नित्या रञ्जना युनिकोड फन्ट सार्वजनिक जुगु दु। म्हिगः शनिवाः नेपाल कला परिषदय् छगु ज्याझ्वः दथुइ येँ महानगरपालिकाया उपमेयर सुनिता डंगोलं नित्या रञ्जना युनिकोड फण्ट पितब्बज्या यानादीगु खः।

थौया इलय् डिजिटल युगय् लिपीया संरक्षण व प्रवर्द्धन यायेगु कथं डिजिटल मार्केटय् दुहावने माःगुलि क्यालिजात्रा फाउण्डेशन व भारतया प्रतिष्ठित फन्ट डिजाइन कम्पनी छगु टाइपया सहकार्यय् रञ्जना युनिकोड फन्ट विकास यानागु खः धका क्यालिजात्रा फाउन्डेसनया अध्यक्ष आनन्द कुमार महर्जनं धयादीगु खः।

महर्जनया कथं थुगु रञ्जना युनिकोड फन्ट हलियकं निःशुल्क कथं छ्यलेफइगु व देवनागरी युनिकोडया नापं नेवाः युनिकोडय् न उपलब्ध यायेफइ धका धयादीगु दु।

उगु ज्याझ्वलय् रञ्जना लिपीबारे स्वर वर्ण, व्यञ्जन वर्ण व ल्याः गुकथं च्वयेगु धका रञ्जना लिपीइ टाइप याना न क्यःगु खः। नापं आर्ट काउन्सिलय् रञ्जना फन्टं च्वयातःगु आखःया ब्बज्या न जूगु खः।

लुँ तस्करी प्रकरणय् पूर्वउपराष्ट्रपति नन्दबहादुर पुनया काय् दीपेश पुनयात ज्वःगु दु।

प्रहरी प्रधान कार्यालय, नक्सालं खटे जुयावंगु टोलीं सत्तारुढ माओवादी केन्द्रया विद्यार्थी संगठन अनेरास्ववियु क्रान्तिकारीया महासचिव पुनयात ज्वःगु खः। वःगु साउन २ गते बरामद ६० किलो लुँ तस्करी प्रकरणया मुख्य आरोपी दावा छिरिङनाप पुनया सम्बन्ध खने दुगुलि छानबिनया दायराय् हःगु खः।

लुँ सम्बन्धी जाँच आयोगं बिहीवाः लःल्हागु प्रतिवेदनय् पुनविरुद्ध अनुसन्धान मयासे सीआईबी न बालाक्क ज्या मयागु धका निष्कर्ष पिकागु खः।

सरकारं लुँ अवैध तस्करी नियन्त्रणसम्बन्धी जाँचबुझ आयोगया प्रतिवेदन अध्ययन याना तत्काल कार्यान्वयनया ज्या न्ह्याकेगु निर्णय याःगु दु।

थौ शुक्रवाः च्वंगु मन्त्रिपरिषद् बैठकया प्रतिवेदन कार्यान्वय यायेगु निर्णय जुगु दु धका सञ्चार सूचना लिसे प्रविधि मन्त्री रेखा शर्मां जानकारी बिःगु दु।

“लुँ अवैध पैठारी (तस्करी) नियन्त्रण सम्बन्धी जाँचबुझ आयोग, २०८० न २०८० चैत १ गते माननीय उपप्रधानमन्त्री लिसे गृहमन्त्रीयात लःल्हागु प्रतिवेदनयात गम्भीर अध्ययन याना तत्काल कार्यान्वयनयाना यकेगु,” निर्णय जुगु धका धयादीगु दु।

पूर्वन्यायाधीश डिल्लिराज आचार्यया नेतृत्वय् आयोगं म्हिगः बिहीवाः प्रतिवेदन लःल्हागु खः।

सरकारं नेपाल प्रहरीया एआईजी श्याम ज्ञवाली व सीआईबी प्रमुख किरण बज्राचार्यया जिम्मेवारी हुलाबुला याःगु दु।

थौ च्वंगु मन्त्रिपरिषद् बैठकं ज्ञवालीयात सिआईबीया प्रमुख व बज्राचाययात कार्यविभाग प्रमुखय् सरुवा याःगु दु धका सञ्चारमन्त्री रेखा शर्मां जानकारी बिःगु दु।

शेयर बजाः थौ निगु ल्याखं कुहावःगु दु। शेयर बजाः परिसूचक नेप्से थौ २७ दशमलव ८४ अङ्कं कुहावया २ हजार ८० दशमलव ८७ विन्दुइ कुहावःगु दु।

थौ दक्को समूहया शेयर कुहावसा बीमा समूह, माइक्रोफाइनान्स, उत्पादन लिसे प्रशोधन, विकास बैंक, होटल नाप पर्यटन समूहया शेयर यक्को कुहावःगु दु।

निगु ल्याखं कुहावःगु बजाः वगुलि स्वाभिमान लघुवित्त कम्पनीया शेयर ६ प्रतिशतं कुहावःगु दु। समग्र बजाः कुहावःगु दिं वीन नेपाल लघुवित्त व मानुषी लघुवित्त कम्पनीया शेयर १० प्रतिशतं थहावया सकारात्मक सर्किटय् वःगु दु।

थौ १ करोड १४ लाख कित्ता शेयर ३ अर्ब ९४ करोड ३५ लाख रुपैयाँया शेयर कारोबार जूगु दु। दकलय् अप्पो अपर तामाकोशी हाइड्रोपावर कम्पनीया ५० करोड ८९ लाख रुपैयाँया शेयर कारोवार जूगु दु।