प्रधानमन्त्री केपी शर्मा ओलीं मुक्कं देय् निराश जुयाच्वंगु दु धका धयादीगु दु। प्रतिनिधिसभाया आइतबाः च्वंगु बैठकय् विश्वासया मतया निंतिं इनाप यासें ओलीं ०४६ लिपाया पुस्तां न्हापांखुसी थुज्वःगु अप्पो निराशा खंगु धका धयादिगु दु।

अर्थतन्त्र अस्तव्यस्त अवस्थाय् वना च्वंगु दु धका धयादीसे वय्कलं ‘आयात निर्यात म्हो जूगु दु’ धयादिल। लिबाःसां नं लक्ष्य कथं ७६ प्रतिशत जक राजश्व मुंके फयाच्वंगु दु। थुकिं देय्या अर्थतन्त्रय् गुलि तःधंगु समस्या ब्वलंगु दु धइगु सिइदु।

वय्कलं बैंकय् ध्यबा मुनाच्वंगु व ब्याजदर म्हो जूगु इलय् नं व्यवसायी लगानी यायेत तयार मजूगु खँ कनादिल। ओलीं धाःगु दु, “सरकार स्टन्टम्यान जुल, सरकारं इमिगु खँ रोके यानाः न्यन, अले इमिसं ज्या याये मफुत।” वय्कलं थःगु सरकारया प्राथमिकताया बारे संसदयात जानकारी बियादीगु खः।

नेकपा माओवादी केन्द्र बागमती प्रदेश संसदीय दलया सुझाव लिपा मुख्यमन्त्री शालिकराम जमकट्टेलं प्रदेशसभायात सम्बोधन यानाः राजीनामा बीत्यंगु दु।

माओवादी केन्द्रया प्रमुख सचेतक रत्नप्रसाद ढकालं संसदीय दलया आइतबाः च्वंगु बैठकय् संसदीय दुजःपिन्सं राजीनामा बीत सुझाव ब्यूगु जानकारी बियादीगु खः। संसदीय दलं राजीनामा बीत सुझाव ब्यूगु दु। पार्टीया सुझावयात मुख्यमन्त्रीं कार्यान्वयन याइ।’ ढकालं धयादीगु दु।

थ्वसिबें न्ह्यः जमकट्टेलं विश्वासया मत कायेगु उद्देश्यं प्रस्ताव दर्ता याःगु खः । साउन ५ गते च्वंगु कार्यव्यवस्था परामर्श समितिया बैठकं विश्वास मतया नितिं कार्यसूची दयेकूगु खः।

नेपालभाषा एकेदेमिया ग्वसालय् बौद्धिक सहलह कथं छगू विशेष ज्याझ्वः शनिवार जूगु दु। एकेदेमिया सभाकक्षय् जूगु उगु ज्याझ्वलय् सांस्कृतिक इतिहास अध्येयता डा गोविन्द बोल श्रेष्ठं मू खँ न्ह्यब्वया दिगु खः।

उगु बौद्धिक सहलह ज्याझ्वलय् सु खः नेवा ?, गुबलेनिसें नेवाःतय् अस्तित्व दत ?, दकले न्हापांगु नेवाः बस्ति गन खः?, इतिहाससिबें न्ह्यव नेवाःतय् स्थिति छु खः ?, नेपालभाषा गुलि पुलां ? धैगु विषययात कःघानाः नेवाः व नेपाल पुलां इतिहासया ज्याखँ कुला विशेष न्ह्यब्वया बौद्धिक सहलह ज्याझ्वः जूगु खः।

