सहरी विकास मन्त्रालयं स्वनिगःया फोहर व्यवस्थापनय् खनेदूगु समस्या ज्यंकेत सरोकार दुपिंलिसे सहलह ब्याकूगु दु।

मन्त्रालयय् जूगु ‘बन्चरेडाँडा स्यानिटरी ल्याण्डफिल साइट सञ्चालनय् अःपुकेत, समन्वय व अनुगमन यायेत दयेकूगु उच्चस्तरीय समिति’या मुँज्यां स्वनिगःया फोहर व्यवस्थापनय् खनेदूगु समस्या ज्यंकेत थी थी निर्णय यात।मुँज्याय् उपप्रधानमन्त्री नापं सहरी विकासमन्त्री प्रकाशमान सिंहं स्वनिगःया फोहर व्यवस्थापनय् खनेदूगु हाथ्या व समस्या सकसिगु नं सरोकारया विषय जूगुलिं ज्यंकेत सकलें मिले जुयाः न्ह्याःवनेमाःगु धयादिल।

विसं २०७८ फागुन २६ गतेया मन्त्रिपरिषद्या मुँज्यां उगु समिति नीस्वंगु खः। उपप्रधानमन्त्री सिंहं धयादिल, “फोहर व्यवस्थापनय् सकसिनं माःगु मापदण्ड नालेमाः। फोहरया ब्वथला, हाकनं छ्यलेगुलिसेंया विषयकय् सकसिनं ध्यान बिइमाः । थुकिइ मन्त्रालयं माःगु ग्वाहालि व समन्वय याइ।” उपप्रधानमन्त्री सिंहं ल्याण्डफिल साइटया स्थानीयतय्सं तःगु माग संबोधन यायेत उकिया विकल्पया बारे सहलह यानाः न्ह्याःवने फइ धयादिल।

थुकिइ खनेदूगु समस्या ज्यंकेत स्वंगुलिं तगिंया सरकार मिले जुयाः न्ह्याःवनेमागुलिं वय्कलं बः बियादिल। उगु सहलह बारे खँ कनादिसें मन्त्रालयया सचिव मणिराम गेलालं स्वनिगःया फोहर व्यवस्थापनया नेतृत्व येँ महानगरपालिकां काइगु न्ह्यथंसें स्थानीयतय्गु जायज माग व्यवस्थापन यायेत थी थी न्वाखँत वःगु धयादिल।

फोहर ल्ह्ययेत मेगु लँ निर्माण, ल्याण्डफिल साइटया जग्गा अधिग्रहणया बारे खँ चकंकेमाःगु, ध्वगिइगु फोहर स्वनिगलय् हे विसर्जन यानाः साः दयेकेगुलिसेंया विषयकय् क्वःछ्यूगु वय्कलं धयादिल। मुँज्याय् प्रधानमन्त्री नापं मन्त्रिपरिषदया ज्याकुथिया सचिव राजकुमार श्रेष्ठ, सङ्घीय मामिला नापं सामान्य प्रशासन मन्त्रालयया भरतमणि सुवेदी, यल महानगरपालिया प्रमुख नापं स्वनिगः मेयरर्स फोरमया नायः चिरीबाबु महर्जन, थी थी नगरपालिकाया प्रमुख नापं प्रशासकीय अधिकृतलिसें ब्वति कयादीगु खः। (रासस)

जिल्लाया यलय् च्वंगु हलिं सम्पदा लागाय् च्वंगु ऐतिहासिक अदालतया भवन पुनः निर्माणया ज्या न्ह्याःगु दु।

सम्पदा लागा दुने लाःगु जीर्ण जुयाच्वंगु उगु अदालत मोहनि सिधयेवं हे पुनःनिर्माणया ज्या न्ह्याःगु खः। पुनःनिर्माण न्ह्याःगु ऐतिहासिक अदालतया भवन विसं १९९० या भुखाय् स्वयां न्ह्यः स्वंगू तला दूगु खः। पुलांगु हे स्वरूपय् भवन दयेकेत नक्शा पास जुइ धुंकूगु स्मारक संरक्षण नापं दरबार स्वइगु ज्याकुथिं धाःगु दु।

