प्रधानमन्त्री केपी शर्मा ओलीयात २१ क्वःगु राष्ट्रिय ज्यापु दिवसया मूपाहाँ कथं ब्बनेगु कथं थौ ग्वय् दाँ तयेगु ज्याझ्वः जुगु दु।

प्रधानमन्त्री निवास, बालुवाटारय् थौ सङ्घीय सांसद कृृष्णगोपाल श्रेष्ठ, ज्यापु संस्कृति विकास कोषया अध्यक्ष मङ्गलकृष्ण महर्जन नाप पदाधिकारीपि मूपाहाँ कथं ब्बने बालुवातारय् वःगु खः। थ्व हे वइगु मंसिर ३० गते यःमरी पुन्ही कुन्हु ज्यापु दिवसय् मूपाहाँ कथं झायेत ब्बनेगु ज्या जुगु खः। उगु दिं वसन्तपुरय् मू ज्याझ्वः जुइगु खः।

उगु ज्याझ्वलय् ज्यापु प्रतिभा सिरपा नाप थीथी मनूतयेत हनिइगु ज्याझ्वः दुगु खः। उगु ज्याझ्वलय् प्रधानमन्त्री ओलीं नेवाः संस्कृति नेपाःया संस्कृतिया म्हसिका बिइगु मौलिक, उन्नत व परिस्कृत व इतिहास ज्वनातःगु संस्कृति दुगुलि दक्को मिले जुया थुकियात संरक्षण व प्रवद्र्धन यायेमाःगुलि बःबियादीगु खः।

प्रधानमन्त्री ओलीं ज्यापु संस्कृति विकास कोषया माःगु अक्षयकोषया निति माःगु  सरकारं ग्वहालि यायेगु जुइ धका धयादीगु खः।

देशय् पश्चिमी फय्या सामान्य प्रभाव लानाच्वंगु धासें जल व मौसम विज्ञान विभागं पहाडी ब्वय् आंशिक बदली जुया ल्यंगु ब्वय् लकस यचुइ धाःगु दु।

तराई व पहाडया छुं थासय् खसु कुहाँवःगु दु।स्वनिगःया तापक्रम न्हियान्हिथं कुहाँ वनाच्वंगु दु। थौं सुथय् थनया न्यूनतम तापक्रम ८ डिग्री सेल्सियस दूगु खसा न्हिनय् १९ निसें २१ डिग्री सेल्सियसया दथुइ च्वनीगु अनुमान यानातःगु दु। विभागया कथं थौं न्हिनय् कोशी, बागमती, गण्डकी व कर्णाली प्रदेशया पहाडी लागाया छुं थासय् बदली जुया ल्यंगु ब्वया मौसम यच्चुइ ।

अथेहे बहनी कोशी, बागमती व गण्डकी प्रदेशया पहाडी लागाय् आंशिक बदली जुया ल्यंगु ब्वया मौसम यचुइ। कोशी व गण्डकी प्रदेशया छथाय् निथाय् फुलुफुलु वा वइगु सम्भावना दु।

वइगु २४ घौ दुने कोशी, बागमती व गण्डकी प्रदेशया छथाय् निथाय् फुलुफुलु वा वइगु व कोशी व गण्डकी प्रदेशया तःगु व हिमाली ब्वया छथाय् निथाय् च्वापु गायेपूm धासें थुकिं बुँज्या, स्वास्थ्य, पर्यटन, पर्वतारोहण, सतक व हवाई यातायातय् छुं भचा लिच्वः लाये पूmगुलिं सतर्क जुयाच्वनेत धाःगु दु।

प्रधानमन्त्री केपी शर्मा ओलीं सामाजिक सुरक्षाया लागायात चकंकेगु घोषणा यानादीगु दु। थौ न्हय्क्वःगु सामाजिक सुरक्षा दिवसया छगु ज्याझ्वलय् वयकलं अथे घोषणा यानादीगु खः।

