Display Style:
Column Style
थुगुसी नं पृथ्वीनारायणयात थुकलं बिल
लहनान्यूज | पोहेंलाथ्व चतुर्दशि ११३७ (जनवरी ११ २०१७)
थौं पृथ्वीनारायण शाहया बुदिंयात गुलिसिनं एकता दिवसया रुपय् हनेमाः धयाच्वंबलय् किपुलिइ धाःसा पृथ्वीनारायण शाहयात थुकलं बीगुलिसें किपुलिइ लडाईंया इलय् पृथ्वीनारायण शाह चुल्लुयाः दःगु ल्वहंयात लुमंकूगु दु ।
नेवाः प्रदेशय् आदिवासी जनजाति जागरण अभियानं थौं किपुलिइ छगू ज्याझ्वःया ग्वसाः ग्वसें किपूया छ्याकं ल्वहँतय् थुकलं बिल । किपूमिपिनिगु उगु लं जुइबलय् पृथ्वीनारायण शाह व वं किपूमिपिन्त याःगु अत्याचारयात लुमंकाः उगु ल्वहंतय् थुकलं बीगु चलन दु ।
व धुंकाः अभियानया पुचः किपुलिइ लडाईंया इलय् पृथ्वीनारायण शाह चुल्लुयाः दःगु चुल्लू ल्वहंतक्क ब्यानरसहित र्याली वंगु खः । लडाईंलय् थःपिन्त साथ ब्यूगु ल्वहं धकाः किपूमिपिनि उगु चुल्लू ल्वहंयात द्यः भाःपियाः पुज्यायेगु चलन नं दु ।
अभियान पुचलं चुल्लू ल्वहं थ्यंकाः छगू सभा नं याःगु खः । सभायात सम्बोधन यासें किपूया अभियन्ता व पत्रकार नजरराम महर्जनं थौंतक्क पृथ्वीनारायण शाहयात थुकलं बियाः अले चुल्लू ल्वहंयात पुज्यानाः किपूमिपिन्सं थःगु पहिचानया सः थ्वयेकाच्वंगु दुगु धयादिल ।
अथे हे आदिवासी जनजाति वकिलतय् पुचः लाहुर्निपया छ्यान्जे शंकर लिम्बुं नेवाःत थःगु हे थासं विस्थापित जुया वनाच्वंगु खँ नेवाःतयसं वाःचायेकेमाःगु खँ कुलादिल । सडक विस्तारया नामय् अथवा विकासया नां बियाः स्वनिगःया थीथी थासय् नेवाःतयत विस्थापित यायेगु ज्या जुयाच्वनं नं नेवाःत दनामवःगु खँय् वयकःपिन्सं च्यूताः प्वंकादिल ।
ईनर व्हील स्थापना दिवस तःजिक हन
लहनान्यूज | पोहेंलाथ्व चतुर्दशि ११३७ (जनवरी ११ २०१७)
अन्तराष्ट्रिय स्तरय् दक्कले तःधंगु मिसा दुजः दुगुस्वयंसेवक संस्था ईनरव्हील क्लबया ९३क्वःगु स्थापना दिवस नेपालय् नं तःजिक हंगु दु
हृदयस्पर्श व मू सेवा आज्जु सुखद भविष्य, उन्नत जीवन नारालिसें हलिंन्यंक हंगु इनरव्हील क्लबया स्थापना दिवसया झ्वलय् येँय् नं छगू तःजिगु ज्याझ्वः याःगु खः । ज्याझ्वलय् नेपालय् यौनहिंसां पिडित मिसा अले इमिगु मचायो संरक्षणय् ज्या यानाच्वंगु रक्षा नेपालया संस्थापक नायः मेनुका थापायात विशेष सम्मान लिसें मानार्थ सदस्यता ब्यूगु खः ।