भारतीय दूतावासया ग्वाहालिं ज्या न्ह्याःगु ऐतिहासिक अदालत भवनया पुनःनिर्माण पतली भैरव निर्माण व्यवसायी कम्पनीं १८ लाय् क्वचायेकेगु कथं भालाः काःगु कम्पनीया इञ्जिनियर किसन कुटाभारं धयादिल। १८ क्वतिं पुलांगु हे संरचनाय् दयेकेत्यंगु अदालतय् यल लाय्कू सङ्ग्रहालयया ज्याकुथि जुइफइगु लाय्कू सङ्ग्रहालयया प्रमुख सुरेशमान लाखें न धयादीगु दु। वय्कलं थथे धयादिल, “ताःई पियाच्वने धुंकाः जीर्ण जुयाच्वंगु अदालत भवन दयेकेगु ज्या न्ह्याःगु दु।

पुलांगु हे पहलं निर्माण जुइधुंकाः यल लाय्कू लागाया स्वरूप अझ बांलाइगु जूगु दु।” जीर्ण भवन दुने च्वंगु सामान सुरक्षितकथं मेगु थासय् ल्ह्ययेधुंकूगु यलया स्मारक संरक्षण नापं दरबार स्वइगु ज्याकुथिया सूचं अधिकारी पाठकं धयादीगु दु।

वय्कःया कथं ऐतिहासिक अदालत भवनलिसें पाटनदरबार लागाया मेमेगु ऐतिहासिक सम्पदा गुलिं पुनःनिर्माण जुइत्यंगु दु धाःसा गुलिं पुनःनिर्माणया झ्वलय् दु। (रासस)

प्रधानमन्त्री केपी शर्मा ओलीं मेडिकल कलेजय् आवासीय चिकित्सक–स्नातकोत्तर तह (पिजी) या सुविधासम्बन्धी ल्वापु निथ्वःया दथुइ सहलह यानाः ज्यंकेत सम्बन्धित मन्त्रालय व निकाययात निर्देशन बियादीगु दु।

प्रधानमन्त्री निवास बालुवाटारय् थौं जूगु चिकित्सा शिक्षा आयोगया १५ क्वःगु मुँज्याय् आयोगया नायः प्रधानमन्त्री ओलीं निजी व सरकारी निगुलिं ख्यःया सरोकार दूगु पक्षतय्त दुथ्याकाः ज्यंकेत शिक्षा, विज्ञान नापं प्रविधिमन्त्री विद्या भट्टराई, स्वास्थ्य नापं जनसङ्ख्यामन्त्री प्रदीप पौडेल व आयोगया उपाध्यक्ष प्रा डा अञ्जनीकुमार झालिसेंयात थुगु निर्देशन बियादीगु खः।

निजी कलेजया आवासीय चिकित्सकतय्त नं च्यागूगु तहया सरकारी सरह लय् ४८ द्वः सुविधा बिइत अःपुइका ब्यू धकाः स्वास्थ्य नापं जनसङ्ख्या मन्त्रालयया पौया आधारय् थ्व हे मङ्सिर ११ गतेदुने स्वमूल्याङ्कन फाराम भरे यायेत आयोगं सूचं पिकाःगु खः। प्रधानमन्त्री ओलीं आःया इलय् आवासीय चिकित्सकतय्त गुलि सुविधा बिइ फइ उलि न्ह्यथनाः आयोगय् स्वमूल्याङ्कन फाराम छ्वयाहयेत इनाप यासें समझदारी दयेकाः लिच्वः पिकायेबलय् निजी मेडिकल कलेजया घाटा नाफाया नं अध्ययन यायेत धयादिल।

