Display Style:
Column Style
पुष्कर माथेमा आः मुनाय्
लहनान्यूज | सिल्लाथ्व षष्ठी ११३७ (फेब्रुअरी २ २०१७)
वरिष्ठ पत्रकार पुष्कर माथेमां आवंलि गोरखापत्र संस्थानया पिथना मचा लयपौ ‘मुना’या सम्पादन यानादीगु जूगु दु ।
गोरखापत्र राष्ट्रिय न्हिपौया नि.प्रधान सम्पादकया रुपं ज्या याना वयाच्वनादीम्ह वरिष्ठ पत्रकार माथेमायात सिल्लाथ्व सप्तमी (माघ २१) शुक्रबाःनिसें लागू जुइकथं मुनाया सम्पादकया भाला ब्यूगु खः ।
थ्व हे झ्वलय् माथेमां निक्वःगु खुसी गोरखापत्रया प्रधान सम्पादक कथं बिकागु १३लाया ई तसकं बांलाःगु धयादीगु दु । सामाजिक संजालय् स्टाटस अपडेट यासें थुगु इलय् थम्हं क्षमता व धर्मं फत्तले गोरखापत्रयात बिस्कं कथं न्ह्यब्वयेत कुतः यानागु धयादिल ।
माथेमां थःत गोरखापत्रय् ग्वाहालि याःपिं सकसितं सुभाय् देछासें गोरखापत्रय् न्हूम्ह नियुक्त नि. प्रधान सम्पादक निर्मल आचार्ययात भिंतुना नं बियादीगु दु ।
काभ्रेय् पत्रकार दबूया सुदृढकरण अभियान
नृपेन्द्रलाल श्रेष्ठ | सिल्लाथ्व षष्ठी ११३७ (फेब्रुअरी २ २०१७)
नेवाः पत्रकार राष्ट्रिय दबूया केन्द्रपाखें न्ह्याकाच्वंगु संगठन सुदृढिकरण अभियान अन्तर्गत थौं काभ्रेय् ज्याझ्वः क्वचाःगु दु ।
थौंया ज्याझ्वलय् नायः श्रीकृष्ण महर्जनं अभियानया बारे कनादिल । अथे हे न्वकू सुरजवीर बज्राचार्यं दबूया ज्याझ्वःया बारेव मूछ्याञ्जे सुनिल महर्जनं दबूया आवश्यकता व औचित्य बारे ज्यापौ न्ह्यब्वयादीगु खः ।
ज्याझ्वलय् केन्द्रिय दुजः विजय कर्माचार्य, काभ्रे कचाया नायः सिद्धिबहादुर कर्माचार्य, पुलांम्ह नायः रमा कर्णजीत, पुलांम्ह केन्द्रीय दुजः पुस्पदास स्याउला लगायतयापिन्सं थःथःगु बिचाः प्वंकादीगु खः ।
व सिबें न्ह्यः येँ व ख्वप कचाय् नं उगु अभियान क्वचाये धुंकूगु दु । आः मेमेगु जिल्ला कचाय् नं थुगु अभियान न्ह्यानावनीगु दबूपाखें न्ह्यथंगु दु ।
राजोपाध्याय समाजया ई लाइब्ररी न्ह्यात
लहनान्यूज | सिल्लाथ्व पारु ११३७ (जनवरी २८ २०१६)
राजोपाध्याय समाजं राजोपाध्याय सम्बन्धि ऐतिहासिक, सांस्कृतिक लिसेंया सकतां हलंज्वलंया डिजिटल अभिलेखीकरण यायेत धकाः ई लाइब्ररी न्ह्याकूगु दु ।
थौं यलय् ग्वसाः ग्वःगु समाजया स्वक्वःगु साधारण सभा अले हना ज्याझ्वलय् उद्योगमन्त्री नविन्द्रराज जोशीं समाजया ई लाइब्ररी http://rajopadhyayasociety.org.np/elibrary या उलेज्या यानादिल । ज्याझ्वलय् मू पाहां उद्योगमन्त्री जोशीं नेवाः समुदायया गुरु पुरोहितया रुपं सांस्कृतिक भूमिकाय् सक्रिय राजोपाध्यायं विकसित प्रविधियात नं नालाकासें डिजिटल लाइब्ररी न्ह्याकूगु च्वछायेबहःगु धयादिल ।
