लुँया भावय् थौ न्हुगु रेकर्ड कायम जूगु दु। लुँ तोलां थौं द्धःछि थहावना आःतक हे दकलय् अप्पो १ लाख २६ हजार रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न थौ न्यातका थहावंगु दु। वहः तोलां न्यातका थहावना १ हजार ४ सय ७५ रुपैयाँ न कारोबार जूगु दु धका महासङ्घं धाःगु दु।

फागुन २९ गते क्वछिना तःगु राष्ट्रिय सभा अध्यक्षया निर्वाचन लिछाय्गु कांग्रेसया प्रस्ताव अस्वीकृत जूगु दु।

आइतवाः सुथय् संसद भवन न्हुगु बानेश्वय् च्वंगु राष्ट्रिय सभाया प्रतिनिधित्व याइपिगिु दलया (सर्वदलीय) बैठकय् राष्ट्रिय सभाय् कांग्रेसया संसदीय दलया नेता कृष्ण सिटौलां छुु दिं अध्यक्षया निर्वाचन लिछाय्गु प्रस्ताव तःगु खः।

मेगु दलपि मानेमवजुइवं थ्व हे वइगु फागुन २९ गते अध्यक्षया निर्वाचन जुइगु जुगु दु।

जनता समाजवादी पार्टी (जसपा)या अध्यक्ष उपेन्द्र यादवं उपप्रधानमन्त्री लिसे स्वास्थ्यमन्त्रीया शपथ ग्रहण याःगु दु।

थ्व नापं हे प्रचण्ड नेतृत्वया वर्तमान सरकारय् प्यम्ह उपप्रधानमन्त्री जुगु दु। थ्व स्वया न्ह्यः मन्त्रिपरिषदय् उपप्रधानमन्त्री लिसे परराष्ट्रमन्त्री नारायणकाजी श्रेष्ठ, उपप्रधानमन्त्री लिसे भौतिक पूर्वाधार नाप यातायातमन्त्री रघुविर महासेठ व उपप्रधानमन्त्री लिसे गृहमन्त्री रवि लामिछानेपि खः।

अथेहे जसपापाखे सरकारय् यादव व नवलकिशोर साह न मन्त्री जुगु दु। साहं वन लिसे वातावरण मन्त्रीया शपथ ग्रहण याःगु खः।

थौ छगु ज्याझ्वः दथुइ राष्ट्रपति रामचन्द्र पौडेलं शितल निवासय् पद व गोपनीयताया शपथ ग्रहण याकूगु खः।

प्रधानमन्त्री पुष्पकमल दाहाल प्रचण्डं जनता समाजवादी पार्टी (जसपा)यात दुथ्याका मन्त्रिपरिषद् विस्तार याइगु जुगु दु। जसपा पार्टी अध्यक्ष उपेन्द्र यादवया नेतृत्वय् सरकारय् वनेत्यःगु खः।

यादवं उपप्रधानमन्त्री नापं स्वास्थ्यमन्त्री जुइत्यःगु खः। अथेहे जसपाया मेम्ह नेता नवलकिशोर साहयात वन लिसे वातावरण मन्त्रालयया जिम्मेवारी बिइगु तयारी दु।

जसपाया दीपक कार्की स्वास्थ्य राज्यमन्त्री जुइगु। थौ हे शपथ ग्रहण याइगु तयारी दु। थ्व स्वया न्ह्यः नेकपा एमाले, माओवादी केन्द्र, राष्ट्रिय स्वतन्त्र पार्टी (रास्वपा) व एकीकृत समाजवादी सरकारय् वने धुकुगु दु।

नागरिक उन्मुक्ति पार्टीया अध्यक्ष रञ्जिता श्रेष्ठ चौधरीं कमलबहादुर शाह नेतृत्वया सरकार त्वःत्येत प्रदेश सभा सदस्यपिन्त निर्देशन बिःगु दु।

पार्टी अध्यक्षयात छु न सहलह मयासे म्हिगः चान्ह्यः सरकारय् छाय् वनागु धका पार्टी अध्यक्ष चौधरीें संसदीय दलया नेता घनश्याम चौधरीयात थौ हे सरकार त्वोत्यत  निर्देशन बिउगु दु। नागरिक उन्मुक्तिया न्ह्यय् म्ह प्रदेश सभा सदस्यमध्ये शुक्रवाः सरकार विस्तार याउगुलि स्वम्ह मन्त्री व छम्ह राज्यमन्त्री जूगु खः।

शुक्रवाः चान्ह्यः मुख्यमन्त्री शाहं उन्मुक्तिया संसदीय दलया नेता घनश्याम चौधरीयात आर्थिक मामिला मन्त्री, खुसीराम चौधरीयात विना विभागीय मन्त्री व ईन्द्रा गिरियात भूमी व्यवस्था कृषि लिसे सहकारी राज्यमन्त्रीइ नियुक्त याःगु खः। उन्मुक्तिपाखे सरकारय् प्यम्ह मन्त्री जुगु खः।

आः नागरिक उन्मुक्तिया संरक्षक रेशमलाल चौधरी व पार्टी अध्यक्ष रञ्जीता दथुइ सरकारय् वनेगु वा मवनेगु धइगु विवाद जुयाच्वंगु दु।