Display Style:
Column Style
प्रधानमन्त्री प्रचण्डया सम्पत्ति विवरण सार्वजनिक
लहनान्यूज | थिंलागा पारु ११३७ (डिसेम्बर १४ २०१६)
सरकारं प्रधानमन्त्री पुष्पकमल दाहाललिसें बहालवाला मन्त्रीतयगु सम्पत्ति विवरण सार्वजनिक याःगु दु ।
सार्वजनिक विवरण कथं प्रधानमन्त्री पुष्पकमल दाहालया नामं छुं छकू नं सम्पत्ति मदु । पैतृक सम्पत्तिइ ३ तोला लुँ व चितवनय् १ख कट्ठा बुँ जक दु ।
थुगु सम्पत्ति विवरणया कथं प्रधानमन्त्री दाहाल सुशील कोइराला धुंकाः नेपाःया निम्हम्ह गरीब प्रधानमन्त्री जूगु दु । स्वंगः मोबाइल फोन जक सम्पत्ति दुगु धाःम्ह सुशील कोइरालायात हलिंया हे गरीब प्रधानमन्त्री धाःगु खः ।
व हे कथं, उपप्रधान अले गृहमन्त्री विमलेन्द्र निधिया थीथी बैंकय् सेयर, ख्वप व धनुषा जिल्लाय् बुँ अले लुँ दुगु मन्त्रिपरिषदया ज्याकुथिं न्ह्यथंगु दु । ज्याकूया कथं गृहमन्त्री निधियाके ६० तोला लुँ, १५० तोला वहः व १० लाख ९६द्वः स्वयां आपाः धेबा दु ।
मेम्ह उपप्रधान अले अर्थमन्त्री कृष्णबहादुर महराया रोल्पाय् ८ रोपनी बुँ व एभरेस्ट बैंकय् ८०द्वः तका दुगु न्ह्यथंगु दु ।
सहरी विकासमन्त्री अर्जुन नरसिंह केसी, भौतिक पूर्वाधार अले यातायातमन्त्री रमेश लेखक, ऊर्जामन्त्री जनार्दन शर्मा, परराष्ट्रमन्त्री डा. प्रकाशशरण महतलिसें २७ मन्त्रीया नं सम्पत्ति विवरण सार्वजनिक याःगु खः । अथे हे, १४ राज्यमन्त्रीया नं सम्पत्ति विवरण सार्वजनिक यानागु मन्त्रिपरिषदया ज्याकुथिं न्ह्यथंगु दु ।
पत्रकार दबूया त्यःछिंत्यः झःझः धाल
लहनान्यूज | थिंलाथ्व पुन्हि ११३७ (डिसेम्बर १३ २०१६)
नेवाः पत्रकार राष्ट्रिय दबू येँ जिल्ला कचाया ग्वसालय् थौं त्यःछिंत्यः ज्याझ्वः झःझः धायेक क्वचाःगु दु ।
थौं येँया इतुम्बहालं न्ह्याःगु त्यःछिंत्यः पुचलं येँया थःने व क्वःनेया थीथी लागा चाःहिलाः त्यःछिंत्यः फ्वँसें असनय् थ्यंकाः क्वचाःगु खः । त्यःछिंत्यः ज्याझ्वलय् नेवाः पत्रकार राष्ट्रिय दबू येँ जिल्लाया दुजःपिंलिसें केन्द्रिय नायः व दुजःपिं, इमेज च्यानलया समयबजि ज्याझ्वः पुचः व बिज्यापूननि (थँहिति) दाफा खलः, म्येहालामि पवित्र कसाःलिसें आम सर्वसाधारणया नं ब्वति दुगु खः ।
पुचलं बाजं लिसें त्यःछिंत्यःया लसय् थीथी म्ये हालाः त्यःछिंत्यः फ्वंगु खः । नेवाःतय् दथुं तना वनाच्वंगु त्यःछिंत्यः थौं येँया सतकय् वःगु खनेदुबलय् आम नेवाःत तसकं लयताःगु व उत्साहित खनेदुगु खः ।
