Display Style:
Column Style
विधागत पत्रकारिता विकासय् जोड
लहनान्यूज | सिल्लाथ्व चतुर्दशि ११३७ (फेब्रुअरी ११ २०१७)
नेपाल प्रेस काउन्सिलया ग्वसालय् विधागत पत्रकारीता सम्वद्ध थीथी संघसंस्थाया पदाधिकारी, प्रतिनिधिलिसे ‘काउन्सिललिसे विधागत पत्रकारिता’ विषयक अन्तर्क्रिया ज्याझ्वः जूगु दु ।
ज्याझ्वलय् प्रेस काउन्सिल नेपालया नायः बोर्णवहादुर कार्कीं विधागत क्षेत्रय् ज्या यानाच्वंपि पत्रकारपिनि दथुइ विद्यमान अवस्था, हाथ्या व सम्भावनाया पहिचान यायेत आवश्यक रणनीति मालीगु धयादिल । दक्वं संचार गृहयात व्यवस्थित, जिम्मेवार व जवाफदेही दयेकेत अभिभावक संस्थाया नातां प्रारम्भिक सहलह जूगु नायः कार्कीं स्पष्ट यानादिल ।
उगु हे ज्याझ्वलय् विश्व प्रेस काउन्सिलया न्हापांम्ह न्वकू किशोर श्रेष्ठ, प्रेस काउन्सिल नेपालया दुजः व विधागत पत्रकारिता उपसमितिया कजि चेतनाथ धमला, दुजःपिं इश्वरीप्रसाद ओझा, गोविन्दप्रसाद चौलागाई, दुजः छ्यान्जे बीरवहादुर राईं विधागत पत्रकारिताबारे थःथःगु तसें आवश्यक तालिम, राहतया ज्याझ्वः हयेत पहल यायेमाःगु धयादिल ।
अथे हे नेपाल फोरम अफ साइन्स जर्नालिस्टया नायः छत्र कार्की, लक्ष्मण डंगोल, वैैदेशिक रोजगार कृषि पत्रकार समाजया न्वकू धनबहादुर मगर, नेपाल साहित्यिक पत्रकार संघया न्वकू नवराज पुडासैनी, विकास पत्रकार मञ्चया छ्यान्जे चन्द्रमणि भट्टराई, नेपाल वातावरण पत्रकार समूहया उर्वसी बस्न्यातलिसें नं थःथःगु नुगः खँ तयादीगु खः ।
कलाकार रामशेखर क्यान्सर अस्पताल भर्ना
लहनान्यूज | सिल्लाथ्व त्रयोदशि ११३७ (फेब्रुअरी ९ २०१७)
लोकंव्हाःम्ह कलाकार लिसें निर्देशक रामशेखर नकःमि थौं ख्वपया क्यान्सर अस्पताल भर्ना जुयादीगु दु ।
मोडल अस्पतालं भक्तपुर क्यान्सर अस्पताल रिफर यायेधुंकाः उखे झाःम्ह नकःमियात बेडया समस्या जुयाः अस्पतालं भर्ना मकाःगु खः । थौं बेडया व्यवस्था यानाः भक्तपुर क्यान्सर अस्पतालं भर्ना काःगु खः ।
वंगु आइतवाः वयकःयात सासः सम्बन्धि समस्या जुयाः येँया मोडल अस्पतालय् वासः यायेत हःगु खः । इमर्जेन्सीइ अस्पताल थ्यंम्ह कलाकार नकःमियात लिपा तसकं म्हं मफयेवं आइसीयूलय् तयाः वासः याःगु खः । अन वयकःया न्हासय् ला बढे जुइगु ल्वय् ‘नोजेफारेन्सिजयल कार्सिनोमा’ या अप्रेशन जुगु खः ।
