राष्ट्रपति रामचन्द्र पौडेल व सभामुख देवराज घिमिरेदथुइ खँल्हाबल्हा जूगु दु।

राष्ट्रपति भवन शीतल निवासय् थौं जूगु उगु खँल्हाबल्हाया झ्वलय् सभामुख घिमिरें राष्ट्रपति पौडेलयात थः कम्बोडिया भ्रमणय् वनीगु बारे कनादीगु राष्ट्रपतिया सचिवालयं न्ह्यथंगु दु।

सभामुख घिमिरे कम्बोडियाया राजधानी नोमपेन्हय् थ्व हे मङ्सिर ८ निसें ११ गतेतक जुइगु इन्टनेसनल पार्लियामेन्ट फर टोलरेन्स एन्ड पिस (आइपिटिपी) या ११ क्वःगु प्लेनरी सेसनय् ब्वति कायेत अन वनेत्यगु खः।

किपू जःखः केन्द्रविन्दु जूया भुखाय् ब्बःगु दु। म्हिगः बहनि १०ः४५ बजे भुखाय् ब्बःगु दु धका राष्ट्रिय भूकम्प मापन लिसे अनुसन्धान केन्द्रं धाःगु दु।

केन्द्र ब्यूगु जानकारी कथं उगु भुखाय् २.६ म्याग्निच्युड मापन या जुगु धका धाःगु। स्वनिगः दुने तक भुखाय् ब्बःगु महसुस जुगु दु।

नेपाल कम्युनिष्ट पार्टी (एमाले) व चिनियाँ कम्युनिष्ट पार्टीया नेतातय् दथुइ सहलह ब्याःगु दु।

चीनया राजधानी बेईजिङय् बुधबाः बहनी नाप लानाः नेतातय्सं प्रधानमन्त्री केपी शर्मा ओलीं यायेत्यंगु चीन भ्रमणं जःलाखःला देय्त दथुइ दयाच्वंगु स्वापु व मंकाः ज्यायात अझ च्वन्ह्याकीगु भलसा कयाःगु भ्रमण दलया जः एमाले प्रचार विभागया दुजः दीपक ज्ञवालीं न्ह्यथनादिगु दु।

उगु झ्वलय् एमालेया बरिष्ठ उपाध्यक्ष ईश्वर पोखरेलं पार्टी अध्यक्ष नापं प्रधानमन्त्री ओलीया भ्रमणं निगुलिं देय् दथुइया स्वापुयात अझ बल्लाकीगु व लिक्क हइगु भलसा प्वंकादिलगु दु। वय्कलं नेपाः व चीन दथुइ जूगु पुलांगु सम्झौतात छ्यलाबुलाया झ्वलय् ठोस योजना दयेकाः न्ह्यावनेगु व निगुलिं देय्या दथुइया ऐतिहासिक स्वापुयात अझ च्वकाय् थ्यंकेत प्रधानमन्त्री ओलीपाखें जुइगु चीन भ्रमण कोसेढुङ्गा सावित जुइ धइगु बिचाः तयादिगु दु।

चिनियाँ कम्युनिष्ट पार्टीया विदेश विभाग प्रमुख लिउ जियन चाओं प्रधानमन्त्री ओली यानादीत्यंगु चीन भ्रमणं चिनियाँ व नेपाःमितय्सं तःधंगु आश यानाच्वंगु धासें प्रधानमन्त्री ओलीयात लसकुस यायेत चिनियाँ पक्ष आतुर जूगु धयादिगु दु। वय्कलं नेपाः व चीन दथुइ सलंसः दँनिसें दयाच्वंगु ऐतिहासिक स्वापुयात विकास व समृद्धिया दिशाय् आपालं आपाः छ्यलेमाःगु खँय् निगुलिं देय् तय्सं ध्यान बिइ माःगुली बः बियादिगु दु।

चिनियाँ कम्युनिष्ट पार्टीया विदेश विभागया उपमन्त्री सन हाईयानं भिंगु जःला खःला देय् नेपाःया विकास व समृद्धिया पक्षय् माःकथं ग्वाहालि यायेत चिनियाँ पक्ष तयार दूगु खँ न्ह्यथनादिल। चिनियाँ कम्युनिष्ट पार्टी अन्तर्गत विदेश विभागया ब्वनाय् एमालेया वरिष्ठ उपाध्यक्ष पोखरेलया नेतृत्वय् १५ दुजःया प्रतिनिधिमण्डल आः चीन भ्रमणय् दु।(रासस)

पश्चिम नेपालया अन्नपूर्ण लागाय् केन्द्रविन्दू जुया थौं भुखाय् ब्वःगु दु।

राष्ट्रिय भूकम्प मापन तथा अनुसन्धान केन्द्र लैनचौरया कथं सुथय् १०ः१३ ताः इलय् कास्की व मनाङया सिमानाय् लाःगु अन्नपूर्ण लागायात केन्द्रविन्दू दयेकाः प्यंगू दशमवल निगू रेक्टर स्केलया भूखाय् ब्वगु दु धका धाःगु दु।

सिंहदरबारय् मन्त्रिपरिषदया बैठक च्वना च्वंगु दु।

प्रधानमन्त्री लिसे मन्त्रिपरिषदया कार्यालय सिंहदरबारय् छु ई न्ह्यः जक बैठक च्वना च्वंगु दु धका प्रधानमन्त्रीया सचिवालयं धाःगु दु। थौया बैठक नियमित खः।

थ्व स्वया न्ह्य च्वंगु मन्त्रिपरिषद् बैठक कांग्रेस–एमालेया शीर्ष नेतापिनिगु बैठकया कारण लिपागु इलय् दिउगु खः।