थौ येँ महानगरपालिकाया ३२ गु वडाय् च्वपि जनप्रतिनिधिपि न्हुसतकय् मुना फुटपाथ दयेकुलि बिरोध याःगु दु।

वंगु शुक्रवाः येँ महानगरं न्हुसतकय् फुटपाथ दयेकेगु ज्या न्ह्याकुगु खः। थौ येँ महानगरं न्हू सतकय् डोजर चिइकूगु दु। न्हूगु सतकय् फुटपाथ विस्तारया नितिं छ्यलेत हःगु डोजर स्वन्हुलिपा जुद्ध शालिकं थौ महानगरं चिइकुगु दु। फुटपाथ विस्तार यायेत वंगु डोजर लिहा वनेधुका आः ज्या दिउगु दु।

वंगु बुधवाःनिसें फुटपाथ विस्तारया ज्या न्ह्याकेवं न्यूरोडया स्थानीयपिन्स विरोध यायेवं ज्या दिकूगु दु। स्वन्हुतक ज्या न्ह्याके मफयेधुंकाः स्थानीयबासीया दबाबय् थौं सुथय् ७ बजे डोजर लित यकेत बाध्य जुगु खः।

शुक्रवाः स्थानीय जनतां विरोध यानाः फुटपाथय् ज्या यायेत पंगः थःगु खः। मेयर बालेन साहया पुत्ला न च्याकूगु खः।

थौं बंगलादेशय् ब्वनाच्वंपिं १७ म्ह विद्यार्थीपिन्त नेपाः हयेत्यंगु दु।

प्रधानमन्त्री केपी शर्मा ओलीं बंगलादेशय् ब्वनाच्वंपिं विद्यार्थीपिन्त थौं हे नेपाः हयेगु धका धयादीगु दु।प्रधानमन्त्रीं सम्बन्धित परिवारया इनाप कथं थौं हे बंगलादेशया सावर क्षेत्रय् च्वंगु इनाम मेडिकल कलेजय् ब्वनाच्वंपिं उपिं विद्यार्थीपिन्त लित हयेगु व्यवस्था यानागु जानकारी बियादिगु दु।

“बंगलादेशय् सरकारी सेवाय् कोटा प्रणाली खारेज यायेमाःगु माग यासें विरोधया कारण अन चिकित्सा शिक्षा ब्वनाच्वंपिं नेपाली विद्यार्थीपिन्सं थःपिं असुरक्षित जूगु धयाच्वंगु खः। जिं थौं उपिं विद्यार्थीपिनिगु छेँजःलिसे नापलाना। छेँजःया इनाप कथं १७ म्ह सावर क्षेत्रया इनाम मेडिकल कलेजय् अध्ययन यानाच्वंपिं नेपाली विद्यार्थीपिन्त कन्हय् सुथय् ४ ता इलय् ढाका एयरपोर्टय् हया येँ हयेगु व्यवस्था मिले यानागु दु।’ प्रधानमन्त्री ओलीं शनिवाः बहनी सामाजिक संजालय् च्वःगु दु।

वागमती प्रदेशया मुख्यमन्त्री शालिकराम जमकट्टेलं थौ विश्वासया मत काइगु जुगु दु।

थौ न्हिनय् १ बजे च्वनीगु प्रदेशसभा बैठकय् मुख्यमन्त्री जमकट्टेलं विश्वासया मत काइगु खँ धाःगु दु।संघीय सरकार हिलेवं प्रदेश सरकारय् नेपाल कम्युनिष्ट पार्टी (एमाले)या न्याम्ह मन्त्रीतय्सें असार ४ गते राजीनामा बिउगु खः।

२०७९ मंसिरय् माओवादी केन्द्रया नेता जमकट्टेल नेकपा (एमाले), राष्ट्रिय प्रजातन्त्र पार्टी व नेपाल कम्युनिष्ट पार्टी (एकीकृत समाजवादी)या समर्थनय् मुख्यमन्त्री जुगु खः।

प्रधानमन्त्री केपी शर्मा ओलीं थौ विश्वासया मत काइगु जुगु दु।थौ प्रतिनिधि सभाया बैठक न्हिनय् १बजे च्वनिइगु जुगु दु।

निगु व निगु स्वया अप्पो दलया समर्थनय् नियुक्त जूम्ह प्रधानमन्त्रीं ३० दिं दुने प्रतिनिधिसभापाखे विश्वासया मत कायेमाःगु संवैधानिक प्रावधान दु। प्रधानमन्त्री ओली नेपाली कांग्रेसया समर्थनय् असार ३० गते प्रधानमन्त्रीइ नियुक्त जुयादीगु खः।

