यथसें वडा दुजः धनबहादुर महर्जनं धयादिल ।
येँ महानगरपालिकां सम्पदा संरक्षणयात मू प्राथमिकता
नृपेन्द्रलाल श्रेष्ठ | दिल्लागा चौथी ११३९ (जुलाई २१ २०१९)
येँ महानगरपालिकाया आर्थिक वर्ष २०७६ व ७७ या नीति तथा कार्यक्रम पारित जुगु दु । महानगरया न्याक्वःगु नगरसभाया बैठकं छु न्हि न्ह्यः पारित जुगु उगु नीति तथा कार्यक्रम बारे जानकारी बिइगु लागि थौ छगु पत्रकार सम्मेलनयासे उग न्याझ्वःया सार्वजनिक यानादिगु खः ।
आर्थिक वर्ष २०७६ व ७७ या नीति तथा कार्यक्रमय् येँ महानगरपालिकां सम्पदा संरक्षणयात मू प्राथमिकता लाकुगु दु । थौंया उगु पत्रकार सम्मेलनय् महानगरया प्रवक्ता ईश्वरमान डंगोलं महानगरं सम्पदा संरक्षण तथा पर्यटन प्रवर्द्धनका लागि ‘पूर्वाधार विकास वर्ष’ जु धका धयादिगु खः ।
अथेहे महानगरया हरेक जात्रायात अन्तर्राष्ट्रिय करण याना पर्यटन प्रवद्धन यायेगु निति दयकुगु दु । स्वनिगःया तधःगु येँयाः जात्रायात बिश्वब्यापि यायेगु तातुना येँ महानगरया भगिनि सम्बन्ध व सहकार्य जुुगु शहर नाप प्रतिनिधिपन्त बिशेष आमन्त्रण यायेगु ज्याझ्वः न न्ह्यःने हःगु दु ।
वइगु आर्थिक वर्षय् हनुमानध्वाका निसे स्वयम्भू तक पुरातात्विक सम्पदा पदमार्ग व पशुपतिनाथ निसे देखि बौद्धस्तुपा तक हरित सम्पदा पदमार्ग निर्माण यायेगु नीति तथा कार्यक्रमय् दुथ्याकुगु दु ।
महानगरं ऐतिहासिक, धार्मिक, पुरातात्विक महत्वया त्वाः, बस्ती, मठ, मन्दिर, भाषा, लिपी, रितीरिवाज व अमूर्त सम्पदाया संरक्षण नाप सम्बर्द्धन यायेगु नीति तथा कार्यक्रमय् समावेश याःगु दु ।
आ वइगु आर्थिक दँय् महानगरं शहिदपि धर्मभक्त माथेमायाःगु शालिक सिफल, सहित दशरथ व गंगालालयाःगु शालिक शोभाभगवतिइ पूर्णकद्या शालिक प्रतिस्थापन यायेगु धका प्रवक्ता डंगोलं जानकारी बियादिगु खः ।
थुगु नीति तथा कार्यक्रमय् सुरक्षित भवन निर्माण यायेगु महागरवासीयात प्रोत्साहन यायेगु उद्देश्यं निम्ह व निम्ह स्वया अप्वो जग्गाधनीपिन्त सहमतियाना छगु हे आवासीय भवन निर्माण यायेत नक्सा पेश यात धाःसा नक्सापास दस्तुरय् ९० प्रतिशत छुट बिइगु, महानगरपालिकाया दुने मू सतकय् अर्नामेन्टल प्लान्ट याना शहरी हरियाली नाप सौन्दर्य अभिवृद्धि यायेगु, छगु छँे निगु सिमा ज्याझ्वः अभियानयात निरन्तरता ब्युगु दु ।
पत्रकार दबू ख्वप कचाय् न्हगु नेतृत्वय् राम तमखु
नृपेन्द्रलाल श्रेष्ठ | दिल्लागा चौथी ११३९ (जुलाई २१ २०१९)
नेवाः पत्रकार राष्ट्रिय दबू ख्वप कचाया स्वक्वःगु अधिवेसन व खुक्वःगु साधारणसभा छगु ज्याझ्वः दथुइ दबूया नायः श्रीकृष्ण महर्जनं उलेज्या यानादिगु दु ।
उगु ज्याझ्वलय् दबूया न्वकु नृपेन्दलाल श्रेष्ठ, सुरजवीर बज्राचार्य व दांभरी सुरेन्द्रभक्त श्रेष्ठ नाप भक्तपुर पत्रकार महासंघया प्रतिनिधि, शिल्पकार समाजया प्रतिनिधि व भक्तपुर घरेलुया जितेन्द्र जितिपिन्स स्वक्वःगु अधिवेसन व खुक्वःगु साधारणसभा भिंतुना न्वचु तयादिगु खः ।
ख्वप कचाया नायः ईश्वरकाजी श्रेष्ठया सभाध्यक्षताय् जुगु उगु ज्याझ्वलय् सचिव सिमान्त सिल्पकारं आर्थिक प्रतिवेदन व प्रगति बिवरण न्ह्यब्बयादिगु खः ।
