एमाले अध्यक्ष केपी शर्मा ओलीयात थौं प्रधानमन्त्री जुइत्यःगु दु। राष्ट्रपति रामचन्द्र पौडेलं थौं न्हूम्ह प्रधानमन्त्रीइ नियुक्त यायेत्यंगु खः।

प्रतिनिधिसभाय् प्रधानमन्त्री प्रचण्डयात विश्वासया मत मवःगुलिं शुक्रवाः राष्ट्रपति रामचन्द्र पौडेलं दलतय्त न्हूगु सरकार गठन यायेत आह्वान यानादीगु खः।

उकुन्हु हे ओलीं १६६ म्ह सांसदलिसें कांग्रेसया समर्थनय् दाबी पेश याःगु खः।दावी बुझे यायेगु ई थौं सनिलया ५ ता ई तक खः। सोमवाः सपथ ग्रहण यायेगु ज्याझ्वः तयातःगु दु ।

थ्व नाप ओली प्यक्वःगु पटक प्रधानमन्त्री जुइत्यंगु खः। संविधानया धारा ७६ (२) कथं गठन जुइगु सरकारया नेतृत्व वय्कलं यानादीत्यःगु खः।

नेकपा एमालें मन्त्री ल्ययेगु जिम्मा अध्यक्ष केपी शर्मा ओलीयात ब्यूगु दु।बुधवाः च्वंगु सचिवालय बैठकय् ओलीयात मन्त्रीया नितिं मापदण्ड क्वःछिनाः मन्त्री ल्ययेगु जिम्मा ब्यूगु खः।

सचिव पद्मा अर्यालं धाःगु दु, “पार्टी अध्यक्ष स्वयं हे प्रधानमन्त्री जुइत्यंगु दु, गुज्वःगु टिम दयेकेगु धयागु खँ वं अझ अप्वः सीके फइ” धकाः सचिव पद्मा अर्यालं धाःगु दु।

अध्यक्ष ओलीं मन्त्री ल्ययेत मेमेपिं नेतातय्के सुझाव फ्वंगु दु। आःतक नेपाली कांग्रेस लगायतया दललिसे मन्त्रालय व मन्त्रालयया ल्याः क्वचाःगु मदुनि।

सामाजिक सुरक्षा भत्ता कायेत राष्ट्रिय परिचयपत्र अनिवार्य यायेगु निर्णय स्थगित याइगु दु।

थौ आइतवाः च्वंगु मन्त्रिपरिषदया बैठकं प्राकृतिक प्रकोपया हुनिं राष्ट्रिय परिचयपत्र दयेकेगुलि थाकुगुलि थुगु इलय् राष्ट्रिय परिचयपत्र लागू मयायेत गृह मन्त्रालययात निर्देशन ब्यूगु दु। सरकारं थ्व सिबें न्ह्यः राजपत्रय् सुचं पिकासें फुक्क कथंया सार्वजनिक सेवाया नितिं राष्ट्रिय परिचयपत्र अनिवार्य याःगु खः।

उगु सुचं कथं सरकारी स्वामित्वया संस्था, संस्था व निजी क्षेत्रं बियाच्वंगु सार्वजनिक सेवाया सुविधा कायेगु वा माग यायेगु नितिं साउन १ गतेनिसें नेपाली नागरिकता प्रमाणपत्रया पलेसा राष्ट्रिय परिचयपत्र बुझे यायेमाःगु आवश्यक जूगु दु।

राष्ट्रिय परिचयपत्र ड्राइभर लाइसेन्स, कम्पनी दर्ता व नविकरणया निंतिं नं अनिवार्य याःगु खः। ज्येष्ठ नागरिक, अपांगता जूपिन्स राष्ट्रिय परिचयपत्र अनिवार्य यात धाःसा भत्ता मवइगु धासें विरोध जूगु खः।

लुँ तोलां थौ च्यासः थहा वःगु दु। लुँ तोला च्यासः थहावना थौ १ लाख ४४ हजार ९ सय थ्यःगु दु धका नेपाल सुनचाँदी व्यवसाय महासंघं जानकारी ब्यूगु दु।

अथे हे वहः तोला न झीन्यातका थहावंगु दु। वहःतोलां झीन्यतका थहावना १ हजार ८ सय ८५ न कारोवार जुगु दु धका महासंघं जानकारी ब्यूगु दु।

नेपाली कांग्रेसया महामन्त्री विश्वप्रकाश शर्मां नेकपा एमाले अध्यक्ष केपी शर्मा ओलीया नेतृत्वय् गठन जूगु सरकारय् थः मवनेगु धका धयादीगु दु।

मुख्यमन्त्री शर्मां थःगु क्षेत्र झापा–१ य् पार्टी कार्यकर्तापिनिगु बैठकय् थः भविष्यया सरकारय् वने मखु धका धयादीगु दु। वय्कलं निगुलिं तःधंगु दल सरकारय् वनेवं विपक्षी दलया शक्ति कमजोर जुइगु चिन्ता गुलिखे मनूतय्सं याइगु स्वाभाविक खः धयादिल। उगु कार्यकर्ता भेलाय् शर्मां धाःगु दु, “निगू तःधंगु दल एकीकरण जुइवं विपक्षी सः कमजोर जुइगु खँय् बौद्धिक ख्यलय् च्युता कयाच्वंगु दु, विपक्षी सः कमजोर मजुइगुनिति हे जि सरकारय् वने मखु।”

असार १७ गते कांग्रेस व एमाले दथुइ ओलीया नेतृत्वय् सरकार गठन यायेलि सहमति जूगु खः। निगू दल दथुइ मन्त्रालय साझेदारी क्वचाःगु मदुनि । कांग्रेसपाखें सु सु नेतृत्व याइ, सरकारय् वनी धइगु खँय् चर्चा जुयाच्वंगु दु, तर आःतक निर्णय धाःसा जूगु मदुनि ।

शर्मां मेम्ह महामन्त्री गगन थापाया नेतृत्वय् सरकारय् कांग्रेस सहभागी जुइगु उपयुक्त जुइगु धका धयादिगु दु।