ओमानया विदेशमन्त्री सैयद बदर बिन हमद अल बुसैदी थौ नेपाः वइगु जुगु दु।

विदेशमन्त्री बुसैदी परराष्ट्रमन्त्री आरजु देउवा राणाया ब्बनाय् निन्हुया निति थौ येँ थ्यकः वइगु जुगु दु।निगु देय् दथुइ च्वपि विदेशमन्त्री दथुइ निगु देय् या हितबारे सहलह जुइ धका परराष्ट्र मन्त्रालयं धाःगु दु।

नेपालय् च्वनिइगु झ्वलय् वयकलं राष्ट्रपति व प्रधानमन्त्रीयात नापलाइगु ज्याझ्वः दु।

प्रधानमन्त्री केपी शर्मा ओलीं बुद्धया दर्शन व सन्देशयात शिक्षाया माध्यमं विस्तार यायेमाः धका बःबियादीगु दु।

लुम्बिनी बौद्ध विश्वविद्यालयया १६ क्वःगु सभाया बैठकय् कुलपति ओलीं विश्व मानव जातिया लागि ऐतिहासिक योगदान बियादीम्ह बुद्ध दर्शनया रक्षा व विस्तार यायेत न्हुगु बिचाः कथं चायकूगु थुगु विश्वविद्यालयं महत्त्वपूर्ण भूमिका म्हित्येमाः धका धयादीगु खः।

वयकल नेपालीया चेतना, गौरव व इतिहासनाप थुगु विश्वविद्यालय स्वागुलि बुद्धं स्यना थकुगु सकारात्मक व मैत्रीचेत आः न उलि हे सामयिक दु धका धयादीगु दु। “बुद्ध दर्शनया अनुयायी व भिक्षु जुइत वसः फिना जक जुइ मखु। थुकिया लागि ज्ञां व मन माः।“ प्रधानमन्त्री ओलीं धयादीगु दु, “झिस बौद्ध दर्शनया शिक्षा सुरु याये धुनगु दु।

झीसं जीवनयात माःगु गुणस्तरीय शिक्षा बिइमाः। दृढ़ अठोट व निरन्तर कुतः झीसं विकास हासिल यायेफयके माः व अले जक ताः लाइ।“ शिक्षा, विज्ञान लिसे प्रविधि मन्त्री विद्या भट्टराईया ब्बति दुगु उगु बैठकं वइगु मंसिरय् स्वक्वःगु दीक्षान्तया निति २८५ विद्यार्थी तय्त ग्रेस लिष्टया नापं थुगु आर्थिक दँया नीति, कार्यक्रम व बजेट पारित याःगु दु।

प्रधानमन्त्री केपी शर्मा ओलीं राजस्व अनुसन्धान विभाग, सम्पत्ति शुद्धिकरण विभाग, सार्वजनिक खरिद अनुगमन कार्यालय, राष्ट्रिय सतर्कता केन्द्र, राष्ट्रिय अनुसन्धान विभाग, नेपाल ट्रष्टलगायत कार्यालययात तस्करी, भ्रष्टाचार व राज्यया सम्पतिइ दुरुपयोग नियन्त्रण यायेगुलि प्रभावकारी कथं ज्यायायेत निर्देशन बिउगु दु।

प्रधानमन्त्री लिसे मन्त्रिपरिषदया कार्यालय, सिंहदरबारय् थौ जूगु दँमुज्या समीक्षा व मन्त्रालय स्तरीय विकास समस्या समाधान समितिया बैठकय् प्रधानमन्त्री ओलीं वंगु इलय् त्रिभुवन अन्तर्राष्ट्रिय विमानस्थलय् ३३ किलोतक लुँ तस्कारी जूगु घटनायात लुमकादीसे सम्बन्धित निकाय जिम्मेवार मजुया राज्यं तधःगु राजस्व गुमे यायेमाःगु व बेथिति पिहावःगु धका धयादीगु दु। “आः थज्यागु गतिविधि सहयाये फइ मखु, तस्करी जुयाच्वनिइगु सम्भव मदु। छिकपिन्स सूना छु जिम्मेवारी कयागु दु, व पूरा यायेत दुनुगलनिसे ज्या यानादीस। कार्यक्षेत्र निर्धारणय् समस्या दु सा हयादीस।

