जनसङ्ख्या व विकासयात सन्तुलित ढङ्गं नापनापं यंकेत माःगु नीतिगत व्यवस्थाया निंतिं मंकाः अवधारणा दयेकेगु तातुनां थ्व हे मङ्सिर १२ निसें १५ गतेतक येँय् जनसङ्ख्या व विकाससम्बन्धी खुक्वःगु अन्तर्राष्ट्रिय सम्मेलन जुइत्यंगु दु।

त्रिभुवन विश्वविद्यालय, जनसङ्ख्या अध्ययन केन्द्रीय विभागं ग्वसाः ग्वःगु थुगु सम्मेलनय् चीन, अमेरिका, युरोप, अष्ट्रेलिया, दक्षिणपूर्व एसिया व एसियाली लागाया ३५ स्वयां अप्वः देय्या न्यासः स्वयां अप्वः जनसङ्ख्या व विकास ख्यःया प्राध्यापक, नीति निर्माता, अनुसन्धानकर्ता, विद्यार्थी व विषयविज्ञ तय्सं ब्वति काइ। सम्मेलनया उलेज्या प्रधानमन्त्री केपी शर्मा ओलीं याइगु ज्याझ्वः दु।सम्मेलनय् थी थी १७ गू विषय व ख्यलय् केन्द्रित जुयाः सहलह जुइ।

लिपांगु इलय् जन्मदर कुहाँवयाच्वंगु झ्वलय् जनसङ्ख्याया व्यवस्थापन गथे यानाः यायेगु धइगु बारे विशेष सहलह जुइगु न्ह्यथंगु दु। “थुगु अवस्थाय् जनसङ्ख्या व विकास दथुइ गथे यानाः तादम्यता दयेके फइ, थुकिया निंतिं नीति निर्मातां छु यायेमाः, विश्वविद्यालयय् गजाःगु पाठ्यक्रम तयेमाः धैगु बारे सहलह जुइ”, विभागया सहप्राध्यापक नापं नेपाल जनसङ्ख्या सङ्घया नायः डा पदम खतिवडां धयादिगु दु।

सम्मेलनय् नेपाःपाखें प्रजननदर, जन्मदर व बसाइँ सराइलिसें जनसाङ्खिक ह्यूपाःया बारे विशेष न्ह्ब्वयेगु जुइ। पार्किन्सनलिसें पुनी मखूगु ल्वय्या विषयय् नं सम्मेलनय् सहलह जुइगु ज्याया धलः दु। नेपालय् लैङ्गिक समानता, समावेशिता व सामाजिक सुरक्षालिसें संवैधानिक हकया छ्यलाबुलाया अवस्थाया बारे नं सहलह जुइ।

सम्मेलनय् विकास व जनसङ्ख्याया ख्यलय् नेपालं ताःलाकूगु उपलब्धि, फयाच्वनेमाःगु व उकिया सामाना यायेत अन्तर्राष्ट्रिय अनुभव कालबिल जुइ। जनसङ्ख्या व विकासया ख्यलय् गथे जुयाः ह्यूपाः वयाच्वन धैगुलिइ सहलह जुइगु सङ्घया नायः डा खतिवडां धयादिल। एसिया प्यासेफिक लागाय् जूगु जनसाङ्खिक ह्यूपाः, बसाइँसराइ व औषत आयु अप्वः जूबलय् लाःगु पारिवारिक असर व प्रभाव नापं विकास नीति, योजनां हिलावंगु जनसङ्ख्यापाखें फाइदा कायेगु व कय्च्यायेगु बारे सहलह केन्द्रित जुइगु त्रिवि, जनसङ्ख्या अध्ययन केन्द्रीय विभागया प्रमुख नापं प्रा डा योगेन्द्र गुरुङं धयादीगु दु।

सम्मेलनया लिच्वलं वइगु इलय् जनसङ्ख्या नीति निर्माण यायेत अःपुइकिइ धकाः भलसा कयाच्वंगु वय्कःया धापू दु। जनसङ्ख्या व विकासयात स्वाकेगु मू तातुनाकथं सन् २०१० निसें सम्मेलन जुयावयाच्वंगु खः । न्हापांगु सम्मेलन भारतया न्हू दिल्ली, निक्वःगु थाइल्याण्डया बैंकक, स्वक्वःगु मलेसियाया क्वालालम्पुर, प्यक्वःगु चीनया साङ्घाइ व न्याक्वःगु इन्डोनेसियाया जाकर्ताय् जूगु खः। (रासस)

सेयर बजाः परिसूचक नेप्से थौ सोमवाः १५.८३ ल्याखं थहावंना नेप्से २६८३ ल्याखं थहावःगु दु। अथेहे थौ कारोबार रकम धाःसा कुहावःगु दु।

म्हिगः ७ अर्ब ७२ करोडया कारोबार जूगुलि थौ ६ अर्ब ३४ करोड जूगु दु। १६९ कम्पनीया भाः थहावंगुलि ६७ गु कम्पनीया भाः कुहावःगु दु सा गूगुं कम्पनीया भाः स्थिर जूगु दु। फाइनान्स समूहया सूचक दकलय् अप्पो २.२७ प्रतिशतं थहावःगु दु।

