न्यतभलु अजिमा (श्वेतकाली) या झिंनिदँ जात्राया झ्वलय् यलया कात्ति दबुलिइ प्याखं हुलाच्वँच्वं हे द्यः गणया प्याखंम्वःया भैरव जुयाः प्याखं हुलादीम्ह रामकाजी महर्जन मंत ।

वंगु विहिवाः अष्टमि कुन्हु यलया कात्ति दबुलिइ न्यतभलु अजिमाया प्याखं हुइकूगु खः । महर्जन हृदयाघात जूया मदुगु खः । वयां तुरुन्त लिपा वय्कःयात अस्पताल यंकूगु खःसा अन वय्कः मदुगु घोषणा जूगु खः । वय्कः ६२ दँ दुम्ह खः ।

मदुम्ह महर्जनया अन्तिम संस्कार म्हीगः यायेधुंकूगु दु । वय्कःया जहान लिसें काय छम्ह व म्ह्याय् प्यम्ह दी । वय्कः गुथिया थाकुलि मध्ये छम्ह खः । कात्ति दबुलिइ वकुन्हु हे प्याखं हुलाच्वंम्ह धर्म महर्जनयात नं तुतिइ ला थहां वनाः अस्पताल भर्ना यायेमाःगु खः ।

व्याघ्रिणी जुयाः प्याखं हुलीम्ह वय्कःया उसाँय् धाःसा आः बांलाना वःगु खँ धाःगु दु ।

महोत्तरी जिल्लाया मटिहानी नगरपालिकाय् च्वंगु मस्जिद मदरसाय् च्वना च्वपि इस्लाम धर्मया धर्म गुरु मोलबीतय्त छगू ज्याझ्वः दथुइ मटिहानी नगरपालिकाया नगर प्रमुख हरि प्रसाद मंडलं कम्बल लःल्हाःगु दु।

तराईलय् ख्वाउगु अप्पोया वयेवं ख्वाउगुलि बचे जुइत मोलबी तय्गु समस्यायात ध्यानय् तया राहत कथं कम्बल वितरण यानागु धका नगर प्रमुख मंडलं धयादीगु खः।

अथेहे ३५ दँ दुम्ह मोलबी तहसीन रेजां थःत कम्बल बिउगुलि नगरपालिकायात सुभाय् बिःगु दु।

झिंप्यक्वःगु नेवाः एकता दिवस नेवाःतय्गु ऐतिहासिक नापं सांस्कृतिक रुपं महत्वपूर्ण जुगु नेवाः वस्ती पनौतिइ याइगु जूगु दु।

तिथि कथं हनीगु नेवाः एकता दिवस थुगुसी पोहेलाथ्व नवःमि माघ ५ गते शुक्रवाः लाःगु दु । काभ्रेपलाञ्चोक जिल्लाया नेवाः वस्ती पनौतिइ थुगुसी नेवाः एकता दिवस यायेगु नितिं शनिवाः पनौतिया खलः पुचःया प्रतिनिधिपिनिगु भेला याना माःगु तयार याःगु दु । नेवाः देय् दबूया संयोजनाय् थीथी राजनीतिक दलया नेवाःतय्गु संगठन नापं नेवाःतय्गु जातीय संस्था व खलः पुचःयात तकं दुथ्याकाः मंकाः कथं नेवाः एकता दिवस हनेगु याना वयाच्वंगु खः।

थुगु दिवसयात नेवाःतय्सं तसकं महत्व बिया वयाच्वंगु खने दु । स्वनिगलं पिने नेवाः एकता दिवस जुइत्यंगु थ्व न्हापांखुसि खः पनौतिइ । पनौतिइ शनिवाः जूगु सहलह मुँज्याय् नेवाः देय् दबू काभ्रे जिल्ला समिति, नेवाः देय् दबू पनौति नगर समिति, हलिं नेवाः गुथि काभ्रे जिल्ला समिति, हलिं नेवाः गुथि पनौति नगर समिति, नवलकचा नवाल समाज, भिन्तुना ग्रप पनौति, तःमुँज्या समिति, कार्यविनायक महिला समूह, महालक्ष्मी महिला समुह, पनौति नेपाल लागायपिं प्रतिनिधिपिं सहभागी जुयादीगु खः।