त्यःछिंत्यः फ्वंवःगु पुचःयात ज्यापु महागुथिया नायः राजभाई जकःमि, संघीय समाजवादी फोरम नेपालया ल्यू नायः राजेन्द्र श्रेष्ठ, क्षेत्रपाटि निशुल्क चिकित्सालय अस्पताल संचालक समितिया नायः बिजय माली, व्यवसायी लिसें समाजसेवी लक्ष्मीदास मानन्धरं त्यःछिंत्यः ब्यूगु खः ।
दबुलिं थौं येँया दुनेया बस्तीइ त्यःछिंत्यः फ्वनेगु ज्या याःगु खःसा कन्हय् नं पिनेया बस्तीइ त्यःछिंत्यःयात निरन्तरता बीगु धाःगु दु ।
१३क्वःगु ज्यापु दिवस तःजिक हन
लहनान्यूज | थिंलाथ्व पुन्हि ११३७ (डिसेम्बर १३ २०१६)
ज्यापु संस्कृति विकास कोषया ग्वसालय् १३क्वःगु ज्यापु दिवस तःजिक हंगु दु ।
थौं १३क्वःगु ज्यापु दिवसया झ्वलय् येँया बसन्तपुरय् तःजिगु ज्याझ्वः यासें थीथी ख्यलय् विशिष्ट योगदान ब्यूपिं ज्यापु समुदाय लिसें थीथी समुदायया विशिष्ट व्यक्तित्वपिन्त हनेगु ज्या नं जूगु खः । सम्मानित व्यक्तित्वपिन्त ज्याझ्वःया मू पाहां प्रधानमन्त्री पुष्पकमल दाहालं सम्मान लःल्हानादिल ।
थुगुसीया ज्यापु प्रज्ञा सिरपालं नेवाः लिसें आदिवासी जनजाति आन्दोलनया हे न्ह्यलुवा पद्मरत्न तुलाधरयात हंगु दु । ज्यापु रत्न सिरपाः धाःसा पूर्वान्चल क्षेत्रीय प्रशासन ज्याकूया क्षेत्रीय प्रशासक राजेश्वरमान सिंहयात लःल्हात ।
व हे कथं पत्रकारीतापाखे उपेश महर्जनयात हन सा कासापाखे विश्व मिसा बडिबिल्डिङ कासाय् कँयया तक्मा त्याकेत ताःलाःम्ह ननिता महर्जन बज्राचार्ययात व जुडो कासामि इन्द्र डंगोलयात लःल्हात । उकिया नापं म्येहालामि दिपा महर्जनयात नं नेपालभाषा विषयस स्नातकोत्तर तगिमय् ने.सं ११३५य् न्हाप लाःगुलिं हंगु खः ।
ज्यापु विशेष सम्मानपाखे साहित्यकार शरद कसाः, वरिष्ठ पत्रकार पुष्कर माथेमालिसें खुम्हेसित हंगु खः ।
कलापाखे मैंचा बाउचाया कलात्मक चित्रणया नितिं मैचा बाउचाया सर्जक बुकेस महर्जनयात हन ।
बसन्तपुरया औपचारीक ज्याझ्वः स्वयां न्ह्यः र्यालीं देय् चाःह्यूगु खः । येँया कमलादी गनेद्यःया थासं न्ह्याइगु र्याली रत्नपार्क, बीर अस्पताल, न्हूसतक, खिचापुखू, ओमबहाः, यंगाः, लगं, ब्रम्हत्वाः, ओन्दे, जैसिदेगः, क्वहिति, भिंद्यःत्वाः, मरु, यट्खा, त्यंगः, क्वाःबहाः, थँबहि, ज्याथा, इनबहालय् कमलादि गनेद्यः जमःत्वाःया द्यःछेँय् लाकाः त्यर, असं, थायमदु, वंगः, मखनं बसन्तपुर थ्यंकूगु खः ।
थौं यःमरि पुन्हि
लहनान्यूज | थिंलाथ्व त्रयोदशि ११३७ (डिसेम्बर १२ २०१६)