ज्याझ्वलय् विशेष पाहांया रुपं झाःम्ह थापां थः १५म्ह तःकेहेँपिनिगु पारिवारिक जीवन, मांया संघर्ष व नेपालय् महिला विभेद विरुद्धया लडाईं दथुइ न्ह्याःगु रक्षा नेपालबारे नवानादीगु खः । हरेक मनुखँ काय् वा म्ह्याय् मखसें छम्ह बांलाःम्ह मनूयात जन्म बीमाःगु खँय् बः बियादिल ।
थः मबूनिबलय् हे अबु मदुम्ह थापां थः विधुवा मांप्रतिया तिरस्किृत व्यवहार, थम्हं म्हमस्यूम्ह अबुया नां न्ह्याथासं न्ह्याब्लें च्वयेमाःगु व मदुम्ह मांया ईच्छा कथं मि तयेत नं संघर्ष यायेमाःगु थःगु जीवनया अनुभव न्यंकादीगु खः । थापां पुरुषप्रधान समाज लिसें परिवार व समाजय् न्यनाच्वंगु लैंगिक विभेदं निराश जुयाः आत्महत्याया कुतः यानागु खँ कनादीबलय् ज्याझ्वःया ब्वतिमि इनरव्हील दुजःपिं भावबिव्हल जूगु खः ।
निवर्तमान डिष्ट्रिक्ट नायः कमलप्रभा खरेलं लसकुस यानादीगु खःसा न्वकू कमला महर्जन सुवालं सुभाय् देछानादिल । ईनरव्हील क्लब अफ राजधानीया नायः कमला श्रेष्ठं ज्याझ्वलय् सम्बोधन यानादीगु खः ।
ज्याझ्वलय् विशेष न्ह्यब्वया कथं बिस्कं कथंया क्षमता दुपिं यल सिविआरया मस्तयसं हुलाप्याखं न्ह्यब्वःगु खः । अथे हे ईनरव्हील क्बल अफ दरवार स्क्वायरया अनुसुयां म्ये हालाः न्यंकादीगु खः । सिरपाःलिसें इनरव्हीलबारे न्ह्यसःलिसः कासा तक नं याःगु खः ।
नेपालया स्वयंसेवी मिसात दुथ्याःगु ईनरव्हील डिस्टिक्ट ३५०या नायः बिजयालक्ष्मी श्रेष्ठया सभाध्यक्षताय् क्वचाःगु ज्याझ्वलय् देयन्यंकया ईनरव्हील क्लबतयगु करीव १८०म्ह प्रतिनिधीपिनिगु ब्वति दुगु खः । ज्याझ्वलय् ईनरव्हील क्लबया संस्थापक नायः मार्गारेट ओलिभर गोल्डिंगया किपाय् स्वांमाः कोखायेकूगु खः ।
सन १९०५य् स्थापित रोटरीया प्रारम्भिक इलय् अप्रत्यक्ष रुपं थः जहानपिनिगु ज्याय् मिसातयसं रोटरी क्लब थें समाजय् सेवा व मित्रता अप्वयेकेगु आज्जु लिसें सन १९२४ जनवरी १० कुन्हु ईनरव्हील क्लब स्थापना याःगु खः ।
एकता दिवसया विरोधय् सभा
लहनान्यूज | पोहेंलाथ्व चतुर्दशि ११३७ (जनवरी ११ २०१७)
पृथ्वी नारायण शाहया बुदिंयात एकता दिवसया नां ब्यूगु विरोधय् नेपाल आदिवासी जनजाति महासंघ व आदिवासी जनजाति राष्ट्रिय आन्दोलन नेपालया मंकाः ग्वसालय् छगू विरोध सभा येँय् क्वचाःगु दु ।
आदिवासी जनजाति महासंघया न्वकू किरण सुनुवारया सभाध्यक्षताय् जूगु ज्याझ्वलय् आदिवासी जनजाति न्ह्यलुवाःपिं सोनाम याङ्कि, थाङसाङ लाओती, मनरत्न शाक्यपिन्सं थःथःगु नुगःखँ तयादीगु खः ।
