राष्ट्रिय प्रजातन्त्र पार्टी (राप्रपा) या अध्यक्ष राजेन्द्र लिङ्देनं पार्टीया केन्द्रीय कार्यसम्पादन समितिया सदस्य ठाकुरमोहन श्रेष्ठयात आक्रमण जुगु आपराधिक घटना जुगु धका धाःगु दु।

आइतवाः पार्टी कार्यालयय् पार्टीया केन्द्रीय कार्यसम्पादन समिति बैठक न्ह्यानाच्वंगु इलय् ल्याय्म्ह तयेगु छगु पुचलं  श्रेष्ठयात ल्हाः वाःगु खः।

बैठकलिपा सञ्चारकःमित नाप खँ ल्हायेगु झ्वलय् अध्यक्ष लिङ्देनं पार्टी ज्याकूथि दुने पार्टीया पदाधिकारीयात आक्रमण जुगु आपराधिक घटना खः धका धागु दु।

पार्टीं दोषीयात कारबाही यायेमाःगु निर्णय याःगु दु धका धागु दु। शनिवाः निसे न्ह्यागू राप्रपा केन्द्रीय कार्यसम्पादन समितिया बैठक सोमवाः तक च्वनिइ धका जानकारी बिःगु दु।

यल महानगरपालिका वडा नम्बर १० या पूर्व–वडाध्यक्ष नरसिंह व्यञ्जनकार मन्त। व्यञ्जनकारयात नियमित स्वास्थ्य परीक्षणया लागि आइतवाः अस्पतालय् यकूगु खः।

नर्भिकय् थौं न्हिनय् ४ बजेति मदुगु खः। व्यञ्जनकार लगातार झिक्वःतक स्वतन्त्र उम्मेदवारी बिया यल महानगर वडा नम्बर १० य् अध्यक्षय् निर्वाचित जुयादीगु खः। वंगु स्थानीय चुनावय् नेपाली कांग्रेसया उम्मेदवार थः हे काय्चा रविनमान व्यञ्जनकारनाप पराजित जूगु खः।

व्यञ्जनकारं वडाध्यक्षय् २०२९ सालनिसे सुरू याःगु खः।

नेकपा माओवादी केन्द्रं नेता नारायण दाहालयात राष्ट्रियसभा अध्यक्षय् उम्मेदवार दयकिइगु जुगु दु।

आइतवाः च्वंगु पदाधिकारीपिनिगु बैठकं दाहालयात उम्मेदवार दयकेगु निर्णय याःगु दु धका छम्ह नेतां जानकारी बिःगु दु। राष्ट्रियसभा अध्यक्षया लागि निर्वाचन फागुन २९ गते जुइत्यःगु दु।

एमाले, माओवादी केन्द्र व जनता समाजवादी पार्टी दथुइ राष्ट्रियसभा अध्यक्ष माओवादी केन्द्रं कायेगु सहमति जुगु दु। नेपाली कांग्रेसं धाःसा युवराज शर्मायात उम्मेदवार दयकेगु निर्णय याःगु खः।

महिला, बालबालिका लिसे ज्येष्ठ नागरिकमन्त्री भगवती चौधरी अमेरिका भ्रमणय् मवनिइगु जूगु दु।

भ्रमणया लागि वंगु फागुन २४ गते न्हुगु मन्त्रिपरिषदया न्हापागु बैठकं स्वीकृति बिःगु खःसा मन्त्री चौधरीया भ्रमण स्थगित याःगु खः।

सोमवाः व मंगलवाः संयुक्त राष्ट्र संघया ग्वसालय् न्युयोर्कय् जुइगु ‘कमिसन अन दि स्टाटस अफ वुमनझया ६८ क्वःगु सत्रय् ब्बति कायेगु निति मन्त्री चौधरी वनेगु ज्याझ्वः दुगु खः।

प्रधानमन्त्रीं याकन हे विश्वासया मत कायेगु तयारी जुगुलि चौधरीया भ्रमणय् मवंगु खः। मन्त्री मवनेवं उगु ज्याझ्वलय् मन्त्रालयया सचिव सुमनराज अर्यालया नेतृत्वय् न्युयोर्क वःगु दु।

उपप्रधान लिसे स्वास्थ्यमन्त्री उपेन्द्र यादवं स्वास्थ्य सेवायात याउक व दक्कोसिगु पहुँचय् थ्यकेगु हे चुनौती दु धका धयादीगु दु।

थौ आइतवाः पदभार ग्रहण याये धुका यादवं अस्पतालय् परीक्षण वा सर्जरीका लागि अनलाइन वा डिजिटल प्रविधिपाखे छेँ न हे ई कायेगु फइगु व्यवस्था यायेगु निर्णयय् ल्हाःचि तयादीगु खः।