थौं थिंलाथ्व पुन्हि, सकसिया छेँय् छेँय् यःमरि दयेकाः व हे यःमरि नयाः नकाः यःमरि पुन्हि हनाच्वंगु दु ।
थौंया दिनय् न्हूगु वा दुकायेगु याइ । लिसें जाकिचुंया यःमरि, ल्वंचामरिया नापं जाकिचुंया हे कुबेर, लक्ष्मी, गनेद्यः आदि तकं दयेकेगु याइ ।
थौं हे न्हूगु दुकाःगु वालिसें जाकिचुनं दयेकातःगु यःमरि, ल्वंचामरि लिसें द्यःपिं नं कुथिइ तयाः पुज्यायेगु याइ । द्यःपिं नं पुज्यायेगु याःसां विशेष यानाः थौं वा व यःमरि हे पुज्याइयेगु खः ।
येँय् नं पूर्वपाखेया नेवाः लागा पन्तिइ च्वंम्ह सुचन्द्र महाजनया दानी स्वभाव खनाः कुबेरं छंगु कुथिइ अन्न गबलें खाली मजुइमा धकाः वरदान ब्यूगु व वयांलिपा सुचन्द्र महाजनं कुथिइ कुबेरलिसें अन्न तयाः पुज्याःगु व यःमरि दयेकाः सकसितं इंगु धइगु किम्बदन्ति थुगु नखःलिसे स्वानाच्वंगु दु ।
थौं हे पुचः पुचः मुनाः त्यःछिंत्यः फ्वंवनेगु नं चलन दु । थौंकन्हयया ल्यायम्ह पुस्तां थुगु चलन मसियावंगु धासें संस्कृति पुनर्जागरण यायेगु नितिं धकाः नेवाः पत्रकार राष्ट्रिय दबू येँ जिल्लापाखें थौं त्यःछिंत्यः ज्याझ्वः यायेत्यंगु दु ।
दबू, येँ जिल्लाया त्यःछिंत्यः ज्याझ्वः न्हिनसिया ३ताः इलय् इतुम्बहालं न्ह्यानाः येँया थःने व क्वःने लागाय् चाःहिलाः असनय् थ्यंकाः क्वचाइगु धाःगु दु ।
पुष्पा बस्नेत सुपर हिरो
लहना संवाददाता | ने.सं. ११३७ थिंलाथ्व १४ (१२ डिसेम्बर २०१६)
समाजसेवी पुष्पा बस्नेत सिएनएन सुपर हिरोया उपाधि त्याकेत ताःलाःगु दु ।
अमेरिकी टेलिभिजन सिएनएनपाखें सिएनएन हिरो पुष्पा बस्नेतयात मतया लिधंसाय् सिएनएन सुपर हिरोपाखें पुरस्कृत याःगु खः । ५०द्वः अमेरिकी डलर दुगु उगु सिरपाः अमेरिकाय् ग्वसाः ग्वःगु छगू ज्याझ्वःया दथुइ बस्नेतयात लःल्हाःगु खः । सिएनएन हिरो अवार्ड ब्यूगु झिदँ थ्यंगु झ्वलय् पुलांपिं सिएनएन हिरोजपाखें सुपर हिरो ल्यःगु खः । प्यम्ह पुलांपिं सिएनएन हिरोयात ल्यूने लाकूसें बस्नेतं अवार्ड त्याकूगु खः । पुलांपिं सिएनएन हिरो फिलिपिन्सया एफ्रेन पेना फ्लोरिडा, अमेरिकाया चाङ्ग पे्रग्राके, लिज म्याकक्राट्नी व इण्डोनेसियाया रोबिन लिम मनोनयनय् लाःगु खः ।
झ्यारखानाय् च्वंपिं अभिभावकया मस्तय्त येँय् प्रारम्भिक बालविकास केन्द्रमार्फत आवासिय सुविधालिसेंया शिक्षाया व्यवस्था याना वयाच्वंम्ह बस्नेतयात सन् २०१२लय् सिएनएन हिरो अवार्ड लःल्हाःगु खः ।
