सञ्चार व सूचना प्रविधि मन्त्रालयं सरकारया सच्छि न्हुया कार्ययोजना शतप्रतिशत पूवंकूगु दु।

मन्त्रालययात बियातःगु लक्ष्य व जिम्मेवारी पुरा जूगु सरकारया प्रवक्ता जुयादिइम्ह सञ्चार मन्त्री पृथ्वी सुब्बा गुरुङ व सचिव राधिका अर्यालया तदारुकता व कर्मचारीया तसकं च्वन्ह्याःगु कार्यसम्पादन खः धकाः मन्त्रालयया सहसचिव गजेन्द्रकुमार ठाकुरं धाःगु दु।

वय्कलं मन्त्रालययात बियातःगु १५ गू ज्या इलय् हे क्वचाःगु दु धकाः धयादिल । राससया सेवा २४ घौ हे सञ्चालन जूगु, रासस सङ्ग्रहालय चायेकूगु, मैथिली व नेपाल भाषं समाचार सेवा सञ्चालन जूगु नं मन्त्रालयया सच्छि न्हुया कार्ययोजना कथं हे पूवंगु मन्त्रालयया प्रवक्ता ठाकुरं धाःगु खः। अथे हे, मन्त्रालयं सच्छि न्हुया कार्ययोजनाय् गोरखापत्रय् ४३ भाषाय् राना थारु भाषा छगू थप यानाः ४४ भाषं समाचार सम्प्रेषण जूगु, रेडियो नेपालय् दनुवार भाषा थपे यानाः २५ गू मातृभाषं समाचार सेवा सञ्चालन जूगु, हुम्लाय् फाइवर टु द होम(एफटिटिएच) विस्तार जूगु, तालिम सञ्चालन, सुरक्षा अडिट पूवंगु, फिक्सड फाइबर विस्तार, मोबाइल सेवा विस्तार, फोरजी (एलटिइ)छ्यलीपिं २ प्रतिशत थपे यानाः ७२ प्रतिशत जनसङ्ख्याय् विस्तार यायेगु ज्या पूवंगु दु।

प्रवक्ता ठाकुरं सीमित स्रोत साधनय् महत्वपूर्ण ज्या सम्पादन पूवंकेगु चुनौतीपूर्ण जूगु धयादिल। “भौगोलिक चुनौती व सीमित स्रोत साधनपाखें ज्या सम्पादन यायेगु अःपुगु मखु”, वय्कलं धयादिल, “थुकि मन्त्रालय मातहतया कर्मचारी, प्रमुखया कडा परिश्रम व मन्त्री नापं सचिवया प्रोत्साहनं यानाः इलय् हे लक्ष्य पूवंके फूगु खः।” वय्कलं मन्त्रालयं पूवंकूगु ज्या छम्हसिगु मखुसे पुचःया हे सहकार्यया प्रतिफल जूगु धयादिल। आः वइगु त्रैमासिक कार्ययोजना न्हापा स्वयां यक्वः गुणस्तर व प्रभावकारी ढंगं सफल यायेत एकचित्त जुयागु खँ वय्कलं धयादिल।

पूर्वप्रधानमन्त्री डा बाबुराम भट्टराई नेतृत्वया नेपाल समाजवादीपार्टी (नेसपा)या राष्ट्रिय महाधिवेशन थ्व हे वइगु माघ २५ निसें २७ तक येँय् जुइगु दु।

पोखराय् थौं जूगु पार्टीया न्हापांगु विधान अधिवेशनं माघ २५ निसें महाधिवेशन न्ह्याकेगु पार्टी सचिवालयया बैठकं निर्णय याःगु खँ नेसपा गण्डकीया नायः किरण थापां धाःगु दु। अथे हे, अधिवेशनं पार्टीया नां हिलाः नेपाल समाजवादी पार्टी (नयाँ शक्ति) दयेकूगु दु। महाधिवेशनय् फुक्क पार्टी सदस्यपिंसं प्रत्यक्ष भोट कुर्केगु व्यवस्था यानागु दु धकाः थापां धाःगु दु्।

