जनता समाजवादी पार्टीया नेता तय्स जाति, भाषा, धर्म व संस्कृतिइ जुइगु विभेद आःतक न जुयाच्वंगु दु थुकियात याकन हे क्वचायेकेमाः धका धयादीगु दु।

जनता समाजवादी पार्टी येँ जिल्ला समन्वय समितिया ग्वसालय् थां येँ जुगु नेपाल संवत् ११४५ न्हूदँ, स्वन्ति व छठया लसताय् छगु तुच्चा ज्याझ्वः जुगु अथे धयादीगु खः।

उगु ज्याझ्वलय् जनता समाजवादी पार्टीया अध्यक्ष अशोक राई न आः खँ ल्हायेगु स्वया न ज्या याना क्यनेमाःगु ई खः धका धयादीगु खः। भाषाया आन्दोलन नेपाल संवत्, दक्को नेपाःमि तयेगु संवत खः धका धयादीसे अध्यक्ष राई न नेपाःया लोकतान्त्रिक आन्दोलनय् कायेमाःगु बहुदलीयता आवधिक निर्वाचनया हक व गणतन्त्र वःगु खः। अय्न भाषा आन्दोलन व नेपाल संवतयात स्थापित यायेत अझ न आन्दोलन यायेमाला च्वंगु दु धका धयादीगु खः।

अथेहे पार्टीया सङ्घीय परिषद् अध्यक्ष राजेन्द्र श्रेष्ठं पार्टी न ल्ह्वंगु नेपाल संवत्, राष्ट्रिय संवत लगायत मुद्दाय् छु उपलब्धि जुगु दु सा दक्को पूरा जुगु मदुनि, उकिया निति दक्कोसिया थः थःथु थासं ज्या यायेमाः धका धयादीगु खः।

ज्याझ्वलय् जनता समाजवादी पार्टीया नेता, खानेपानीमन्त्री प्रदीप यादवं स्वनिलय् व मेलम्चीइ च्वपिनिगु सङ्घर्ष नाप चेतावनी ब्यूसा मोहनिया इलय् स्वनिलय् लः हयेत ताः लागु दु धका धयादीगु खः। मन्त्री यादवं थःगु हे कार्यकालय् येँ चौबिसै हे घण्टाय् लः वइगु वातावरण दयका च्वनागु दु धका धयादीगु खः।

उगु ज्याझ्वः जनता समाजवादी पार्टी येँ जिल्लाया अध्यक्ष सृजनमान श्रेष्ठया सभाध्यक्षताय् जुगु खः।

हुम्लाया यइता लागाय् च्वंगु अदानचुली गाउँपालिकापाखें २० न्हु न्ह्यः मचा बुइकूम्ह मिसायात उद्धार याःगु दु। शुक्रबाः नेपाली सेनाया हेलिकोप्टरं वय्कःयात उद्धार याःगु खः।

अदानचुली–५ करगै गांया २० दँ दुम्ह झुपा छत्यालयात बिहीबाः छत्थुँ बेहोस जूगुलिं वासः यायेत श्रीनगर स्वास्थ्य चौकी थ्यंकूगु व अन वासः यायेत सम्भव मजूबलय् हेलिकोप्टरपाखें उद्धार याःगु स्वास्थ्य सेवा ज्याकुथिया प्रमुख डा प्रतीक्षा भारतीं कनादिल।

गामय् च्वंगु स्वास्थ्य चौकीइ मचा बुइकूम्ह छत्यालयात छत्थुँ रक्तस्राव जूबलय् पालिका केन्द्र श्रीनगर स्वास्थ्य चौकीइ यंकूगु व अनं वासः यायेत सम्भव मजूबलय् सम्बन्धित निकायय् खबर बियाः थप वासः यायेत कर्णाली प्रदेश राजधानी वीरेन्द्रनगरया सुर्खेत अस्पतालय् यंकूगु खः।

राष्ट्रपति मिसा उत्थान ज्याझ्वलं हुम्लालिसें कर्णाली प्रदेशया दुर्गम जिल्लाया प्वाथय् दुपिं, मचा बू व्यथां समस्याग्रस्त मिसातय्गु उद्धार यानावयाच्वंगु दु। (रासस) 

ख्वपय् ट्र्याक्टर दुर्घटना जुयाः छम्ह मन्तसा मेपि न्याम्ह घाःपाः जूगु दु।

चाँगुनारायणं ख्वपया डेकोचापाखे वयाच्वंगु ना २ त ९३४० ल्याःया ट्र्याक्टर अनियन्त्रित जुयाः सतकं क्वय् क्वब्वानां ट्र्याक्टरय् च्वनाःवनाच्वंम्ह चाँगुनारायण नगरपालिका–५ य् च्वंम्ह ४५ दँया हरिगोविन्द सुवालया वासः जुइगु झ्वलय् थौं मदुगु जिल्ला प्रहरी ज्याकुथि ख्वपया प्रहरी नायब उपरीक्षक ढुण्डीराज न्यौपानें न्ह्यथादीगु दु।

दुर्घटनाय् ट्याक्टरय् च्वनाःवंपिं चाँगुनारायण–५ या ३५ दँदुम्ह राधिका अवाल, ६० दँ दुम्ह गोपाल कोजु, ४४ दँदुम्ह राधेश्याम सितिखु व ७४ दँदुम्ह पूर्णकेसी शिल्पकारयात ख्वप अस्पतालय् सामान्य वासः यानाः छें लिछ्वये धुंकूगु वय्कलं धयादिल।