सामाजिक सुरक्षा कोषपाखें ग्वसाः ग्वःगु ज्याझ्वलय् प्रधानमन्त्रीं वइगु ९० न्हु लिपा योगदान ब्यूपिनि काय् म्ह्याय्पिं नं कोषपाखें लाभान्वित जुइगु व छगू लख स्वयां अप्वः वासः खर्च जुइपिं योगदानकर्ता तय्त कूल खर्चया ५० प्रतिशत कोषं फइगु घोषणा यानादिल।

प्रधानमन्त्री ओलीं संविधानय् दूगु मौलिक हकया व्यवस्था व दायित्वप्रति सरकार जिम्मेवार व जवाफदेही जुइगु कँसें देय्यात समृद्ध दयेकेत सरकार जुयाच्वंगु दु धकाः धयादिल।

उगु झ्वलय् कोषअन्तर्गत अप्वः योगदानकर्ता व सेवा प्रदायक व्यक्ति व संस्थातय्त प्रधानमन्त्रीं सिरपाः लःल्हानादिल।

हलिंया तज्जागु च्वापूगुँ सगरमाथा लागा त्वतीपिं विदेशी पर्यटकया ल्याः ७० प्रतिशतं अप्वःगु दु।

चिकुगु अप्वया वगुलिं लिपांगु ई सगरमाथा लागाय् दुहाँवनीपिंसिबें पिहांवनिपिनिगु ल्याः ७० प्रतिशतं अप्वःगु खः। लिपांगु ई छगू वाय् जहाजपाखें न्हय्सः व ११ म्ह पर्यटक लुक्ला कुहाँवःगु व निद्वः व प्यसः पर्यटकं सगरमाथा लागा त्वतूगु नेपाल नागरिक उड्डयन प्राधिकरण लुक्लां धाःगु दु।

ज्याकुथिया ‘एटिसी अफिसर’ सञ्जय श्रेष्ठया कथं मंसिर ४ गते निसः व २३ म्ह दुहाँवःगु खःसा स्वसः व ६२ म्हेस्यां लुक्ला त्वतूगु खः। अथेहे ५ गते सच्छि व १९ म्ह दुहाँवःगु व स्वसः व २० म्हेस्यां लुक्ला त्वतूगु दु। ६ गते ८० म्ह दुहाँवःगु व स्वसः व ७४ म्ह विदेशी पर्यटकं जहाज गयाः लुक्ला त्वतूगु दु।

अथेहे मंसिर ७ गते ८८ म्ह दुहाँवःगु व स्वसः व स्वम्ह पिहाँवंगु, ८ गते ५३ म्ह पर्यटक दुहाँवःगु व प्यसः व ८१ म्ह पिहाँवंगु, ९ गते सच्छि व ३६ म्ह दुहाँवःगु व स्वसः व स्वम्ह पिहाँवंगु व १० गते सच्छि व ३२ म्ह पर्यटक दुहाँवयालि निसः व ५७ म्ह लुक्लां पिहाँवंगु प्राधिकरणया ल्याः धलखय् दु।

ख्वाउँगु तच्वकं अप्वयावःगुलिं विदेशी पर्यटक सगरमाथा लागा त्वता भ्रमण क्वपाला लिहाँवनेगु क्रम अप्वया वंगु पर्यटन व्यवसायी डिकबहादुर दर्नालं धयादिल । गुलिखे पर्यटक ला ख्वाउँ अप्वया च्वय्या लागा हे मवंसें लुक्ला नाम्चें हे लिहाँवनाच्वंगु नं वय्कलं कनादिल। दर्नालं धयादिल, “लःहे च्वापु जुया ब्यूगुलिं विदेशी पर्यटकत च्वय् वने हे मानेमजू। आः ख्वाउँ छक्वलं अप्वःगु दु, तन्हुया भ्रमणय् वःपिं थःगु भ्रमण क्वपाला लिहाँवनाच्वंगु दु।”

नाम्चेसिबें च्वय्या लागाय् कात्तिकया न्हापांगु ई निसें हे च्वापूगागुलिं थुगु लागाय् तसकं ख्वाउँगु वय्कःया अनुमान दु। (रासस)