अधिवेशनं पार्टीया केन्द्रीय समितिइ ९९ म्ह दुजः व ११ म्ह दुजःया पदाधिकारी जुइगु व्यवस्था याःगु दु। पदाधिकारीइ छम्ह नायः, न्याम्ह न्वकू (छम्ह मिसा, छम्ह जनजाति, छम्ह मधेसी, छम्ह खसआर्य व छम्ह दलित), छम्ह महासचिव, स्वम्ह सचिव व छम्ह कोषाध्यक्ष जुइ। पार्टीया दक्व तगिंमय् प्रत्यक्ष निर्वाचन प्रणालीपाखें नेतृत्व चयनया व्यवस्था पारित जूगु खँ नायः थापां धाःगु दु।

पार्टीइ युवाया नेतृत्व स्थापित यायेत स्थानीय तहलय् ४०, प्रदेशय् ३० व केन्द्रय् २० प्रतिशतया व्यवस्था यानातःगु दु। अथे हे दक्व समितिइ मिसा पदाधिकारी ३३ प्रतिशत जुइगु व्यवस्था याना तःगु खँ नं नेसपां धाःगु दु। अधिवेशनय् ७१ जिल्ला व विदेशं यानाः जम्मा न्यासःम्ह प्रतिनिधि सहभागी जुइगु दु। अधिवेशन कात्तिक ५ निसें पोखराया सभागृहय् जुइ।अधिवेशनय् पार्टीया सचिवालयया दुजःनापं विधान व घोषणापत्र मस्यौदा समितिया संयोजक डा.जनक शाहं पार्टीया घोषणापत्र व सचिवालयया दुजः नापं अधिवक्ता कृष्ण शर्मां पार्टीया विधान न्ह्यब्वयादिगु खः।

न्ह्यब्वःगु घोषणापत्र व विधानबारे ब्वतिकाःपिं दथुइ पुचः दयेकाः पुचः पुचःया सहलह यानाः पारित जूगु खः।विसं २०७२ असोजय् न्हूगु संविधान दये धुंकाः कजि भट्टराई न तत्कालीन एकीकृत नेकपा माओवादी त्वःताः ‘नयाँशक्ति’ नाम्हं अभियान सञ्चालन यानादिल व धुंकाः नयाँ शक्ति नेपाल पार्टी घोषणा यानादीम्ह भट्टराई न पार्टीया नामय् हिउपाः जुजुं नेपाल समाजवादी पार्टी जूगु खः।

सरकारं थौ १०० दिं दुगु प्रगति विवरण सार्वजनिक याइगु जूगु दु। प्रधानमन्त्री केपी शर्मा ओलीं थौ न्हिनय् ३ बजे प्रधानमन्त्री कार्यालय सिंहदरबारय् प्रगति सार्वजनिक याइगु जूगु दु।

नेकपा एमालेया नेतृत्वय् असार ३० गते न्हुगु सरकार गठन जूगु खः।सच्छि दिंया प्रगति विवरण सार्वजनिक यायेगु न्ह्य सत्तारुढ दलं बैठक च्वंगु खः।

प्रधानमन्त्री निवास बालुवाटारय् सत्तारुढ दल तयेगु बैठक सुरु जूगु दु। प्रधानमन्त्री केपी शर्मा ओलीया इनापय् उगु बैठक च्वंगु खः।

बैठकय् सरकारया सच्छि दिंया समीक्षा, यायेमाःगु कार्ययोजना व समसामयिक राजनीतिक परिस्थितिबारे सहलह यायेगु तयारी दु धका प्रधानमन्त्रीया सचिवालयं धाःगु दु।

उपराष्ट्रपति रामसहायप्रसाद यादव त्रिभुवन विश्वविद्यालय शिक्षण अस्पतालय् भर्ना जुगु दु। हर्नियाया शल्यक्रिया यायेगु निति शाह म्हिगः बहनि भर्ना जुगु खः।

उपराष्ट्रपतिया निजी चिकित्सक डा शिवजीविक्रम सिलवालया कथं शाहयात थौ शल्यक्रिया याइगु जूगु दु। उपराष्ट्रपति यादव ताःईनिसे हर्नियासम्बन्धी समस्यपाखे पीडित जूयाच्वंम्ह खः।

शाहयात शल्यक्रिया प्राध्यापक डा रमेशसिंह भण्डारी व सहप्राध्यापक डा सुमिता प्रधानं याइगु जुगु दु।