Display Style:
Column Style
बीपी स्वास्थ्य प्रतिष्ठानया पूर्वउपकुलपति नाप च्याम्हेसित ज्वन
लहनान्युज | दिल्लाथ्व पुन्हि ११३९ (जुलाई १६ २०१९)
अख्तियार दुरुपयोग अनुसन्धान आयोगं बीपी कोइराला स्वास्थ्य विज्ञान प्रतिष्ठानया पूर्वउपकुलपति बलभद्रप्रसाद दास नाप च्याम्हेसित विशेष अदालतय् मुद्दा दायर याःगु दु ।
प्रतिष्ठानया थीथी तिथि जुगु वस्तु नाप सेवाया खरीद जुगु इलय् बोलपत्र सम्बन्धी भ्वतय् उल्लेखित प्राविधिक ‘स्पेशिफिकेशन’ व व हे भ्वतय् सङ्लग्न खरिद सम्झौताया शर्त कथं ज्या जुगु मखंगुनि अथे कारवाहि न्ह्याकुगु खः ।
आयोगं तत्कालीन उपकुलपति दासविरुद्ध प्यगु करोड च्यागु लाख ९८ द्धः ध्यवा, रजिष्टार तुलबहादुर श्रेष्ठविरुद्ध ५६ लाख ७७ द्धः बराबर ध्यवा भ्रष्टाचार याःगु अभियोग लगे याःगु दु । अथेहे अस्पतालया निर्देशक अरविन्दकुमार सिन्हाविरुद्ध स्वगु करोड ७५ लाख ३० द्धः ध्यवा भ्रष्टाचार याःगु आरोप दु ।
बोलपत्रया तथ्य विश्लेषण मयासे भुक्तानी बिइत लेखा प्रमुख दिनेशराज दाहालं निगु करोड ३४ लाख ८१ द्धः, उपप्रबन्धक अमित श्रीवास्तवविरुद्ध छगु करोड ७४ लाख १६ द्धः बराबरया ध्यवा भ्रष्टाचार याःगु अभियोग लगे याःगु दु ।
उपकरण सप्लायर्स प्रोसिजना मेडिकल प्रालि, वायोमेड इन्टरनेशनल प्रालिया चेतन अग्रवाल, उपकरण आपूर्ति याइम्ह वितरक सर्जिमके डिस्टिब्यूटरया उमेश अग्रवालं थीथी सामान आपूर्ति यायेत प्रतिष्ठानया पदाधिकारी नाप मिलेमतो याःगु लुगु खः ।
आयोगं चेतनविरुद्ध छगु करोड प्यंगु लाख १६ द्धः ध्यवा, उमेशविरुद्ध ६० लाख ३६ ध्यवा बराबरया भ्रष्टाचार याःगु अभियोग लगे याःगु खः ।
आयोगं जलस्रोत तथा सिँचाइ विभाग डिभिजन कार्यालय भोजपुरया सीडीई मोहनबाबु यादवयात छगु लाख ८० द्धः ध्यवा घुस नाप हे ज्वःगु खः । सिँचाइ कार्यक्रमया बिल स्वीकृत यायेगु प्रयोजनया लागि सीडीई यादवं घुस फ्वःगु अभियोग लगे याःगु खः । आरोपी यादवयात भोजपुर नगरपालिका–७ स्थित फुपू भदैनी होटलपाखे ज्वःगु खः ।
मंकाः खलःया दबूछेँ निर्माण यायेगु लागि ५ करोड
नृपेन्द्रलाल श्रेष्ठ | दिल्लाथ्व चर्तुदशी ११३९ (जुलाई १५ २०१९)
नेपालभाषा मंकाः खलःया दबूछेँ निर्माण यायेगु लागिं येँ महानगरपालिका पाखे ५ करोड २५ लाख तका दां बीगु जूगु दु ।