ज्याझ्वःया वक्तापिन्सं पृथ्वीनारायण शाहं थःगु राज्य विस्तारया झ्वलय् याःगु थीथी युद्ध अपराधया खुलासा याःगु खः । लिसें पृथ्वीनारायण शाहं याःगु इतिहासया गर्भय् सुलाच्वंगु थीथी अत्याचारया बारे वयकःपिन्सं नवानादीगु खः ।
आदिवासी जनजाति आन्दोलनया न्ह्यलुवा आङकाजी शेर्पां ज्याझ्वः न्ह्याकादीगु खः ।
पत्रकार दबूपाखें आदिवासी महासंघयात लसकुस
लहनान्यूज | पोहेंलाथ्व अष्टमि ११३७ (जनवरी ६ २०१६)
नेवाः पत्रकार राष्ट्रिय दबूपाखें नेपाल आदिवासी जनजाति महासंघया न्हूगु निर्वाचित कार्य समितियात लसकुस याःगु दु ।
दबुलिं म्हिगः यलय् छगू ज्याझ्वः यासें जनजाति महासंघयात लसकुसलिसें न्हूगु कार्यसमितिया कार्यकाल सफलताया भिंतुना नं देछाःगु खः । ज्याझ्वलय् महासंघया कार्यसमितिया न्हूपिं पदाधिकारीलिसें दुजःपिन्त नेवाः परम्परा कथं धौ सगं व ख्येँय् सगं ब्यूगु खः ।
दबूया नायः श्रीकृष्ण महर्जनया अध्यक्षताय् जूगु ज्याझ्वलय् न्वकू सुरजबीर बज्राचार्यं लसकुस यानादिल । अथे हे दबूया यल कचाया नायः सुरज ब्यन्जनकारं सुभाय् देछानादीगु खः ।
आदिवासीया हितय् मखुसा देयया हितय् नं जुइमखु
नुगः खँ तयेगु झ्वलय् आदिवासी जनजाति महासंघया न्हूम्ह नायः जगतबहादुर बरामं आः न्हूगु संविधान आदिवासी जनजातिया हितय् दयेकेगु खःसा व देयया हे हितय् मजुइगु दाबी यानादिल । न्हूम्ह नायः बरामं संविधान संशोधनया विरोध यासें संसद अवरुद्ध यानाच्वंपिन्त संसद सुचारु यानाबीत इनाप यानादिल ।
व हे कथं लसकुस न्वचुया झ्वलय् न्वकू सुरजबीर बज्राचार्यं महासंघया न्हापाया कार्यसमितिं आदिवासी जनजातिया अधिकार स्थापित यायेत न्ह्यमच्यूगु खँय् कुंखिनादिल । न्हूगु कार्यसमितिया नितिं थुगु हे विषय आः हाथ्या कथं दुगु खँ न्वकू बज्राचार्यं कुलादिल ।
दबूया नायः श्रीकृष्ण महर्जनं धाःसा महासंघया सक्रियतां संविधान संशोधनलिसें जनजातिया अधिकार स्थापित याये सम्भव जुइगु धयादिल । आदिवासी जनजातिया अधिकारया आन्दोलनय् महासंघयात पत्रकार दबूया नं साथ दइगु नायः महर्जनया धापू खः ।
विद्रोहिया कविया लुमन्तिइ बिचाः मुँज्या
लहनान्यूज | पोहेंलाथ्व अष्टमी ११३७ (जनवरी ६ २०१७)
नेपालभाषा साहित्यय् विद्रोही कवि धकाः म्हस्यूम्ह लिसें पूर्व सभासद् बुद्ध सायमि मदुगु थौं १३न्हुया पुण्य तिथिस वयकःयात लुमंकाः येँय् निगू बिचाः मुँज्या जुल ।
