सङ्गीतकार सन्तोष श्रेष्ठं निक्वःगु पटक गिनिज बुक अफ वर्ल्ड रेकर्ड तःगु दु। हलिमयय् तजाःगु थासय् प्रत्यक्ष रूपं वाद्यवादनया म्ये हालेगु व म्युजिक भिडियो छायाङ्कन याःगु म्ये ‘तिलिचो ताल...’ पाखे श्रेष्ठं गिनिज बुक अफ वल्र्ड रेकर्ड तया दसिपौ काःगु दु।

‘तिलिचो ताल’ म्ये डा. डिआर उपाध्यायं च्वंगु खःसा, सन्तोष श्रेष्ठं लय् व सागर अधिकारीं सः बिउगु खः। थुगु म्ये मनाङ जिल्लाया तिलिचो ताल स्वया च्वय् ५ हजार १०५ मिटर उचाइलय् प्रत्यक्ष रूपं वाद्यवादननाप म्ये, रेकर्डिङ व छायाङ्कन याःग खः। श्रेष्ठं न्हापागु पटक ५० देशया ५० भाषाय् सङ्गीतबद्ध याना ‘ढुकढुकीभित्र तिम्रो...’ म्येय् गिनिज बुक अफ वर्ल्ड रेकर्डपाखे सम्मान याये धुकुगु खः।

थ्व स्वया न्ह्यः निदँ न्ह्यः सन्चबहादुर राई लगायतया समूह न ४ हजार ८१३ मिटर उचाइललय् रेकर्ड व छायाङ्कन याना खरेल समूहया कीर्तिमान भङ्ग याःगु खः। उगु म्ये २०७९ वैशाख ९ गते ५ हजार १०५ मिटर (१६ हजार ७४८ फिट २ इन्च) उचाइलय् रेकर्डिङ व छायाङ्कन याःगु खः।

ख्वपया नवदुर्गा देवगण न्यालाकेगु जात्रा मङ्गलवाः धुलिख्यलय् क्यःगु दु। नवदुर्गा देवगणया थीथी थासय् क्यनिइगु झ्वलय् धुलिखेलय् क्यःगु दु।

धुलिख्यलय् क्यने धुका नवदुर्गा श्रीखण्डपुर व चौकोटय् क्यनिइगु जुगु दु। नवदुर्गा द्यः धुनिख्यलय् च्वपिन्स थःपिनिगु कुल द्यः कथं न कयातःगु दु।

राष्ट्रपति रामचन्द्र पौडेलं स्वयम्भू महाचैत्यय् वाफय् वयाः पुइका यंकूगु गजू छुनाः प्राण प्रतिष्ठा यायेगु ज्या यानादीगु खः।

स्वयम्भू व्यवस्थापन तथा संरक्षण महासमितिया ग्वसालय् जूगु छगू धार्मिक ज्याझ्वःया दथुइ प्राण प्रतिष्ठा जूगु खः। स्वयम्भू महाचैत्यय् वंगु २०७९ फागुन ३० गते वाफय् वयाः चैत्यय् क्षति जूगु खः।

लिपा ५० लाख तका खर्च यानाः जीर्णोद्धार याःगु खः। पुरातत्व विभाग, येँ मनपा, जिल्ला प्रशासन कार्यालय व गुथि संस्थानया प्राविधिक पुचलं विस्तृत अध्ययन यायेधुंकाः जीर्णोद्धार ज्या न्ह्याकूगु खः।

उगु ज्याझ्वलय् भिक्षु धर्ममूर्ति महास्थविरं स्वयम्भू क्षेत्रय् जुयाच्वंगु थीथी ज्याबारे कनाबिज्याःगु खःसा राष्ट्रपति पौडेलं थीथी व्यक्तिपिंत हनापौ लःल्हानादीगु खः।

प्रधानमन्त्री पुष्पकमल दाहाल प्रचण्डं मन्त्रिपरिषदय् दलिततय्गु प्रतिनिधित्व याकेगु प्रतिबद्धता याकेगु दु धका धयादीगु दु।

मंगलवाः प्रतिनिधि सभाया बैठकय् प्रधानमन्त्रीनाप न्ह्यसः लिसः ज्याझ्वलय् ब्बति कायेगु झ्वलय् नेकपा एमालेया सांसद छविलाल विश्वकर्मां मन्त्रिपरिषद् छाय् समावेशी मयानागु खः धका न्ह्यसः तःगु खः।

उकिया लिसः बिइगु झ्वलय् प्रधानमन्त्री प्रचण्डं धाःगु दु, ‘आः जिमिगु क्याबिनेटय् दलितपिनिगु प्रतिनिधित्व जुइगुलि जिं प्रष्ट याये चाहे जु।’ संविधानतः संघीय सरकारय् २५ म्ह मन्त्री जुइफइ।

आःतक २१ गु मन्त्रालयय् दु। आः २२ सदस्यीय मन्त्रिपरिषदय् स्वम्ह राज्यमन्त्री नियुक्त यायेफइ।

प्रधानमन्त्री पुष्पकमल दाहालं संघीयता कार्यान्वयन यायेत माःगु ऐन दय्केगु ज्यायात सरकारं तधःगु प्राथमिकताय् तयातइगु दु धका धयादीगु दु।

संघीयता कार्यान्वयन सरकारको उच्च प्राथमिकताय् दु धका प्रधानमन्त्रीं प्रतिनिधिसभाय् मंगलवाः च्वंगु बैठकय् सांसद जनार्दन शर्मां न्यःगु न्ह्यसःया लिसलय् धयादीगु खः।

वयकलं सरकारं संघीयता कार्यान्वयनयात प्राथमिकताय् तया न्ह्यावनाच्वंगु दु। राष्ट्रियसभाया विधायन समिति व संघीयता कार्यान्वयन अध्ययन लिसे अनुगमन संसदीय विशेष समितिं बिगु सुझाव कार्यान्वयन यायेगु विषय सरकारं तधःगु प्राथमिकताय् तयातइगु दु धका धयादीगु खः।

निजामती कर्मचारीनाप सम्बन्धित ऐनलगायत गुलि न ऐन मस्यौदा तयार जुया सम्मानित सदनय् दुहावने धुकुगु दु सा गुलि मस्यौदा चरणय् थ्यने धुकुगु दु। अथेहे नेपाल प्रहरीया सञ्चालन व व्यवस्थापनयात ई कथं न्ह्याकेगु व प्रहरी समायोजनयात व्यवस्थित यायेत नेपाल प्रहरी ऐन, २०१२ यात प्रतिस्थापन यायेगु विधेयक, प्रहरी समायोजन ऐन, २०७६ यात संशोधन यायेगु विधेयक व नेपाल प्रहरी व प्रदेश प्रहरी (कार्यसञ्चालन, सुपरीवेक्षण व समन्वय) ऐन, २०७६ यात संशोधन यायेगु विधेयक संसदं थुगु हे अधिवेशनय् पेश यायेगु तयार दु।

प्रधानमन्त्रीं सदनपाखे कानुन पारित जुइवं प्रहरी समायोजनया ज्या याकन हे न्ह्याइगु कथं समायोजनया तयारी यायेगु ज्या जुयाच्वंगु दु धका धयादीगु खः।