Display Style:
Column Style
म्येहालामि निशा देसार सम्मानित
लहनान्यूज | पोहेंलागा अष्टमि ११३७ (जनवरी २० २०१७)
नेवाः लिसें नेपाःया हे संगीत ख्यलय् थौंकन्हय् लोकं व्हानाच्वंम्ह म्येहालामि निशा देसार थुगुसीया नारायण गोपाल यूवा संगीत सिरपालं सम्मानित जूगु दु ।
राष्ट्रिय यूवा सेवा कोषया ग्वसालय् थौं येँय् क्वचाःगु छगू ज्याझ्वःया दथुइ म्येहालामि देसारलिसें संगीतकार सन्तोष श्रेष्ठयात नं थुगु सिरपालं हंगु खः । ज्याझ्वलय् राप्रपाया पार्टि नायः लिसें पूर्व उपप्रधानमन्त्री कमल थापां निम्हं सम्मानित कलाकारपिन्त हनापौ लःल्हानाः हनादिल ।
नायः थापां सम्मानित निम्ह कलाकारयात हनापौ लिसें तका सिरपाः नं लःल्हानादिल । निम्हं सम्मानित कलाकारपिन्त म्हतिं २५द्वः तका लःल्हाःगु खः ।
उगु हे ज्याझ्वलय् मूर्ति लिसें चित्रकार पृथ्वी श्रेष्ठ व ज्योति प्रकाश विश्वकर्मायात नं हंगु खः । वयकःपिन्त नं लुँया तक्मा लिसें म्हतिं २५द्वः तका सिरपाः लःल्हाःगु खः ।
ज्याझ्वलय् सम्मानित जूम्ह म्येहालामि निशा देसारं मदुम्ह स्वरसम्राट नारायण गोपालया म्ये हालाः न्यंकादीगु खः ।
सिरपाःया निर्णायक कथं वरिष्ठ संगीतकार दिपक जंगम व वरिष्ठ मूर्तिकार ठाकुरप्रसाद मैनालीयात तःगु खः ।
ज्याझ्वः कोषया नायः भिमबहादुर अधिकारीया सभाध्यक्षताय् क्वचाःगु खः ।
१५० कुमारीयात पूजा यात
लहनान्यूज | पोहेंलागा अष्टमि ११३७ (जनवरी २० २०१७)
यलया चक्रबहिलिइ नेवाः दुनेया थीथी जातजातिया यानाः करीब सत्याम्ह मिसा मचातयगु वृहत कुमारी पूजा क्वचाःगु दु ।
ताम्रकार समाजया दुजः अष्टलाल ताम्रकारया भाकल अले आर्थिक ग्वाहालिइ चक्रबहि परिसरय् क्वचाःगु पूजाय् कुमारी मचातयत पुज्यायेत द्वलंद्वः भक्तजनत थ्यंगु खः ।
पूजा न्यायेकूम्ह अष्टलाल ताम्रकारं करीव ८दँ न्ह्यः कुमारी पूजाया भाकल यानागुलिइ बल्ल ताःलाःगु धयादिल । थम्हं इच्छा यानागु ज्या क्वचायेकेत व्यवस्थापन अले स्वयम सेवक परिचालनय् ताम्रकार समाज व स्थानीय टोलवासीया ग्वाहालिया नितिं थः तसकं लयताःगु वयकलं धयादिल ।
ताम्रकार समाजया नायः रविन्द्रराज ताम्रकारं नेवाः समुदायस गुगु नं भिंगु ज्या न्ह्याके न्ह्यः कुमारीया पूजा यायेबलय् सिद्धिफल प्राप्त जुइ धइगु मान्यता दया वयाच्वंगु धयादिल । कुमारी पूजा जुया वयाच्वंसां थुकथं तःजिक धाःसा काचाक्क मजूगु वयकलं धयादिल ।
नेवाः समुदायस इहि मयाःनिपिं मिसा मचातयत कुमारी पूजा यायेगु परम्परा दु ।
मिखा शिविरय् ५४म्हेसिनं मिखादान यात
लहनान्यूज | पोहेंलागा अष्टमि ११३७ (जनवरी २० २०१७)
कमजोर आर्थिक स्थितीयापिन्त नं स्वास्थ्य सेवा अःपुक थ्यंकेगु आज्जुं यलया बाग्लदों खटल टोल सुधार समितिं सितिकं बृहत मिखा शिविरया ग्वसाः ग्वःगु दु ।
स्थानीय वासिन्दा व संघसस्थाया ब्वतिइ जूगु शिविरय् मिखा परीक्षणया लिसें वासः वितरण, मोतियाविन्दुया सितिकं शल्यक्रिया, मिखादान यायेगु घोषणा नं जूगु कजि मोतिशान्ति शाक्यं जानकारी बियादिल । कजि शाक्यया कथं शिविरय् ६५०म्हेसिनं मिखा परीक्षण अले ५४म्हेसिनं मरणोपरान्त मिखा दान यायेगु घोषणा यात ।
अथे हे शिविरय् मोतियाबिन्दुया शल्यक्रिया यायेमाःपिं ३९म्हेसिया पहिचान यात । इमित कन्हय् व आईतबाः सितिकं शल्यक्रिया यायेगु ज्याझ्वः दु ।