अथेहे बैंकिङ ०.११, विकास बैंक १.२१, होटल लिसे पर्यटन १.२४, हाइड्रोपावर ०.४४, लगानी १.०५, जीवन बीमा ०.२३, माइक्रोफाइनान्स ०.१९, निर्जीवन बीमा १.२७, मेमेगु १.६८ व व्यापार समूह ०.०९ प्रतिशतं थहावंगु दु। उत्पादन समूह ०.२३ प्रतिशतं कुहावंगु दु।

बेस्ट फाइनान्स व सुपरमादी हाइड्रोपावर ९.९ प्रतिशतं थहवंगु दु। कर्पोरेट डेभलपमेन्ट बैंक ९.८, स्वाभिमान लघुवित्त ९.७, सप्तकोशी विकास बैंक ९.६, विन्ध्यबासिनी हाइड्रोपावर ८.५, एनएलजी इन्स्योरेन्स ७.४, थ्रीस्टार हाइड्रोपावर ७.२ प्रतिशतं थहावंगु दु। ङादी ग्रुप पावर १० प्रतिशतं कुहावःगु दु। जानाकी फाइनान्स ३.४ व मध्यभोटेकोशी २.९ प्रतिशतं कुहावंगु दु।

कारोबार रकमया आधारय् ङादी ग्रुप पावर, बेस्ट फाइनान्स, नेपाल फाइनान्स, एनआरएन इन्फ्रास्ट्रक्चर, हाथवे इन्भेस्टमेन्ट कम्पनी न्ह्यने लागु दु।

निर्वाचन आयोगं उपनिर्वाचनया प्रचारया झ्वलय् तोकेयानातःगुसिबें अप्वः गाडी व ‘लाउड स्पीकर’या छ्यला अप्वः जुयाच्वंगु धासें थुकियात नियन्त्रण यायेत स्थानीय प्रशासनयात निर्देशन ब्यूगु दु।

आयोगया आइतबाःया मुँज्यां निर्वाचन कानुन व आचारसंहिता हाचांगायेगु ज्या मयायेत व याकेमबीत हाकनं धाःगु दु। स्थानीय तहया उपनिर्वाचनया निंतिं निर्वाचन प्रचारप्रसारया अवधि सुरु जुयांलि  राजनीतिक दल व उम्मदेवारतपाखें निर्वाचन प्रचार प्रसार जुयाच्वंगु खँ न्ह्यथसें आचारसंहिता पालना यायेत व पालना याकेबियेत दल, उम्मेदवार व सम्बन्धित निकाययात निर्देशन बियागु खँ लुमंकाः ब्यूगु दु।

“सवारी साधनय् ‘लाउड स्पीकर’ छ्यलाः निर्वाचनया प्रचाप्रसार जुयाच्वंगु धयागु सुचं वयाच्वंगुलिं अजाःगु सवारी साधानत लाकाकया माःगु कानूनी कारवाही यायेत स्थानीय प्रशासनयात उजं बिइ दु। थ्वहे मंसिर १६ गते स्थानीय तहया उपनिर्वाचन जुइत्यंगु दु।

नेपाः प्रहरीया च्याम्ह प्रहरी वरिष्ठ उपरीक्षक (एसएसपी)तय्त प्रहरी नायब महानिरीक्षक (डिआइजी)य् बढुवा यायेत सिफारिस याःगु दु।

गृह मन्त्रालय, बढुवा समितिया सचिवालयं आइतबाः च्वंगु मुँज्यां प्रहरीया च्याम्ह एसएसपीतय्त डिआइजीइ बढुवा यायेत सिफारिस याःगु खः। बढुवा सिफारिस जूपिं एसएसपीय् धु्रवराज राउत, भोलाबहादुर रावल, गणेश चन्द, सिद्धिविक्रम शाह, सुशीलसिंह राठौर, उमाप्रसाद चर्तुवेदी, हिमालयकुमार श्रेष्ठ व डम्बरबहादुर विकपि खः।

बढुवा समितिं प्रहरी नियमावली, २०७१ (संशोधन नापं)या नियम २७ या उपनियम (४) कथं बढुवा याःगु बढुवा समितिया सदस्य सचिव नापं प्रहरी अतिरिक्त महानिरीक्षक टेकप्रसाद राईं कनादिगु खः।

राहदानी सेवा बालाक्क सञ्चालन जुइत मेगु निवाः लगे जुइगु दु। राहदानी विभागं छगू सूचं जारी यासे सेवा बालाक्क सञ्चालनय् हयेत छवाः वा निवाः लगे जुइगु अनुमान याःगु दु।

राहदानी आवेदन प्रणालीनाप सम्बन्धित छु कप्युटरय् भाइरस दुहावःगु धाःसे विभागं थुकियात अझ मेगुलि सरे जुइफुलि सेवा बन्द यायेमाःगु स्पष्टीकरण ब्यूगु दु। राहदानी विभागं छु भचा सेवा न्ह्याकूगु दु धका विभागं धाःगु दु।

विभागं छन्हु निन्हु दुने हे न्हुगु आवेदन फाराम भरे यायेगु निति बुकिङ्ग खुल्ला याइ। भाइरस खने दुगुलि सुरक्षा संवेदनशीलतायात ध्यानय् तया माःगु सतर्कता अपने यायेवं व सेवाग्राहीया डाटा सुरक्षित दुगु धाःसा विभागं धाःगु दु।

राहदानी सेवा बन्द जुगुलि सेवाग्राही मर्काय् लागु खः। आइतवाः सेवा बन्द जुगुलि विभागय् सेवाग्राही तयेस नाराबाजी याःगु खः।