देय् बर्बाद जुइपाखे जोगे यायेमाःगु दु। जनताया भलसा बिइगु ज्यायानादीस।’’, प्रधानमन्त्री ओलीं कडा शब्दं धयादीगु दु, “थःगु प्रभावकारी औचित्य स्थापित याये मफुगु खःसा जागिर नय्त जक राज्यया निकाय तया तयेमागु धइ मदु।’’ वयकलं अझ बालाक्क ज्या यायेमाः धका हे उगु निकाययात प्रधानमन्त्री लिसे मन्त्रिपरिषदया कार्यालयया मातहतय् हयागु धका स्पष्ट यानादीगु खः।

सेयर बजारय् थौ आइतवाः शेयरया भाः तसक कुहावःगु दु। नेप्से परिसूचक ७९.८८ ल्याखं कुहावया २८९४ ल्याखय् थ्यःगु दु।

अथेहे थौ १९ अर्ब ७४ करोड तकाया कारोबार जूगु दु। ६० गु कम्पनीया भाः थहावःगु दु सा १८४ गु कम्पनीया भाः कुहावःगु दु। अथेहे माइक्रोफाइनान्स बाहेकया दक्को समूहगत सूचक कुहावःगु दु। माइक्रोफाइनान्स धाःसा १.०८ प्रतिशत थहावःगु दु।

बैंकिङ ३.३१, विकास बैंक २.४४, फाइनान्स ३.५०, होटल नाप पर्यटन २.३८, हाइड्रोपावर ३.०४, लगानी ३.८३, जीवन बीमा २.५०, उत्पादन १.९८, निर्जीवन बीमा २.३२, मेमेगु ३.५५ व व्यापार समूह १.७६ प्रतिशतं कुहावःगु दु। समग्र बजाः कुहावःसा स्वंगु लघुवित्त कम्पनीया भाः १० प्रतिशतं थहावंगु दु। विन नेपाल, उपकार, आत्मनिर्भर लघुवित्तया भाः १० प्रतिशतं कुहावःगु दु।

थ्रीस्टार हाइड्रोपावरया ९.९, धौलागिरि लघुवित्तया ८.१, गुराँस लघुवित्तया ७.२, कर्पोरेट डेभलपमेन्ट बैंकया ६.९, सप्तकोशी विकास बैंकया ६.९ व समाज लघुवित्तया भाः ६.८ प्रतिशतं थहावंगु दु। मन्दाकिनी हाइड्रोपावरया भाः दकलय् अप्पो ९.९ प्रतिशत कुहवःगु दु सा कुथेली बुकरी स्मल हाइड्रोपावरया ७.९, मेन्छियाम हाइड्रोपावरयो ७, सेन्ट्रल फाइनान्सया ७, साइन रेसुङ्गा विकास बैंकया ६.७ प्रतिशतं कुहावःगु दु।

कारोबार जूगुलि अपी पावर, हिमालयन रिइन्स्योरेन्स, साइन रेसुङ्गा विकास बैंक, अरुणभ्याली हाइड्रोपावर व शिवम् सिमेन्ट न्ह्यने लागु दु।

येँ महानगरया प्रहरीं लँ सिथय् चिया मियाच्वम्ह छम्ह मनूयात लछारपछार याःगु भिडियो सार्वजनिक जूगु दु। उगु भिडियो सामाजिक सन्जालय् भाइरल जूगु दु।

उगु भिडियाय् बागु दर्जन स्वया अप्पो नगर प्रहरीपि मिले जूया छम्ह मनूयात जबरजस्ती भ्यानय् कोचे यायेत स्वंगु खनेदु। उम्ह मनूखं ‘ऐया ! ऐया !!’ धया हागु सः ताय् दु।

सामाजिक सन्जाल प्रयोगकतातय्स उगु भिडियो बाँसबारीइ गंगालाल मुटु रोग अस्पताल न्ह्यने सतकय् नगर प्रहरीं छम्ह मनूयात चिया मियाच्वम्हेसि लछारपछार याउगु खः। थौकन्ह्यः सतक व बजार व्यवस्थित यायेगु धका येँ महानगरपालिकाया नगर प्रहरीतय्से फुटपाथय् च्वना व्यापार यानाच्वपिन्त अमानवीय व्यवहार यायेगु थ्व स्वया न्ह्यन न यक्को घटना सार्वजनिक जुयाच्वंगु दु।

थव्यागु हे घटना साइकलय् अँ मियाच्वम्ह मधेशी मूलया मनू, लँ सिथय् कःनिइ मियाच्वम्ह मिसा, थापाथलीइ चिया मिया च्वम्ह मिसायात अमानवीय ढंगं लुटय् याना यकूगु भिडियो न सार्वजनिक जुइ धुकुगु दु।

थुगु घटनालिपा नगर प्रमुख बालेन साहविरुद्ध विरोध प्रदर्शन तक यायेगु ज्या जुगु दु।