नेवाः न्ह्यलुवाः, मानवअधिकारवादी, राजनीतिज्ञ पद्मरत्न तुलाधरया “लुमन्तिइ पद्मरत्न तुलाधर” सफू पिदंगु दु।

येँ महानगरपालिकाया ग्वाहालिं पिदंगु उगु सफू यलया अशोक पार्टी प्यालेसय् पद्मरत्न लुमन्ति गुथिया ग्वसालय् जूगु खः।

ज्याझ्वलय् मूपाहाँ कथं उपप्रधानलिसें परराष्ट्रमन्त्री नारायणकाजी श्रेष्ठ, बिशेष पाहाँ बागमती प्रदेशया पर्यटन संस्कृति सहकारीमन्त्री शैलेन्द्रमान बज्राचार्यया विशेष उपस्थितिइ जूगु उगु ज्याझ्वलय् साहित्यकार हितकरवीर सिं कसाः, नर्मदेश्वर प्रधान, पूर्वसभामुख दमननाथ ढुंगाना, परराष्ट्रविद् हिरण्यलाल श्रेष्ठपिन्त हनेगु ज्या याःगु खः।

ज्याझ्वलय् यल महानगरपालिकाया प्रमुख चिरिबाबु महर्जन येँ महानगरपालिका उपप्रमुख सुनिता डंगोल लिसें थीथी प्रतिष्ठित व्यक्तिपिं पाहाँ कथं उपस्थित जुयादीगु खः।

गुथिया नायः डा.केशबमान शाक्यया सभाध्यक्षताय् जुगु उगु ज्याझ्वलय् सुम्निमा तुलाधरं लसकुस यानादीगु खःसा गुथि संस्थानया पुलांम्ह प्रशासकीय प्रमुख किरण शाक्य, राष्ट्रिय विभूति शंखधर साख्वाः प्रतिष्ठानया नायः ज्ञानुराम श्रेष्ठलिसें थीथी व्यक्तिपिन्सं तुलाधरं यानादीगु योगदानयात कयाः चर्चा परिचर्चा यानादीगु खः।

यल महानगरपालिका–१६ वडा महिला कमिटीया ग्वसालय् कन्ह्यः असार ११ व १२ गते स्थानीय नागबहालय् रात्रिकालीन व्यापार मेला जुइगु दु। बहनिया इलय् न वडाय् दुने चहलपहल अप्पोेकेगु व उद्यमी मिसापिन्त प्रवर्द्धन यायेगु उद्देश्यं उगु मेला यायेत्यनागु खः धका कमिटीया संयोजक नाप मिसा सदस्य बबिता श्रेष्ठ धयादीगु दु।

संयोजक श्रेष्ठया कथं उगु  मेला वडाय् च्वपि मिसापिन्स उत्पादन यागु सामग्री नाप अतिरिक्त हस्तकलापाखे उत्पादना यागु ३५ गु स्टल दइ धका धाःगु दु। निन्हुयक जुइगु उगु मेला बहनि ५ बजेनिसे ९ बजेतक उगु मेला जुइ। थ्व नाप सांगीतिक ज्याझ््वः व नेवाः नँसाया स्टल  दइ।

उगु मेलां यलय् पयर्टन प्रवद्र्धनया लागि बहनि बजारया सम्भावना व पूर्वाधार दयकेगुलि सकसिगु ध्यानाकृष्ट यायेगु निति थुगु ज्याझ्वः यायेत्यनागु खः धका वडाअध्यक्ष निर्मलरत्न शाक्यं धयादीगु खः।

संसद् सचिवालयया कर्मचारीतय्स ‘ब्ल्याक आउट’ याना प्रतिनिधि सभाया बैठक स्थगित जूगु दु।

स्वास्थ्य लिसे जनसंख्या मन्त्रीं बजेटय् वःगु न्ह्यसःया लिसः बिइ धुका सांसदतयेगु न्ह्यसः न्यना च्वंगु इलय् प्राविधिक कर्मचारीतय्स सभामुखयात जक क्यना युट्युबटं प्रत्यक्ष प्रसारण याःगु खः।

थःपिन्स न्यनागु न्ह्यसः न्यना च्वनागु इलय् प्रत्यक्ष प्रसारणय् सभामुखयात जक क्यना च्वंगु धासे सांसदतय्स विरोध याःगु खः। ‘ब्ल्याक आउटय् सदन मन्ह्याके’ धका नेपाली कांग्रेसया सांसद रामहरि खतिवडां धाःगु खः।

प्रतिनिधि सभाया मेगु बैठक बिहीवाः सुथय् ११ बजे सःतूगु दु। संसद् सचिवालयया कर्मचारीतय्स तलब भत्ता, आवास भत्ता व शैक्षिक भत्ता अप्पोके माःगु माग यासे आन्दोलन याःगु खः।

मेलम्ची खानेपानी विकास समितिं कसं शुक्रवाःनिसे येँ लः छ्वया हयेगु बन्द याइगु जुगु दु।

वाः वयेगु सुरु जुइवं मेलम्चीइ लः अप्पोया वयेवं अप्पो क्षति जुइफुलि सुरुङया मू लुँखा बन्द यायेगु तयारी यानागु दु धका मेलम्ची खानेपानी विकास समितिया कार्यकारी निर्देशकं धाःगु दु।

थौकन्ह्य येँ न्हि झन्डै २० करोड लिटर मेलम्चीया लः वयाच्वंगु दु।

शेयर बजार थौ सामान्य सुधार जूगु दु। म्हिगः १८ दशमलव ७६ अङ्कं कुहावःगु शेयर बजार परिसूचक नेप्से थौ २ दशमलव २७ अङ्कं थहावना २ हजार ७८ दशमलव ७६ अङ्क थ्यःगु दु।

थौ बैंक, फाइनान्स, जलविद्युत, लघुवित्त, निर्जिवन विमा व मेमेगु समूहया शेयर थहावगु दु। फाइनान्स समूहया शेयर २ दशमलव ६२ प्रतिशतं थहावःगु दु। अथेहे नेपाल फाइनान्स, समाज लघुवित्त व खुटेली बुखारी जलविद्युत् कम्पनीया शेयर झन्डै १० प्रतिशतं थहावंगु दु।

मनकामना स्मार्ट लघुवित्तया शेयर झन्डै १० प्रतिशतं कुहावःगु दु। ३ सय ८ गु कम्पनीया ७२ लाख ९ हजार कित्ता शेयर ३ अर्ब ४० करोड रुपैयाँया कारोबार जूगु दु।

दकलय् अप्पो थौ नेपाल फाइनान्सया २० करोड २३ लाख रुपैयाँ बराबरया शेयर किनबेच जूगु दु।