छगू बिचाः मुँज्या थीथी नेवाः संघसंस्थात जानाः मंकाः ग्वसाः कथं याःगु खःसा मेगु बिचाः मुँज्या नेपाः राष्ट्रिय पार्टिपाखें याःगु खः ।
नेपालभाषा एकेदमि, च्वसापासा, नेवाः देय् गुथि नेपालमण्डल, नेपाल सम्वत न्हूदँ राष्ट्रिय समारोह समिति, नेपाः राष्ट्रिय पार्टिया मंकाः ग्वसालय् छगू बिचाः मुँज्या जुल । व धुंकाः नेपाः राष्ट्रिय पार्टिपाखें बिस्कं हे मेगु बिचाः मुँज्या नं याःगु खः ।
मंकाः ग्वसालय् जूगु ज्याझ्वलय् नेपालभाषा एकेदमिया चान्सलर चित्तरन्जन नेपाली, च्वसापासापाखें पद्मरत्न तुलाधर, नेवाः देय् गुथि नेपालमण्डलया नायः बिजरराज बज्राचार्य, न्हूदँ राष्ट्रिय समारोह समितिया नायः भीमसेनदास प्रधान, नेपाः राष्ट्रिय पार्टिया नायः सुवर्णकेशरी चित्रकारं बुद्ध सायमिं नेवाः साहित्य ख्यः व नेवाः आन्दोलनय् बियादीगु योगदानया चर्चा यानादीगु खः
।
ज्याझ्वलय् मदुम्ह विद्रोही कवि सायमिया किपाय् स्वांमाः कोखायेकाः श्रद्धान्जलि देछाःगु खः ।
नेपाः पार्टिया नं बिचाः मुँज्या
मदुम्ह विद्राही कविया लुमन्तिइ नेपाः राष्ट्रिय पार्टिं बिस्कं हे बिचाः मुँज्या ज्याझ्वः यात ।
न्हापांगु संविधान सभाय् नेपाः पार्टिपाखें सभासद् जूम्ह कवि सायमियात बिस्कं हे नं ज्याझ्वः यानाः पार्टिं बिचाः हायेकूगु खः ।
ज्याझ्वलय् पार्टिया पाखें न्वकू डा. रमेश श्रेष्ठ, मू छ्यान्जे डा. विजय सैंजुं मदुम्ह सायमिया योगदानया चर्चा यानादिल । लिसें थरुहट तराइ पार्टिया नायः भानुराम थारु, समाजसेवी दिलबहादुर मानन्धर, सांसद रुक्मिणी चौधरी, संघीय समाजवादी फोरम नेपालया नायः राजेन्द्र श्रेष्ठ व जनकवि दुर्गालाल श्रेष्ठं नं नेवाः साहित्यया लिसें आदिवासी जनजातिया पहिचानया आन्दोलनय् कवि सायमिं न्ह्याकादीगु पलाःया बिषयस चर्चा यानादीगु खः ।
ज्याझ्वः पार्टिया का.वा. नायः सुवर्णकेशरी चित्रकारया अध्यक्षताय् जूगु खः ।
पार्टिया पूर्व सभासदया झिंस्वन्हुया पुण्य तिथिया दिं लाकाः पार्र्टिं हे ग्वसाः ग्वःगु ज्याझ्वलय् पार्टिया वर्तमान सांसद लक्ष्मण राजवंशीया उपस्थिती मदु । पार्टिं संसदय् पहिचानया मागय् सः थ्वयेकादीम्ह कवि सायमिया बिचाः मुँज्या न्ह्याकाच्वंगु इलय् पार्टिया सांसद राजवंशी धाःसा सरकारं संसदय् दर्ता याकूगु संविधान संशोधन प्रस्तावया विरोधय् प्रतिपक्षी दलं येँय् याःगु जनशक्ति प्रदर्शन ज्याझ्वलय् ऐक्यवद्धता क्यनेत थ्यनाच्वंगु खः ।
