‘नेवाः सांस्कृतिक ज्ञानकोश’ थौ छगु ज्याझ्वः दथुइ पितब्वज्या जूगु दु। येँ महानगरपालिकाया ग्वाहालिं नेपालभाषा एकेदेमिं पिथंगु उगु ज्ञानकोशया विमोचन येँया राष्ट्रिय नाचघरय् जूगु दु।

उगु ज्याझ्वलय् जनकवि दुर्गालाल श्रेष्ठ, क्रोधकला शिरोमणि कालु कुम्हाः, संस्कृतिविद् यज्ञमानपति वज्राचार्य, साहित्यकार सुवर्णकेशरी चित्रकार, संगीतकःमि श्रीगोपाल प्रजापतिपिंसं मंकाः कथं सफूया उलेज्या यानादीगु खः।

नेवाःतय्गु बारे वृहद् रुपं म्हसीका बीगु थ्व सफू ‘नेवाः म्हसीका’, ‘संस्कृति व सम्पदा’, ‘भाषा, लिपि व साहित्य’, ‘म्ये, बाजं व प्याखं’ व ‘शिल्प, प्रविधि व ज्ञान’ यानाः न्यागू ब्वय् पिदंगु खः। ‘नेवाः म्हसीका’या विमोचन जनकवि श्रेष्ठ, ‘भाषा, ‘संस्कृति व सम्पदा’या विमोचन संस्कृतिविद वज्राचार्यं ‘भाषा, लिपि व साहित्य’ साहित्यकार चित्रकार, ‘म्ये बाजं व प्याखं’ वरिष्ठ संगीतकःमि श्रीगोपाल प्रजापति व ‘शिल्प, प्रविधि व ज्ञान’ क्रोधकला शिरोमणि कुम्हाः नं विमोचन यानादीगु खः।

उगु ज्याझ्वलय् ज्ञानकोशया परिकल्पनाकार व नेपालभाषा एकेदेमिया भाइस चान्सलर मल्ल के सुन्दरं थुगु सफू नेवाः भासं च्वयातःगु मात्र आखःग्वःया सफू जक मखु, थ्व नेवाःतय् वृहत् रुपं म्हसीका बीगु सफू खः धका धयादिगु खः। जनकवि दुर्गालाल श्रेष्ठ, येँ महानगरपालिकाया संस्कृति लिसे पर्यटन विभागया संयोजक व येँ महानगरपालिका ८ वडाया अध्यक्ष आशामान संगतपिंसं भिंतुना देछानादीगु खः। येँ महानगरपालिकाया उपमेयर सुनिता डंगोलया सभाध्यक्षताय् जुगु खः।

न्यागू ब्वय् पिदंगु ज्ञानकोशया न्यागुलिं सफू यानाः थ्यंमथ्यं नीच्यासः पृष्ठ दु। ज्ञानकोशया ‘नेवाः म्हसीका’ ब्वया संयोजन शाक्य सुरेन, ‘संस्कृति व सम्पदा’या संयोजन डा. चुन्दा वज्राचार्य, ‘भाषा, लिपि व साहित्य’या संयोजन प्रा. प्रेमशान्ति तुलाधर, ‘म्ये, बाजं व प्याखं’या संयोजन त्रिरत्न मानन्धर व ‘शिल्प, प्रविज्ञि व ज्ञान’या संयोजन विश्व शाक्यं यानादीगु खः।

मन्त्रिपरिषदं प्रधानमन्त्री केपी शर्मा ओलीया अमेरिका भ्रमण स्वीकृत याःगु दु। मन्त्रिपरिषद् बैठकं राष्ट्रसंघया महासभाय् ब्बति कायेगु निति प्रधानमन्त्रीया न्यूयोर्क भ्रमण स्वीकृत याःगु दु।

उगु भ्रमण टोलीइ परराष्ट्रमन्त्री आरजु देउवा राणा, प्रधानमन्त्रीया प्रमुख सल्लाहकार विष्णु रिमाल, परराष्ट्र सचिव सेवा लम्साल, प्रधानमन्त्री जहान राधिका शाक्य, निजी चिकित्सक न दुथ्याःगु दु।

राष्ट्रसंघया महासभा सेप्टेम्बर १० निसे २८ (२५ भदौनिसे १२ असोज) तक न्यूयोर्कय् जुइत्यःगु खः। समिट अफ द फ्युचर २२–२३ सेप्टेम्बर (६–७ असोज) जुइगु क्वछि धुकुगु दु। प्रधानमन्त्री कार्यालय स्रोतया कथं समिट अफ द फ्युचरय् सम्बोधन यायेगु कथं प्रधानमन्त्री अमेरिकाय् वनेत्यःगु खः।