थुगु दिवसया बारे थुइकेत नापं समन्वय यायेगु नितिं नेवाः देय् दबू स्वनिगः विशेष प्रदेशया नायो श्रीकृष्ण महर्जन वना सहलह ब्याकादीगु खः। स्वनिगलं पिने न्हापांखुसि जुइत्यंगु नेवाः एकता दिवसया थःगु हे कथंया महत्व दुसा थुकियात अझ अप्वः प्रभावकारी यायेगु नितिं नं उगु सहलह मुँज्याय् खँ जूगु खः। थुगुसी झिंप्यक्वःगु नेवाः एकता दिवस पनौतिइ याये खना थःपिं तसकं उत्साहित जुयागु दु धकाः तकं स्थानीय खलः पुचःया प्रतिनिधिपिन्सं धयादीगु खः।

नेवाःतय्सं नेवाःत एकता जूगु नापं नेवाः स्वायत्त राज्य घोषणा जूगु दिंयात लुमंकाः दँय् दसं नेवाः एकता दिवस हना वयाच्वंगु खः। थ्व स्वया न्हापां बलम्बुइ नेवाः एकता दिवस याःगु खःसा थुगुसी पनौतिइ यायेगु नितिं माःगु तयारी यायेगु ज्या जुयाच्वंगु दु।

नेवाःतय्गु हक अधिकारया नितिं सः थ्वयेकेगु अले नेवाः छ छप्पँ जुइगु छगू माध्यमया रुपय् नं नेवाः एकता दिवसयात हना वयाच्वंगु खः । नेवाः एकता दिवसया लसताय् नेवाःतसें थःथःगु लागाय् नं थीथी कथंया ज्याझ्वः याना नेवाः एकता क्यनेगु नापं नेवाः सः थ्वयेकेगु यानाच्वंगु दु।

नेपाःया संविधान व भाषा आयोगया सिफारिस कथं बागमती प्रदेशय् नेपालभाषा व तामाङ भाषायात कामकाजि भाषा कथं लागू यायेत कानुन दयेकूगु लसताय् प्रदेश सांसद नापंं थीथी झिम्ह नेवाः ब्यक्तित्वपिन्त हनापौ लःल्हाःगु दु।

शनिवाः येँया पचिलिइ उगु जूगु ज्याझ्वलय् सांसदपिन्त सुभाय् देछायेगु नापं नेपालभाषाया नितिं थीथी थासं योगदान यानादीपिन्त अथे हनापौ लल्लहाःगु खः । ज्याझ््वलय् जनकवि दुर्गालाल श्रेष्ठ, ख्यालि जुजु मदनकृष्ण श्रेष्ठ, बाग्मती प्रदेशय् नेपालभाषा व तामाङ भाषायात सरकारी कामकाजि भाषा कथं लागू यायेगु नितिं विधेयक हयेकेगु नापं भाषा सम्वन्धि कानुन हयेगु नितिं जनस्तरं योगदान यानादीम्ह नापं पत्रारिकता ख्यलंं योगदान यानादीम्ह श्रीकृष्ण महर्जन, नेवाः पत्रकारिता ख्यलं योगदान यानादीम्ह सुरेश किरण मानन्धर, संविधानसभाषाया दुजः जुया नापं जनयुद्धया इलय् थःगु ज्यानयात तकं ल्हातय् तया भाषाया नितिं योगदान यानादीम्ह रूपा महर्जन, घुव्रभक्त मानन्धर, सुजिता महर्जन, प्रेममान डंगोलयात नं अथे हनापौ लःल्हाःगु खः ।

कृषि लिसे पशुपन्छि विकास मन्त्री डा. राजेन्द्रमान श्रेष्ठ मूपाहां जुयादीगु उगु ज्याझ्वलय् थीथी प्रदेश सांसदपिं नं पाहां कथं झायादीगु खः । मूपाहां मन्त्री श्रेष्ठ, सांसदपिं हरिप्रभा खड्गी, बसन्त मानन्धर, नापं थीथी प्रदेश सांसदपिन्सं न्वंवानादीगु खः ।

उगु हे कथं ज्याझ््वलय् सम्मानीत जुयादीपिंपाखें जनकवि दुर्गालाल श्रेष्ठ, ख्याली जुजु मदनकृष्ण श्रेष्ठ श्रीकृष्ण महर्जनं न्वंवानादीगु खः। बागमती प्रदेशं गुगु कथं भाषा सम्वन्धी कानुन दयेकल आः उगु हे कथं संघ सरकार व स्थानीय सरकारं नं कानून दयेका लागू याना वमेनमाःगु नापं नेपालय् सम्वत सम्वन्धि नं कानून दयेका न्ह्याः वनेमाःगु खँय् बः बियादीगु खः ।

साहित्यकार लिसें पुलांम्ह पत्रकार आर.के. निर्मलं भाय् हिलाः च्वयादीगु मचा उपन्यास ’अजूचायापुगु जादुया भुखाचा’ सार्वजनिक जूगु दु।

