कर्णाली प्रदेश सरकारय् दुथ्यापि नेपाली कांग्रेसया स्वम्ह मन्त्रीपिन्स राजीनामा बिःगु दु।

उमिसं थौ मंगलवाः न्हिनय् पत्रकार सम्मेलन यास् राजीनामा बियागु धासे सरकारपाखे पिहावनिइगु धका  जानकारी बिउगु खः। कांग्रेसपाखे अर्थय् बेदराज सिंह, सामाजिक विकासय् खड्गबहादुर पोख्रेल व उद्योग, पर्यटन, वन लिस् वातावरण मन्त्रालयया कृष्णकुमार वीसी मन्त्री जूगु खः।

केन्द्रय् सत्ता समीकरणय् ह्यूपाः वयेवं कर्णालीइ राजीनामा बियागु धका मन्त्रीं धाःगु खः। माओवादीया मुख्यमन्त्री राजकुमार शर्माया बियागु समर्थन न लितकयागु धका उगु पत्रकार सम्मेलनपाखे जानकारी बिउगु खः।

यल महानगरपालिकाया मेयर चिरिबाबु महर्जन व १६ वडाया अध्यक्ष निर्मलरत्न शाक्यया दथुया विवाद सामाजिक सञ्जालपाखें पिदंगु दु। वडा भवन पुनःनिर्माण ख“ल्हाय्त वडाध्यक्ष शाक्यं निन्हु/स्वन्हुया दथुइ तःक्व मछि फोन यातं नं मेयर महर्जनं फोन मल्ह्वनेवं विवाद पिदंगु खः।

फोन मल्ह्वना मेयर महर्जनं थःगु अपमान यागु द्वप बिसें वडाअध्यक्षं थःगु फेसबुक स्टाटस च्वयादीगु र्दु न्ह्यागु इलय् न्ह्यागु नं ज्या दःसां जनता व जनप्रतिनिधिया फोन मल्ह्वना वा फोन ल्ह्वनेमाःगु आवश्यकता वाः मचाय्कीम्ह, अव्यवहारिक अपमान याइम्ह मेयरं थःगु फोन ल्ह्वने मज्यूगु धलखय् तयाः बरु ब्लकया धलखय् तयाब्यूसां ज्यू ।

थथे यात धाःसा जनताया मेयर स्वसः व ख्वीन्हु व्यस्त जुयाच्वंगु दु धकाः धाय्के दइनि ।’ वडा अध्यक्षया थुगु स्टाटसयात कयाः यल महानगर पालिकाया जन प्रतिनिधि व नगर वासिया च्यूता ब्वलंगु दु। थी थी कोणं सामाजिक संजालय् टिका टिप्पणी नं शुरु जूगु दु। खय्तला मेयर महर्जनया फोन मल्ह्वनेगु स्वभावयात कयाः टिकाटिप्पणी जूगु थ्व न्हापांगु खुसिइ धाःसा मखु। मेयर महर्जनया फोन मल्ह्वनेगु बानीयात कयाः नेपाली काँग्रेसया नेता–कार्यकतालिसें पिनेया सर्वसाधारणं नं गुनासो यानावयायाच्वंगु दु। न्ह्याम्हेस्यां न्ह्यागु हे धाःसां नं मेयर महर्जनया फोन मल्ह्वनेगु बानीइ छफुति तकं हे ह्यूपाः वःगु मदु।

सर्वसाधारणं थीथी समस्या, सरोकारया विषयस चिउताः प्वंकाः फोन याइबलय् नं फोन मल्ह्वनीगु मेयर महर्जनया स्वभावं यानाः यक्व हे मनूत आजित जुइधुंकूगु दु। थुगु स्थितिइ वडाअध्यक्ष शाक्यं न्ह्याक्व फोन याःसां नं फोन मल्ह्वनेवं छुं उपाय पिहाँ मवय् धुंकाः बाध्य जुयाः फेसबुक स्टाटस च्वःगु खः। स्टाटस च्वय् स्वयां निन्हु स्वन्हु न्ह्यः मेयर महर्जनं थःगु फोन मल्ह्वंगु खँयात कयाः सचिवालयय् इन्द्र बज्राचार्ययात नं खँ तयादीगु ख ।

अथे नं मेयरं फोन ल्ह्वना मब्यू । फोन मल्ह्वनेगुया पलेसा बरु ब्लक लिस्टय् तःगु जूसां ज्यूगु खः धइगु वडाअध्यक्ष शाक्यं फेसबुक स्टाटसपाखे व्यंग्य नं यानादीगु दु। वडाअध्यक्षया हैसियतं न्हय्दँया दुने फोन यानागु इलय् मेयर महर्जनं मुस्किलं निक्वः÷स्वक्वः बाहेक खास हे फोन ल्ह्वंगु मदु। फोन मल्ह्वने धुंकाः कल ब्याक धकाः छक्वः नं याःगु मदु।

गुगुं ज्याझ्वः, सन्दर्भ विशेषय् छगू हे इलय् १८ क्वःतक फोन याःसां नं मेयर महर्जनं ल्ह्वनामदी। थ्व हे सन्र्दभयात स्वानाः वडाअध्यक्ष शाक्यं जनप्रतिनिधिया फोन मल्ह्वनेगुयात अव्यावहारिक अपमानया रुपय् काःगु खः । वडाअध्यक्षया फेसबुक स्टाटसय् प्रतिक्रिया बिसें श्रीमहर्जनं च्वःगु दुर्, गन तिमिलया जः, गन लाकांया पुतु ताय्कूगु दुइ । शेरबहादुर देउवा प्रधानमन्त्री जूगु इलय् ला फोन मल्ह्वंगु प्रसंग न्यनागु दु सा जाबो ज्या न खँया मनूया फोन छाय् ल्ह्वनी?’ फेसबुकय् आनन्दवीर बज्राचार्यं च्वःगु दुर्, नमूना १६ दय्केगु अवधारणा मेयर साहेबयात मयल जुइ नि’।