उगु हे ज्याझ्वलय् राजोपाध्याय समाजपाखें न्हापांम्ह मिसा डाक्टर डा. मनिषा शर्मा राजोपाध्याययात हंगु खः । नापं अमेरीकाय् च्वनाः अनया नेवाः समुदायया गुरु पुरोहितया रुपं सक्रिय जुयाः ल्याय्म्ह संस्कृतिविद्या रुपं तकं म्हस्यूम्ह बासबचन्द्र राजोपाध्याययात नं हंगु खः । सम्मानित व्यक्तित्वपिन्त उद्योगमन्त्री जोशीं खादां न्ययेकाः हनापौ लःल्हानादिल । ज्याझ्वलय् २०७२ सालया एस.एल.सी परीक्षाय् ताःलाःपिं राजोपाध्याय विद्यार्थीपिन्त नं हंगु खः ।
थुगु हे ज्याझ्वलय् समाजया निगूगु स्मारिका लुमन्ति ११३७ या नं विमोचन याःगु खः । ज्याझ्वःया सकल पाहांपिं ताम्रकार समाजया नायः रविन्द्रराज ताम्रकार, ज्यापु समाजया नायः प्रेम महर्जन, स्यस्यः समाजया नायः डा.केदारलाल श्रेष्ठ, जोशी समाजया नायः जयन्तीलाल जोशी, वैदिक प्रतिष्ठानया नायः गोविन्द भक्तानन्द राजोपाध्यायं मंकाः रुपं स्मारिकाया विमोचन यानादीगु खः ।
ज्याझ्वलय् ताम्रकार समाजया नायः रविन्द्रराज ताम्रकार, ज्यापु समाजया नायः प्रेम महर्जनं समाजया विकासया लागिं दक्वं संगठित जुयाः थीथी जातीय संगठनतय्सं थवंथवय् सहकार्य यासें न्ह्याःवनेमाःगुलिइ बः बियादिल ।
ज्याझ्वलय् समाजया मू छ्यान्जे संजय शर्मा राजोपाध्यायं संगठनया वार्षिक प्रगती प्रतिवेदन न्ह्यब्वयादीगु खःसा दांभरिं जयन्ती शर्मा राजोपाध्यायं आर्थिक प्रतिवेदन न्ह्यब्वयादीगु खः । ज्याझ्वः समाजया नायः बदन ज्वालानन्द राजोपाध्यायया सभाध्यक्षताय् जूगु खः ।
प्रेमध्वज संगीत प्रतिष्ठान स्थापना जुइगु
लहनान्यूज | पोहेंलागा आमै ११३७ (जनवरी २७ २०१७)
संस्कृति, पर्यटन तथा नागरीक उड्डयन मन्त्री जीवनबहादुर शाहिं गोल्डन भ्वाइस अफ नेपाल प्रेमध्वज प्रधानया नामं प्रेमध्वज संगीत प्रतिष्ठान गठन यायेत पहल यायेगु धयादीगु दु ।
लहना मिडियाया ग्वसालय् येँय् क्वचाःगु ‘यूएफओ भिन्तुना सनिल’ ज्याझ्वलय् म्येहालामि प्रधानयात सम्मान लःल्हासें मन्त्री शाहिं संगीतया माध्यमं मदिक्क नेपाःया सेवा यानाच्वंम्ह प्रधानया नामय् प्रतिष्ठान याये हे माःगु धयादीगु खः । शाहिं नेपालय् रक एन्ड रोल संगीत दुतहयेगु निसें भारतय् हे च्वनाः म्ये हालेगु व्हःताःयात तकं त्वःताः नेपाली संगीत ख्यःयात हे कर्मक्षेत्र दयेकाः थःगु मातृभूमिप्रति म्येहालामि प्रधानं क्यनादीगु मतिनायात च्वछानादिल ।
लहना मिडियां न्हूदँ ने.सं. ११३७ या लसताय् याःगु प्रेमध्वज प्रधानया हना लिसें सांगितिक ज्याझ्वलय् मन्त्री शाहिं प्रधानयात हनापौ लःल्हासें हनादिल । अथे हे जनगायक भृगुराम श्रेष्ठं स्वांमाः कोखायेकादिल सा समाजसेवी लक्ष्मीदास मानन्धरं दोसल्लां न्ययेकादिल ।