साहित्यकार आर.के. निर्मलया न्हापांगु ज्याःजंक्वया लसताय् लहना मिडियाया लुखां उगु उपन्यास सफू पिदंगु खः । वंगु शनिबाः जंक्व भ्वय्या दथुइ हे छगू ज्याझ्वः यासें उपन्यासया लोकार्पण याःगु खः।

नेवाः न्ह्यलुवा मल्ल के. सुन्दर, लहना मिडियाया नायः नृपेन्द्रलाल श्रेष्ठ, व्यवस्थापक सुरेन्द्रभक्त श्रेष्ठ, साहित्यकार आर.के. निर्मल व वय्कःया तिरिमय्जु बिन्दीरा राजोपाध्यायलिसें वय्कःपिनि परिवारं सफूया लोकार्पण यानादिल। सफूया विमोचन धुंकाः न्ववासें नेवाः न्ह्यलुवाः मल्लं भाषा आन्दोलनलिसें पत्रकारिता क्षेत्रय् थः पुलांम्ह सहकर्मी आर. के. निर्मलया उपन्यास सार्वजनिक जूगुलिइ लसता प्वंकादिल। भाषा आन्दोलननिसें जिं इनाप वाःपौ पिथनाच्वनागु इलय् जितः मदिक्क सक्रिय रुपं साथ ब्यूम्ह पासा आर.के. निर्मलया ज्याःजंक्वकुन्हु काय्पिं जानाः पिथंगु थ्व सफू हे वय्कःयात दकले तःधंगु सगं खः। थ्वयां लिपा निर्मलया च्वसा आः गबलें मदीमा, न्ह्यानाः तुं च्वनेमा, जिगु भिन्तुना’ मल्लं धयादिल।

चाब थ्येन ईं च्वयादीगु चाइनिज उपन्यासयात श्यामा बल्लभं अनुवाद यानाः ’जादुकी तुम्बी’ नामं हिन्दी भाषां पिथंगु खःसा व हे हिन्दी भाय्या उपन्यासयात साहित्यकार आर.के निर्मलं नेवाः भाषां हीकाः विश्वभुमि न्हिपौया शुक्रबाःया तँसापतिइ धारावाहिक रुपं पिथनादीगु खः। व हे बाखंयात ’अजूचायापुगु जादुया भुखाचा’ नामं सफूया रुपय् आः पिथंगु खः।

ज्याझ्वलय् लहना मिडियाया व्यवस्थापक सुरेन्द्र भक्तं प्यदँ न्यादँ न्ह्यःनिसें पिथने धाधां लिबानाच्वंगु सफू, च्वमिया हे ज्याःजंक्वकुन्हु पिथनेखंगुलिइ थःपिन्त गौरवया अनुभूति जूगु धयादिल।

लहना मिडियाया नायः नृपेन्द्रलालं पुलांम्ह पत्रकारलिसें साहित्यकार आर.के. निर्मलया जंक्वकुन्हु थःपिन्सं नं छुं यायेखंगुलिइ थःपिन्त भाग्यमानी हे तायेकागु धयादिल। साहित्यकार आर.के. निर्मलया चिधिकःम्ह काय् बिराजकाजी राजोपाध्यायं न्हापा हे तयार जुइधुंकूगु उपन्यास लकडाउन व मेमेगु थीथी हुनिं पिथने मखना च्वंगुलिइ जंक्वया सरप्राइज गिफ्ट कथं पिथनागु जानकारी बियादिल।

थःगु नुगःखँ तयेगु झ्वलय् साहित्यकार निर्मलं विश्वभुमि पत्रिका हे दिनावंबलय् शुक्रबाःया तँसापतिइ पूवनेमफूगु उपन्यासयात आः सफूया रुपं पूर्णता बीखंबलय् थः लय्तायागु धयादिल। ’न्हापा हे पिदनीगु धाःगु सफू उबलय् पिमदन । आः जिगु जंक्वया लसताय् धकाः जिं हे मसीक थ्व सफू थुकथं पिदंबलय् जि धात्थें हे अजू चाल, जिगु लागिं थ्व धात्थें हे सरप्राइज गिफ्ट हे जुल’ साहित्यकार निर्मलं धयादिल ।

सफूया प्रकाशक लहना मिडिया खः। सफूया द्यबः डिजाइन सचिना राजोपाध्यायं याःगु दुसा लेआउट डिजाइन रोशन राजोपाध्यायं यानादीगु दु। सफूया मू न्यासः तका तयातःगु दु। सफू बुकिब याःपिन्त होम डेलिभरीया सुविधा दुगmुलहना मिडियां जानकारी ब्यूगु दु।