चन्द्रागिरि नगरपालिकां थःगु लागाया शिक्षित ल्याम्ह्य तय्त ‘डिजिटल’ सीप बियाः देय् दुने हे सुचं प्रविधिया लागाय् ज्या चूलाकेगु ह्वताः दयेका बिइगु नीति कयेच्याःगु दु।

थ्व हे नीतियात ज्याखँय् हयेत नगरपालिकां न्हापांगु खुसिइ सोमबाःनिसें डिजिटल तालिम न्ह्याकूगु दु। नगरपालिकां रोजगार सेवा केन्द्रनाप जानां न्हापांगु खुसिइ न्ह्याकूगु थूगु तालिमय् ५०म्ह ल्यासेल्याय्म्हतसें थःत मिलेजूगु ई लाका न्हि स्वघौ सुचं प्रविधिया थी थी आयाम (मोडल) या बारे ज्ञां काइगु जुइ।

‘स्किल ल्याब’या ग्वाहालिइ न्ह्यानाच्वंगु थुगु तालिमय् नगरया १५ गू हे वडाया ५० म्ह ल्यासेल्याय्म्हतसें ब्वति कयाच्वंगु दु। तालिम लिपा थ्व हे संस्थां इमित लजगाःया निंतिं विदेशी संस्थात नाप समन्वय यानाबीगु धाःगु दु। सीप व लजगाःयात स्वाइगु थुगु तालिमलिपा ब्वतिकापिंसं देशय् हे च्वना सूचं प्रविधिया ज्या याये फइगु धाःगु दु।

लिपांगु ई नगरपालिकां ल्यासेल्याय्म्हतय्त थी थी लागाय् देय् दुने हे लजगाःया ह्वताः चुलाके फइगु लकस दयेकेत माःगु सीपमूलक तालिम, प्रशिक्षण व मेमेगु ज्याझ्वःयात न्हापं थाय् बियावयाच्वंगु दु। सोमबाः न्ह्यागु तालिमया उलेज्या यानादिसें चन्द्रागिरि नगरपालिकाया प्रमुख घनश्याम गिरीं नगरपालिकाया सेवायात प्रविधिमैत्री दयेकाः यंकेगु नगरपालिकाया नीति दूगु खँ धयादिल।

वय्कलं धयादिल, “देय् दुने हे लजगाःया ह्वताः चुलाकेया निंतिं नगरपालिकां युवातय्त केन्द्रय् तयाः थी थी ज्या न्ह्याकेया नापं प्रशिक्षण व तालिम बियाच्वंगु दु।” ज्याझ्वलय् प्रमुख प्रशासकीय अधिकृत हेमराज अर्यालं नगरपालिकां न्ह्याकाच्वंगु रोजगारमुखी तालिमलिपाया पलाः न्ह्याकेत न्हापांगु कुतः कथं डिजिटल तालिम न्ह्याकाःगु व थुकीं सीप व लजगाःयात स्वाइ धयादिल।

वय्कलं धयादिल, “डिजिटल तालिमलिपा देय् दुने हे च्वना ज्या यायेफइगु जुयाः नगरपालिकां थुजाःगु तालिमयात यक्वः मू बियाः न्ह्यने हःगु खः। सुचं प्रविधिया लागाय् दक्ष जनशक्ति म्ह्वः जुयाच्वंगुयात तालिमं पूवंकेगुलिइ ग्वाहालि याइ। डिजिटल तालिमलिपा ब्वतिकाःपिन्त रोजगारदाता कंपनीनाप समन्वय यानाबिइगु जुया थुकिया मू यक्वः दु।”

ज्याझ्वलय् नगरपालिकाया उपप्रमुख वसन्ती श्रेष्ठ, प्रवक्ता कृष्णप्रसाद खड्गी, रोजगार सेवा केन्द्रया प्रमुख पुष्पराज शर्मां तालिमया महत्वबारे नुगः खँ तयादीगु खः। (रासस)