नगद सम्मान कथं सम्मानित प्रधानयात यूएफओ क्लोडिङ स्टोरपाखें ५१,१११ तका लःल्हाःगु खः । यूएफओया ब्रान्ड मेनेजर सचिन श्रेष्ठ व हरि न्यौपानें प्रधानयात चेक लःलहानादीगु खः ।
प्रधानयात हनेगु झ्वलय् लहना मिडिया सकल दुजः लिसें सकल कलाकारपिन्सं नं खादां न्ययेकूगु खः । हना स्वयां न्ह्यः वरिष्ठ म्येहालामि प्रेमध्वजलिसें मन्त्री शाहि व ज्याझ्वःया विशिष्ट पाहां व पाहांपिन्त नेवाः परम्परा कथं ख्येँय् सगं ब्यूगु खः ।
सम्मान लःल्हाना कायेधुंकाः म्येहालामि प्रधानं नेवाः ख्यःपाखें थः दक्कले न्हापां सम्मानित जुइखंगु धयादीगु खः । नेवाः ख्यलं थःत थुकथं सम्मान याःबलय् थः तसकं लयताःगु धयादीगु खः ।
सन् १९३८ जुन ६स चौतारा सिन्धुपाल्चोकय् बूम्ह वरिष्ठ म्येहालामि प्रेमध्वज प्रधानंं बालाबालाचिंगु मिखा म्येलिसें नेपालय् रक एन्ड रोल संगीत दुत हयादीगु खः । लिसें भारतया सिने क्षेत्रया प्रतिष्ठित फिल्मफेयर अवार्डया न्हयक्वःगु संस्करणय् भ्वाइस अफ नेपाल उपाधिं सम्बोधित जुयाः म्ये तकं हालादीधुंकूगु दु ।
उगु इलय् प्रधानयात भारतय् हे च्वनाः हिन्दि संकिपाया नितिं म्ये हालेत इनाप यातं तकं वयकः नेपालय् हे च्वनेगु धकाः लिहां झाःगु खः ।
सिजि ब्रुअरी नेपाल प्रा. लि. इभेन्ट पार्टनर जुयाच्वंगु यूएफओ भिन्तुना सनिल ज्याझ्वलय् म्येहालामि ज्योति घिमिरे, भीम तुलाधर, जेम्स प्रधान, जेम्स प्रधान, निशा देसार, सुरजवीर बज्राचार्य, एञ्जिला सिंह, सुलिन्द्र शाक्य, अन्जन श्रेष्ठ, पंकज राजोपाध्याय, भूपेन्द्र बज्राचार्य, निशान्त गौचनं म्ये हालादीगु खःसा आराध्यलक्ष्मी खड्गीं हुलाप्याखं न्ह्यब्वयादीगु खः ।
नांजाःम्ह म्येहालामि पन्नाकाजी मन्त
लहनान्यूज | पोहेंलागा त्रयोदशि ११३७ (जनवरी २५ २०१७)
नांजाःम्ह पुलांम्ह म्येहालामि पन्नाकाजी शाक्य ८५दँया बैंशय् थौं मन्त ।
मदुम्ह शाक्यया थौं हे टेकुदोभानय् अन्त्येष्टि क्वचाःगु दु । वयकःया अन्त्येष्टि न्ह्यः संगीतकार संघ नेपालया कलाकारपिन्सं मदुम्ह शाक्यया हे म्येत हालाः वयकःयात श्रद्धान्जलि देछाःगु खः ।
ताः दत मखनागु थुज्वःगु नेवाः म्येलिसें तिरिरि मुरली बज्यो, किन किन तिम्रो तस्बीर थुज्वःगु लोकंव्हाःगु म्ये शाक्यं हालादीगु दु ।
वयकलं म्ये हालेगुलिसें नेवाः नाटकय् नं म्हितादीगु दु । परमानन्द बज्राचार्यया पूधाः प्याखं यूवराज कुणालय् नं वयकलं म्हितादीगु दुगु खः ।
मदुम्ह शाक्यया प्यम्ह काय् व छम्ह म्ह्याय् दी । नांजाःम्ह म्येहालामि प्रवेशमान शाक्य व पवित्रमान शाक्य नं मदुम्ह पन्नाकाजीया हे काय् खः ।
