बिपी कोइराला मेमोरियल अस्पतालं मस्तय्गु क्यान्सर ल्वय्या सितिकं वासः यायेगु ज्या न्ह्याकूगु दु।

अस्पतालं न्हापा नं खाता, नयेगु नँसा, रेडियो थेरापी सितिकं याना वयाच्वंगु खःसा आः वया वासः नं सित्तिकं यायेत्यंगु खः। अस्पतालया कार्यकारी निर्देशक डा शिवजी पौडेलया कथं डिसेम्बरया लिपांगु न्हि तकया दुने विश्व स्वास्थ्य संगठन (डब्लुएचओ) पाखें केमो नापनापं मचा क्यान्सर ल्वय्या ३५ गु वासः सितिकं वयेत्यंगु दु।

व वासःत मवतले आःयात अस्पतालं हे वासः बिया वयाच्वंगु दु। वय्कलं धयादिल, “मन्त्रालय नं स्रोत क्वछिना ब्यूगुलिं आः जिमिसं फुक्क वासः  नापनापं सितिकं उपचार यायेगु ज्या न्ह्याकाःगु खः।” अस्पतालया उपनिर्देशक डा उमेश नेपालया कथं थुगु अस्पतालय् क्यान्सरया मचा ल्वगितय् चाप यक्व हे दु। वय्कलं धयादिल, “ल्वगित यक्व दु, सितिकं वासः यायेबले अस्पतालयात तःधंगु भार जुइ धकाः धायेधुंका स्वास्थ्य मन्त्रालयनं वासःया स्रोत क्वछिना बिइगु बचं बिल।” लिपा पलेसा कायेगु याना आःयात अस्पतालं हे केमो नापनापं मेगु वासः मिलेयानाच्वनागु उपनिर्देशक डा नेपालं धयादिल।

अस्पतालया मचा क्यान्सर ल्वय् विशेषज्ञ डा कृष्णसागर शर्मां न्हापांगु इलय् हे मस्तय् क्यान्सर म्हसिके पूmसाः लंके अःपुइगु धयादिल। नेपालय् दँय् दसं द्वःछि व न्यासःया ल्याखं न्हूपिं मचा क्यान्सर ल्वगित अप्वःया वनाच्वंगु दु धइगु जिमिगु अनुमान दु धकाः वय्कलं धयादिल। उपिंमध्ये बच्छिजक वासःया पहुँचय्  वयाच्वंगु नं वय्कलं तनादिल। वय्कलं धयादिल, “गुलिखय् मस्तला क्यान्सर जूगु हे मसिकं सिनावनाच्वंगु दु।

गुलिसिनं विदेश वना वासः याकाच्वंगु दु। अथेजुसां ५० प्रतिशत मस्त क्यान्सर अस्पतालया पहुँचं पिने हे लानाच्वंगु दयेमाः धयागु जिमिसं अनुमान यानाःगु दु।” मस्तय् क्यान्सरया वासः पूवंक सितिकं यायेगु जुलिसें अस्पतालया पहुँच पिने लानाच्वंपिं मस्तय्त नं वासः यायेफइगु लकस बनेजुइगु खँय् वय्कलं भलसा प्वंका दिल। (रासस)

नेपाल भ्रमणय् वयाच्वंम्ह कोसोभोया स्थानीय सरकार लिसे प्रशासनमन्त्री एल्बर्ट क्रिस्निक व यल महानगरया प्रमुख चिरीबाबु महर्जन दथुइ नापलायेगु ज्या जुगु दु।

मन्त्री एल्बर्ट प्रतिनिधिमण्डलया टोलीें महानगर प्रमुख महर्जनं यल महानगर कार्यालयय् नापलानादीगु खः। नेपाःया स्थानीय सरकारया कुतः, उपलब्धि, अवसर व चुनौतीया बारेय् मन्त्री एलबर्टया पुचलं जानकारी कयादीगु खः।

हेल्भेटास नेपाःपाखे नेपालय् सञ्चालित जूगु ज्याझ्वःया बारे अध्ययन यायेगु झ्वलय् कोसोभो टोली सोमवाः नेपाः वःगु खः।

मन्त्री एल्बर्ट न कोसोभोया भौगोलिक, राजनीतिक अवस्थाबारेय् जानकारी ब्यूगु खः।नापे कोसोभाय् दुगु पालिका न प्रविधि, ज्ञान, सिप व बालागु कुतःयल महानगरय् दुथ्याकेगु व अनुभव कालबिल यायेगु प्रतिबद्धता यानादीगु खः।

नेपाल धितोपत्र बोर्डय् न्हुगु नेतृत्व वयेवं सेयर बजारय् न सकारात्मक प्रतिक्रिया वःगु दु। मंगलवाः सेयर बजाः २७ सय ल्याखय् थ्यःगु दु।

म्हिगःया तुलनाय् नेप्से परिसूचक ३३.४१ ल्याखं थहावंना नेप्से २७१६ ल्याखय् थ्यःगु दु। कारोबार रकम न थहावंगु दु। म्हिगः ६ अर्ब ३४ करोड कारोवार जुगुलि थौ ७ अर्ब ४४ करोडया कारोबार जूगु दु।