व धुंकाः वयकःया न्हायया लाया बायोप्सि टेष्ट याःबलय् उकिया रिपोर्ट पोजिटिभ वःगु खः । व धुंकाः मोडल अस्पतालं वयकःयात भक्तपुर क्यान्सर अस्पताल रिफर यानाछ्वःगु खः ।
थ्व हे दथुइ, नेवाः पत्रकार राष्ट्रिय दबुलिं कलाकार नकःमिया वासः यायेत ग्वाहालि यायेगु नितिं जिप्रका ख्वपयात इनाप याःवनीगु जूगु दु ।
कन्हय् पत्रकार दबूया छगू पुचः जिप्रका ख्वपय् वनाः ताः इलंनिसें दम, प्रोष्टेड व चिनि ल्वयया वासः याकुयाकुं आर्थिक अभाव जुइधुंकूगु अवस्थाय् क्यान्सरं कःम्ह कलाकार नकःमियात अःपुक वासः यायेत सहजीकरण यानाबीत इनाप याः वनेत्यनागु दबूया छ्यान्जे सुनिल महर्जनं कनादिल ।
छ्यान्जे महर्जनं कन्हय् जिप्रका ख्वपय् वनाः कला, साहित्य व संगीतया माध्यमं देयया नां थकायेत च्वछायेबहःगु योगदान बियादीम्ह कलाकारयात राज्यं वासः यायेगु व्यवस्था यानाबीमाःगु खँ थःपिन्सं तयेत्यनागु लहनान्यूजयात कनादिल ।
थेच्वय सहश्र जलधारा हायेका: माघ हा:वन
लहनान्यूज | सिल्लाथ्व द्वादशि ११३७ ( फेव्रुअरी ८ २०१७ )
नेवाः बस्ति यलया थेच्वय् नेवाः परम्परा कथं माघ महिनाय् जुइगु माघ हाःवनेगु ज्याझ्वः अन्तिम इलय् थ्यंगु दु ।
थ्यंमथ्यं लच्छि न्ह्यवःनिसें जुयाच्वंगु माघ हाः वनेगु झ्वलय् शुक्रबाः थेच्वया पीगं लागा निसें हरि भजन यानाः देयया थीथी थाय् चाःहिउगु खः । अथे चाःहिलेगु झ्वलय् दक्कले न्ह्यःने सहश्र जलधारा हायेकाः वइगु खःसा वयां लिपा जःसिइ लः तयाः उकी मनूयात तयाः कुबिया हयेगु चलन दु ।
अथे जःसिइ तयाः मनू कुविया हइगुयात महाद्यवं थम्हं त्वंगु विष सिलु तीर्थय् वनाः शान्त याःगु कथं विश्वास याना वयाच्वंगु दु । थथे चाहिलेगु झ्वलय् मनूत थःगु म्हय् पाल्चा च्याकाः देय् चाःहिलेगु नं याइगु खः ।
नापं कृष्णया ध्वाँयया प्रतीक कथं मस्तयसं कापःया ध्वाँय् नं ज्वनावयेगु याइसा उगु इलय् महाद्यःया नन्दी कुन्दनी आदि देवगणया रुपं ख्या:चा नं हयेगु याः ।
ठमेल पर्यटन विकासय् गुरुङया नेतृत्व
लहनान्यूज | सिल्लाथ्व द्वादशी ११३७ (फेब्रुअरी ८ २०१७)
ठमेल पर्यटन विकास परिषदय् समीर गुरुङयात न्हूम्ह नायः ल्यःगु दु ।
येँय् क्वचाःगु परिषदया विषेश साधारणसभां समीर गुरुङ्गया अध्यक्षताय् १५ दुजःया न्हूगु ज्यासना पुचःयात निर्विरोध निर्वाचित याःगु खः । न्हूगु ल्यःगु ज्यासना पुचःया स्वम्ह न्वकुलिइ प्रकाश नरसिंह राणा, राजु मान डंगोल व गीता गुरुङ्ग ल्यःगु दु ।