मुँज्याय् एशोसिएसन अफ मेडिकल एण्ड डेन्टल कलेज अफ नेपाःया नायः डा ज्ञानेन्द्रमानसिंह कार्कीं पिजीया विद्यार्थीतय्त सरकारी मेडिकल अधिकृतया तलबकथं निर्वाह भत्ता बिइगु धकाः आयोगं छगूपक्षीय निर्णय यायेमफइगु धासें निकास बिइत प्रधानमन्त्री ओलीयात इनाप यानादीगु खः।

आयोगया न्ह्यानाच्वंगु मुँज्याय् वंगु आर्थिक दँया प्रगति धलः, न्ह्यानाच्वंगु आर्थिक दँया बजेट व ज्याझ्वलय् नीतिगत संशोधन, प्राविधिक नापं व्यावसायिक शिक्षापाखेया मनसुवापौ व सम्बन्धन, स्वामित्व हस्तान्तरण, छात्रवृत्तिलिसेंया ज्याया धलः नं दुथ्याः। (रासस)

नागार्जुन पब्लिकेशन, यल पाखे नेवाःभाय्या थी थी सफू दँय्दँसं पिथना वया च्वंगु खः ।

डा.सर्वोत्तम श्रेष्ठया कुतलं थथे नेवाः सफू पिदना वया च्वंगु दुसाः थुगुसिइ  समान्त श्रेष्ठया मयजुकलःडटकम् , माणिक उराय्या जि म्वानाच्नागु दनि, रामेश्वर जलनया बाखं कि प्याखं व दिब्या बज्राचार्यया चिग्वःगु मल्ता नांयागु प्यंगू बाखं सफूया मंकाः पितब्वज्या याःगु दु।

साहित्यकार प्राज्ञ नेपालभाषा परिषदया ध्रुब मधिकःमिं मूपाहाँ कथं झायादीगु उगु पितब्वज्या ज्याझ्वलय् नेपालभाषाया साहित्यख्यलय् बाखं साहित्यया पलाः बाँलाक्क न्ह्यानाच्वंगु खँया चर्चा जुल। ज्याझ्वलय् पितब्वज्या जूगु सफूया च्वमिपाखें छपू छपू बाखं न्यंकुगु खः। मिसा साहित्यकार मुनाया ग्वसालय् जूगु उगु ज्याझ्वः ग्वसाः खलःया नायः विमलप्रभा बज्राचार्यया सभाध्यक्षताय् जूगु खःसा ग्वसाः खलःपाखें दिव्या ताम्राकारं लसकुस न्वचु तयादीगु खः।

ज्याझ्वलय् नेपाल प्रज्ञा प्रतिष्ठानया प्राज्ञ अगिब बनेपालि, साहित्यकार सुधिर ख्वबिपिन्सं नुगःखँ तयादीगु खः।

सहकारी ठगी लिसे सङ्गठित अपराधसम्बन्धी मुद्दाय् कास्की प्रहरीया हिरासतय् च्वनाच्वम्ह राष्ट्रिय स्वतन्त्र पार्टी (रास्वपा) या सभापति रवि लामिछानेयात मेगु झीन्यान्हु हिरासतय् तयेत जिल्ला अदालत कास्कीं अनुमति ब्यूगु दु।

लामिछानेयात थौ कास्की जिल्ला अदालतय उपस्थित याकूगु खः। जिल्ला अदालतया न्यायाधीश हिमलाल वेल्बासेया इजलासं मेगु झीन्यान्हु हिरासतय् तया राखेर अनुसन्धान यायेत अनुमति ब्यूगु धका अदालतया सूचना अधिकारी सुरज अधिकारीं जानकारी ब्यूगु दु।

थ्व स्वया न्ह्य वंगु कात्तिक २५ गते कास्की जिल्ला अदालतं झीन्यान्ह तक हिरासतय् तयेत अनुमति ब्यूगुलि वंगु शुक्रवाः उगु म्याद क्वचागुलि थां अदालतय् उपस्थित याउगु खः। अनुसन्धानया झ्वलय् प्रहरी हिरासतय् च्वना च्वम्ह पूर्वगृहमन्त्री लामिछाने वंगु कात्तिक २ गते येँ न ज्वना यकूगु खः।