दुर्घटनाय् घाःपाः जूम्ह ड्राइभर ख्वप नगरपालिका–२ व्यासी च्वनीम्ह ४८ दँदुम्ह गणेश सुवालया धाःसा ख्वप अस्पतालय् वासः जुयाच्वंगु दु ।(रासस) 

मधेसया मुख्यमन्त्री शतिसकुमार सिंहं नेतृत्व यानादीगु निसः व ५१ दुजःया प्रतिनिधिमण्डल उत्तरप्रदेशया अयोध्याय् च्वंगु श्रीराम देगःया पदाधिकारीतय्त ब्वनापौ लःल्हायेत उखेपाखे वंगु दु।

थ्व हे मङ्सिर २१ गते थन ग्वसाः ग्वःगु जानकी विवाह महोत्सवया सन्दर्भय् नीस्वंगु उगु प्रतिनिधिमण्डलय् विश्वहिन्दूपरिषद् नेपाल, जनकपुरया प्रमुख मजोजकुमार साह, जनकपुर उद्योग वाणिज्य महासङ्घया अध्यक्ष सुरेन्द्र भण्डारी व जानकी मन्दिरया उत्तराधिकारी रामरोशनदास वैष्णवलिसें नागरिक समाजया प्रतिनिधितय्सं दुथ्याः।

प्रतिनिधिमण्डल आइतबाः बहनी अयोध्या थ्यनीगु व उगु देगःया पदाधिकारीतय्त ब्वनापौ लःल्हाइगु परिषदया नायः सन्तोष साहं कनादिगु दु। सोमबाः अयोध्याया राम मन्दिरय् तिलकोत्सवया ग्वसाः ग्वइ। परम्परागत रुपं ग्वसाः ग्वयाः वयाच्वंगु जानकी इहिपा उत्सवय् ब्वति कायेत प्रतीकात्मक रुपं श्रीराम द्यः नापं प्यंम्हं दाजुकिजा व स्वम्ह लानीया निंतिं कापः, तिसा, धौ, धौबजि, मुखां, फलफूल पकवान चाकुमरि देछाःकथं राम मन्दिरया पदाधिकारीतय्त लःल्हाइगु ज्याझ्वः दु। (रासस) 

प्रधानमन्त्री केपी शर्मा ओलीं धर्मया नामय् जुइगु राजनीतियात निषेध यायेमाःगुली बः बियादिइगु दु।

बौद्ध विहार सङ्घ, यलय् थौं अक्षेश्वर महाविहारय् जूगु ४९ क्वःगु वार्षिकोत्सव नापं स्वर्णजयन्ती दँ शुभारम्भ ज्याझ्वलय् वय्कलं धर्म निरपेक्ष झीगु देसय् सकसितं स्वतन्त्रतापूर्वक थःगु आस्थाकथं धर्म हंनेत अधिकार दूगु अथेसां थुकियात राजनीतिकथं काये मफइगु न्ह्यथनादिल। प्रधानमन्त्रीं धार्मिक सहिष्णुता कायम यानाः अहिंसा, शान्ति व छवाः जुयाः धार्मिक अभ्यास यायेमाःगु धासें धयादिल, “बुद्ध धर्म व वय्कःया बिचाःयत राजनीतिया निंतिं दुरुपयोग यायेमज्यू।

बुद्धया दर्शन हे शान्ति, अहिंसा व मानवताका निंतिं खः। छुं नं जीवया हिंसा यायेमज्यू धैगु बुद्धवादया दुस्यः खः। बुद्ध धर्मया शिष्यत हे थ्व धर्मया रक्षकत खः। झीसं बुद्धवादयात ल्याय्म्ह्तय् दथुइ च्वयेकेमाः। उकिया लागि जिं जिगुपाखें फक्वः ज्या याये।’’ न्यादँन्ह्यः भियतनामय् जूगु अन्तर्राष्ट्रिय बौद्ध सम्मेलनय् थःम्हसिनं ब्वति कयागु व अजाःगु सम्मेलन संयुक्त राष्ट्रसङ्घया ग्वसालय् नेपालय् यायेगु खँल्हाबल्हा जूबलय् कोभिड महामारीं असर याःगु न्ह्यथसें प्रधानमन्त्री ओलीं लुम्बिनीइ थःम्हेसिनं न्याद्वःम्ह क्षमता दूगु अन्तर्राष्ट्रिय ध्यान केन्द्र दयेकेबियागु खँ लुमंकादिल।

उगु ज्याझ्वलय् प्रधानमन्त्री ओलीं बुद्धया शिक्षा व दर्शनयात च्वयेकेत व प्रवद्र्धन यायेत योगदान ब्यूगु लोटस रिसर्च सेन्टर व डुण्डबहादुर बज्राचार्ययात हना दिइगु खः। बौद्ध विहार सङ्घ यलया नायः नानीकाजी शाक्यं पुर्खातय्सं दयेकाथकूगु बौद्ध धर्मसम्बन्धी सम्पदां पर्यटन प्रवद्र्धनय् तसकं योगदान ब्यूगु धयादिल।बौद्ध विहार सङ्घ २०३२ साल मङ्सिर १ गते नीस्वंगु खः।(रासस)