येँ महानगरपालिकाया न्याक्वःगु अधिवेशनया झ्वलय् न्ह्यब्बःगु आर्थिक वर्ष २०७६÷७७ या वार्षिक बजेट तथा कार्यक्रमय् मंकाः खलःया लागिं छुटे याना तःगु थ्व बजेट नं उल्लेख याना तःगु खः ।
मंकाः खलकं थःगु दबूछेँ दनेगु लागिं ताः ई न्ह्यवंनिसें कुतः याना वयाच्वंगु खः । येँ मनपाया मेयर विद्यासुन्दर शाक्यं थःगु चुनावी घोषणापत्रय् नं थः त्यात धाःसा मंकाः खलःया दबूछेँ दनेगु लागिं बजेटया व्यवस्था यायेगु बचं बियादीगु खः ।
ताःई न्ह्यवंनिसें विवादं यानाः न्ह्याये मफयाच्वंगु मंकाः खलः छुं ई न्ह्यः तिनि जनकवि दुर्गालाल श्रेष्ठया अध्यक्षताय् दर्ता यायेगु ज्या जूगु खः ।आः वइगु बजेटं अन हे दबूछेँ निर्माण याइगु खँ धाःगु दु ।
दबू छेँ दनेगु नितिं मकाः खलःया प्यम्ह संस्थापकतय्गु नामय् येँया १५ वडा बिजेश्वरी बज्र होटलया नापं २८ आना जग्गा दु । उगु जग्गा लिटिल बुद्ध एकेदमी स्कूलयात बालं बिया तःगु खः ।
किपाः नातिकाजि महर्जन
किपुली छवाःयंकया होमस्टे तालिम क्वचाल
लहनान्युज | दिल्लाथ्व चर्तुदशी ११३९ (जुलाई १५ २०१९)
“भिजिट नेपाल २०२०” यात लक्षितयानाः किपुलिइ जूगु छवाःयंकया होमस्टेया तालिम सञ्चरवाः क्वचाल ।
किपू नगरपालिका वडा ल्याः ३य् च्वंगु श्रीपञ्चमि मानन्धर गुथिइ उगु तालिम जूगु खः । नेपाल पर्यटन तथा होटेल व्यवस्थापन प्रतिष्ठान (नाथम)या ग्वाहालिइ स्वंगः ल्वहं पुचःया ग्वसालय् जूगु उगु तालिमय्् किपू नगरपालिकाया वडा ल्याः १, २ व ३ य् च्वंपिं पीस्वम्हेसिनं ब्वति काःगु खः ।
नाथमया प्रशिक्षकपिं सूर्यकिरण श्रेष्ठ, नम्रता अधिकारी, बद्री अर्याललिसें हिराज्ञान महर्जनपिन्सं कुक, हाउस किपिङ्ग, एकाउण्ट व रिसेप्सनयात कयाः प्रशिक्षण बियादीगु खः । चिरायू नेशनल हस्पिटलया सहायक मेट्रोन गीता श्रेष्ठं फष्र्ट एडया बारे प्रशिक्षण बियादीगु खः ।
समापन ज्याझ्वलय् मूपाहाँ किपू नगरपालिकाया प्रमुख रमेश महर्जन व विशेष पाहाँ नाथमया कार्यकारी निर्देशक दुर्गादत्त ढकालं प्रशिक्षार्थीपिन्त दसिपौ लःल्हानादीगु खः ।
किपू नगरपालिकाया मेयर रमेश महर्जनं किपुलिइ नं होमस्टे न्ह्याके फइगु जूगुलिं थजाःगु तालिम आवश्यक जूगु व होमस्टे न्ह्याकेत नगरपालिकापाखें माःगु ग्वाहालि याय्त तयार दुगु कनादिल ।
ग्वसाःखलःया नायः सुविन्द्र नारायण महर्जनया सभाध्यक्षताय् न्ह्याःगु उगु ज्याझ्वलय् वडा नं. ३या वडाध्यक्ष राजेन्द्र महर्जनलिसें प्रशिक्षकपिन्सं नं थःथःगु नुगः खँ तयादीगु खः । काजिराम मालाकारं न्ह्याकादीगु उगु ज्याझ्वलय् भाइलाल महर्जनं लसकुस यानादीगु खः ।