ओलीें प्रधानमन्त्रीया कथं २०७५ असोजय् न राष्ट्रसंघ महासभाय् सम्बोधन याये धुकुगु दु।लिपागु इलय् असार ३० गते प्रधानमन्त्री जुयादीम्ह ओली विदेश भ्रमणय् वःगु मदुनि।

प्रधानमन्त्री केपी शर्मा ओलीनाप द्वन्द्वपीडित सङ्घं सङ्क्रमणकालीन न्यायसम्बन्धी आयोगया पदाधिकारी नियुक्ति गठन याउगुलि पीडित केन्द्रित भावनायात दुथ्याकेत माग याःगु दु।

प्रधानमन्त्री निवास, बालुवाटारय् थौ प्रधानमन्त्री ओलीयात ध्यानाकर्षणपौ लःल्यायेगु ज्या जुगु दु। उगु ध्यानाकर्षणपौ लःल्हासे सङ्घं सत्य निरुपण व मेलमिलाप आयोग व बेपत्ता जूयाच्वपि मनूत तयेगु छानबिन आयोग गठन याये वलय् राजनीतिक आधार मयासे पीडित तयेगु भावनायात निष्पक्ष कथं प्राथमिकता तइम्ह मनूयात महत्व बिइत इनाप याःगु दु।

उगु सम्बन्धी कानुन संसदपाखे पारित जूया वंगु थ्व हे भदौ १५ गते राष्ट्रपतिं प्रमाणीकरण याये धुकुगु दु। सङ्घया अध्यक्ष हिमाकुमारी घर्ती नेतृत्वया प्रतिनिधिमण्डलं बिउगु ज्ञापनपत्रय् २०६३ सालय् अन्तरिम राहतया निति सरकारं घोषणा याःगु छम्ह पीडितयात न्ह्यगू लाख ५० हजारमध्ये १ लाख ५० हजार जक ध्यवना काये धुकुगु दु सा ल्यःदनिइगु बिइत इनाप याःगु खः।

रेडियो नेपालया कार्यकारी निर्देशकय् अमरध्वज लामा नियुक्त जूगु दु।

थौ बिहीवाः च्वंगु मन्त्रिपरिषदया बैठकं लामायात रेडियो नेपालया कार्यकारी निर्देशकय् नियुक्त याःगु खः।

सेयर बजाः थौ कुहावःगु दु। म्हिगः स्वया थौ १२.१० ल्याखं नेप्से परिसूचक कुहावःगु दु। थौ १२.१० ल्याखं कुहवया २७२७ ल्याखय् कुहावःगु दु।

अथेहे थौ कारोबार रकम न म्हो जुगु दु। म्हिगः १२ अर्ब ९२ करोडया कारोबार जूगु खःसा थौ १२.१० ल्याखं कुहावया ९ अर्ब ६५ करोड जूगु दु। १०१ गु कम्पनीया भाः थहावःगुलि १३८ या भाः कुहावःगु दु स न्यागु कम्पनीया भाः स्थिर जूगु दु।

माइक्रोफाइनान्स १.६८ व व्यापार सूचक ०.१६ प्रतिशत थहावःगु दु सा मेगु दक्को कुहावःगु दु। बैंकिङ ०.६९, विकास बैंक ०.१३, फाइनान्स ०.५३, होटल व पर्यटन ०.११, हाइड्रोपावर १.०१, लगानी १.३६, जीवन बीमा ०.७४, उत्पादन ०.३३, निर्जीवन बीमा ०.५२ व मेमेगु ०.०१ प्रतिशतं कुहावःगु दु।

गुडविल फाइनान्सया १० प्रतिशतं थहावःगु दु। युनिक नेपाल लघुवित्तया ९.१४, नेस्डो लघुवित्तया ८.४३, विन नेपाल लघुवित्तया ७.५ व उन्नति सहकार्य लघुवित्तया ६.९ प्रतिशतं थहावःगु दु। नेपाल फाइनान्सया भाः ८.९१ प्रतिशतं कुहावःगु दु।

बुद्धभूमि हाइड्रो ५.७७, एनआरएन इन्फ्रास्ट्रक्चरया ५.०३, न्यादी हाइड्रोया ४.८९, मन्दाकिनी हाइड्रोया ४.८२ प्रतिशतं भाः कुहावःगु दु। कारोबार रकमया आधारय् नेपाल फाइनान्स, एनएलजी इन्स्योरेन्स, गुडविल फाइनान्स, हिमालयन रिइन्स्योरेन्स व अपी पावर न्ह्यने लागु दु।

क्षेत्रगत स्वयेगु खःसा हाइड्रोपावरं दकलय् अप्पो ३ अर्ब ३७ करोडया कारोबार याःगु दु।