फेसबुक स्टाटसयात समर्थन यासें चर्चित पत्रकार प्रशान्त मालाकारं च्वःगु दु, ‘सय प्रतिशत सही । न्ह्याम्हेस्यां न्ह्यागु हे धाःसां छिगु आँट माने याय्माः ।’ थुकथं हे सांस्कृतिक अभियन्ता पृथविन्दु महर्जनं सहीयात सही, गलतयात गलत धाय् फुगु हे जनताया सही जनप्रतिनिधि खः धकाः फेसबुक प्रतिक्रिया बियादीगु दु।

यल महानगरपालिकाबारे सत्तिकं जानकारी तयादीम्ह स्थानीय पत्रकार सुनील महर्जनं वडाअध्यक्ष शाक्यं फेसबुक स्टाटस च्वय्त ल्यःगु ईयात तकं न्ह्यसः थँसें च्वःगु दु –थम्हं अपमान सह यायर्् मफुसेंलि थुम्ह जनप्रतिनिधिं सार्वजनिक रूपय् धाल । अपमान फय् माःपिनिगु पुचलय् थुम्ह जनप्रतिनिधि न्हापांम्ह मखु, न लिपांम्ह हे जुइ । बोर्ड बैठकय् यक्व जनप्रतिनिधिया अपमान यात । कार्यपालिका व नगरसभाय् नं न्हापालिपा थःत ग्वाहालि याना वयाच्वनादीपिं जनप्रतिनिधिया आत्मसम्मानय् लिच्वः लाकल । उबलेफेसबुकय् स्टाटस च्वम्ह जनप्रतिनिधि गन दुगु खः ?’ वडाध्यक्ष नं जनप्रतिनिधि खः ।

थुमिगु नं सम्मान व आत्मसम्मान व मर्यादित व्यवहार जुइमाः । तर जनताया अपमान जुइगु थासय् वडाध्यक्षया मान जक गनं सुरक्षित जुइ ? जनतां अपमान फय्माःगु लकसय् वडाध्यक्षया जक सम्मान सुनिश्चित याय् मफइगु खनि । उकिं जनतायात याःगु अपमान बारे नं वडाध्यक्षं न्ववानादिसँ । न्ववाय् हे माः ।’

नेपाली कांग्रेसया सभापति शेरबहादुर देउवां थौ कार्यसम्पादन समितिया बैठक सःतूगु दु।

बैठक थौ न्हिनय् ३ बजे सभापति देउवा निवास बूढानीलकण्ठय् च्वनिइगु जुगु दु धका कांग्रेस केन्द्रीय कार्यालयया मुख्य सचिव कृष्णप्रसाद पौडेलं जानकारी बिःगु दु। बैठकय् न्हुगुँ सत्ता समीकरणबारे समीक्षा जुइ धका छम्ह नेतां धाःगु दु।

कार्यसम्पादन समितिइ ४६ म्ह जुइगु व्यवस्था दु सा देउवां ३७ म्हेसित जक सःतूगु दु।

न्हुगु सत्ता गठबन्धनय् निगु मू दल नेकपा एमाले व नेकपा माओवादी केन्द्र दथुइ सरकारया नेतृत्व पालंपाः यायेगु सहमति जूगु दु।

उगु सहमति कथं माओवादी केन्द्र व नेकपा एमाले न निदँ निदँ सरकारया नेतृत्व याइगु जुगु दु।

माओवादी केन्द्रया छम्ह नेतां बिगु जानकारी कथं माओवादी केन्द्रया अध्यक्ष नाप वर्तमान प्रधानमन्त्री पुष्पकमल दाहाल प्रचण्डं सुरुइ निदँ सरकार चले याइगु जु सा ल्यः दुगु निदँ एमालेया अध्यक्ष केपी शर्मा ओली प्रधानमन्त्री जुइगु सहमति जुइगु दु।

प्रधानमन्त्री पुष्पकमल दाहाल प्रचण्डं मन्त्रिपरिषद पुनर्गठन याःगु दु। बहालवाला दक्को मन्त्री बर्खास्त याना दक्को मन्त्रालयया जिम्मा थम्हेसिया हे कागु दु।

सोमवाः सुथय् नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी व जनता समाजवादी पार्टी दथुइ सत्ता सहकार्य यायेगु सहमति जुइवं प्रधानमन्त्रीें बहालवाला दक्को मन्त्रीयात बर्खास्त याःगु खः। न्हुगु समीकरणय् दुथ्याःगु दलपिनिगु सहमतिइ प्यम्हेसिगु मन्त्रिपरिषद दयकूगु दु।

नेकपा एमालेया पदम गिरी, थःगु दल नेकपा माओवादी केन्द्रया हितबहादुर तामाङ व राष्ट्रिय स्वतन्त्र पार्टीया डीपी अर्यालयात मन्त्री नियुक्त याःगु दु। स्वम्हं मन्त्रीयात थौ हे राष्ट्रपति रामचन्द्र पौडेलं पद व गोपनीयताया शपथ बिःगु दु। मन्त्रालय धाःसा लिपा जक क्वछिइगु जुगु दु धका राष्ट्रपति कार्यालयं छ्वया हःगु विज्ञप्ति उल्लेख याःगु दु।