उगु अधिवेसनं रामगोपाल तमखुया सर्वसम्मतं अध्यक्ष ल्यःगु दु । अथेहे, न्वकु सुरेश श्रेष्ठ ,छ्याञ्जे देवेन्द्र प्रजापति, दांभरी चन्द्रकृष्ण श्रेष्ठ व दुजःपिं रिता दुवाल, प्रकाश मल्ल, राजन गारु, ऋषिकेश श्रेष्ठ व सिमान्त शिल्पकारया सर्वसम्मत ल्यःगु खः ।
अथेहे, केन्दिय पार्षदया लागि रत्न श्रेष्ठ, बाबुकाजी श्रेष्ठ, पुर्णभक्त दुवाल, किष्ण किसि व रामराजा नापित ल्यःगु खः ।
स्वक्वःगु तःमुँज्याया लागि दबूया दांभरी सुरेन्द्रभक्त श्रेष्ठया संयोजकत्वय् सुमन श्रेष्ठ व जितेन्द्र जितिपिं निर्वाचन कमिति च्वनादिगु खः ।
स्वम्ह च्वमिया बाखं ब्वने ज्या
लहनान्युज | दिल्लागा चौथी ११३९ (जुलाई २१ २०१९)
सः छगू फरक अभिव्यक्तिया ग्वसालय् शनिवाः यलय् नेपालभाषाय स्वम्ह चिबाखं च्वमिपिनिगु छगु साहित्यक ज्याझ्वः जूगु दु ।
उगु ज्याझ्वलय् साहित्यकारपिं भूषण प्रसाद श्रेष्ठ, ध्रुव मधिकःमि व पुष्कर माथेमापिन्स थःथःगु न्यापु न्यापु बाखं न्यकादिगु खः ।
सुनिल बाज्राचार्यं न्ह्याकादीगु उगु ज्याझ्वलय् सुधिर ख्वबिं स्वम्ह बाखं च्वपि व ब्वतिकयादीपिं मध्ये साहित्यकार जुलुम चित्रकारयात लःल्हानादीगु खःसा नरेश अमात्यं लसकुस यानादीगु खः ।
बुखँ नेवाः सुचना केन्द्र किपाः राजेन्द्र रंजित
महानगरया प्रशासन प्रमुख कार्की सामान्य प्रशासन मन्त्रालय सःतल
लहनान्यूज | ने.सं. ११३९ दिल्लागा दुतिया (१८ जुलाइ, २०१९), विहिवाः
येँ महानगरपालिकाया प्रशासन प्रमुख ज्ञानेन्द्र कार्कीयात संघीय मामिला तथा सामान्य प्रशासन मन्त्रालयय् साःगु दु । कार्की धाःसा मन्त्रालयस हाजिर जुइत माने जुयाच्वंगु मदुनि ।
ताःई न्ह्यःनिसें महानगरय् च्वना ज्या यानाच्वनादीम्ह कार्की लिपांगु इलय् चकंदबूया जग्गाय् टहरा दयेकाः बालं बीत नक्कली भ्वं दयेकेगु निसें बसपार्कया टावर ठेक्काय् तकं स्वानाच्वंगु खः । कार्कीया हे हुनिं महानगरया प्रमुखतकं विवादय् लाःगु धासें नेपाल कम्यूनिष्ट पार्टी (नेकपा)या नेतातसें कारवाहीया दबाब ब्यूगु खः ।
३१ असारय् संघीय मामिला तथा सामान्य प्रशासन मन्त्रालयं महानगरपालिकायात पौ च्वयाः कार्कीयात मेगु निर्णय मजूतलय् मन्त्रालयस हाजिर याकेत छ्वयेत पत्राचार याःगु खः ।
कन्हय् खुन्हु हे अर्थात साउन १ गते महानगरपालिकाया प्रमुख प्रशासकीय अधिकृत केदार न्यौपानें कार्कीयात मन्त्रालयस हाजीर जूवनेगु नितिं तोक तयाब्यूगु खः । कार्की धाःसा कर्मचारीलिसे लबिङ यानाच्वंगु दु ।
कांग्रेस लिक्क लाःगु स्थानीय तह कर्मचारी युनियनया छगू पुचलं कार्कीयात मन्त्रालय छ्वःसा आन्दोलन यायेगु ख्याच्वः ब्यूगु दु । युनियनया महानगर कमिटी नायः कृष्ण सोती छगू लख ७द्वः तका घुसलिसे निन्हु न्ह्यः ज्वंगुलिं युनियनया मेम्ह नेता हरि कुँवरं आन्दोलनया ख्याच्वः ब्यूगु खः ।
सत्तारुढ नेपाल कम्यूनिष्ट पार्टी सम्बद्ध कर्मचारी युनियनं धाःसा कार्की थीथी अनियमितताय् दुथ्याःगुलिं छानवीनया नितिं मन्त्रालय सःतूगु जुइफूगु धासें हाजीर जूवनेमाःगु धाःगु दु ।