मोटर डेन्टपेन्ट सम्बन्धि कार्यशाला गोष्ठी जुल
लहनान्युज | दिल्लाथ्व चर्तुदशी ११३९ (जुलाई १५ २०१९)
सभा इन्टरनेशनल ट्रेडिङ्गया ग्वसालय् सिंङ्गापुरया ‘एज्को नोबल कार रिफिनिशेज’ सहकार्यस प्यन्हुया ‘आधारभूत तथा कलर डेन्टपेन्ट कार्यशाला गोष्ठी’ क्वचाल ।
वंगु असार २४ मंगलवाःनिसे सभा इन्टरनेशनल ट्रेडिङ्गया हलय् जूगु उगु गोष्ठीइ एज्को नोबलया प्रशिक्षक याजिद बिन ममत सालेहं डेन्टपेन्ट सम्बन्धि वइगु समस्या, समस्यापाखें बचय् जुइगु, रंगया सैद्धान्तिक पक्षलिसें डिजिटलाइजेशन व थुकिया प्राविधिक पक्षयात कयाः प्रशिक्षण बियादीगु खः ।
थ्व हे झ्वलय् डेन्टपेन्टया व्यवहारिक पक्षयात कयाः प्रयोगात्मक कक्षा नं जूगु खः ।
न्यू जेनिथया विदाइ व भिन्तुना ज्याझ्वः
नृपेन्द्रलाल श्रेष्ठ | दिल्लाथ्व चर्तुदशी ११३९ (जुलाई १५ २०१९)
न्यू जेनिथ इङ्गलिस मोडेल स्कूलपाखें २०७५या एसईई पास जूपिं विद्यार्थीपिन्त भिन्तुनालिसें विदाई ज्याझ्वः यात ।
स्कूलया संस्थापक भाइस प्रिसिन्पल पुष्पलाल श्रेष्ठया सभाध्यक्षताय् जूगु उगु ज्याझ्वलय् येँ महानगरपालिका वडा ल्याः १८या वडाध्यक्ष न्हुछेकाजी महर्जन मूपाहाँकथं झायादीगु खः ।
ज्याझ्वलय् एसईई परीक्षा २०७५य् जिपिए ३.९० लिसें उत्कृष्ट ल्याः हयादीम्ह विद्यार्थी रमेश रोकायं केएमसीया विज्ञान संकायपाखे प्रवेश परीक्षाय् सर्वोकृष्ट जुयाः ११ व १३ निगू तगिमय् नं छात्रबृत्ति कयादीगुलिं विशेष सम्मान याःगु खः । अथे हे छम्ह अभिभवक व छम्ह विद्यार्थीयात खादां न्यय्काः मतिनाया चिं लःल्हासें सम्मान याःगु खः ।
ज्याझ्वलय् संस्थापक प्रिन्सिपल राजु महर्जनं उतीर्ण जुयादीपिन्त भिन्तुना देछानादिसें वइगु दिनस गजाःम्ह पासा दय्कूसा थःगु जीवनय् न्ह्याबलें लसतां जायाच्वनी धकाः ‘सकारात्मक सोच दुम्ह पासा, नकारात्मक सोच दुम्ह पासा, छंगु नितिं सकारात्मक सोच दुम्ह पासा, छंगु नितिं नकारात्मक सोच दुम्ह पासा व न्युट्रल पासा’या बारे धयादीगु खः ।
ज्याझ्वलय् उपस्थित जुयादीपिन्त प्लस टुया प्रिन्सिपल विकास पौडेलं लसकुस यानादीगु खः ।
थुगुसी उगु ब्वनेकुथिपाखें ५८म्हेस्यां एसईई ब्यूगु खःसा ११म्ह ए प्लस, २१म्ह ए, १९म्ह बी प्लस, ६म्ह बी व १म्ह सी लिच्वःलिसें उतीर्ण जूगु खः ।