एकेदेमिया प्राज्ञ दुजः त्रिरत्न शाक्यं सहजीकरण यानादीगु उगु ज्याझ्वलय् सहभागि जुयादीपिन्सं मू खँय् थःथःगु विचार व खँ नं न्ह्यब्वया दीगु खः। नेपालभाषा एकेदेमिया भाइस चान्सलर मल्ल के सुन्दरंं उगु ज्याझ्वः नेवाःतयेगु प्राज्ञ इतिहास कुलेगु छगू कुतः खः धका धासे थुकिया विस्तृत अध्ययनय् एकेडेमि अझ न्ह्यावनिगु खँ कनादिलसा ज्याझ्वः एकेदेमिया चान्सलर यज्ञरत्न धाख्वाःया सभाध्यक्षताय् जूगु खः।

उगु ज्याझ्वःयात तिबः कथं नेवाः राजनीतिक आन्दोलनया डा. महेशमान श्रेष्ठ, नागार्जुन पब्लिकेशनया डा. सर्वोत्तम श्रेष्ठ व सीम्याट कन्सलटायन्सया ई. बालसुन्दर मल्लपिंन्सं ग्वाहालि यानादीगु खः।

नेपाली कांग्रेस बागमती प्रदेश संसदीय दलया बैठकं बहादुर सिंह लामायात मुख्यमन्त्री दयकेगु सर्वसम्मतिं निर्णय जूगु दु। थौ आइतबाः सुथय् हेटौन्डाय् च्वंगु संसदीय दलया बैठकं लामायात मुख्यमन्त्रीया उम्मेदवार दयेकेगु निर्णय याःगु खः।

प्रदेशया सांसद रमेश महतं धयादी कथं, “सुथय् च्वंगु संसदीय दलया बैठकं सर्वसम्मतिं बहादुर सिंह लामायात मुख्यमन्त्रीया उम्मेदवार दयेकेगु निर्णय याःगु खः।

”बागमती प्रदेशसभाय् कांग्रेसया ३७ म्ह सांसद दु। लामा बागमती प्रदेशसभाय् कांग्रेस संसदीय दलया नेता नं खः। प्रदेश अध्यक्षलिसें प्रतिनिधिसभा सदस्य इन्द्र बानिया नं मुख्यमन्त्री जुइगु इच्छा प्वंकादीगु खः। संविधानया धारा १६८ (२) कथं पार्टीया नेता बाहेक मेपिं मनूतय्सं नं मुख्यमन्त्रीया दावी याये दइ।

येँ महानगरपालिका वडा नम्बर २२ या वडाध्यक्ष चिनिकाजी महर्जनं सतकय् टेबुल मेच तयाः वडाया ज्या न्ह्याकादीगु दु।

महानगरं न्हू सतक फुटपाथ दयकेगु ज्याया निर्णय लित मकाःतले वडाया ज्या सतकं हे यायेगु धासें वडा २२ या वडा अध्यक्ष महर्जनं सतकं हे ज्या न्ह्याकादीगु खः वडा अध्यक्ष महर्जनं फुटपाथ विस्तारया निर्णय लितमकातले महानगरयात दबाब बिइगु कथं सतकपाखें हे वडाया ज्या न्ह्याकागु खः धका धयादीगु दु।

नेपाल बैंक वनेगु लँय् धर्नाया नितिं दयेकूगु पाल दुनेंनिसें हे ज्या न्ह्याकूगु खः। वडा अध्यक्ष महर्जनं धयादीगु दु, “महानगरया फुटपाथ विस्तार यायेगु निर्णय लित मकाःतले सतकं हे २२ गू वडाया फुक्क ज्या न्ह्याकेगु जुइ ।” धका धयादीगु खः।

महानगरं न्हूगु सतकया सतक चिब्या यानाः फुटपाथ तब्या यायेगु ज्या न्ह्याकूगु धासें वडाध्यक्ष महर्जनलिसें स्थानीयबासीं विरोध याःगु खः। वंगु बुधवाःनिसें फुटपाथ दयकेगु ज्या न्ह्यागु खःसा शुक्रवाःनिसें स्थानीयबासीं बिरोध याःगु खः।

महानगर थौं सुथय् डोजर लित यकूगु खः।