न्हूम्ह मू छ्यान्जेय् भविश्वर शर्मा, व छ्यान्जेय् धाःसा दावाङ्ग तामाङ्गयात ल्यल । दांभरिं पदय् नारायण खनाल निर्वाचित जूगु दुसा दुजलय् गोपाल गुरुङ्ग, राजेन्द्र बहादुर दुलाल, टासी गुरुङ्ग, अनिल गरुङ्ग, रत्न प्रसाद दुलाल, राम चन्द्र गिरी, पुण्य राम लगेजु, किरण गुरुङ्ग निर्वाचित जुल ।
विशेष साधारण सभाय् मू पाहां कथं झाःम्ह पूर्व उपप्रधानमन्त्री प्रकाशमान सिंहं नुगः खँ तयेगु झ्वलय् राजधानीया महत्वपूर्ण क्षेत्र थँबहिलिं देयया पर्यटन प्रवद्र्धनया ख्यलय् च्वछायेबहःगु भूमिका म्हिता वयाच्वंगु धयादिल । सभाया उलेज्या यासें सिंहं थँबहि क्षेत्रया २४घौ हे खुला तयातयेगु नितिं आवश्यक कार्ययोजना क्वःछीमाःगु जिकिर यानादिल ।
थुगु हे खँय् बः ब्युसें नेपाल प्रहरीया एसएसपी छविलाल जोशीं थँबहियात २४घौ हे खुला यायेत माःगु शान्ति सुरक्षा ताःलाकेगु प्रतिवद्धता प्वंकादिल ।
यलय् निम्ह प्रहरीयात सम्मान
लहनान्यूज | सिल्लाथ्व एकादशि ११३७ (फेब्रुअरी ७ २०१७)
यलय् महानगरीय प्रहरी परिसर यलया प्रमुख लिसें प्रहरी वरिष्ठ उपरीक्षक ठूले राईयात लसकुस लिसें व परिसरया पूर्व प्रमुख पिताम्बर अधिकारीयात सम्मान याःगु दु ।
यलय् ग्वसाः ग्वःगु छगू ज्याझ्वःया दथुइ निम्हेसित सम्मान याःगु खः । यल जिल्लाय् सरुवा जुयावया: यल परिसरया भाला कःघानादीम्ह राईयात लसकुस याःगु खःसा न्हापा यल जिल्लाय् ज्या यानाः आः मेची जिल्लाय् सरुवा जूम्ह अधिकारीयात ज्याझ्वलय् सम्मान याःगु खः ।
महानगरीय प्रहरी प्रभाग मंगलबजार भवन निर्माण समिति, राष्ट्रिय युवा महासंघ नेपाल यल कचा, रुस्लान थ्री स्टार क्लब, बौद्ध युवा कमिटी यल, नेवाः पत्रकार राष्ट्रिय दबू यल कचा व पाटन संग्रहालय विकास समितिं मंकाः कथं ज्याझ्वः यानाः वयकःपिन्त हंगु खः ।
थःगु नुगः खँ तयेगु झ्वलय् प्रहरी वरिष्ठ उपरीक्षक अधिकारीं विश्वव्यापी भूमण्डलीकरण, सूचना प्रविधिया विकासलिसें अपराध नियन्त्रणय् हाथ्या अप्वयावंगु धयादिल ।
ज्याझ्वलय् अधिकारीया लिसें राष्ट्रिय उपभोक्ता मञ्च नेपालया नायः प्रेमलाल महर्जन, महानगरीय प्रहरी प्रभाग भवन निर्माण समितिया नायः अजरमान जोशी, यल उद्योग वाणिज्य संघया नायः सविन श्रेष्ठ, नेवाः पत्रकार राष्ट्रिय दबू यल कचाया छ्यान्जे राजेश बज्राचार्य, बौद्ध युवा कमिटी यलया निर्वतमान नायः सुनील महर्जनं थःथःगु नुगः खँ तयादीगु खः ।
