नागरिक उन्मुक्ति पार्टी (नाउपा) या अध्यक्ष रञ्जिता श्रेष्ठं सःतूगु केन्द्रीय कार्यसमितिया बैठक स्थगित जुगु दु। सुदूरपश्चिम प्रदेश सरकारय् ब्बति काउगु विषय असन्तुष्टि जुइवं श्रेष्ठं सोमवाः न्हिनय् १ बजे कैलालीया टीकापुरय् केन्द्रीय कार्यसमिति बैठक सःतूगु खः।

तर स्वास्थ्यय् समस्या वउगुलि मेगु सूचं मवतले बैठक स्थगित जूगु दु धका छम्ह केन्द्रीय सदस्य जानकारी बिःगु दु। ५३ म्ह सदस्यीय प्रदेशसभाय् मुख्यमन्त्रीया दल कांग्रेसया १८ व नााउपाया न्ह्यय्म्ह दु।

राप्रपा व स्वतन्त्र छम्ह छम्ह सांसदपिनिगु समर्थन काय्फत धाःसा शाह नेतृत्वया सरकारं बहुमत खाकेफइगु खनेदु। नागरिक उन्मुक्ति पार्टीया समर्थन दुगुलि स्वतन्त्र सांसद डा. ताराप्रसाद जोशी सरकारय् वनेत तयार जुगु दु सा, राप्रपा धाःसा निर्णय याउगु मदुनि।

निर्वाचन आयोगं रेशम चौधरीयात अयोग्य ठहर याये धुका नागरिक उन्मुक्ति पार्टी (नाउपा) या न्हापागु बैठक थौै सोमवाः च्वनिइगु जुगु दु।

चौधरी नेतृत्वया न्हुगु कार्यसमितियात निर्वाचन आयोगं वैधता मबिइवं पुलागु हे समितियात निरन्तरता बिइवं अध्यक्ष रञ्जिता श्रेष्ठं हे बैठक सःतुगु खः। पार्टीया वरिष्ठ उपाध्यक्ष दामोदर पण्डितया कथं बैठक न्हिनय् १ बजे टीकापुरय् सःतुगु धका जानकारी बिःगु दु।

पडिण्तया कथं बैठकय् समसामयिक राजनीतिक विषय सहलह यायेगु एजेन्डा तयातःगु दु। उगु बैठकं संघीय सरकार व सुदूरपश्चिम प्रदेश सरकारया विषयतक मागु निर्णय याइ धका पण्डितं धाःगु दु।

राष्ट्रिय सभा अध्यक्षय् नारायण दाहाल व युवराज शर्मापिन्स उम्मेदवारी दर्ता याःगु दु।

सत्ता गठबन्धनया उम्मेदवार दाहालया प्रस्तावय् माओवादीया गोपी सार्की अछामी व समर्थनय् एमालेया देवेन्द्र दाहाल, एकीकृत समाजवादीया वेदुराम भुसाल व जसपाका मोहम्मद खालिदपि च्वनादीगु दु।

अथेहे कांग्रेस उम्मेदवार शर्माया प्रस्तावकय् कांग्रेसया आनन्दप्रसाद ढुंगाना व समर्थनय् कांग्रेसया किरणबाबु श्रेष्ठ व लोकतान्त्रिक पार्टी (लोसपा)या शेखरकुमार सिंहपि च्वनादीगु दु।

कन्ह्यः मंगलवाः च्वनिइगु राष्ट्रिय सभा बैठकय् निर्वाचन जुइगु दु। सत्ता गठबन्धनय् याउक बहुमत दुगुलि दाहाल त्याइगु खनेदु।

नेपाल साहित्य मन्दिरं निम्ह साहित्यकारपिन्त हने ज्याझ्वः याःगु दु। ख्वपय् छगु ज्याझ्वः दथुइ जरीमाया स्मृति पुरस्कार सिरपा ११४४ पाखे वरिष्ठ बाखं च्वमि सरस्वती तुलाधर व ल्याय्म्ह साहित्यकार कुमार शाखः स्मृति प्रोत्साहन सिरपा ल्याय्म्ह गजलकार अनीश शाक्ययात हंगु दु।

नेपाल भाषां बाखं च्वयेगु नाप नेपाल भाषां ब्बकां च्वम्ह तुलाधरयात झिद्धः नगद नाप जरीमाया स्मृति सिरपापाखे हःगु खः। अथेहे साहित्यकार नेपाल भाषां गजल, चिनाखँ, चिबाखं च्वमि अनीश शाक्ययात झिद्धः नगद नाप कुमार शाक्य स्मृति प्रोत्साहन सिरपा ज्याझ्वःया मूपाहा तिलक प्रकाश कायस्थं लःल्हानादीगु खः।

ज्याझ्वलय् साहित्यकारपि महेन्द्र गोपाल कर्माचार्य, कृष्णलाल प्रधान, योगेन्द्र प्रधान, प्रतिसरा सायमी, कृष्णलाल प्रधान, दीपचन्द्र साखपिन्स नेपाल भाषा साहित्यया संरक्षण यायेगु लागि सकसिया थःगु थासं ग्वहालि यायेमाः धका धयादीगु खः।

ज्याझ्वःया सभाध्यक्षता साहित्य मन्दिरया नायः त्रैलोक्यमान बनेपाली (अगिव बनेपाली) यानादीगु खःसा सुमा श्रेष्ठं ज्याझ्वः न्ह्याकादीगु खः।

राष्ट्रिय प्रजातन्त्र पार्टी (राप्रपा) या अध्यक्ष राजेन्द्र लिङ्देनं पार्टीया केन्द्रीय कार्यसम्पादन समितिया सदस्य ठाकुरमोहन श्रेष्ठयात आक्रमण जुगु आपराधिक घटना जुगु धका धाःगु दु।

आइतवाः पार्टी कार्यालयय् पार्टीया केन्द्रीय कार्यसम्पादन समिति बैठक न्ह्यानाच्वंगु इलय् ल्याय्म्ह तयेगु छगु पुचलं  श्रेष्ठयात ल्हाः वाःगु खः।

बैठकलिपा सञ्चारकःमित नाप खँ ल्हायेगु झ्वलय् अध्यक्ष लिङ्देनं पार्टी ज्याकूथि दुने पार्टीया पदाधिकारीयात आक्रमण जुगु आपराधिक घटना खः धका धागु दु।

पार्टीं दोषीयात कारबाही यायेमाःगु निर्णय याःगु दु धका धागु दु। शनिवाः निसे न्ह्यागू राप्रपा केन्द्रीय कार्यसम्पादन समितिया बैठक सोमवाः तक च्वनिइ धका जानकारी बिःगु दु।