२७५ सदस्यीय प्रतिनिधिसभाय् विश्वासया मतया निति १३८ मत माः। ओलीनाप २ तिहाई बहुमत खने दु। कांग्रेस (८८), एमाले (७९), जसपा (७) व लोसपा (४) सरकारय् दु सा जनमत, नागरिक उन्मुक्ति लगायतया दलया न समर्थन याइगु जुगु दु।

विपक्षय् माओवादी केन्द्र, एकीकृत समाजवादी, रास्वपा व राप्रपालगायत दलपि दु।

नेपालभाषा संकिपा संघं छगु प्रेस वक्तव्य पिकया ‘नेपालभाषा सिनेमा विकास केन्द्र’ नां तया न्हुगु संस्था चाय्कूलि ध्यानाकर्षण जूगु दु धका संघया नायः हृदयप्रसाद मिश्रं धाःगु दु।

नेवाः संकिपाया विकास यायेगु ताः तयाः आः नकतिनि हे ‘नेपालभाषा सिनेमा विकास केन्द्र’ नां तयाः छगू न्हूगु संस्था चायेकल धकाः पिहां वःगु समाचारप्रति थुगु ‘नेपालभाषा संकिपा संघ’ या ध्यानाकर्षण जूगु खः। न्हू गठन जूगु ‘केन्द्र’ या नां व उद्देश्य थुगु संघलिसे ज्वःलाःगु जक मखु, थुकिया गठन समेत थुगु हे संघया सक्रिय संरक्षक डा. शान्तवीर सिंह तुलाधरया संरक्षकत्व व संघया हे छम्ह दुजःया नेतृत्वय् जूगु धकाः समाचारय् उल्लेख जुयाच्वंगुलिः जिमिगु ध्यानाकर्षण जूगु धकाः नायः मिंश्रं पिथःगु बिज्ञप्ति धयातःगु दु।

उगु विषययात कयां आकाझाकां च्वंगु संघया मुँज्यां थ्व सम्बन्धय् स्पष्ट जुइया लागिं संघया सक्रिय संरक्षक डा. तुलाधरयात छुं न्ह्यसः छ्वयेगु निर्णय याःगु खः

संरक्षक डा. शान्तवीर सिंह तुलाधरयात न्ह्यसः थुकथं तःगु दुु –

न्ह्यसः १) नेपालभाषा संकिपाया विकास यायेगु ताः तयाः थनिं दछि न्ह्यः तिनि छिगु हे पहल व छिगु हे सक्रिय संरक्षकत्वय् ‘नेपालभाषा संकिपा संघ’ गठन जूगु खः। लुमंकेबहः जू, थुगु संघपाखें ज्या न्ह्याकेया लागिं छिं प्यंगू करोड तका दां मुंकेगु बचं नं बियादीगु खः। तर थुगु संस्था अस्तित्वय् दयेक दयेकं हे थुगु संस्थालिसे छुं सहलह तकं मयासे थःगु हे संरक्षकत्वय् वहे उद्देश्यया मेगु संस्था गठन यायेमाःगुया कारण छु खः?

न्ह्यसः २) नेपालभाषा ख्यलय् संकिपाकःमिपिनि ल्याः तसकं म्हो जक दु। थ्व म्हो जक दुपिं संकिपाकःमिपिंत छथाय् हयाः छधी यायेमाःम्ह छि थेंज्याःम्ह न्ह्यलुवां छगू संस्था दयेक दयेकं वहे संस्थाया छम्ह दुजःया नेतृत्वय् हानं मेगु संस्था चायेकाः दुपिं नेवाः संकिपाकःमिपिंत नं विभाजित यायेगु ज्या यानादिल। छि थः बेलायतय् च्वनाः नेपालय् च्वंपिं नेवाः संकिपाकःमिपिंत थःथः ल्वाकाच्वनेगु थ्व षडयन्त्रकारी ज्यायात नेवाः संकिपा ख्यःयात आघात यायेगु अपराध खः धकाः छाय् मधायेगु?

न्ह्यसः ३) छिगु संरक्षकत्वय् न्हूगु संस्था गठन यानादीधुंकाः आः छिगु हे संरक्षकत्वय् गठन जुयाच्वंगु थुगु संघयात गुकथं न्ह्याकेगु अले थ्व संघय् छिगु भूमिका छु जुइगु खः स्पष्ट यानादीत इनाप याना।