थौ बौद्ध युवा कमिटी यलपाखे गृहमन्त्री रमेश लेखकयात नेपाल संघमहानायक भिक्षु गुणघोष महास्थविरयात दाउगु बिषययात कया ध्यानाकर्षण याःगु दु।

गृहमन्त्री रमेश लेखक घटनायात थुइकेगु निति नेपाल प्रहरीयात निर्देशन बिउगु दु।

बुद्धजन्मभूमी नेपालय् बुद्धधर्मया विकासय् समर्पित भिक्षुयात आक्रमण जुगु तसक दुःखदायी घटना खः धका धयादीसे गृहमन्त्री लेखकं प्रहरी महानिरीक्षक वसन्त कुँवरयात याकन हे फोन याना घटनाया बिफ्रिङ यायेत निर्देशन बियादीगु दु।

उगु ज्याझ्वलय् कमिटीया उपाध्यक्ष सुर्दशन शाक्यं वाचन याना न्यकादीगु खःसा ज्ञापन पौ कमिटीया अध्यक्ष सतिश शाक्यं गृहमन्त्री लेखकयात लःल्हागु खः।

बुद्ध विहारया प्रमुख भिक्षु कौण्डन्य लगायत विविध बौद्ध संघसंस्थाया प्रतिनिधिपिनिगु  उपस्थिति उगु ज्ञापन पौ लःल्हागु खः।

राष्ट्रिय सभाया दुजः डा. अन्जान शाक्यं बौद्ध भिक्षु गुणघोष महास्थवीरयात जूगु आक्रमणयात कया थौ राष्ट्रिय सभाय् सः तयादीगु दु।

वयकलं दोषीपिन्त कडा कारवाही यायेत सरकारयात माग यानादीगु दु।

राष्ट्रिय सभाया दुजः डा. शाक्यं बौद्ध भिक्षु गुणघोष महास्थवीरयात सुनियोजित रुपं आक्रमण यानाः लुटपाट याःगु धासें थुगु आक्रमणयात कूकर्मया क्रूर रुप खः धासें आक्रमण याःपिन्त क्रूर अपराधीया संज्ञा बियादीगु दु।

डा. शाक्यं बौद्ध भिक्षु भन्तेपिनिगु सुरक्षाया माग यासें बौद्ध विहारय् नं सरकारपाखें सुरक्षाया व्यवस्था यायेमाःगु माग यासें घाःपाः जुयाः बिज्याःम्ह भन्ते गुणघोष महास्थवीरया स्वास्थ्यलाभया कामना नं यानादीगु दु।

सरकारं मुख्यसचिवय् एकनारायण अर्यालयात नियुक्त यागु दु। थौ बिहीवाः च्वंगु मन्त्रिपरिषद् बैठकं सचिव अर्यालयात मुख्य सचिव दयकेगु निर्णय याःगु खः।

आःयाम्ह मुख्य सचिव लीलादेवी गड्तौलां ५८ दँया कारण कन्ह्यनिसे अवकाश काइगु जुगु दु। गड्तौला साउन १० गते मुख्यसचिवय् नियुक्त जूगु खः।

कन्ह्यः शुक्रवाः न्हुम्ह मुख्यसचिव अर्यालयात पद हस्तान्तरण याना सिंहदरबारं बिदा काइगु जुगु दु। अर्याल निदँ स्वया अप्पो मुख्यसचिव जुइ।

प्रधानमन्त्री केपी शर्मा ओलीं आधुुनिक, प्राविधिक व गुणस्तरीय शिक्षाया लक्ष्य निर्धारण याना शिक्षा बिइत मध्यपश्चिम विश्वविद्यालययात इनाप यानादीगु दु।

प्रधानमन्त्री निवास बालुवाटारय् जुगु ज्याझ्वलय् विश्वविद्यालयय् १५ क्वःगु सभाय् कुलपति ओलीं देशय् शैक्षिक उन्नयनय् माःगु योगदान बिइगु कथं ज्या यायेत इनाप यानादीगु खः।

प्रधानमन्त्री ओलीें नेपाःया राज्य प्रणालीया जग इतिहासनाप स्वागु कर्णाली प्रदेशयात न्हुगु जागरण बिइगु कथं थुगु विश्वविद्यालयं ज्या यायेमाः धका बः बियादीसे सरकारया दक्को ध्यान देय् सकारात्मक रुपान्तरण व विकास यायेगु धका स्पष्ट यानादीगु खः।

सभाय् न्ह्यब्बगु नीति, कार्यक्रम व बजेटलगायतया कार्यसूची सम्बन्धी प्रस्तावय् सहलहय् शिक्षा, विज्ञान लिसे प्रविधिमन्त्री नाप सहकुलपति विद्या भट्टराईया सभाध्यक्षताय् जुगु खः।

विश्वविद्यालयया उपकुुलपति प्रा डा ध्रुवकुुमार गौतमं १३१ शिक्षकया दरबन्दी स्वीकृतिया निति इनाप यानादीगु खः।

प्रधानमन्त्री केपी शर्मा ओलीं ‘समृद्ध नेपाल, सुखी नेपाली’ या राष्ट्रिय आकाक्षाय् ग्वहालि यायेगु कथं अनुसन्धान याना नीतिगत सुझाव बिइत नीति अनुसन्धान प्रतिष्ठानया पदाधिकारी तयेत इनाप याःगु दु।

प्रधानमन्त्री लिसे मन्त्रिपरिषदया कार्यालय, सिंहदरबारय् जुगु प्रतिष्ठानया पदाधिारीपि नाप जुगु सहलहय् प्रधानमन्त्री ओलीं सरकारया लक्ष्य व विकास नाप स्वागु मन्त्रालय व विश्वविद्यालय नाप संयोजन याना अनुसन्धान जुइ मागुलि बः बियादीसे प्रमाणया आधारय् जक नीति तर्जुमा यायेमाः धका धयादीगु खः।

अनुसन्धान प्रतिष्ठान थः याकचा जक ज्या याना लिच्वः वइ मखु व देशय् माःगु सम्बोधन जुइ मखुलि अनुसन्धान व उच्चतम् प्रविधिया नाप देशया विकास यायेत सरकारया प्राथमिकता दु धका धयादीगु खः।

प्रतिष्ठानया कार्यकारी अध्यक्ष डा लेखनाथ शर्मा न थीथी मन्त्रालयया समन्वयय् आःतक ५० गु अनुसन्धान याये धुकुगु जानकारी बियादीगु खः। प्रधानमन्त्री ओलीं न्हापागु कार्यकालय् उगु प्रतिष्ठानया स्थापना यानादीगु खः।