यलय थौ राजोपाध्याय देव व्राम्हणतय् उपाकर्म गुथिपाखें न्ह्याका वयाच्वंगु नृसिंह जात्रा पिहा वइगु जूगु दु। दँय्दसं गुंलागा पञ्चमि कुन्हु पिदनीगु थुगु नृसिंह जात्रा थौं न्हिनसिया १२ बजेलिपा पूर्णचण्डीं पिहां वइगु जुगु दु।

उपाकर्मया गुथिया गुथियारपिंसं पाः फयाः न्ह्याकीगु थुगु जात्रा थुगुसी मदुम्ह नृपेन्द्रराज शर्माया पाः लाःगु दु । थुगुसी संचारकःमि राजीव राजोपाध्यायय् नृसिंह जुइत्यःगु दु। थुगु जात्राय् पाःलाःम्हेसिया जिलाजं नृसिंह जुइमाःगु परम्परा दु।

पूर्णचण्डीं सुरुजुइगु जात्रा गाःबहाः, प्यंगःथां, पिम्बहाः, बालिफः, नकबही, क्वालखु, झटापोल, क्वन्ति, क्वबहाः, स्वथ, मंगलबजाः, हःखा, लुँहिति, ओकुबहाः, थैना, चक्रबही, टंगः, तिछुँगल्ली, इखालखु, जेनबहाः, वला जुयाः पूर्णचण्डी हे थ्यंकाः क्वचायेकी ।

क्षत्रपाति निःशुल्क चिकित्सालययात छगु ज्याझ्वः दथुइ एम्बुलेन्स लःल्हाःगु दु। बागमती प्रदेशया सांसद लिसें पुलांम्ह प्रदेशमन्त्री बसन्त मानन्धरं थःगु विकास बजेट कथं थथे चिकित्सालययात एम्बुलेन्स लःल्हागु खः।

म्हिगः शुक्रवाः क्षत्रपाति निःशुल्क चिकित्सालयय् छगू ज्याझ्वःया दथुइ उगु एम्बुलेन्स सांसद मानन्धरं चिकित्सालयया अध्यक्ष डा. मनोजमान श्रेष्ठयात लःल्हानादीगु खः।

उगु ज्याझ्वलय् चिकित्सालयया व्यवस्थापन पुचः नाप थीथी व्यक्तित्वपिनिगु उपस्थितिइ दुगु खः।

एसइइ निसें एमए तगिमय् नेपालभाषा विषय कया ब्बपि मध्ये दकलय् अप्वो ल्याः हःपिन्त छगु ज्याझ्वः दथुइ मोतिलानि सिरपा लःल्हायेगु ज्या जुगु दु

नेसं ११४१ निसें ११४३ तकया खुम्ह ब्वनामिपिंत दसिपौ लःल्हायेगु ज्या जुगु खः। उगु ज्याझ्वलय् मूपाहाँ ये महानगरपालिकाया पूर्व मेयर विद्यासुन्दर शाक्य झायादीगु खः। थुगु दँय् एसइइ, बिए व एमएय् नेपालभाषाय् उत्कृष्ट जूपिं विद्याथपिंत दां सिरपाःसहित दसिपौ लःल्हाःगु खः।

ने.सं. ११४१ य् एसइइ जगतसुन्दर ब्वनेकुथिया पूर्णिमा तुलाधर, बिएय् सोमी डंगोल, एमएय् राकेशमान मास्के उत्कृष्ट जूगु खःसा ने.सं. ११४२ इ एसइइ आर्दश मावि थिमिया निकेश बसी श्रेष्ठ व एमएय् अनिल स्थापित उत्कृष्ट जूगु खः। अथेहे ने.संं ११४३ य् एसईइ जगतसुन्दर ब्वनेकुथिया रविना श्रेष्ठ उत्कृष्ट जूगु खः।