शिविरय् मिखादानया विषयस समाजया स्वयेगु पहः, थुइकेगु पहः भिंकेगु कथं जानकारीमूलक सफूचा इंगु खः । लिसें अभिमुखीकरण व टेलिश्रृखंला दयेकेगु ज्या नं न्ह्याकूगु खः ।
शिविरय् मिखादान बारे जनचेतना थनेगु ज्याय् कार्यमा मुदिता सेवा गृह इमाडोल, रोटरी क्लब अफ पाटन वेष्ट, इनर व्हील क्लब अफ पाटनया विशेष ग्वाहालि दुगु धाःगु दु । मिखादानप्रति समाजय् न्यनाच्वंगु रुढीवादी बिचाः न्हंकेत मदिक्क मिखा शिविर यायेगु झ्वलय् थुगु पालय् स्थानीयया तःजिगु ब्वतिं तसकं हे उत्साहित जुयागु कजि शाक्यया धापू दु ।
शिविरयात तिलगंगा आँखा अस्पतालं प्राविधिक ग्वाहालि ब्यूगु खः ।
दबाब पुचलं कानूनी लँपु ज्वनीगु
लहनान्यूज | पोहेंलागा चतुर्थी ११३७ (जनवरी १६ २०१७)
नेवाः देय् दबुलिइ अवैधानिक वर्तमान कार्यसमितियात हे यथावत तयेत स्वःगु व यकःति ढङ्गं न्ह्याःवंगु धासें दबाब पुचलं कानूनी लँपु लीगु जूगु दु ।
दबाब पुचलं प्रेस विज्ञप्ति जारी यासें आः थःपिन्के कानूनी उपचार बाहेकं मेगु लँपु मल्यंगु धाःगु खः । देय् दबूया थौं च्वंगु कार्यसमिति, सल्लाहकार व संरक्षकया मुँज्यां वर्तमान कार्य समितियात हे यथावत तयाः अधिवेशन यायेगु क्वःछीधुंकाः दबाब पुचलं आः
कानूनी लँपु लिनावनेगु धाःगु खः ।
दबाब समूहया कजि ज्योति शाक्यया ल्हाःचिं दुगु प्रेस विज्ञप्तिइ अधिवेशन यायेत सर्वपक्षीय ग्वसाः खलः नीस्वनेमाःगु एकसुत्रीय माग थःपिन्सं तया वयाच्वनागु धाःगु खः । तर थौं क्वचाःगु मुँज्यां वर्तमान कार्यसमितियात हे यथावत तयेगु क्वःछिनाः अवैधानिक कार्य समितियात हे ल्यंकेत स्वःगु द्वपं बियादिल ।
दबाब पुचलं २०७३ कार्तिक महिना दुने देय् दबूया अधिवेशन यायेगु धाःगुलिइ व आःतकं जुइ मफयाच्वंगु अवस्थाय् वर्तमान कार्यसमिति अवैधानिक जुइधुंकूगुलिं उकियात भङ्ग यायेमाःगु धाःगु खः । नेवाः देय् दबूया मुँज्यां धाःसा कार्य समितियात निष्कृय जक यानाः उगु हे कार्यसमितिया नेतृत्वय् अधिवेशन क्वचायेकेगु अडान काःगु खः ।
लिसें थौं क्वचाःगु देय् दबूया मुँज्यां १३म्ह दुजःया अधिवेशन ग्वसाः खलः नीस्वनेगु क्वःज्यूगुलिइ उकी ४ दुजः दबाब समूहपाखें कायेगु नं क्वःछ्यूगु खः ।
लिसें नारायणगढय् क्वचाःगु विधान अधिवेशनं क्वःछ्यूगु इलय् अधिवेशन यायेमफूगु व विधान अधिवेशनं पारित याःगु विधानयात नं थः यस्सें विधान अभिलेख याःगु विज्ञप्तिइ न्ह्यथनातःगु दु । थुकथं यकःति ढङ्गं थः यत्थे निर्णय यानाः थःपिन्त कानूनी लँपुइ वनेत बाध्य दयेकूगु विज्ञप्तिइ धयातःगु दु ।
थौंनिसें स्वस्थानी अपसं न्ह्यात
लहनान्यूज | पोहेंलाथ्व पुन्हि ११३७ (जनवरी १२ २०१७)
थौंनिसें स्वस्थानीया अपसं न्ह्याःगु खः ।
दँयदसं पौष शुक्ल पुन्हिनिसें न्ह्याइगु स्वस्थानी अपसं लछि न्ह्यानाः माघ शुक्ल पुन्हिकुन्हु क्वचाइ । थुगु इलय् अपसं च्वनीपिनि न्हिछिया छछाः जक नयाः महाःद्यः व स्वस्थानी परमेश्वरीयात पुज्यायेगु याइ ।
स्वस्थानीया अपसं च्वनीपिनि न्हिंन्हिं हे सुथय् म्वःल्हुयाः नीसी यानाः नी वसः फीगु याइ । लिसें थुगु इलय् न्या, ला, ख्येँय् आदि मनसें सात्विक नसा जक नयाः अपसं च्वनी ।
थुगु लछितक छेँय् छेँय् स्वस्थानीया बाखं नं कनेगु याइ । स्वनिगःया बाखं मुक्कं स्वनिगः वा नेपाःगाःया परिवेशय् च्वयातःगु बाखं खः ।
थुगु इलय् येँया सक्वय् शालिनदिइ व ख्वपया हनुमानघाटय् लछियंकं मेला जुइ ।
