लुँया भाः आःतकया हे दकलय् अप्पो थ्यःगु दु। थौं लुँ तोलां निसः थहावःगु दु।

लुँ तोलां निसः थहावना १ लख ४६ हजार ९ सय थ्यंगु दु धका नेपाल सुनचाँदी व्यवसायी महासंघं जानकारी ब्यूगु दु। थौं वहःया भाः नं थहां वंगु दु।

थौं वहः तोलां झीतका थहावःगु दु। वहः तोलां झीतका थहावना १ हजार ८ सय ८५ तका कारोवार दु धका महासंघं जानकारी ब्यूगु दु।

न्हूम्ह प्रधानमन्त्री केपी शर्मा ओलीं पद व गोपनीयताया सपथ काःगु दु। प्रधानमन्त्री ओलीं राष्ट्रपति ज्याकुथि शीतल निवासय् सपथ ग्रहण यानादीगु दु।

वय्कःयात राष्ट्रपति रामचन्द्र पौडेलं शपथ ग्रहण यानादीगु खः। राष्ट्रपति पौडेलं प्रधानमन्त्री पदय् दाबी बुझे यायेगु ई क्वचायेधुंकाः आइतबाः सनिलया ५ बजे लिपा ओलीयात प्रधानमन्त्री नियुक्त याःगु खः।

संविधानया धारा ७६ (२) कथं ओलीयात प्रधानमन्त्री दयेकूगु खः। असार २८ गते प्रतिनिधिसभाय् विश्वासया मत मवयेधुंकाः माओवादी केन्द्रया अध्यक्ष पुष्पकमल दाहाल प्रचण्डयात प्रधानमन्त्री पदपाखे  मुक्त याःगु खः।

उकुन्हु हे राष्ट्रपति पौडेलं प्रधानमन्त्रीयात दाबी लःल्हायेत निन्हुया ई ब्यूगु खःसा एमाले सभापति ओलीं नेपाली कांग्रेस लगायत पार्टीया सांसदपिनिगु समर्थन दुगु धासें दाबी लःल्हाःगु खः।

प्रधानमन्त्री ओलीं थौं हे मन्त्रिपरिषद् विस्तार यायेगु तयारी याःगु दु। शपथ ग्रहण यायेधुंकाः ओलीं थौं सिहदरबारय् वना पदभार ग्रहण याइगु ज्याझ्वः दु।

लोकतान्त्रिक समाजवादी पार्टीपाखें शरतसिंह भण्डारी श्रममन्त्री जुइगु जूगु दु। प्रधानमन्त्री केपी शर्मा ओलीं सपथया नापनापं मन्त्रिपरिषद् गठन यायेगु तयारी याःगु दु।

वय्कः सरकारय् कांग्रेस व एमालेलिसें लोसपा व जसपायात नं दुथ्याकेत तयार दु। भण्डारी लोसपापाखें श्रममन्त्री जुइगु जूगु दु।

जनता समाजवादी पार्टीं प्रदीप यादव व नवल किशोर साह सुदीयात मन्त्री दयेकिइगु जूगु दु।

महासचिव इस्तियाक राईया कथं केपी शर्मा ओलीया नेतृत्वया सरकारय् जसपां निगु मन्त्रालय कायेगु सहमति जूगु खः।

यादवयात खानेपानी मन्त्रीया जिम्मा बिइगु जुगु दु सा नवल किशोर साहया मन्त्रालय क्वचाःगु मदुनि।

प्रचण्ड नेतृत्वया सरकारय् थ्यंमथ्यं च्याला वन लिसे वातावरणमन्त्री जुयादीगु खः।