उत्कृष्ट जूपिं विद्यार्थीपिंत मूपाहाँ येँ महानगरपालिकाया पुलांम्ह मेयर विद्यासुन्दर शाक्य व विशेष पाहाँ नेपालभाषा केन्द्रीय विभागया प्रमुख सह प्रा. राजनलाल जोशीं दसिपौ, मोतिलानि सिरपाःया अध्यक्ष प्रा. प्रेमशान्ति तुलाधरं स्वां, सरोज तुलाधरं मतिनाया चिं व सिरपा दाता मोतिलानी ताम्राकारया तःधिकःम्ह म्ह्याय् सीता ताम्राकारं दां सिरपाः लःल्हानादीगु खः।

प्रा. तृुलाधरया सभापतित्वय् जूगु ज्याझ्वलय् मूपाहाँ लिसें पाहाँपिंसं मदुम्ह ताम्राकारया किपाय् स्वांमाः देछासें श्रद्धाञ्जली प्वंकादीगु खःसा सिरपा समितिया स्थापनाकालंनिसें दांभरि जुयाः ज्या यानादीम्ह मदुम्ह करुणामान शाक्यया लुमंति छगू मिनेट मौन धारण याःगु खः।दिव्या ताम्राकारं लसकुस यानादीगु ज्याझ्वलय् रमिता वज्राचार्यं सिरपाः दाता मोतिलानी ताम्राकारया म्हसीका न्ह्यब्वयादीगु खः।

अथेहे ताम्राकारया चीधिकःम्ह म्ह्याय् व सिरपाःया संरक्षक सरोज तुलाधरं सुभाय् देछायादीगु खः।

प्रधानमन्त्री केपी शर्मा ओली संयुक्त राष्ट्रसंघीय महासभाया निति अमेरिकाया न्यूयोर्कय् वनेगु तयारी जूगु दु। राष्ट्रसंघया महासभा सेप्टेम्बर १० निसे २८ (२५ भदानिसे १२ असोज) तक न्यूयोर्कय् जुइत्यःगु खः।

उकिया निति समिट अफ द फ्युचर २२–२३ सेप्टेम्बर (६–७ असोज) य् जुइगु क्वछिइ धुकुगु दु। प्रधानमन्त्री कार्यालय स्रोतया कथं समिट अफ द फ्युचरय् सम्बोधन यायेगु झ्वलय् प्रधानमन्त्रीे ओलीया न्यूयोर्क भ्रमणया तयारी जुयाच्वंगु दु।

‘गुवलय् वनिइगु? सू सू वनेगु धका गृहकार्य परराष्ट्र मन्त्रालयं यानाच्वंगु दु।’ ओलीं प्रधानमन्त्रीया कथं २०७५ असोजय् राष्ट्रसंघ महासभाय् सम्बोधन यानादीगु खः।

प्रधानमन्त्री केपी शर्मा ओलीयात चीन अन्तर्राष्ट्रिय विकास सहयोग निकायया उपाध्यक्ष याङ वेईकुनं थौ नापलागु दु।

प्रधानमन्त्री निवास बालुवाटारय् नापलायेगु झ्वलय् थौ हे उपप्रधानमन्त्री नाप अर्थमन्त्री विष्णुप्रसाद पौडेलनाप जूगु सहलह व सहमतिबारे प्रधानमन्त्री ओलीयात जानकारी बियादीगु खः।

अर्थ मन्त्रालय चिनियाँ पक्ष दथुइ येँया चक्रपथनिसे कलंकी, बसुन्धरा महाराजगञ्ज तकया ८.२ किलोमिटर सतक दयेकगु, हिल्सा–सिमिकोट सतक खण्डयात निगु लेनय् दयकेगु, मुस्ताङया कोरला नाकाय् आइसिपी व आइसिडी निर्माण व अरनिको राजमार्गयात मर्मत सुधार व चलः वइगु थाय् नियन्त्रण सम्बन्धी ज्याय् सम्भाव्यता अध्ययन याना सम्बन्धी प्यंगू बिस्क बिस्क ग्वहालि यायेगु पत्रय् ल्हाःचिं तयेगु ज्या जुगु खः।