थौ २११ कम्पनीया भाः थहावंगुलि ३२ गु कम्पनीया भाः कुहावःगु दु सा छगू कम्पनीया भाः स्थिर जूगु दु। दक्को सेक्टरया सूचक थहावःगु दु। बैंकिङ १.२०, विकास बैंक ०.४९, फाइनान्स १.५१, होटल लिसे पर्यटन ०.६४, हाइड्रोपावर १.९७, लगानी १.१३, जीवन बीमा १.०२, उत्पादन १.०८, माइक्रोफाइनान्स ०.८५, निर्जीवन बीमा ०.८१, मेमेगु १.६८ व व्यापार समूह १.२९ प्रतिशतं थहावंगु दु।

स्वंगू कम्पनीया भाः १० प्रतिशत स्वया अप्पोगु दु। सपोर्ट माइक्रोफाइनान्स, युनाइटेड इदी मर्दी हाइड्रोपावर, कुथेली बुखरी स्मल हाइड्रोपावरया भाः १० प्रतिशतं थहावंगु दु। मिथिला लघुवित्त वित्तीय संस्थाया ९.६, अपरहेवाखोलाया ८.८ नाप मायाखोला हाइड्रोपावरया ८.६ प्रतिशतं थहावःगु दु। थ्रीस्टार हाइड्रोपावरया भाः १० प्रतिशतं कुहावःगु दु।

राष्ट्र बैंक समस्याउन्मुख घोषणा यायेवं कर्णाली विकास बैंकया भाः ८.४ प्रतिशतं कुहावंगु दु। सामुदायिक लघुवित्तया ८.१, बेस्ट फाइनान्स ६.१ प्रतिशतं कुहावंगु दु। कारोबार रकमया आधारय् नेपाल फाइनान्स, ङादी ग्रुप पावर, एनआरएन इन्फ्रास्ट्रक्चर, कर्णाली विकास बैंक व जानाकी फाइनान्स न्ह्यने खनेदुगु दु।

लुँया भाः थौ न कुहावःगु दु। लुँ तोलां थौ २ हजार ६ सय तका कुहावःया १ लाख ४८  हजार ७ सय तका थ्यःगु दुु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न नीन्यातका कुहावःगु दु। वहः तोलां नीन्यातका कुहावया थौ १ हजार ८ सय २० तका न कारोवार जूगु दु धका महासङ्घं धाःगु दु।

योगदानय् आधारित सामाजिक सुरक्षा योजना छ्यलाबुलाय् वःगु न्हय्दँ क्यंगु दु।

प्रधानमन्त्री केपी शर्मा ओलीया मू पाहाँसुइ थौं न्हय्क्वःगु सामाजिक सुरक्षा दिवस न्यायेकेत्यंगु दु।विसं २०७५ मङ्सिर ११ गते सरकारं योगदानय् आधारित सामाजिक सुरक्षा योजना न्ह्याकूगु खः। विस २०७५ मङ्सिर ३ गतेया मन्त्रिपरिषद् मुँज्यां थौंया न्हियात सामाजिक सुरक्षा दिवस कथं न्यायेकेगु क्वःछ्यूगु खः।

नेपाःया संविधानं फुक्क नागरिकतय्त सामाजिक सुरक्षाया हक दइगु व्यवस्था यानातःगु दु। सरकारं व हे हक छ्यलाबुलाय् हयेत सामाजिक सुरक्षा कोषपाखें आम नागरिकतय्त सामाजिक सुरक्षाया लागाय् हयेत कुतः यानाच्वंगु दु। कोषय् आःतक औपचारिक, अनौपचारिक, वैदेशिक व स्वरोजगार ख्यःया थ्यंमथ्यं १८ लख श्रमिक धलखय् दुथ्याकेधुंकूगु दु।

सोमबाःतक औपचारिक ख्यःया ५ लख ४३ द्वः ४ सः व ९१, वैदेशिक रोजगारया १२ लाख ५३ द्वः ६ सः व १५, अनौपचारिक ख्यःया स्वसः व ७ नापं स्वरोजगार ख्यःया निसः व २७ यानाः १७ लख ९७ द्वः ६ सः ४० श्रमिक कोषय् दुथ्याःगु कार्यकारी निर्देशक कविराज अधिकारीं धयादिगु दु।

कोषं श्रमिकया निंतिं औषधोपचार, स्वास्थ्य नापं मातृत्व, दुर्घटना नापं अशक्तता, आश्रित छेँजः व वृद्धावस्था सुरक्षा योजना सञ्चालन यानाच्वंगु दु। कोषं आःतक १ लख ८० द्वः ९ सः व २२ श्रमिकतय्त थी थी सुविधा योजना अन्तर्गत ११ अर्ब ६२ क्वति दाबी भुक्तानी यायेधुंकूगु दु । कोषय् ६८ अर्ब ६८ क्वति योगदान ध्यबा मुनेधुंकूगु दु।